شي جينپيڭ تۇركيانىڭ زۇڭتۇڭى ەردوعانمەن كەزدەستى

8 - ايدىڭ 31 - كۇنى تۇستەن كەيىن مەملەكەت ءتوراعاسى شي جينپيڭ تيانجين يىڭبيڭ قوناق ۇيىندە 2025 - جىلعى شاڭحاي سەلبەستىك ۇيىمىنىڭ باسشىلار ماجىلىسىنە قاتىناسۋ ءۇشىن جۇڭگوعا كەلگەن تۇركيانىڭ زۇڭتۇڭى ەردوعانمەن كەزدەستى.

سۋرەتتى شينحۋا اگەنتتىگىنىڭ ءتىلشىسى يان يان تۇسىرگەن

«حالىق گازەتى»، 8 - ايدىڭ 31 - كۇنى، تيانجين (تىلشىلەر لي يىڭچي، ۋاڭ رۇڭ). 8 - ايدىڭ 31 - كۇنى تۇستەن كەيىن مەملەكەت ءتوراعاسى شي جينپيڭ تيانجين يىڭبيڭ قوناق ۇيىندە 2025 - جىلعى شاڭحاي سەلبەستىك ۇيىمىنىڭ باسشىلار ماجىلىسىنە قاتىناسۋ ءۇشىن جۇڭگوعا كەلگەن تۇركيانىڭ زۇڭتۇڭى ەردوعانمەن كەزدەستى.

شي جينپيڭ بىلاي دەپ اتاپ كورسەتتى: جۇڭگو مەن تۇركيا ەكەۋى دە جاڭادان گۇلدەنگەن ءىرى ەلدەر، دۇنيە ءجۇزىنىڭ وڭتۇستىگىندەگى ماڭىزدى مۇشەلەر، ەكەۋى دە دەربەس، ءوز - وزىنە قوجايىن بولۋ رۋحىنا يە ەلدەر. جۇڭگو - تۇركيا قارىم - قاتىناسىنىڭ جوعارى دەڭگەيدە دامۋىن ساقتاۋ ەكى ەلدىڭ ءتۇبىرلى مۇددەسىنە ۇيلەسەدى ءارى دۇنيە ءجۇزىنىڭ وڭتۇستىگىنىڭ ورتاق مۇددەسىنە دە ۇيلەسەدى. ەكى ەل بەيبىتشىلىك، دامۋ، سەلبەستىك، تەڭ يگىلىككە كەنەلۋ سىندى ءداۋىر اعىمىن يگەرىپ، مەملەكەتتىڭ قۇدىرەتتەنۋىن جۇزەگە اسىرۋ جولىندا ءوزارا تابىسقا جەتىپ، جۇڭگو مەن تۇركيانىڭ ستراتەگيالىق سەلبەستىك قارىم - قاتىناسىنىڭ تىڭ دەڭگەيگە كوتەرىلۋىن ىلگەرىلەتىپ، اناعۇرلىم ءادىل، ۇيلەسىمدى دۇنيە جۇزىلىك جونگە سالۋ جۇيەسىن قۇرۋدى قول ۇستاسا ىلگەرىلەتۋى كەرەك.

