شي جينپيڭ قازاقستان زۇڭتۇڭىمەن، بيرمانىڭ ۋاقىتشا زۇڭتۇڭىمەن، ەگيپەت زۇڭليىمەن، كامبودجانىڭ باس ۋازىرىمەن، نەپال زۇڭليىمەن، بىرلەسكەن مەملەكەتتەر ۇيىمىنىڭ باس حاتشىسىمەن جەكە ـ جەكە كەزدەستى

شينحۋا اگەنتتىگىنىڭ 8 ـ ايدىڭ 30 ـ كۇنى تيانجيننەن بەرگەن حابارى (تىلشىلەر ۋىن شين، حۋاڭ جياڭلين). 8 ـ ايدىڭ 30 ـ كۇنى كەشتە مەملەكەت ءتوراعاسى شي جينپيڭ تيانجين يىڭبين سارايىندا 2025 ـ جىلعى شاڭحاي سەلبەستىك ۇيىمى باسشىلار ماجىلىسىنە جانە جۇڭگو حالقىنىڭ جاپون شاپقىنشىلارىنا قارسى سوعىسى مەن دۇنيە جۇزىلىك فاشيزمگە قارسى سوعىس جەڭىسىنىڭ 80 جىلدىعىن ەسكە ءتۇسىرۋ قيمىلىنا قاتىناسۋ ءۇشىن جۇڭگوعا كەلگەن قازاقستان زۇڭتۇڭى توقايەۆپەن كەزدەستى.

شي جينپيڭ بىلاي دەپ اتاپ كورسەتتى: جۇڭگو - قازاقستان ەكى ەل ءبىر ـ ءبىرىنىڭ سەنىم ارتۋعا جانە قاستەرلەۋگە بولاتىن ستراتەگيالىق سەرىگى. مەيلى حالىقارالىق جاعداي قالاي وزگەرسە دە، ەكى جاق تاتۋ كورشى، دوس بولۋ ۇلكەن باعىتىنان اۋىتقىماۋعا باستان ـ اياق تاباندى بولىپ، ەسىك اشىپ تەڭ يگىلىككە كەنەلۋ ۇلكەن پرينسيبىنەن اۋىتقىماۋعا تاباندى بولىپ، تاعدىرلاس ورتاق تۇلعانى بىرگە قۇرۋ ۇلكەن بەتالىسىنان اۋىتقىماۋعا تاباندى بولىپ، ءبىر ـ ءبىرىنىڭ وزەكتى مۇددەسىنە جانە ءجىتى قاداعالاپ وتىرعان كەلەلى ىستەرىنە ساياتىن ماسەلەلەردە ءبىر ـ ءبىرىن باتىل قولداپ، جان ـ جاقتىلى سەلبەستىكتى بەكەمدەپ جانە كەڭەيتىپ، جۇڭگو - قازاقستان قارىم ـ قاتىناسىنىڭ ۇزدىكسىز تىڭ ساتىعا كوتەرىلۋىن ىلگەرىلەتۋى كەرەك.

شي جينپيڭ بىلاي دەپ باسا دارىپتەدى: ەكى جاق دامۋ ستراتەگيالارىن ءتۇيىلىستىرۋدى كۇشەيتىپ، اناعۇرلىم كوپ مۇددەنىڭ توعىسۋ ءتۇيىنى مەن سەلبەستىكتىڭ ارتۋ ءتۇيىنىن اشۋى؛ ەنەرگيا سەلبەستىگىنىڭ نەگىزىن بەكەمدەپ، ۇلاستىرۋ ـ تۇتاستىرۋ سەلبەستىگىن تەرەڭدەتىپ، نەگىزدىك قۇرىلعىلاردىڭ ”قاتتى ۇلاسۋىن“ ىلگەرىلەتىپ، ساياسات مەحانيزمىنىڭ ”جۇمساق ۇلاسۋىن“ كۇشەيتۋى؛ جۇرت تىلەگىن توعىستىرۋدى ۇزدىكسىز جەبەپ، ”جۇڭگو - قازاقستان مادەنيەت اۋىس ـ كۇيىس جىلىن“ ويداعىداي وتكىزۋى؛ كوپ جاقتى ىستەستىكتى تەرەڭدەتىپ، شاڭحاي سەلبەستىك ۇيىمىن ناقتىلاندىرىپ، كۇشەيتىپ، بىرلەسكەن مەملەكەتتەر ۇيىمىن وزەك ەتكەن حالىقارالىق جۇيەنى بىرگە قورعاپ، حالىقارالىق ءتارتىپتىڭ اناعۇرلىم ءادىل، ۇيلەسىمدى بەتالىسقا قاراي دامۋىن ىلگەرىلەتۋى كەرەك.

