چۇڭچيڭدە ”3 ساياحاتشى كاۋاپ جەۋگە 780 يۋان جۇمساعان“ ءىس جونىندە تەكسەرۋ جۇرگىزۋ جاعدايى: دۇكەن ەسەپ جابۋ تالونىن وزگەرتىپ، تۇتىنۋشىلاردى الداعان 

شينحۋا اگەنتتىگىنىڭ ءتىلشىسى لي شياۋتيڭ 6 – ايدىڭ 8 – كۇنى چۇڭچيڭنەن حابارلايدى. چۇڭچيڭ قالاسى جياڭبەي رايوندىق مادەنيەت جانە ساياحاتتى دامىتۋ كوميتەتى 6 – ايدىڭ 8 – كۇنى ”ساياحاتشىلار اڭىس ەتكەن كاۋاپ جايماسىنىڭ اقى الۋى ۇيلەسىمسىز بولۋ“ ءىسى تۋرالى تەكسەرۋ جۇرگىزۋ جاعدايى جونىندە حابارلاندىرۋ شىعارعان، حابارلاندىرۋعا قاراعاندا، دۇكەننىڭ ەسەپ جاپقان كەزدە قويعان باعاسى سول ماڭداعى بازارداعى ورتاشا باعادان %50 جوعارى بولعان ءارى تۇتىنۋشىلاردى الداعان.

جۋىردا ساياحاتشىلار چۇڭچيڭ قالاسى يىڭبين جولىنداعى ءمالىم كاۋاپ جايماسىندا ۇيلەسىمسىز اقى الۋ ىسىنە جولىققانىن، 3 ادامنىڭ كاۋاپ جەۋگە 780 يۋان جۇمساعانىن، ”باعاسى قالىپسىز ىسكە “ جولىققانىن اڭىس ەتكەن. چۇڭچيڭ قالاسى جياڭبەي رايونىنداعى قاتىستى تاراۋلار بۇعان ايرىقشا ءمان بەرىپ، بىرلەسكەن قىزمەت گرۋپپاسىن ۇيىمداستىرىپ، تەكسەرۋ جۇرگىزگەن ءارى ءبىر جاقتى ەتكەن.

تەكسەرۋ جاعدايى تۋرالى حابارلاندىرۋعا قاراعاندا، چۇڭچيڭ قالاسى جياڭبەي رايوندىق بازاردى باقىلاۋ – باسقارۋ مەكەمەسى تۇتىنۋشىلار بەرگەن تۇتىنۋ تالونىن سول ماڭداعى كاۋاپ دۇكەندەرىنىڭ ۇقساس تۇردەگى تاعامدارىنىڭ مولشەرىمەن، باعاسىمەن ءبىر – بىردەن سالىستىرۋ ارقىلى وسى ىسكە قاتىستى دۇكەننىڭ ەسەپ جاساعان كەزدەگى قويعان باعاسى سول ماڭداعى بازارداعى ورتاشا باعادان %50 اينالاسىندا جوعارى بولعانىن ءارى ەسەپ جابۋ تالونىن وزگەرتۋ ارقىلى تۇتىنۋشىلاردى الداعانىن انىقتاعان.

چۇڭچيڭ قالاسى جياڭبەي رايوندىق قوعام حاۋىپسىزدىگى مەكەمەسى سول جەرگە بارىپ جاعداي ۇعىسۋ، باقىلاۋ كامەراسىنداعى كەسكىندەردى تەكسەرۋ، ەكى جاقتان سول جەردە بولعان ادامداردان جانە ءوز كوزدەرىمەن كورگەن كۋاگەرلەردەن سۇراستىرۋ ارقىلى پىشاقپەن قۇقاي كورسەتىپ اقشا تولەۋگە زورلاۋ جاعدايىنىڭ تۋىلماعانىن راستاعان.

قازىر چۇڭچيڭ قالاسى جياڭبەي رايوندىق بازاردى باقىلاۋ – باسقارۋ مەكەمەسى تۇتىنۋشىلاردىڭ ۇقىق – مۇددەسىن قورعاۋ زاڭىنىڭ 56 – تارماعىنداعى بەلگىلەمەلەرگە ساي، بۇل دۇكەندى تيجاراتىن توقتاتۋعا، زاڭسىز تاپقان تابىسىنىڭ ون ەسەسىندەي اقشالاي ايىپ تولەۋگە بۇيىرعان. سونىمەن بىرگە، اتالعان دۇكەندى بۇل ىسكە قاتىستى تۇتىنۋشىلاردىڭ جۇمساعان اقشاسىن تۇگەل قايتارىپ بەرۋگە ءارى كەشىرىم سۇراۋعا بۇيىرعان.

كەلۋ قاينارى: حالىق تورابى