لي چياڭ ازيا نەگىزدىك قۇرىلعىلاردى قارجىلاندىرۋ بانكەسىنىڭ 10 - كەزەكتى القالار كەڭەسى جىلدىق ءماجىلىسىنىڭ اشىلۋ سالتىنا قاتىناستى ءارى ارناۋ ءسوز سويلەدى

«حالىق گازەتى»، 6 - ايدىڭ 26 - كۇنى، بەيجيڭ (تىلشىلەر ۋاڭ دي، گى مىڭچاۋ). مەملەكەتتىك كەڭەستىڭ زۇڭليى لي چياڭ 6 - ايدىڭ 26 - كۇنى تۇستەن بۇرىن بەيجيڭدە ازيا نەگىزدىك قۇرىلعىلاردى قارجىلاندىرۋ بانكەسىنىڭ 10 - كەزەكتى القالار كەڭەسى جىلدىق ءماجىلىسىنىڭ اشىلۋ سالتىنا قاتىناستى ءارى ارناۋ ءسوز سويلەدى.

لي چياڭ مىنالاردى ءبىلدىردى: ءتوراعا شي جينپيڭ ازيا نەگىزدىك قۇرىلعىلاردى قارجىلاندىرۋ بانكەسى قۇرىلعان العاشقى مەزگىلدە ازيا نەگىزدىك قۇرىلعىلاردى قارجىلاندىرۋ بانكەسىن كاسىپتىك، جوعارى ءونىمدى، پاك جاڭاشا كوپ جاقتى اشۋ بانكەسىنە اينالدىرۋدى العا قويدى. 10 جىلدان بەرى بارلىق مۇشەنىڭ بىرگە قولداۋى مەن قۇلشىنۋىندا، ازيا نەگىزدىك قۇرىلعىلاردى قارجىلاندىرۋ بانكەسى اۋەلگى ماقساتتان جازباي، جاڭالىق اشا العا ىلگەرىلەپ، مۇشەلەر 57 دەن 110 عا كەڭەيىپ، ىستەر ۇزدىكسىز دامىپ، زورايىپ، كاسىپتىك ناقتى تاماشا وبراز ورناتىپ، مۇشەلەردىڭ بىرگە دامۋىنا جاڭا قوزعاۋشى كۇش قوسىپ، دۇنيە جۇزىلىك فينانستى جونگە سالۋعا جاڭا ۇلگى اشىپ، حالىقارالىق كوپ جاقتى سەلبەستىككە جاڭا ۇلگى ورناتتى.

لي چياڭ ازيا نەگىزدىك قۇرىلعىلاردى قارجىلاندىرۋ بانكەسىنىڭ بولاشاقتاعى دامۋىنا ءۇش جاقتان ءۇمىت ارتتى. ءبىرىنشى، دۇنيە ءجۇزى ەكونوميكاسىنىڭ ارتۋى قيىن بولۋ الدىندا مۇشەلەردىڭ دامۋ قابىلەتىن جوعارىلاتۋىن اناعۇرلىم زور تەبىنمەن قولداۋ كەرەك. مۇشەلەردىڭ تۇرلىشە دامۋ قاجەتىنە ساي، جوعارى ساپالى، وزىندىك قۇنى تومەن قارجى قۇراۋ جاعىنان قولداۋ كورسەتىپ، مۇشەلەردىڭ تەحنيكالىق تاجىريبەلەردەن ورتاق يگىلىكتەنۋىنە كومەكتەسىپ، دامۋدىڭ ىشكى قوزعاۋشى كۇشىن ارتتىرۋ كەرەك. ەكىنشى، ەكونوميكا - ساۋدا جاعدايىن قايتا سومداۋ الدىندا حالىقارالىق پىكىرلەسۋدى، اۋىس - كۇيىستى، سەلبەستىكتى اناعۇرلىم كەڭ كولەمدە كۇشەيتۋ كەرەك. اشىق وڭىرشىلدىككە تاباندى بولىپ، ازيا، ءتىپتى، دۇنيە جۇزىندەگى ەلدەر اراسىنداعى بايلانىس پەن تىلدەسۋدى ىلگەرىلەتىپ، ”ءبىر بەلدەۋ، ءبىر جولدى“ بىرگە قۇرۋ باستاماسى، دۇنيە جۇزىلىك دامۋ باستاماسى سياقتىلارمەن ۇشتاستىرۋدى كۇشەيتۋ كەرەك. ءۇشىنشى، دۇنيە جۇزىلىك جونگە سالۋ سايىسى الدىندا وزىندىك جاڭاشا كوپ جاقتى تەكشەنىڭ يقۋاتىن اناعۇرلىم ويداعىداي ساۋلەلەندىرۋ كەرەك. بىرگە اقىلداسۋ، بىرگە قۇرۋ، بىرگە يگىلىكتەنۋ پرينسيبىن باستان - اياق امالياتتا ايگىلەپ، حالىقارالىق سيپاتقا، ارناعا تۇسىرىلۋگە جانە جوعارى ولشەمدى بولۋعا تاباندى بولىپ، ىشكى جونگە سالۋ قۇرىلىمىن ۇزدىكسىز ساپالىلاندىرىپ، كوپ جاقتى شەشىم جاساۋ ەرەجەسىن كۇشەيتىپ، ءونىم مەن قىزمەت وتەۋدە جاڭالىق اشىپ، اناعۇرلىم ءادىل، ۇيلەسىمدى دۇنيە جۇزىلىك جونگە سالۋ جۇيەسىن ورناتۋدى ىلگەرىلەتىپ، بارلىق مۇشەنىڭ ات سالىسۋ دارەجەسى مەن تابىس سەزىمىن ۇزدىكسىز جوعارىلاتۋ كەرەك.