توقايەۆ مىنالاردى ءبىلدىردى: جۇڭگونىڭ شاڭحاي سەلبەستىك ۇيىمىنىڭ كەزەكتى ءتوراعا ەلى بولۋ قىزمەتى ايرىقشا تابىستى بولدى، قازاقستان جاق ءتۇرلى كەڭەستىك تارتىپكە بەلسەندى قاتىناستى، جۇڭگو جاقپەن تىعىز سايكەسىپ، وتكىزىلۋ الدىندا تۇرعان شاڭحاي سەلبەستىك ۇيىمى باسشىلار ءماجىلىسىنىڭ تولىق تابىستى وتكىزىلۋىنە شىنايى كەپىلدىك ەتۋدى قالايدى. جۇڭگو حالقىنىڭ جاپون شاپقىنشىلارىنا قارسى سوعىسى جەڭىسىنىڭ 80 جىلدىعىن قۇتتىقتايمىن، جۇڭگو حالقى دۇنيە جۇزىلىك فاشيزمگە قارسى سوعىس جەڭىسى ءۇشىن كەلەلى تاريحي ۇلەس قوسىپ، كەرەمەت باتىرلىعىن جانە وتانشىلدىق ىنتاسىن ايگىلەدى. قازاقستان - جۇڭگو قارىم ـ قاتىناسى بۇرىن ـ سوڭدى بولماعان جوعارى دەڭگەيدە تۇر، بىلتىر ەكى ەلدىڭ ساۋدا سوماسى تاريحتاعى ەڭ جوعارى دەڭگەيدى جاراتتى، ءىرى نىسان سەلبەستىگى ءساتتى ىلگەرىلەدى. قازاقستان جاق جۇڭگو جاقپەن ناقتى ىستەر سەلبەستىگىن ۇزدىكسىز تەرەڭدەتىپ، گۋمانيتارلىق اۋىس ـ كۇيىستى كۇشەيتىپ، ەكى ەل قارىم ـ قاتىناسىنىڭ جاڭا دەڭگەيگە جەتۋىن ىلگەرىلەتۋدى قالايدى.

كەزدەسۋ كەزىندە ەكى ەلدىڭ مەملەكەت باسشىسى ەكى ەلدىڭ دامۋ ستراتەگيالارىن ءتۇيىلىستىرۋ، ەنەرگيا، عىلىم ـ تەحنولوگيا، تۇرعىن ءۇي، وقۋ ـ اعارتۋ، دەنە تاربيە، جابايى حايۋاناتتاردى قورعاۋ سياقتى 20دان استام ەكى جاقتى سەلبەستىك حۇجاتىن جاريالاۋعا جانە قازاقستانداعى ەكى ورىندا جاڭادان قۇرىلعان لۋبان شەبەرحاناسىنىڭ ماڭدايشالىق اسۋىنا كۋا بولدى.

ساي چي، ۋاڭ ي، چىن مين ـ ىر قاتارلىلار كەزدەسۋگە قاتىناستى.

شينحۋا اگەنتتىگىنىڭ 8 ـ ايدىڭ 30 ـ كۇنى تيانجيننەن بەرگەن حابارى (تىلشىلەر ما جويان، باي جيالي). 8 ـ ايدىڭ 30 ـ كۇنى تۇستەن كەيىن مەملەكەت ءتوراعاسى شي جينپيڭ تيانجين يىڭبين سارايىندا 2025 ـ جىلعى شاڭحاي سەلبەستىك ۇيىمى باسشىلار ماجىلىسىنە جانە جۇڭگو حالقىنىڭ جاپون شاپقىنشىلارىنا قارسى سوعىسى مەن دۇنيە جۇزىلىك فاشيزمگە قارسى سوعىس جەڭىسىنىڭ 80 جىلدىعىن ەسكە ءتۇسىرۋ قيمىلىنا قاتىناسۋ ءۇشىن جۇڭگوعا كەلگەن بيرمانىڭ ۋاقىتشا زۇڭتۇڭى مين اڭلايمەن كەزدەستى.

شي جينپيڭ بىلاي دەپ اتاپ كورسەتتى: بيرما — دۇنيە جۇزىلىك فاشيزمگە قارسى سوعىستىڭ شىعىس سوعىس مايدانىنداعى قۇرامداس بولىگى، شاڭحاي سەلبەستىك ۇيىمىنىڭ ماڭىزدى تىلدەسۋ سەرىگى. جۇڭگو مەن بيرمانىڭ باۋىرلاستىق سۇيىسپەنشىلىگى حالىق اراسىنا تامىر تارتقان، ۋاقىت وتكەن سايىن جاڭالانىپ كەلەدى. ەكى جاق جۇڭگو مەن بيرمانىڭ ديپلوماتيالىق قارىم ـ قاتىناس ورناتقاندىعىنىڭ 75 جىلدىعىن وراي ەتىپ، ستراتەگيالىق سەلبەستىكتى تەرەڭدەتىپ، تاعدىرلاس ورتاق تۇلعا قۇرىلىسىن جەدەل ىلگەرىلەتىپ، ەكى ەل حالقىنا اناعۇرلىم مول قۇت ـ ىرىس اكەلۋى كەرەك.

