شي جينپيڭ گرەتسيانىڭ جاڭادان تاعايىندالعان زۇڭتۇڭى تاسۋلاسقا قۇتتىقتاۋ تەلەگرامماسىن جولدادى

شينحۋا اگەنتتىگى، 3 - ايدىڭ 13 - كۇنى، بەيجيڭ. 3 - ايدىڭ 13 - كۇنى مەملەكەت ءتوراعاسى شي جينپيڭ كونستانتينوس تاسۋلاسقا تەلەگرامما جولداپ، ونىڭ گرەتسيا رەسپۋبليكاسىنىڭ زۇڭتۇڭى بولىپ تاعايىندالعاندىعىن قۇتتىقتادى.

شي جينپيڭ بىلاي دەپ اتاپ كورسەتتى: جۇڭگو مەن گرەتسيا ۇزاق تاريحقا جانە شۇعىلالى مادەنيەتكە يە، ەكى ەلدىڭ دوستىق قارىم - قاتىناسىنىڭ تاريحى ۇزاق، ۋاقىت وتكەن سايىن جاڭارىپ كەلەدى، ەكى ەل − ءبىرىن - ءبىرى بىلەتىن،ءوزارا ەتەنە، ءوزارا پايدا جەتكىزىپ، تەڭ يگىلىككە كەنەلەتىن جان - جاقتى ستراتەگيالىق سەرىكتەر. تاياۋ جىلداردان بەرى ەكى جاق پيراەۋس پورتى نىسانىن ۇزدىكسىز ىلگەرىلەتىپ، ”ءبىر بەلدەۋ، ءبىر جولدى“ بىرگە قۇرۋ سەلبەستىگىنىڭ جوعارى ساپالى دامۋىن ىلگەرىلەتىپ، جۇڭگو - گرەتسيا وركەنيەتتەن ءوزارا ۇلگى الۋ ورتالىعىن، افينا جۇڭگو كلاسسيكالىق وركەنيەتىن زەرتتەۋ ورنىن سەلبەسىپ قۇرىپ، ەكى بايىرعى وركەنيەتتىڭ جاراسىمدى كوركەمدىگىن جانە داۋىرلىك جاۋاپكەرشىلىك ارقالاۋىن ايگىلەدى.

شي جينپيڭ بىلاي دەپ باسا دارىپتەدى: بۇگىنگى دۇنيەدە 100 جىلدىق وزگەرىس جەدەل قۇبىلۋدا، ءار ەلدىڭ بەينەت پەن زەينەتتى بىرگە وتكەرىپ، تاعدىرلاس بولىپ، سەلبەسىپ تەڭ يگىلىككە كەنەلۋى − دۇنيە جۇزىلىك سىن - سايىسقا توتەپ بەرۋدە، ءسوزسىز، باسىپ وتەتىن جول. مەن جۇڭگو - گرەتسيا قارىم - قاتىناسىنىڭ دامۋىنا ايرىقشا ءمان بەرەمىن، زۇڭتۇڭ مىرزامەن بىرگە قۇلشىنىپ، ءداستۇرلى دوستىقتى ۇزبەي جالعاستىرىپ، ءوزارا ءتيىمدى سەلبەستىك جانە وركەنيەتتەر اۋىس - كۇيىسى سىندى ەكى ۇلكەن دانەكەردى شيراتا ءتۇسىپ، جۇڭگو مەن گرەتسيانىڭ جان - جاقتى ستراتەگيالىق سەرىكتەستىك قارىم - قاتىناسىنىڭ مازمۇنىن ۇزدىكسىز بايىتىپ، جۇڭگو - ەۆروپا قارىم - قاتىناسىنىڭ باياندى، اقاۋسىز دامۋىن جەبەپ، دۇنيە ءجۇزىنىڭ بەيبىتشىلىگىنە، ورنىقتىلىعىنا جانە دامۋىنا، گۇلدەنۋىنە اقىل - پاراساتىم مەن كۇش - قۋاتىمدى ارناۋدى قالايمىن.

كەلۋ قاينارى: حالىق تورابى