ورنىقتى اقشا قاتارلى جەلەۋلەرمەن زاڭسىز قارجى توپتاۋشىلاردان ساق بولۋ قاجەت

ورتالىق تەلەۆيزيا تورابىنىڭ حابارى: 7 – ايدىڭ 15 – كۇنى، حىنان ولكەلىك پارتكوم فينانس كوميتەتىنىڭ كەڭسەسى ورنىقتى اقشا قاتارلى جەلەۋلەرمەن زاڭسىز قارجى توپتاۋ سىندى حاۋىپ – قاتەردەن ساقتانۋ جونىندە ەسكەرتۋ جاريالاعان.

جۋىردان بەرى، ورنىقتى اقشانى ۋاكىل ەتكەن سيفرلىق اقشالار جۇرت نازارىن اۋداردى. باقىلاۋعا قاراعاندا، ءىشىنارا زاڭسىز قۇرىلىمدار ”فينانس سالاسىندا جاڭالىق اشۋ“، ”سيفرلىق مال – مۇلىك“ دەگەن جەلەۋلەرمەن قوعامداعى جۇرتشىلىقتىڭ ورنىقتى اقشا قاتارلىلارعا بولعان تانىمىنىڭ جەتەرسىزدىگىنەن پايدالانىپ، ”ۆيرتۋالدى اقشا“، ”ۆيرتۋالدى مال – مۇلىك“، ”سيفرلىق مال – مۇلىك“دەگەندەردى تاراتۋ قاتارلى تاسىلدەرمەن اقشا توپتاپ، قوعامداعى جۇرتشىلىقتى قاتىناسۋعا، ايىرباس جاساۋعا، دابىرالاۋعا ەلىكتىرىپ، ەكونوميكا مەن فينانس ءتارتىبىن ءبۇلدىرىپ، زاڭسىز قارجى توپتاۋ، قۇمار ويناۋ، الدامكوستىك ىستەۋ، جالعامالى ساتۋ، اقشا جىلىستاتۋ قاتارلى زاڭعا قايشى قىلمىستاردى ءوربىتىپ، قوعامداعى جۇرتشىلىقتىڭ مال – مۇلكىنىڭ حاۋىپسىزدىگىن اۋىر دارەجەدە زيانداعان.

حىنان ولكەلىك زاڭسىز فينانس قيمىلدارىنان ساقتانۋ جانە وعان سوققى بەرۋ قىزمەتى مەحانيزمىنىڭ كەڭسەسى مىنانى ەسكەرتەدى: وسى تەكتەس زاڭسىز قۇرىلىمدار مەملەكەتتىڭ فينانستى باسقارۋ قۇرىلىمدارىنىڭ زاڭدى رۇقساتىن الماعان نەمەسە مەملەكەتتىڭ فينانستى باسقارۋ جاعىنداعى بەلگىلەمەلەرىنە قايشىلىق جاساعان، جۇرتشىلىقتان اشىق تۇردە قارجى توپتاۋ تولىمدىعىنا يە ەمەس. ورنىقتى اقشا قارجى قوسۋ مەن ورايدان پايدالانۋدىڭ قۇرالى ەمەس. «زاڭسىز قارجى توپتاۋدان ساقتانۋ جانە ونى ءبىر جاقتى ەتۋ ەرەجەسىندەگى» بەلگىلەمەگە ساي، مەملەكەت ءارقانداي فورماداعى زاڭسىز قارجى توپتاۋ قيمىلىنا تيىم سالادى، زاڭسىز قارجى توپتاۋ قيمىلىنا قاتىناسۋ سەبەپتى زيانعا ۇشىراعان جاعدايدا، قارجى توپتاۋعا قاتىناسقان ادام ءوزى جاۋاپكەرشىلىك ارقالايدى. جۇرتشىلىقتىڭ بايسالدىلىقپەن قارجى قوسۋ تانىمىن ارتتىرىپ، وتىرىكتى شىنداي سوعىپ ۋادە بەرگەندەرگە كوزسىزدىكپەن سەنە كەتپەۋىن، اقشا جانە قارجى قوسۋ جونىندە دۇرىس تانىم ورناتىپ، حاۋىپ – قاتەردەن ساقتانۋ تانىمىن شىنايى جوعارىلاتىپ، الدانىپ قالۋدان ساقتانۋىن ءۇمىت ەتەمىز.

ەگەر قاتىستى قۇرىلىمداردىڭ ورنىقتى اقشاعا قارجى قوسۋ دەگەن اتپەن زاڭسىز قارجى توپتاۋ قيمىلىن ورىستەتىپ جۇرگەنىن بايقاساڭىز، جەر – جەردەگى زاڭسىز قارجى توپتاۋدان ساقتانۋعا جەتەكشىلىك ەتۋ تاراۋلارىنا نەمەسە قوعام حاۋىپسىزدىگى ورگاندارىنا مالىمدەۋىڭىزگە بولادى. قاتىستى تاراۋلار ءسىز اشكەرەلەگەن دەرەكتەرگە ساي تەكسەرىپ، زاڭ بويىنشا سوققى بەرىپ، ءبىر جاقتى ەتەدى ءارى بەلگىلەمە بويىنشا دەرەكتەردى اشكەرەلەۋشىلەرگە سيلىق بەرەدى.

كەلۋ قاينارى: حالىق تورابى