شي جينپيڭ بىلاي دەپ باسا دارىپتەدى: جۇڭگو جاق بيرمانىڭ ءوز ەلىنىڭ مەملەكەت جاعدايىنا ۇيلەسەتىن دامۋ جولىمەن ءجۇرۋىن، مەملەكەتتىڭ يەلىك ۇقىعىن، حاۋىپسىزدىگىن، دامۋ مۇددەسىن قورعاۋىن قولدايدى، بيرمانىڭ جەر سىلكىنىسىنەن كەيىنگى قايتا قۇرۋىن، حالىق تۇرمىسىن جاقسارتۋىن قولدايدى، بيرمانىڭ ەل ىشىندەگى ساياسي كۇشتەردى كەڭ كولەمدە ىنتىماقتاستىرىپ، ورنىقتىلىقتى جانە دامۋدى قالپىنا كەلتىرۋىن قولدايدى. ەكى جاق جۇڭگو - بيرما ەكونوميكالىق ءدالىزىنىڭ ءتۇيىندى نىساندارىن ىلگەرىلەتىپ، ەكونوميكا ـ ساۋدا سەلبەستىگىن جەبەۋى كەرەك. شەكارا اتتاعان قىلمىسقا كۇش بىرىكتىرە سوققى بەرىپ، جۇڭگو - بيرما شەكارا ءوڭىرىنىڭ تىنىشتىعىن بىرگە قورعاپ، جۇڭگو جاقتىڭ بيرماداعى ادامدارىنىڭ، قۇرىلىمدارىنىڭ، نىساندارىنىڭ حاۋىپسىزدىگىنە شىنايى كەپىلدىك ەتۋى كەرەك. بەيبىت قاتار تۇرۋ بەس پرينسيبى رۋحىن اسقاقتاتىپ، بىرلەسكەن مەملەكەتتەر ۇيىمىن وزەك ەتكەن حالىقارالىق جۇيەنى بىرگە قورعاۋى كەرەك.

مين اڭلاي مىنالاردى ءبىلدىردى: بيرما مەن جۇڭگو اراسىندا تەرەڭ باۋىرلاستىق سۇيىسپەنشىلىك جانە بەيبىتشىلىككە، ورنىقتىلىققا دەگەن ورتاق تالپىنىس بار، تۇگەلدەي دۇنيە جۇزىلىك فاشيزمگە قارسى سوعىس جەڭىسىنە ماڭىزدى ۇلەس قوسقان. جۇڭگو ەجەلدەن بەرى بيرمانىڭ جاقسى كورشىسى، جاقسى دوسى، ۇزاق ۋاقىتتان بەرى، بيرمانىڭ ەكونوميكالىق، قوعامدىق دامۋىنا كومەك بەرىپ، بيرمانىڭ اپاتتان كەيىنگى قايتا قۇرۋىن قولداپ، بيرمانىڭ سولتۇستىگىنىڭ بەيبىتشىلىگى مەن ورنىقتىلىعىن قورعاۋدا سىندارلى رول اتقارىپ كەلەدى. بيرما جاق ءبىر جۇڭگو ساياساتىن بۇلجىماي اتقارادى، جۇڭگو جاقپەن ”ءبىر بەلدەۋ، ءبىر جولدى“ جوعارى ساپامەن بىرگە قۇرىپ، ساۋدا، قارجى قوسۋ، ەنەرگيا، نەگىزدىك قۇرىلعى سياقتى سالاداعى سەلبەستىكتى كەڭەيتىپ، ەكى ەل حالقىنا اناعۇرلىم مول قۇت ـ ىرىس جاراتۋدى قالايدى. شاڭحاي سەلبەستىك ۇيىمىنىڭ تىلدەسۋ سەرىگى رەتىندە، بيرما جاق شاڭحاي سەلبەستىك ۇيىمىنىڭ دامۋىنا بەلسەندى ۇلەس قوسۋدى قالايدى.

ەكى جاق كەدەن، اقپارات سياقتى سالالاردا كوپتەگەن ەكى جاقتى سەلبەستىك حۇجاتىنا قول قويدى.

ساي چي، ۋاڭ ي، چىن مين ـ ىر قاتارلىلار كەزدەسۋگە قاتىناستى.

شينحۋا اگەنتتىگىنىڭ 8 ـ ايدىڭ 30 ـ كۇنى تيانجيننەن بەرگەن حابارى (تىلشىلەر گاۋ لەي، ماۋ جىنحۋا). 8 ـ ايدىڭ 30 ـ كۇنى تۇستەن كەيىن مەملەكەت ءتوراعاسى شي جينپيڭ تيانجين يىڭبين سارايىندا 2025 ـ جىلعى شاڭحاي سەلبەستىك ۇيىمى باسشىلار ماجىلىسىنە قاتىناسۋ ءۇشىن جۇڭگوعا كەلگەن ەگيپەت زۇڭليى مادبۋريمەن كەزدەستى.

شي جينپيڭ بىلاي دەپ اتاپ كورسەتتى: ەگيپەت جاڭا جۇڭگومەن ديپلوماتيالىق قارىم ـ قاتىناس ورناتقان تۇڭعىش اراب جانە افريكا مەملەكەتى، جۇڭگو - ەگيپەت قارىم ـ قاتىناسى تاريحتاعى ەڭ جاقسى مەزگىلدە تۇر. كەلەر جىلى ەكى ەل ديپلوماتيالىق قارىم ـ قاتىناس ورناتقاندىعىنىڭ 70 جىلدىعىن قارسى الادى، ەكى جاق وسىنى وراي ەتىپ، ەكى جاقتى قارىم ـ قاتىناستىڭ جاڭا داۋىردەگى جۇڭگو - ەگيپەت تاعدىرلاس ورتاق تۇلعاسىن قۇرۋ نىساناسىنا قاراي العا باسۋىن ىلگەرىلەتىپ، جۇڭگو - اراب ەلدەرى، جۇڭگو - افريكا قارىم ـ قاتىناسىنا جاڭا قوزعاۋشى كۇش قوسىپ، دۇنيە ءجۇزىنىڭ بەيبىتشىلىگىن، ورنىقتىلىعىن قورعاۋعا، بۇكىل الەمنىڭ دامۋىن، گۇلدەنىپ ـ كوركەيۋىن جەبەۋگە اناعۇرلىم زور ۇلەس قوسۋى كەرەك.

