ديڭ شۋەشياڭ ەۆروپا وداعى كوميتەتى ءتوراعاسىنىڭ اتقارۋشى ورىنباسارى ريبەلامەن 6 - رەتكى جۇڭگو - ەۆروپا قورشاعان ورتا جانە كليمات جونىندەگى جوعارى جىكتەگىلەردىڭ كەڭەسىن وتكىزدى

شينحۋا اگەنتتىگى، 7 - ايدىڭ 14 - كۇنى، بەيجيڭ. جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى مۇشەسى، مەملەكەتتىك كەڭەس زۇڭليىنىڭ ورىنباسارى ديڭ شۋەشياڭ 7 - ايدىڭ 14 - كۇنى تۇستەن كەيىن بەيجيڭدە ەۆروپا وداعى كوميتەتى ءتوراعاسىنىڭ اتقارۋشى ورىنباسارى ريبەلامەن 6 - رەتكى جۇڭگو - ەۆروپا قورشاعان ورتا جانە كليمات جونىندەگى جوعارى جىكتەگىلەردىڭ كەڭەسىن وتكىزدى.

ديڭ شۋەشياڭ مىنالاردى ءبىلدىردى: بيىل 5 - ايدا ءتوراعا شي جينپيڭ ەۆروپا وداعىنىڭ باسشىلارىمەن جۇڭگو مەن ەۆروپانىڭ ديپلوماتيالىق قارىم - قاتىناس ورناتقاندىعىنىڭ 50 جىلدىعىنا بايلانىستى ءوزارا قۇتتىقتاۋ تەلەگرامماسىن جولداپ، جۇڭگو - ەۆروپا سەلبەستىگىن تەرەڭدەتۋگە ايقىن باعدار كورسەتتى. ءبىز ەكى جاق باسشىلارىنىڭ ستراتەگيالىق جەتەكشىلىگىندە، قورشاعان ورتا مەن كليمات جاعىنداعى ناقتى سەلبەستىكتى كۇشەيتىپ، جۇڭگو مەن ەۆروپانىڭ جانە دۇنيە ءجۇزىنىڭ باياندى دامۋىنا اناعۇرلىم زور ۇلەس قوسۋىمىز كەرەك.

ديڭ شۋەشياڭ بىلاي دەپ اتاپ كورسەتتى: جۇڭگو ەكولوگيالىق ورتانى قورعاۋ جانە كليمات وزگەرىسىنە توتەپ بەرۋ قىزمەتىنە ايرىقشا ءمان بەرىپ، ءبىر قىدىرۋ ناقتى شارالاردى بەلگىلەپ جانە اتقارىپ، ەكونوميكالىق، قوعامدىق دامۋدىڭ جاپپاي جاسىل تيپكە بۇرىلىس جاساۋىندا ونىمدىلىككە قول جەتكىزدى. حالىقارالىق جاعداي قالاي وزگەرسە دە، جۇڭگو جاسىل، تومەن كومىرتەكتى دامۋدى باتىل ىلگەرىلەتىپ، پارمەندى شارالار قولدانىپ، دۇنيە جۇزىلىك قورشاعان ورتانى، كليماتتى جونگە سالۋعا ات سالىسادى. جۇڭگو ەۆروپامەن بىرگە جوعارى جىكتەگىلەردىڭ پىكىرلەسۋىنە، اۋىس - كۇيىس جاساۋىنا تاباندى بولىپ، اناعۇرلىم كوپ ورتاق تانىم قالىپتاستىرىپ، جاسىل سەرىكتەستىك قاتىناستى تەرەڭدەتۋدى قالايدى. ءوزارا تيىمدىلىك جەتكىزىپ، تەڭ يگىلىككە كەنەلۋگە تاباندى بولىپ، ەنەرگيا، اينالمالى ەكونوميكا سياقتى ءتۇيىندى سالالارداعى سەلبەستىكتىڭ تەرەڭدىگىن، كەڭدىگىن ۇزدىكسىز كەڭەيتىپ، باسقا وركەندەپ كەلە جاتقان ەلدەردىڭ جاسىل، تومەن كومىرتەكتى دامۋىن بىرگە قولداۋ كەرەك. ءوزارا سايكەسۋگە تاباندى بولىپ، باسشىلىق قۋاتىن ونان ارى ايگىلەپ، ءادىل، ۇيلەسىمدى، سەلبەسىپ تەڭ يگىلىككە كەنەلەتىن دۇنيە جۇزىلىك قورشاعان ورتانى، كليماتتى جونگە سالۋ جۇيەسىن ورناتۋدى ىلگەرىلەتۋ كەرەك.

ريبەلا مىنالاردى ءبىلدىردى: ەۆروپا وداعى ەۆروپا مەن جۇڭگونىڭ ديپلوماتيالىق قارىم - قاتىناس ورناتقاندىعىنىڭ 50 جىلدىعىن وراي ەتىپ، جۇڭگومەن قازىرگى سەلبەستىكتى اناعۇرلىم بەكەمدەپ، اناعۇرلىم كوپ سەلبەستىكتىڭ جاڭا ورايىن قۇلشىنا قاراستىرىپ، كوپ جاقتىلىققا تاباندى بولىپ، پاريج كەلىسىمىنىڭ ءونىمدى اتقارىلۋىن ىلگەرىلەتىپ، دۇنيە جۇزىنە قورشاعان ورتا مەن كليمات سايىسىنا بىرگە توتەپ بەرۋدىڭ بەلسەندى سيگنالىن جەتكىزۋدى قالايدى.

كەڭەستە ەكى جاقتىڭ قاتىستى تاراۋلارى كليمات سايىسىنا بىرگە توتەپ بەرۋ، ەكولوگيالىق ورتانى قورعاۋ سياقتى كەڭەستىك تاقىرىپتاردى ارقاۋ ەتىپ، 5 - رەتكى جوعارى جىكتەگىلەردىڭ تىلدەسۋىنەن بەرگى سەلبەستىك جەتىستىكتەرىن قورىتىندىلاپ، كەلەسى قادامداعى سەلبەستىكتى تەرەڭدەتۋ جونىندە پىكىر اۋىستىردى.

كەلۋ قاينارى: حالىق تورابى