مەملەكەتتىك حالىق قۇرىلتايى تۇراقتى كوميتەتى ازىق – تۇلىك حاۋىپسىزدىگى زاڭىنىڭ اتقارىلۋى جونىندە تەكسەرۋ جۇرگىزۋدى باستادى 

حالىق گازەتىنىڭ ءتىلشىسى ني گى 5 – ايدىڭ 9 – كۇنى بەيجيڭنەن حابارلايدى. ازىق – تۇلىك حاۋىپسىزدىگى زاڭىنىڭ دۇرىس ءارى ءونىمدى اتقارىلۋىن ىلگەرىلەتۋ، ازىق – تۇلىك حاۋىپسىزدىگىن باقىلاۋ – باسقارۋدى كۇشەيتۋدى ىلگەرىلەتۋ، ازىق – تۇلىك حاۋىپسىزدىگى قىزمەتىن اناعۇرلىم ويداعىداي ورىنداۋ ءۇشىن، مەملەكەتتىك حالىق قۇرىلتايى تۇراقتى كوميتەتى 5 – ايدىڭ 9 – كۇنى ازىق – تۇلىك حاۋىپسىزدىگى زاڭىنىڭ اتقارىلۋى جونىندە تەكسەرۋ جۇرگىزۋدى باستاعان.

ازىق – تۇلىك حاۋىپسىزدىگى زاڭى 2009 – جىلى جاريالانعان ءارى 2015 – جىلى جان – جاقتى وزگەرىس ەنگىزىلىپ بەكىتىلگەن. مەملەكەتتىك حالىق قۇرىلتايى تۇراقتى كوميتەتى 2009 -، 2011 – جىلدارى جانە 2016 - جىلى ازىق – تۇلىك حاۋىپسىزدىگى زاڭىنىڭ اتقارىلۋى جونىندە تەكسەرۋ ورىستەتكەن.

ءتىلشىنىڭ 5 – ايدىڭ 9 – كۇنى مەملەكەتتىك حالىق قۇرىلتايى تۇراقتى كوميتەتىنىڭ ازىق – تۇلىك حاۋىپسىزدىگى زاڭىنىڭ اتقارىلۋى جونىندە تەكسەرۋ جۇرگىزۋ گرۋپپاسىنىڭ ءبىرىنشى رەتكى جالپى ماجىلىسىنەن ۇعىسۋىنشا، زاڭدى اتقارۋدا ساقتالىپ وتىرعان ماسەلەلەردى جان – جاقتى تەكسەرۋ ءۇشىن، زاڭنىڭ اتقارىلۋى جونىندە وسى رەتكى تەكسەرۋ جۇرگىزۋ قىزمەتى بارىسىندا جەرگىلىكتى ورىندارعا بارىپ تەكسەرۋ جۇرگىزۋ مەن ولكە دارەجەلى حالىق قۇرىلتايى تۇراقتى كوميتەتتەرىنە اماناتتاۋ ارقىلى تەكسەرۋ ءوزارا ۇشتاستىرىلعان ءتاسىل قولدانىلادى، تەكسەرۋ گرۋپپالارى حيلۇڭجياڭ، شاڭحاي، جياڭشي، حىنان، گۋاڭشي، گانسۋ قاتارلى ولكەلەرگە (اۆتونوميالى رايون، توتە قاراستى قالا) بارىپ، سول جەردە تەكسەرۋ جۇرگىزەدى ءارى تيانجين، لياۋنيڭ، انحۇي، حۋبەي، گۇيجوۋ، چيڭحاي قاتارلى ولكەلەردەگى (توتە قاراستى قالا) حالىق قۇرىلتايى تۇراقتى كوميتەتتەرىنە ءوز باسقارۋىنداعى اكىمشىلىك اۋماقتا ازىق – تۇلىك حاۋىپسىزدىگى زاڭىنىڭ اتقارىلۋ جاعدايىنا تەكسەرۋ جۇرگىزۋدى اماناتتايدى. سول جەرگە بارىپ تەكسەرۋ جۇرگىزۋ قىزمەتى جەرگىلىكتى ورىنداعى ۇكىمەت پەن قاتىستى تاراۋلاردىڭ مالىمەتىن تىڭداۋ، اڭگىمە ءماجىلىسىن اشۋ، سول جەردە تەكسەرۋ جۇرگىزۋ، تۇتقيىل ۇلگى الىپ تەكسەرۋ جۇرگىزۋ قاتارلى كوپتەگەن تاسىلدەردى ۇشتاستىرۋ ارقىلى ورىستەتىلىپ، زاڭنىڭ اتقارىلۋىنىڭ ناقتى جاعدايىن تولىق ۇعىسىپ، زاڭنىڭ اتقارىلۋىندا ساقتالىپ وتىرعان باستى ماسەلەلەردى ءدال تاۋىپ انىقتايدى.

تەكسەرۋ گرۋپپاسى 8 ءتۇرلى جاقتان ءتۇيىندى تۇردە تەكسەرۋ جۇرگىزەدى: ۇكىمەتتىڭ ازىق – تۇلىك حاۋىپسىزدىگىن باسقاراتىن تاراۋلارىنىڭ، قاتىستى ورىنداردىڭ قىزمەتتىك جاۋاپكەرشىلىگىن تياناقتاندىرۋ جاعدايى؛ ازىق – تۇلىك حاۋىپسىزدىگىنە ساياتىن حاۋىپ – قاتەرلەردى باقىلاۋ – تەكسەرۋ جانە باعا بەرۋ جۇيەسى قۇرىلىسىنىڭ جاعدايى؛ ازىق – تۇلىك حاۋىپسىزدىگى ولشەمىن بەلگىلەۋ جۇيەسى قۇرىلىسىنىڭ جاعدايى؛ ازىق – تۇلىك وندىرۋشىلەر مەن تيجارات ەتۋشىلەردىڭ جاۋاپكەرشىلىگىن تياناقتاندىرۋ جاعدايى؛ مەكتەپ قاتارلىلاردىڭ ازىق – تۇلىك حاۋىپسىزدىگىن باقىلاۋ – باسقارۋ جاعدايى؛ ازىق – تۇلىكتى يمپورت – ەكسپورت ەتۋدى باقىلاۋ – باسقارۋ جاعدايى؛ ينتەرنەت تەكشەلەرىنىڭ ازىق – تۇلىك حاۋىپسىزدىگىن باقىلاۋ – باسقارۋ جاعدايى؛ زاڭدىق جاۋاپكەرشىلىكتى تياناقتاندىرۋ جاعدايى، سونداي – اق، زاڭعا وزگەرىس ەنگىزۋ جونىندەگى ۇسىنىستار.

كەلۋ قاينارى: حالىق تورابى