شي جينپيڭ بىلاي دەپ باسا دارىپتەدى: جاڭا جاعدايدا جۇڭگو - ەگيپەت ەكى جاق ءبىر ـ ءبىرىن باتىل قولدايتىن جاقسى باۋىرلاس بولىپ، ساياسي ءوزارا سەنىمدىلىكتى ۇزدىكسىز بەكەمدەپ، ءبىر ـ ءبىرىنىڭ وزەكتى مۇددەسىنە جانە ءجىتى قاداعالاپ وتىرعان كەلەلى ىستەرىنە ساياتىن ماسەلەلەردە ۇزدىكسىز ءوزارا قولداۋ كورسەتۋى كەرەك. ءوزارا پايدا جەتكىزۋ سەلبەستىگىن تەرەڭدەتەتىن جاقسى سەرىك بولىپ، ”ءبىر بەلدەۋ، ءبىر جولدى“ بىرگە قۇرۋ باستاماسىن ”2030 بولاشاق جوسپارى“ باستاماسىمەن ءتۇيىلىستىرۋدى ىلگەرىلەتىپ، سۆەيش ەكونوميكا ـ ساۋدا سەلبەستىك رايونى سياقتى باقشا رايونى سەلبەستىگىن جەتەكشى ەتىپ، ەكونوميكا ـ ساۋدا، بىرلەسىپ جاساۋ، جاڭا ەنەرگيا سياقتى سالالارداعى سەلبەستىكتى كۇشەيتۋى كەرەك. كوپ جاقتى ىستەستىكتى قويۋلاتقان جاقسى دوس بولىپ، بىردەي جەر شارىنىڭ وڭتۇستىگىنىڭ ماڭىزدى مۇشەسى بولعان تاريحي بورىشى ءىرى ەل جاۋاپكەرشىلىگىن ارقالاپ، دۇنيە جۇزىلىك 2 ـ سوعىس جەڭىسىنىڭ جەتىستىكتەرىن قورعاپ، سىڭار جاقتىلىققا جانە زورەكەرلىك ارەكەتىنە بىرگە قارسى تۇرىپ، بىرلەسكەن مەملەكەتتەر ۇيىمىن وزەك ەتكەن حالىقارالىق جۇيە مەن حالىقارالىق زاڭدى نەگىز ەتكەن حالىقارالىق ءتارتىپتى قورعاۋى كەرەك.

مادبۋري سيسي زۇڭتۇڭنىڭ ءتوراعا شي جينپيڭگە جولداعان ىقىلاستى سالەمىن جانە قۇرمەتىن جەتكىزدى. مادبۋري مىنالاردى ءبىلدىردى: جۇڭگو ەگيپەتتىڭ ناعىز سەرىگى جانە دوسى، ەكى جاق باستان ـ اياق ءوزارا سەنىم ارتىپ، ءوزارا قولداۋ كورسەتىپ كەلەدى. ەگيپەت جاق جۇڭگومەن قارىم ـ قاتىناسىنا وسكەلەڭ ءمان بەرەدى، ءبىر جۇڭگو پرينسيبىن باتىل اتقارادى، كەلەر جىلى ەكى ەلدىڭ ديپلوماتيالىق قارىم ـ قاتىناس ورناتقاندىعىنىڭ 70 جىلدىعىن وراي ەتىپ، جوعارى جىكتەگىلەردىڭ بارىس ـ كەلىسىن جيىلەتىپ، ساۋدا جانە قارجى قوسۋ كولەمىن كەڭەيتىپ، جاڭا ەنەرگيا، ەلەكترلى اۆتوكولىك، فينانس، تەڭىز سۋىن تۇششىلاندىرۋ سياقتى سالاداعى سەلبەستىكتى تەرەڭدەتىپ، ەكى ەل قارىم ـ قاتىناسىنىڭ اناعۇرلىم زور دامۋعا يە بولۋىن ىلگەرىلەتۋدى قالايدى. ەگيپەت پەن جۇڭگو بىردەي وركەندەپ كەلە جاتقان ەل جانە جەر شارىنىڭ وڭتۇستىگىندەگى ەل رەتىندە، دۇنيە ءجۇزى جاعدايى جانە حالىقارالىق ەكونوميكا ـ ساۋدا سالاسى ءدوپ كەلگەن سىن ـ سايىس الدىندا ەگيپەت جاق جۇڭگو جاقپەن بىرگە حالىقارالىق جانە وڭىرلىك ىستەردە سايكەسۋ مەن سەلبەسۋدى كۇشەيتىپ، وركەندەپ كەلە جاتقان ەلدەردىڭ ورتاق مۇددەسىن قورعاۋدى قالايدى.

ساي چي، ۋاڭ ي، چىن مين ـ ىر قاتارلىلار كەزدەسۋگە قاتىناستى.

