شي جينپيڭ رەسەيدىڭ زۇڭتۇڭى پۋتينمەن شاي ىشە وتىرىپ اڭگىمەلەستى

سول جەر ۋاقىتى 5 - ايدىڭ 8 - كۇنى تۇستەن كەيىن رەسەيدىڭ زۇڭتۇڭى پۋتين جۇڭگونىڭ مەملەكەت ءتوراعاسى شي جينپيڭمەن ماسكەۋدەگى كرەمل سارايىنىڭ زۇڭتۇڭ كەڭسەسىندە شاي ىشە وتىرىپ اڭگىمەلەستى. سۋرەتتى شينحۋا اگەنتتىگىنىڭ ءتىلشىسى شيە حۋانچى تۇسىرگەن

«حالىق گازەتى»، 5 - ايدىڭ 8 - كۇنى، ماسكەۋ (تىلشىلەر لي جيانگۋاڭ، ياڭ چياۋچۋ). سول جەر ۋاقىتى 5 - ايدىڭ 8 - كۇنى تۇستەن كەيىن رەسەيدىڭ زۇڭتۇڭى پۋتين جۇڭگونىڭ مەملەكەت ءتوراعاسى شي جينپيڭمەن كرەمل سارايىنداعى زۇڭتۇڭ كەڭسەسىندە شاي ىشە وتىرىپ اڭگىمەلەستى.

شي جينپيڭ بىلاي دەپ اتاپ كورسەتتى: دۇنيە ءجۇزى جاڭا اۋمالى ـ توكپەلى وزگەرىس كەزەڭىنە ءوتتى. جۇڭگو مەن رەسەي ستراتەگيالىق تۇراقتىلىقتى ساقتاپ، ستراتەگيالىق سەلبەستىككە تاباندى بولسا بولعانى، ەكى ەلدىڭ وزدەرىنىڭ دامۋىن، گۇلدەنۋىن جۇزەگە اسىرۋىنا، جۇڭگو مەن رەسەيدىڭ ۇرپاقتان ـ ۇرپاققا جالعاسقان دوستىعىنىڭ حالىق تىلەگىنە، دۇنيە ءجۇزىنىڭ كوپ ۇيەكتەنۋى مەن ەكونوميكانىڭ جاھاندانۋىنىڭ ءداۋىر اعىمىنا ەشقانداي كۇش بوگەت بولا المايدى. مەن پۋتين زۇڭتۇڭمەن تىعىز بايلانىستى ساقتاپ، جۇڭگو - رەسەي قارىم - قاتىناسىنا باعدار بەلگىلەپ، جول باستاپ، دۇنيە جۇزىلىك جونگە سالۋدى ىلگەرىلەتۋگە بەلسەندى ۇلەس قوسۋدى قالايمىن.

پۋتين مىنالاردى ءبىلدىردى: رەسەي مەن جۇڭگو باستان ـ اياق تار جول، تايعاق كەشۋلەردەن بىرگە ءوتىپ، ءبىرىن ـ ءبىرى قولداپ كەلەدى، ەكى ەلدىڭ دوستىعى بەرىك. مەن ءتوراعا شي جينپيڭمەن تىعىز ستراتەگيالىق قارىم ـ قاتىناستى ساقتاپ، ەكى ەل قارىم ـ قاتىناسىنىڭ دامۋىنا ستراتەگيالىق جەتەكشىلىك ەتىپ، حالىقارالىق كۇردەلى جاعدايعا، سىن ـ سايىسقا بىرگە توتەپ بەرىپ، جان ـ جاقتى ستراتەگيالىق سەلبەستىكتى تەرەڭدەتىپ، ەكى ەلدىڭ ورتاق مۇددەسىن قورعاپ، دۇنيە ءجۇزىنىڭ ادىلدىك، دەموكراتيا، كوپ ۇيەكتەنۋ بەتالىسىنا قاراي دامۋىن ىلگەرىلەتۋدى قالايمىن.

ەكى ەل مەملەكەت باسشىلارى ۋكراينا داعدارىسى سياقتى ماسەلەلەر جونىندە پىكىر اۋىستىردى. شي جينپيڭ بىلاي دەپ اتاپ كورسەتتى: ۋكراينا داعدارىسى جونىندە جۇڭگو ورتاق، جالپىلىق، سەلبەستىك، باياندى بولۋ سىندى دۇنيە جۇزىلىك حاۋىپسىزدىك كوزقاراسىن دارىپتەپ جانە وعان تاباندى بولىپ، ءار ەلدىڭ حاۋىپسىزدىك جاعىنداعى كوڭىل ءبولىپ وتىرعان ۇيلەسىمدى ماسەلەلەرىنە ءمان بەرىپ، داعدارىستىڭ تۋىلۋ قاينارىن جويۋ كەرەك دەپ قارادى. جۇڭگو بەيبىتشىلىككە ءتيىمدى بارلىق قۇلشىنىستى قارسى الادى، پىكىرلەسۋ ارقىلى ءادىل، باياندى، تەجەۋ كۇشىنە يە ءارى ىسكە قاتىستى جاقتار قابىلدايتىن بەيبىتشىلىك كەلىسىمىنە كەلۋدى ءۇمىت ەتەدى.

پۋتين جۇڭگونىڭ ۋكراينا داعدارىسى ماسەلەسىن ساياسي جولمەن شەشۋدەگى وبيەكتيۆ، ءادىل تۇرعىسىن ايرىقشا القاپ، رەسەيدىڭ العى شارت قويماي بەيبىتشىلىك كەلىسسوزىن باستاۋدى قالايتىندىعىن، ءادىل، باياندى بەيبىتشىلىك كەلىسىمىنە كەلۋدى ءۇمىت ەتەتىندىگىن ءبىلدىردى.

كەلۋ قاينارى: حالىق تورابى