جالعاستى قاتتى ىستىق بولادى! الداعى بىرنەشە كۇندە شينجياڭنىڭ بۇل جەرلەرىندە 37 سەلتسي گرادۋستان جوعارى ىستىق اۋا رايى جالعاسادى

7 ـ ايدىڭ 17 ـ كۇنى، شينجياڭنىڭ كوپ جەرى جوعارى تەمپەراتۋرادان ساقتانۋدىڭ ساقتىق سيگنالىن جاريالادى، الداعى بىرنەشە كۇندە وسى جەرلەردىڭ ءىشىنارا وڭىرلەرىنىڭ ەڭ جوعارى تەمپەراتۋراسى 37 سەلتسي گرادۋستان اسادى، ءىشىنارا جەرلەردىڭ تەمپەراتۋراسى 39 سەلتسي گرادۋستان اسادى.

جۇڭگو اۋا رايى تورابىنىڭ حابارىنا قاراعاندا، بۇراتالا موڭعۇل اۆتونوميالى وبلىستىق اۋا رايى ستانسياسى ساعات 16 دان 23 مينۋت وتكەندە جوعارى تەمپەراتۋرادان ساقتانۋدىڭ قىزعىلت سارى ءتۇستى ساقتىق سيگنالىن جاريالاعان، مەجەمەن بۇگىننەن باستاپ 7 – ايدىڭ 20 – كۇنىنە دەيىن بۇراتالانىڭ شىعىسىنداعى اۋىل ـ قالاشىق، الاڭداردا، جىڭ اۋدانىندا، الاتاۋ ساعاسىندا ەڭ جوعارى تەمپەراتۋرا 37 سەلتسي گرادۋستان اسادى، ءىشىنارا رايونداردا 40 سەلتسي گرادۋسقا جەتەدى؛

اقسۋ ايماقتىق اۋا رايى ستانسياسى ساعات 16 دان 11 مينۋت وتكەندە جوعارى تەمپەراتۋرادان ساقتانۋدىڭ سارى ءتۇستى ساقتىق سيگنالىن جوعارى تەمپەراتۋرادان ساقتانۋدىڭ قىزعىلت سارى ءتۇستى ساقتىق سيگنالىنا كوتەردى، مەجەمەن 7 – ايدىڭ 18 – كۇنىنەن 20 – كۇنىنە دەيىن اقسۋ ايماعىنىڭ اقسۋ قالاسى، ارال قالاسى، ونسۋ اۋدانى، كۇشار قالاسى، شايار اۋدانى، توقسۋ اۋدانى، اۋات اۋدانى، كەلپىن اۋدانىنىڭ ەڭ جوعارى تەمپەراتۋراسى 37 سەلتسي گرادۋستان اسادى؛

قاشقار ايماقتىق اۋا رايى ستانسياسى ساعات 15 تەن 32 مينۋت وتكەندە جوعارى تەمپەراتۋرادان ساقتانۋدىڭ سارى ءتۇستى ساقتىق سيگنالىن جاريالادى، مەجەمەن 7 ـ ايدىڭ 17 ـ كۇنى تۇستەن كەيىننەن 7 ـ ايدىڭ 21 ـ كۇنى كۇندىزگە دەيىن قاشقار جازىعىنىڭ باسىم كوپ بولەگىندە 35 سەلتسي گرادۋستان اساتىن جوعارى تەمپەراتۋرالى اۋا رايى جارىققا شىعادى، مۇنىڭ ىشىندە ءپايزاۋات، يوپۇرعا، مارالباسى، ماكىت جانە قۇمدى ءشولدىڭ جيەگىندەگى وڭىرلەردىڭ ەڭ جوعارى تەمپەراتۋراسى 37 سەلتسي گرادۋستان اسادى؛

ىلە قازاق اۆتونوميالى وبلىستىق اۋا رايى ستانسياسى ساعات 13 تەن 12 مينۋت وتكەندە جوعارى تەمپەراتۋرادان ساقتانۋدىڭ سارى ءتۇستى ساقتىق سيگنالىن جاريالادى، مەجەمەن 7 – ايدىڭ 18 – كۇنىنەن 26 – كۇنىنە دەيىن ىلە اڭعارىنداعى جازىق وڭىرلەردىڭ باسىم كوپ بولەگىندە 35 سەلتسي گرادۋستان اساتىن جوعارى تەمپەراتۋرا جارىققا شىعادى، مۇنىڭ ىشىندە 18 – كۇنىنەن 19 – كۇنىنە دەيىن جانە 24 – كۇنىنەن 26 – كۇنىنە دەيىن قورعاس اۋدانى، شاپشال اۋدانى، قورعاس قالاسى، قۇلجا قالاسى قاتارلى جەرلەردىڭ ءىشىنارا وڭىرلەرىندە تەمپەراتۋرا 37 سەلتسي گرادۋستان اسادى، ءىشىنارا جەرلەردە 39 سەلتسي گرادۋستان اسادى؛