شينحۋا اگەنتتىگىنىڭ 8 ـ ايدىڭ 30 ـ كۇنى تيانجيننەن بەرگەن حابارى (تىلشىلەر ۋاڭ پىڭ، لي كۇن). 8 ـ ايدىڭ 30 ـ كۇنى تۇستەن كەيىن مەملەكەت ءتوراعاسى شي جينپيڭ تيانجين يىڭبين سارايىندا 2025 ـ جىلعى شاڭحاي سەلبەستىك ۇيىمى باسشىلار ماجىلىسىنە قاتىناسۋ ءۇشىن جۇڭگوعا كەلگەن كامبودجانىڭ باس ءۋازىرى حۇڭمانايمەن كەزدەستى.

شي جينپيڭ بىلاي دەپ اتاپ كورسەتتى: جۇڭگو - كامبودجا دوستىعى ۇزاق ۋاقىتتىڭ سىنىنان ءوتىپ، باستان ـ اياق تاستاي بەرىك بولىپ، ەكى ەل حالقىنىڭ ورتاق قۇندى قازىناسىنا اينالدى. حالىقارالىق اۋمالى ـ توكپەلى جاعداي الدىندا جۇڭگو - كامبودجا قۇرىشتاي بەرىك دوس رەتىندە، جالپى جاعدايدى كوكەيدە ساقتاپ، ۇزاق بولاشاقتى كوزدەپ، ەكى ەلدىڭ اعا بۋىن باسشىلارى اشقان جۇڭگو - كامبودجا دوستىعى جولىمەن بۇلجىماي ءجۇرۋى كەرەك. ەكى جاق تىعىز ىنتىماقتاسىپ، ءبىرىن ـ ءبىرى تابىسقا كەنەلتىپ، ەكى ەل حالقىنىڭ قۇت ـ ىرىسىن ارتتىرىپ، ءوڭىردىڭ بەيبىتشىلىگى، ورنىقتىلىعى، گۇلدەنىپ ـ كوركەيۋى ءۇشىن ۇلەس قوسۋى كەرەك.

شي جينپيڭ بىلاي دەپ باسا دارىپتەدى: جۇڭگو جاق كامبودجا جاقتىڭ مەملەكەت ورنىقتىلىعىن قورعاپ، تاۋەلسىزدىككە، ءوز ـ وزىنە قوجايىن بولۋعا تاباندى بولىپ، دامۋدى، گۇلدەنۋدى جۇزەگە اسىرۋىن قولدايدى. جۇڭگو مەن كامبودجا ۇكىمەتى اراسىنداعى سايكەستىرۋ كوميتەتىنىڭ رولىن ساۋلەلەندىرىپ، كامبودجا جاقپەن ”الماستىڭ التى قىرى“ سەلبەستىگىن تەرەڭدەتىپ، ”ونەركاسىپتى دامىتۋ ءدالىزى“، ”بالىق، كۇرىش ءدالىزى“ قۇرىلىسىن ءبىر تۇتاس جوسپارلاپ ىلگەرىلەتىپ، ساۋدا بارىس ـ كەلىسىن كەڭەيتىپ، كامبودجا جاقتىڭ دەربەس دامۋ قۋاتىن كۇشەيتۋدى قالايدى. ەكى جاق ينتەرنەتتە قۇمار ويناۋ، تەلەگراف الدامكوستىگى سياقتى شەكارا اتتاعان قىلمىسقا قاتاڭ سوققى بەرىپ، ەكى ەل حالقىنىڭ باس اماندىعى مەن مال ـ مۇلىك حاۋىپسىزدىگىن قورعاۋى كەرەك.

حۇڭماناي مىنالاردى ءبىلدىردى: بيىل جۇڭگو حالقىنىڭ جاپون شاپقىنشىلارىنا قارسى سوعىسى جانە دۇنيە جۇزىلىك فاشيزمگە قارسى سوعىس جەڭىسىنىڭ 80 جىلدىعى، جۇڭگو حالقىنىڭ ەرجۇرەكتىلىك پەن ىنتىماق ارقىلى بەيبىتشىلىك ورناتقاندىعى ادامدى سۇيسىندىرەدى. كامبودجا مەن جۇڭگونىڭ ءداستۇرلى دوستىعى ۋاقىت وتكەن سايىن بەكەمدەلە ءتۇستى، كامبودجا جاق جۇڭگو جاقتىڭ ۇزاق مەزگىلدەن بەرى، كامبودجاعا كورسەتكەن قۇندى قولداۋى مەن كومەگىنە العىس ايتادى. مەيلى حالىقارالىق جاعداي قالاي وزگەرسە دە، كامبودجا جاق جۇڭگوعا قاراتقان دوستىق ساياساتىن باتىل اتقارادى، ءبىر جۇڭگو پرينسيبىن باتىل اتقارادى، جۇڭگو جاق العا قويعان ءۇش ۇلكەن الەمدىك باستامانى باتىل قولدايدى. ءتوراعا شي جينپيڭ بيىل 4 ـ ايدا كامبودجادا تاريحي سيپاتتى مەملەكەتتىك ساپاردا بولىپ، سۇبەلى جەتىستىككە قول جەتكىزدى. كامبودجا جاق جۇڭگو جاقپەن بىرگە ساپاردا كەلىسكەن ماڭىزدى ورتاق تانىمدى ويداعىداي تياناقتاندىرىپ، ەكى ەلدىڭ قۇرىشتاي بەرىك دوستىعىن تەرەڭدەتىپ، ەكى جاقتىڭ وزەكتى مۇددەسىنە جانە ءجىتى قاداعالاپ وتىرعان كەلەلى ىستەرىنە ساياتىن ماسەلەلەردە ءوزارا قولداۋ كورسەتىپ، ساۋدا، قارجى قوسۋ، نەگىزدىك قۇرىلعى سياقتى سەلبەستىكتى كەڭەيتىپ، ينتەرنەتتە قۇمار ويناۋعا، تەلەگراف الدامكوستىگىنە قاتاڭ سوققى بەرىپ، ەكى ەلدىڭ بارلىق جاعدايدا بىردەي تاعدىرلاس ورتاق تۇلعاسى قۇرىلىسىن ىلگەرىلەتۋدە اناعۇرلىم زور دامۋعا قول جەتكىزۋدى ءۇمىت ەتەدى.