لي چياڭ بىلاي دەپ اتاپ كورسەتتى: بيىل جۇڭگو ەكونوميكاسى سىرتقى سوققىعا ءدوپ كەلۋ جاعدايىندا جاقسارۋ جاعدايىن جالعاستىرادى. بولاشاقتاعى جۇڭگو ەكونوميكاسى ءالى دە دۇنيە ءجۇزى ەكونوميكاسىنىڭ قۇتتى مەكەنى بولادى. جۇڭگونىڭ ءىرى بازارى كولەمىن كەڭەيتىپ، ساپاسىن جوعارىلاتىپ، وراسان زور پايدا جەتكىزىپ، ءار ەلگە اناعۇرلىم كوپ ساۋدا، قارجى قوسۋ ورايىن جاراتادى. ”جۇڭگو جاساۋى“ ”جۇڭگو جاراتۋىنا“ قاراي جەدەل بۇرىلىس جاساپ، ساۋدا ەكولوگياسى جەدەل جاڭالانىپ، شىت جاڭا ارتۋ ءورىسىن ۇزدىكسىز اشاتىن بولادى. جۇڭگو جوعارى دەڭگەيدە سىرتقا ەسىك اشۋدى تاباندىلىقپەن كەڭەيتىپ، دۇنيە ءجۇزى ەكونوميكاسىمەن ۇزدىكسىز ىشكەرىلەي توعىسىپ، ءار ەلدىڭ دامۋىنا جاڭا وراي اكەلەدى. جۇڭگو جاق ءار جاقپەن بىرگە ازيا نەگىزدىك قۇرىلعىلاردى قارجىلاندىرۋ بانكەسىنىڭ جاڭا شۇعىلالى 10 جىلدى اشۋىن قول ۇستاسا قولداپ، مۇشەلەردىڭ باياندى دامۋىن جەبەۋگە، ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋگە تىڭ دا اناعۇرلىم زور ۇلەس قوسۋدى قالايدى.

ۋ جىڭلۇڭ اشىلۋ سالتىنا قاتىناستى.

بۇل رەتكى جىلدىق ءماجىلىستىڭ تاقىرىبى ”ءوزارا بايلانىس ارقىلى دامۋعا دەم بەرۋ، سەلبەستىك ارقىلى بىرگە گۇلدەنىپ - كوركەيۋ“ بولدى، مۇنى قازىنا مينيسترلىگى، بەيجيڭ قالالىق حالىق ۇكىمەتى، ازيا نەگىزدىك قۇرىلعىلاردى قارجىلاندىرۋ بانكەسى بىرگە وتكىزدى. ازيا نەگىزدىك قۇرىلعىلاردى قارجىلاندىرۋ بانكەسىنىڭ باستىعى جين ليچۇن مەن ءارقايسى مۇشەنىڭ القالارى، دۇنيە جۇزىندەگى نەگىزگى كوپ جاقتى، ەكى جاقتى اشۋ قۇرىلىمدارىنىڭ جاۋاپتىلارى، ماڭىزدى فينانس قۇرىلىمدارى مەن جەكەلەر باسقارۋىنداعى تاراۋلاردىڭ جاۋاپتىلارى، بەي ۇكىمەتتىك ۇيىمداردىڭ ۋاكىلدەرى قاتارلىلار بولىپ شامامەن 2500 ادام اشىلۋ سالتىنا قاتىناستى.

كەلۋ قاينارى: حالىق تورابى