قارامايلى قالالىق اۋا رايى ستانسياسى ساعات 12 دەن 45 مينۋت وتكەندە جوعارى تەمپەراتۋرادان ساقتانۋدىڭ قىزعىلت سارى ءتۇستى ساقتىق سيگنالىن جاريالادى، مەجەمەن 7 – ايدىڭ 17 – كۇنىنەن 20 – كۇنىنە دەيىن قارامايلى رايونى، بايجيانتان رايونى، ورقى رايونىنىڭ باسىم كوپ ساندى وڭىرلەرىنىڭ كۇندىك ەڭ جوعارى تەمپەراتۋراسى 37 سەلتسي گرادۋستان اسادى؛

تارباعاتاي ايماقتىق اۋا رايى ستانسياسى ساعات 12 دەن 7 مينۋت وتكەندە جوعارى تەمپەراتۋادان ساقتانۋدىڭ سارى ءتۇستى ساقتىق سيگنالىن جوعارى تەمپەراتۋرادان ساقتانۋدىڭ قىزعىلت سارى ءتۇستى ساقتىق سيگنالىنا كوتەردى، مەجەمەن 7 – ايدىڭ 17 – كۇنىنەن 19 – كۇنىنەن دەيىن تارباعاتاي ايماعىنىڭ شاۋەشەك قالاسى، ءدوربىلجىن اۋدانى، شاعانتوعاي اۋدانى، تولى اۋدانى، شيحۋ قالاسى، ساۋان قالاسىنىڭ باسىم كوپ بولەگى، قوبىقسارى اۋدانىنىڭ وڭتۇستىك بولەگىندەگى اۋىل، الاڭ، قالاشىقتار جانە بيڭتۋان 9 - ديۆيزياسىنىڭ 162 - پولكى، 163 - پولكى، 164 - پولكى، 170 - پولكى، 168 - پولكىنىڭ وڭتۇستىك بولەگى، ىنتىماق ەگىس الاڭى قاتارلى جەرلەردە تەمپەراتۋرا 37 سەلتسي گرادۋستان اسادى، ءىشنارا اۋىل، الاڭ، قالاشىقتاردىڭ ەڭ جوعارى تەمپەراتۋراسى 39 سەلتسي گرادۋستان جوعارى بولادى، كەيبىر جەرلەردە تەمپەراتۋرا 40 سەلتسي گرادۋستان اسادى.

اۋا رايى تاراۋلارى مىنانى ەسكەرتتى: تاياۋدا شينجياڭنىڭ جازىق رايوندارىنىڭ باسىم كوپ جەرىندە تەمپەراتۋرا جوعارى بولادى، تاۋلى وڭىرلەردىڭ ءىشىنارا جەرلەرىندە قار ەرۋدەن بولاتىن تاسقىن اپاتىنان ساقتانۋدى كۇشەيتۋ كەرەك، اۋا رايىنىڭ اسەرىنەن ءورت تۋىلۋ حاۋىپى ءبىرشاما جوعارى بولادى، ىستىقتان ساقتانىپ، تەمپەراتۋرانى تومەندەتۋگە جانە وتتان حاۋىپسىز پايدالانۋعا كوڭىل ءبولۋ كەرەك.

7 ـ ايدىڭ 14 ـ كۇنىنەن باستاپ، شينجياڭنىڭ باسىم كوپ جەرىندە ىلگەرىندى ـ كەيىندى بيىلعى جاز باسىنان بەرگى ەڭ ىستىق اۋا رايى جارىققا شىعادى، اۋا رايى تاراۋلارىنىڭ مەجەلەۋىنشە، وسى رەتكى اۋا رايى بارىسىنداعى ەڭ قاتتى ىستىق بولاتىن مەزگىل 7 ـ ايدىڭ 19 ـ كۇنىنەن 20 ـ كۇنىنە دەيىن بولادى.

كەلۋ قاينارى: حالىق تورابى