ساي چي، ۋاڭ ي، چىن مين ـ ىر قاتارلىلار كەزدەسۋگە قاتىناستى.

شينحۋا اگەنتتىگىنىڭ 8 ـ ايدىڭ 30 ـ كۇنى تيانجيننەن بەرگەن حابارى (تىلشىلەر دۇڭ شۋە، سۇڭ رۇي). 8 ـ ايدىڭ 30 ـ كۇنى تۇستەن كەيىن مەملەكەت ءتوراعاسى شي جينپيڭ تيانجين يىڭبين سارايىندا 2025 ـ جىلعى شاڭحاي سەلبەستىك ۇيىمى باسشىلار ماجىلىسىنە جانە جۇڭگو حالقىنىڭ جاپون شاپقىنشىلارىنا قارسى سوعىسى مەن دۇنيە جۇزىلىك فاشيزمگە قارسى سوعىس جەڭىسىنىڭ 80 جىلدىعىن ەسكە ءتۇسىرۋ قيمىلىنا قاتىناسۋ ءۇشىن جۇڭگوعا كەلگەن نەپال زۇڭليى وليمەن كەزدەستى.

شي جينپيڭ بىلاي دەپ اتاپ كورسەتتى: جۇڭگو مەن نەپال تاۋ ـ سۋى تۇتاسقان، ۇرپاقتار بويى دوس وتكەن كورشى ەل، سونداي ـ اق بەيبىتشىلىكتى قىزۋ سۇيەتىن، ءوز كۇشىنە سۇيەنىپ، ءوزىن الۋەتتەندىرەتىن مەملەكەتتەر. ديپلوماتيالىق قارىم ـ قاتىناس ورناتقان 70 جىلدان بەرى، ەكى ەل حالقى قيىندىقتى بىرگە ەڭسەرىپ، بەينەت پەن زەينەتتى بىرگە وتكەرىپ، جۇڭگو مەن نەپالدىڭ تاتۋ كورشى، دوس بولۋىنىڭ تاريحي تاراۋىن بىرگە جازدى. قازىر جۇڭگو مەن نەپالدىڭ ”ءبىر بەلدەۋ، ءبىر جولدى“ جوعارى ساپالى بىرگە قۇرۋ سەلبەستىگى ورنىقتى قاداممەن ىلگەرىلەپ، ەكى ەل حالقى ءتىپتى دە ءوزارا ءتۇسىنىسىپ، ەتەنە بولدى. جۇڭگو جاق نەپال جاقپەن بىرگە قۇلشىنىپ، ءداستۇرلى دوستىقتى جالعاستىرىپ، جۇڭگو مەن نەپالدىڭ دامۋعا جانە گۇلدەنۋگە بەت العان ۇرپاقتار بويى دوس وتەتىن ستراتەگيالىق سەلبەستىك سەرىكتەستىك قارىم ـ قاتىناسىندا جاڭا دا اناعۇرلىم زور دامۋعا قول جەتكىزۋىن ىلگەرىلەتۋدى قالايدى.

شي جينپيڭ بىلاي دەپ باسا دارىپتەدى: ەكى جاق ستراتەگيالىق ءوزارا سەنىمدىلىكتى ارتتىرىپ، ءبىر ـ ءبىرىنىڭ وزەكتى مۇددەسىنە جانە ءجىتى قاداعالاپ وتىرعان كەلەلى ىستەرىنە ساياتىن ماسەلەلەردە ءوزارا باتىل قولداۋ كورسەتۋى كەرەك. ءوزارا پايدا جەتكىزۋ سەلبەستىگىن تەرەڭدەتىپ، ”ءبىر بەلدەۋ، ءبىر جول“ قۇرىلىسىن بىرگە ىلگەرىلەتىپ، شەكارا وتكەل، تاس جول، ەلەكتر تورى، اۆياتسيا، حابارلاسۋ سياقتى ۇلاستىرۋدى، تۇتاستىرۋدى كۇشەيتۋى كەرەك. كاسىپ سالاسى، ەگىن، مال شارۋاشىلىعى، جاڭا ەنەرگيا، قورشاعان ورتانى قورعاۋ، مۇناي ـ گاز، جاساندى زەردە، وقۋ ـ اعارتۋ، دەنساۋلىق ساقتاۋ، زاڭ اتقارۋ حاۋىپسىزدىگى سياقتى سەلبەستىكتى ىلگەرىلەتىپ، جۇڭگو مەن نەپالدىڭ ديپلوماتيالىق قارىم ـ قاتىناس ورناتقاندىعىنىڭ 70 جىلدىعىن ەسكە ءتۇسىرۋ قيمىلىن ۇزدىكسىز ويداعىداي وتكىزۋى كەرەك. بىرلەسكەن مەملەكەتتەر ۇيىمى، شاڭحاي سەلبەستىك ۇيىمى سياقتى كوپ جاقتى تۇعىردا تىلدەسۋدى جانە سايكەسۋدى كۇشەيتىپ، ەركىن ساۋدانى، باياندى دامۋدى بىرگە قولداپ، حالىقارالىق ادىلدىكتى، تۋراشىلدىقتى قورعاۋى كەرەك.

