ساياسي كەڭەس مەملەكەتتىك 14 - كەزەكتى كوميتەتىنىڭ بۇرىنعى تۇراقتى مۇشەسى، مادەنيەت، ادەبيەت، تاريح جانە ۇيرەنۋ كوميتەتىنىڭ بۇرىنعى مەڭگەرۋشىسى ۋ يىڭجيەنىڭ پارا الۋ دەلوسىنا ءبىرىنشى سوتتا ۇكىم جاريالاندى

شينحۋا اگەنتتىگىنىڭ 7 – ايدىڭ 16 – كۇنى بەيجيڭنەن بەرگەن حابارى. 7 – ايدىڭ 16 – كۇنى، بەيجيڭ قالالىق 3 ـ ورتا دارەجەلى حالىق سوت مەكەمەسى ساياسي كەڭەس مەملەكەتتىك 14 - كەزەكتى كوميتەتىنىڭ بۇرىنعى تۇراقتى مۇشەسى، مادەنيەت، ادەبيەت، تاريح جانە ۇيرەنۋ كوميتەتىنىڭ بۇرىنعى مەڭگەرۋشىسى ۋ يىڭجيەنىڭ پارا الۋ دەلوسىنا اشىق ۇكىم شىعارىپ، پارا الۋ قىلمىسى بويىنشا ايىپكەر ۋ يىڭجيەنى ءولىم جازاسىنا ۇكىم ەتىپ، 2 جىل كەشىكتىرىپ اتقارۋ، ساياسي ۇقىعىنان ومىرلىك ماحۇرىم ەتۋ، وعان قوسا جەكەلىك بارلىق مال ـ مۇلكىن ءمۇسادىرالاۋ جونىندە ۇكىم شىعاردى؛ دەلوعا ساياتىن ۋ يىڭجيەنىڭ پاراعا العان مال - مۇلكى مەن ونىڭ ءوسىمى زاڭ بويىنشا مەملەكەت قازىناسىنا تاپسىرىلادى، جەتپەگەن بولەگى جالعاستى قۋزاپ قايتارىپ الىنادى.

تەكسەرۋ ارقىلى مىنانى انىقتادى: 2006 – جىلى 6 – ايدان 2021 – جىلى 2 – ايعا دەيىن ايىپكەر ۋ يىڭجيە شيزاڭ اۆتونوميالى رايوندىق پارتكومنىڭ تۇراقتى مۇشەسى، ۇگىت ءبولىمىنىڭ باستىعى، ۇكىمەتتىڭ ورىنباسار ءتوراعاسى، اۆتونوميالى رايوندىق پارتكومنىڭ تۇراقتى مۇشەسى، ۇكىمەتتىڭ ۇنەمىلىك ىستەرگە جاۋاپتى ورىنباسار ءتوراعاسى، اۆتونوميالى رايوندىق پارتكومنىڭ ورىنباسار شۋجيى، پارتكوم شۋجيى قاتارلى قىزمەت قولايلىلىعىنان پايدالانىپ، قاتىستى ورىندار مەن جەكەلەردىڭ قۇرىلىستى كوتەرمەگە الۋ جانە كاسىپورىن تيجاراتى قاتارلى ىستەرىنە كومەكتەسىپ، باسقالاردىڭ مال - مۇلكىن زاڭسىز قابىلداعان، جالپى حالىق اقشاسىنا سىندىرعاندا 343 ميلليون يۋاننان اسقان.

بەيجيڭ قالالىق 3 - ورتا دارەجەلى حالىق سوت مەكەمەسى ايىپكەر ۋ يىڭجيەنىڭ ارەكەتى پارا الۋ قىلمىسىنا جاتادى، ونى زاڭ بويىنشا جازالاۋ كەرەك دەپ قارادى. ۋ يىڭجيەنىڭ پاراعا العان سوماسى ەرەكشە كوپ، قىلمىس سالماعى ەرەكشە اۋىر، قوعامدىق ىقپالى ەرەكشە ناشار، مەملەكەت پەن حالىقتىڭ مۇددەسىن ەرەكشە اۋىر زيانعا ۇشىراتتى، قىلمىس رەتىندە ءولىم جازاسىنا ۇكىم ەتۋ كەرەك. ۋ يىڭجيە باسقالاردىڭ زاڭعا قايشى قىلمىس كۇمانىن اشكەرەلەگەندىكتەن ءارى تەكسەرۋ ارقىلى شىندىققا جاناسىمدى، ەلەۋلى ەڭبەك كورسەتۋ بەينەسى بولعاندىقتان، پارا الۋ قىلمىسىندا جۇزەگە اسپاعان جاعداي بار بولعاندىقتان، ونىڭ ۇستىنە دەلوعا الىنعاننان كەيىن قىلمىسىن قاز - قالپىندا مويىنداپ، باقىلاۋ - تەكسەرۋ ورگانى ءالى يگەرە قويماعان پارا الۋ فاكتتەرىنىڭ كوبىن ىرىقتىلىقپەن تاپسىرىپ قىلمىسىن تانىپ، وكىنگەندىكتەن ءارى زاڭسىز ولجانى بەلسەنە قايتارعاندىقتان، زاڭسىز ولجانىڭ كوپ ءبولىمى قايتارىلىپ الىنعاندىقتان، زاڭدا بەلگىلەنگەن، جاعدايعا قاراي كەڭشىلىكپەن جازالاناتىن جاعداي بار، وعان ءولىم جازاسى بەرىلىپ دەرەۋ اتقارماۋعا بولادى. سوت جوعارىداعى ۇكىمدى شىعاردى.

كەلۋ قاينارى: حالىق تورابى