شي جينپيڭ رەسەي مەملەكەتتىك دۋماسىنىڭ ءتوراعاسى ۆولوكينمەن كەزدەستى

8 - ايدىڭ 26 - كۇنى تۇستەن بۇرىن مەملەكەت ءتوراعاسى شي جينپيڭ بەيجيڭدەگى حالىق سارايىندا رەسەي مەملەكەتتىك دۋماسىنىڭ ءتوراعاسى ۆولوكينمەن كەزدەستى.

سۋرەتتى شينحۋا اگەنتتىگىنىڭ ءتىلشىسى شىن حۇڭ تۇسىرگەن

«حالىق گازەتى»، 8 - ايدىڭ 26 - كۇنى، بەيجيڭ (ءتىلشى حۋ زىشي). 8 - ايدىڭ 26 - كۇنى تۇستەن بۇرىن مەملەكەت ءتوراعاسى شي جينپيڭ حالىق سارايىندا رەسەي مەملەكەتتىك دۋماسىنىڭ ءتوراعاسى ۆولوكينمەن كەزدەستى.

شي جينپيڭ بىلاي دەپ اتاپ كورسەتتى: جۇڭگو - رەسەي قارىم - قاتىناسى − اۋمالى - توكپەلى، قۇبىلمالى قازىرگى دۇنيە جۇزىندەگى ەڭ ورنىقتى، ەڭ تولىسقان، ەڭ باي ستراتەگيالىق مانگە يە ءىرى ەلدەر قارىم - قاتىناسى. جۇڭگو - رەسەي قارىم - قاتىناسىنىڭ جوعارى دەڭگەيدە دامۋىن تاباندىلىقپەن ىلگەرىلەتۋ ەكى ەل حالقىنىڭ ءتۇبىرلى مۇددەسىنە ۇيلەسەدى ءارى دۇنيە ءجۇزى بەيبىتشىلىگىنىڭ ورنىقتىلىق قاينارى. بيىل 5 - ايدا مەن رەسەيدە مەملەكەتتىك ساپاردا بولدىم ءارى سوۆەت وداعىنىڭ ۇلى وتان سوعىسى جەڭىسكە جەتكەندىگىنىڭ 80 جىلدىعىن قۇتتىقتاۋ سالتىنا قاتىناستىم، كەلەسى اپتادا جۇڭگو جۇڭگو حالقىنىڭ جاپون شاپقىنشىلارىنا قارسى سوعىسى مەن دۇنيە ءجۇزىنىڭ فاشيزمگە قارسى سوعىسى جەڭىسكە جەتكەندىگىنىڭ 80 جىلدىعىن ەسكە ءتۇسىرۋ قيمىلىن سالتاناتپەن وتكىزەدى. جۇڭگو مەن سوۆەت وداعى دۇنيە جۇزىلىك ەكىنشى سوعىستىڭ ازيا مەن ەۆروپاداعى نەگىزگى سوعىس مايدانى رەتىندە جاپونيا ميليتاريزمى مەن گەرمانيا فاشيستەرىنىڭ شاپقىنشىلىعىنا قارسى تۇرۋ جولىندا وراسان زور ۇلتتىق قۇرباندىق بەرىپ، دۇنيە جۇزىلىك ەكىنشى سوعىستىڭ جەڭىسىنە قول جەتكىزۋ جولىندا كەلەلى ۇلەس قوستى. ەكى جاق ءداستۇرلى دوستىقتى جالعاستىرىپ، ستراتەگيالىق ءوزارا سەنىمدىلىكتى تەرەڭدەتىپ، ءار سالاداعى اۋىس - كۇيىستى، سەلبەستىكتى كۇشەيتىپ، ەكى ەلدىڭ حاۋىپسىزدىگى مەن دامۋ مۇددەسىن قول ۇستاسا قورعاپ، دۇنيە جۇزىندەگى وڭتۇستىك ەلدەردى ىنتىماقتاستىرىپ، ناعىز كوپ جاقتىلىققا تاباندى بولىپ، حالىقارالىق ءتارتىپتىڭ اناعۇرلىم ءادىل، ۇيلەسىمدى باعىتقا قاراي دامۋىن ىلگەرىلەتۋى كەرەك.

شي جينپيڭ بىلاي دەپ باسا دارىپتەدى: زاڭ شىعارۋ قۇرىلىمدارىنىڭ سەلبەستىگى − جۇڭگو مەن رەسەيدىڭ جاڭا داۋىردەگى جالپى بەتتىك ستراتەگيالىق سەلبەستىك سەرىكتەستىك قارىم - قاتىناسىنىڭ كەم بولسا بولمايتىن قۇرامداس بولىگى. ەكى جاقتىڭ مەملەكەتتى باسقارۋ، اكىمشىلىكتى جونگە سالۋ جانە زاڭ شىعارۋ تاجىريبەلەرىن اۋىستىرۋدى بەلسەنە ورىستەتىپ، جاڭا جاعدايدا جۇڭگو مەن رەسەيدىڭ ستراتەگيالىق سەلبەستىگى مەن ءار سالاداعى سەلبەستىگىن اناعۇرلىم بەرىك زاڭ شىعارۋ كەپىلدىگىمەن قامداۋىن ءۇمىت ەتەمىن.

ۆولوكين پۋتين زۇڭتۇڭنىڭ ءتوراعا شي جينپيڭگە جولداعان ىقىلاستى سالەمى مەن ىزگى تىلەگىن جەتكىزدى. ۆولوكين بىلاي دەدى: ەكى ەل مەملەكەت باسشىلارىنىڭ ستراتەگيالىق جەتەكشىلىگىندە، رەسەي - جۇڭگو قارىم - قاتىناسى ىشكەرىلەي دامىپ، كورنەكتى ونىمدىلىككە قول جەتكىزدى. رەسەي مەملەكەتتىك دۋماسى ەكى ەل مەملەكەت باسشىلارىنىڭ ماڭىزدى ورتاق تانىمىن تياناقتاندىرۋعا كۇش سالىپ، رەسەي مەن جۇڭگونىڭ زاڭ شىعارۋ قۇرىلىمدارىنىڭ اۋىس - كۇيىسىن، سەلبەستىگىن كۇشەيتىپ، ەكى ەل قارىم - قاتىناسىنىڭ اناعۇرلىم كوپ تابىسقا قول جەتكىزۋىن بار كۇشپەن ىلگەرىلەتتى. 80 جىلدىڭ الدىندا سوۆەت وداعى مەن جۇڭگو حالقى فاشيستەردى جەڭۋگە كەلەلى ۇلەس قوستى. رەسەي جاق جۇڭگو جاقپەن بىرگە وڭاي - وسپاق قولعا كەلمەگەن وسى جەڭىستى قۇتتىقتاپ، قۇربانداردى ساعىنا ەسكە الىپ، كوركەم بولاشاقتى قول ۇستاسا اشۋدى قالايدى.

ۋاڭ ي، پىڭ چيڭحۋا كەزدەسۋدە بىرگە بولدى.

كەلۋ قاينارى: حالىق تورابى