ولي مىنالاردى ءبىلدىردى: نەپال - جۇڭگو قارىم ـ قاتىناسى ءتۇرلى بوران ـ شاشىننىڭ سىنىنان ءوتىپ، ۋاقىت وتكەن سايىن بەكەمدەلدى، ەكى جاق باستان ـ اياق ءوزارا قۇرمەت ەتىپ، ءوزارا سەنىم ارتىپ، ءبىر ـ ءبىرىنىڭ ءجىتى قاداعالاپ وتىرعان ىستەرىنە كوڭىل ءبولىپ كەلەدى، جۇڭگومەن سەلبەستىك نەپالدىڭ ەكونوميكالىق، قوعامدىق دامۋىن پارمەندى جەبەدى. نەپال جاق ءبىر جۇڭگو پرينسيبىن باتىل اتقارادى، ”تايۋاندى دەربەستەندىرۋگە“ باتىل قارسى تۇرادى، ءارقانداي كۇشتەردىڭ نەپال تەرريتورياسىنان پايدالانىپ جۇڭگو جاقتىڭ مۇددەسىن زيانداۋىنا جول بەرمەيدى. نەپال ۇزدىكسىز دامۋدى جۇزەگە اسىرۋعا كۇش سالادى، جۇڭگومەن سەلبەستىكتى تەرەڭدەتىپ، ”ءبىر بەلدەۋ، ءبىر جولدى“ بىرگە قۇرىپ، ساۋدا، قارجى قوسۋ، اۋىل شارۋاشىلىعى، عىلىم ـ تەحنولوگيا، ساياحات، كليمات وزگەرىسىنە توتەپ بەرۋ سياقتى سالالارداعى سەلبەستىكتى كۇشەيتىپ، ءتىپتى دە كوپ بەلسەندى جەتىستىكتى تۇلعالاۋدى ءۇمىت ەتەدى. نەپال جاق جۇڭگونىڭ العا قويعان ءۇش ۇلكەن الەمدىك باستاماسىن قولدايدى، شاڭحاي سەلبەستىك ۇيىمىنىڭ رولىنا ءمان بەرەدى، ”شاڭحاي رۋحىن“ بەلسەنە امالياتتا ايگىلەيدى، جۇڭگونىڭ حالىقارالىق ىستەردە اناعۇرلىم زور رول اتقارۋىن ءۇمىت ەتەدى.

ساي چي، ۋاڭ ي، چىن مين ـ ىر قاتارلىلار كەزدەسۋگە قاتىناستى.

شينحۋا اگەنتتىگىنىڭ 8 ـ ايدىڭ 30 ـ كۇنى تيانجيننەن بەرگەن حابارى (تىلشىلەر ياڭ يجۇن، شاۋ شياڭيۇن). 8 ـ ايدىڭ 30 ـ كۇنى تۇستەن كەيىن مەملەكەت ءتوراعاسى شي جينپيڭ تيانجين يىڭبين سارايىندا 2025 ـ جىلعى شاڭحاي سەلبەستىك ۇيىمى باسشىلار ماجىلىسىنە قاتىناسۋ ءۇشىن جۇڭگوعا كەلگەن بىرلەسكەن مەملەكەتتەر ۇيىمىنىڭ باس حاتشىسى گۋتەرەسپەن كەزدەستى.