شي جينپيڭ بىلاي دەپ باسا دارىپتەدى: كەلەر جىل − جۇڭگو مەن تۇركيانىڭ ديپلوماتيالىق قارىم - قاتىناس ورناتقاندىعىنىڭ 55 جىلدىعى، ەكى جاق وسىنى وراي ەتىپ، ەكى ەل قارىم - قاتىناسىنىڭ تىڭ ساتىعا كوتەرىلۋىن ىلگەرىلەتۋى كەرەك. ءبىرىنشى، ساياسي سەنىمدىلىكتى بەكەمدەپ، ءبىر - ءبىرىنىڭ وزەكتى مۇددەسىنە جانە ءجىتى قاداعالاپ وتىرعان كەلەلى ىستەرىنە ساياتىن ماسەلەلەردە ءوزارا قولداۋ كورسەتىپ، لاڭكەستىككە قارسى تۇرۋ حاۋىپسىزدىگى سەلبەستىگىن كۇشەيتۋ كەرەك. ەكىنشى، ناقتى سەلبەستىكتى تەرەڭدەتىپ، ”ءبىر بەلدەۋ، ءبىر جولدى“ بىرگە قۇرۋ باستاماسىن ”ارالىق ءدالىز“ جوسپارىمەن ۇشتاستىرۋدى كۇشەيتىپ، جۇڭگو - ەۆروپا كەزەكشى پويەزىنىڭ وڭتۇستىك باعىتتاعى ارناسىنىڭ دامۋىن ىلگەرىلەتىپ، ەكونوميكا - ساۋدا، مادەنيەت، ساياحات سياقتى ءداستۇرلى سالالارداعى سەلبەستىك دەڭگەيىن جوعارىلاتىپ، جاڭا ەنەرگيا، 5G، بيولوگيالىق ءدارى - دارمەك سياقتى سەلبەستىكتىڭ جاڭا كورىنەۋ تۇيىندەرىن قالىپتاستىرۋ كەرەك. ءۇشىنشى، كوپ جاقتى سەلبەستىكتى كۇشەيتىپ، بىرلەسكەن مەملەكەتتەر ۇيىمى، 20 ەل توبى، شاڭحاي سەلبەستىك ۇيىمى سياقتى جۇلگەدە تىعىز سايكەسىپ، حالىقارالىق ءتارتىپ پەن ەرەجەنى بىرگە قورعاپ، حالىقارالىق ادىلدىك پەن ادىلەتتىلىكتى قورعاپ، دۇنيە ءجۇزىنىڭ بەيبىتشىلىگى مەن ورنىقتىلىعىنا ۇلەس قوسۋ كەرەك.

ەردوعان مىنالاردى ءبىلدىردى: تۇركيا جۇڭگومەن قارىم - قاتىناستى دامىتۋعا ايرىقشا ءمان بەرەدى، جۇڭگومەن جوعارى جىكتەگىلەردىڭ بارىس - كەلىسىن جيىلەتىپ، ”ءبىر بەلدەۋ، ءبىر جولدى“ جوعارى ساپامەن بىرگە قۇرىپ، ساۋداعا قارجى قوسۋ دەڭگەيىن جوعارىلاتىپ، نەگىزدىك قۇرىلعى، جاڭا ەنەرگيا، اۋىل شارۋاشىلىعى، ازىق - تۇلىك، ەمدەۋ سياقتى سالالارداعى سەلبەستىكتى كۇشەيتىپ، وقۋ - اعارتۋ، ساياحات سياقتى جاقتارداعى گۋمانيتارلىق اۋىس - كۇيىستى جەبەپ، ەكى ەل قارىم - قاتىناسىنىڭ ۇزدىكسىز تەبىندى دامۋىن ىلگەرىلەتۋدى قالايدى. تۇركيا جاق ءبىر جۇڭگو پرينسيبىن باتىل اتقارادى. شاڭحاي سەلبەستىك ۇيىمى قۇرىلعاننان بەرگى كولەمى ەڭ ۇلكەن ءبىر رەتكى باسشىلار ءماجىلىسىن وتكىزەدى، تۇركيا جاق جۇڭگو جاقپەن شاڭحاي سەلبەستىك ۇيىمىنىڭ ىشكى سەلبەستىگىن كۇشەيتىپ، ءوڭىردىڭ جانە دۇنيە ءجۇزىنىڭ دامۋىن، گۇلدەنۋىن جەبەۋدى قالايدى. تۇركيا جاق جۇڭگو جاقتىڭ ورتا شىعىس ماسەلەسىندەگى ءادىل تۇرعىسىن القايدى، جۇڭگو جاقپەن بىرگە حالىقارالىق ادىلدىك پەن ادىلەتتىلىكتى قورعاۋدى قالايدى.

ساي چي، ۋاڭ ي، چىن مين - ىر قاتارلىلار كەزدەسۋدە بىرگە بولدى.

كەلۋ قاينارى: حالىق تورابى