دۇنيە جۇزىلىك دەنساۋلىق ساقتاۋ ۇيىمى مايمىل شەشەگى ىندەتىنىڭ ءالى دە ”حالىقارا كوڭىل ءبولىپ وتىرعان توساتتان تۋىلعان الەۋمەتتىك دەنساۋلىق وقيعاسى“ سانالاتىنىن ايتقان 

جەرگىلىكتى ۋاقىت بويىنشا 6 – ايدىڭ 9 – كۇنى دۇنيە جۇزىلىك دەنساۋلىق ساقتاۋ ۇيىمىنىڭ ايتۋىنشا، مايمىل شەشەگى ىندەتى ءالى دە ”حالىقارا كوڭىل ءبولىپ وتىرعان توساتتان تۋىلعان الەۋمەتتىك دەنساۋلىق وقيعاسى“ سانالادى.

2022 – جىلى 5 – ايدان بەرى، دۇنيە ءجۇزى بويىنشا 100 دەن استام مەملەكەت پەن رايوندا مايمىل شەشەگى ىندەتىنە شالدىققان ناۋقاستار جونىندە مالىمەت بەرىلگەن. دۇنيە جۇزىلىك دەنساۋلىق ساقتاۋ ۇيىمى سول جىلى 7 – ايدا مايمىل شەشەگىن ”حالىقارا كوڭىل ءبولىپ وتىرعان توساتتان تۋىلعان الەۋمەتتىك دەنساۋلىق وقيعاسى“ دەپ جاريالاعان، 2023 – جىلى 5 – ايعا كەلگەندە عانا بۇل جاعدايدى كۇشىنەن قالدىرعان. 2024 – جىلى 8 – ايدىڭ 14 – كۇنى دۇنيە جۇزىلىك دەنساۋلىق ساقتاۋ ۇيىمى مايمىل شەشەگىن ”حالىقارا كوڭىل ءبولىپ وتىرعان توساتتان تۋىلعان الەۋمەتتىك دەنساۋلىق وقيعاسى“ دەپ قايتالاي جاريالاعان. دۇنيە جۇزىلىك دەنساۋلىق ساقتاۋ ۇيىمى سول كۇنى جاريالاعان مازمۇنداماعا قاراعاندا، مايمىل شەشەگىنىڭ بۇرىنعىدان دا حاۋىپتى جاڭا ۆيرۋسى قازىر كونگودا (كينشاسا) جەدەل تارالۋدا ءارى كونگونىڭ توڭىرەگىندەگى بۇرىن مايمىل شەشەگى ىندەتىنە شالدىققاندار تۋرالى مالىمەت بەرىلمەگەن برۋندي، كەنيا، رۋاندا جانە ۋگاندا قاتارلى ەلدەرگە قاراي تارالعان.

مۇنان سىرت، دۇنيە جۇزىلىك دەنساۋلىق ساقتاۋ ۇيىمىنىڭ ساناعىنا قاراعاندا، 2024 – جىلى 1 – ايدان بەرى، دۇنيە ءجۇزى بويىنشا 25 مەملەكەتتە مايمىل شەشەگى ىندەتىنە شالدىققانى تۇراقتاندىرىلعان ناۋقاستار تۋرالى مالىمەت بەرىلگەن. مۇنىڭ ىشىندە، كونگودا (كينشاسا) ىندەت جاعدايى ەڭ اۋىر، دياگنوزى تۇراقتاندىرىلعان ناۋقاستار سانىنىڭ سالىستىرماسى %60 كە جەتكەن، قازا بولعان ادامداردىڭ سالىستىرماسى %40 كە جەتكەن؛ ۋگاندا، برۋندي جانە سەررا – لەون ەلدەرى ونان كەيىنگى ورىندا بولعان. كونگودا (كينشاسا) قازىر ءالى دە اپتاسىنا 2000 – 3000 ادامنىڭ كۇماندى اۋرۋعا شالدىققانى جونىندە مالىمەت بەرىلۋدە، بۇل ىندەتتىڭ ءالى دە ءونىمدى تىزگىندەلمەگەنىن كورسەتەدى.

وسىنىڭ الدىندا دۇنيە جۇزىلىك دەنساۋلىق ساقتاۋ ۇيىمىنىڭ ءتوراعاسى تەدروستىڭ حالىقارالىق دەنساۋلىق ساقتاۋ ەرەجەسى شۇعىل جاعدايلار كوميتەتىنىڭ ماجىلىسىندە ايتۋىنشا، 2024 – جىلدىڭ باسىنان بەرى، مايمىل شەشەگى ىندەتىنىڭ كوپتەگەن ەلدەردەگى تارالۋ كولەمى ۇزدىكسىز كەڭەيگەن، دۇنيە ءجۇزى بويىنشا 37 مىڭنان استام ادامنىڭ ناۋقاسقا شالدىققانى تۇراقتاندىرىلعان ءارى 125 ادام قازا بولعان. ول حالىقارالىق قوعامدى جالعاستى بارىنشا ساق بولۋعا، ىندەتتى باقىلاۋ – تەكسەرۋدى، ۆاكسينا ەگۋدى كۇشەيتۋگە، قوسىلىمدى ارتتىرۋعا، وسى ارقىلى ىندەتتىڭ مەڭگەرۋسىز كەتۋىنەن ونان ارى ساقتانۋعا ۇندەگەن.

كەلۋ قاينارى: حالىق تورابى