شي جينپيڭ بىلاي دەپ اتاپ كورسەتتى: دۇنيە جۇزىلىك 2 ـ سوعىس اياقتالۋدىڭ الدى ـ ارتىندا حالىقارالىق قوعام جاساعان ەڭ ماڭىزدى شەشىم بىرلەسكەن مەملەكەتتەر ۇيىمىن قۇرۋ بولدى. بيىل دۇنيە جۇزىلىك فاشيزمگە قارسى سوعىس جەڭىسىنىڭ جانە بىرلەسكەن مەملەكەتتەر ۇيىمى قۇرىلعاندىعىنىڭ 80 جىلدىعى. تاريح بىزگە مىناداي وي سالدى: كوپ جاقتىلىق، ىنتىماقتاسا سەلبەسۋ — الەمدىك قيىن ماسەلەلەردى شەشۋدىڭ دۇرىس جاۋابى. ءبىز بىرلەسكەن مەملەكەتتەر ۇيىمىن قۇرۋداعى اۋەلگى ماقساتتى قايتا ەسكە ءتۇسىرىپ، بىرلەسكەن مەملەكەتتەر ۇيىمى ۋستاۆىنىڭ باس ماقساتى مەن پرينسيبى جونىندەگى ۋادەمىزدى قايتا دارىپتەپ، بىرلەسكەن مەملەكەتتەر ۇيىمىنىڭ جاڭا جاعدايدا بەدەلى مەن ومىرشەڭ كۇشىن قايتا سەرپىلتىپ، ءار ەلدىڭ ارەكەتىن سايكەستىرەتىن، سىن ـ سايىسقا بىرگە توتەپ بەرەتىن نەگىزگى تۇعىرعا اينالۋىن ىلگەرىلەتۋىمىز كەرەك. بىرلەسكەن مەملەكەتتەر ۇيىمى حاۋىپسىزدىك القالار كەڭەسىنىڭ تۇراقتى القا ەلى رەتىندە، جۇڭگو باستان ـ اياق تاريحتىڭ دۇرىس جاعىندا مىزعىماي تۇرىپ، ناعىز كوپ جاقتىلىققا تاباندى بولىپ كەلدى. جۇڭگو بىرلەسكەن مەملەكەتتەر ۇيىمىنىڭ ماڭگىلىك سەنىم ارتۋىنا بولاتىن سەرىگى. جۇڭگو جاق بىرلەسكەن مەملەكەتتەر ۇيىمىمەن سەلبەستىكتى تەرەڭدەتۋدى قالايدى، بىرلەسكەن مەملەكەتتەر ۇيىمىنىڭ حالىقارالىق ىستەردە وزەكتى رولىن ساۋلەلەندىرۋىن، بىرلىكتە دۇنيە ءجۇزىنىڭ بەيبىتشىلىگىن قورعاپ، دامۋ مەن گۇلدەنۋدى جەبەۋدە كوكىرەك كەرە جاۋاپكەرشىلىك ارقالاۋىن قولدايدى.

شي جينپيڭ بىلاي دەپ باسا دارىپتەدى: دۇنيە ءجۇزىنىڭ 100 جىلدىق وزگەرىسى بارىسىندا، جۇڭگو ورنىقتىلىق پەن ايقىندىق ازىرلەدى. ءبىز جۇڭگونىڭ جاڭا دامۋى ارقىلى دۇنيە جۇزىنە ۇزدىكسىز جاڭا وراي سيلاپ، ادامزاتتىڭ تاعدىرلاس ورتاق تۇلعاسىن قۇرۋ، ءۇش ۇلكەن الەمدىك باستامانى امالياتتا ايگىلەۋ، ”ءبىر بەلدەۋ، ءبىر جولدى“ بىرگە قۇرۋ ارقىلى ءار ەلمەن بىرگە اناعۇرلىم كوركەم بولاشاق جاراتامىز.

گۋتەرەس مىنالاردى ءبىلدىردى: جۇڭگونىڭ ۇزاقتان بەرى بىرلەسكەن مەملەكەتتەر ۇيىمىن باتىل دا پارمەندى قولداعاندىعىنا العىس ايتامىن. كوز الدا كوپ جاقتىلىق، حالىقارالىق زاڭ، بىرلەسكەن مەملەكەتتەر ۇيىمىنىڭ بەدەلى سىن ـ سايىسقا ءدوپ كەلىپ، حالىقارالىق باسقارۋ جۇلگەسى رەفورما جاساۋدى شۇعىل قاجەت ەتىپ وتىر، 80 جىلدىڭ الدىندا بىرلەسكەن مەملەكەتتەر ۇيىمىن قۇرۋداعى اۋەلگى ماقسات پەن قۇن ۇستانىمىن قايتا ەسكە ءتۇسىرۋ ءدال كەزىندە بولدى. جۇڭگو حالىقارالىق زاڭدى قورعاۋعا، حالىقارالىق زاڭمەن باسقارۋعا شىنايى كەپىلدىك ەتۋگە ماڭىزدى ۇلەس قوسىپ، كوپ جاقتىلىقتى قورعاۋدىڭ ىرگە تاسىنا اينالدى. بىرلەسكەن مەملەكەتتەر ۇيىمى جۇڭگو جاقپەن سەلبەستىكتى كۇشەيتىپ، بىرلەسكەن مەملەكەتتەر ۇيىمى ۋستاۆىنىڭ باس ماقساتى مەن پرينسيبىن قورعاپ، حالىقارالىق قارىم ـ قاتىناستىڭ نەگىزگى ولشەمىن قورعاپ، دۇنيە ءجۇزىنىڭ كوپ ۇيەكتەنۋىن ىلگەرىلەتىپ، وركەندەپ كەلە جاتقان ەلدەردىڭ ۋاكىلدىك سيپاتىن جوعارىلاتىپ، بىرلەسكەن مەملەكەتتەر ۇيىمىنىڭ حالىقارالىق ىستەردە ءتىپتى دە زور رول اتقارۋىنا مۇمكىندىك جاساۋدى قالايدى. ەكى جاق الەمدىك باسقارۋ جۇيەسى رەفورماسى، جاساندى زەردە، كليمات وزگەرىسىنىڭ سىن ـ سايىستارىنا توتەپ بەرۋ سياقتى جاقتارداعى سەلبەستىكتى كۇشەيتىپ، ادامزاتتىڭ ورتاق قۇت ـ ىرىسىنا اناعۇرلىم ويداعىداي قىزمەت وتەۋى كەرەك.

ساي چي، ۋاڭ ي، چىن مين ـ ىر قاتارلىلار كەزدەسۋگە قاتىناستى.