ءىشىنارا ءدارى -  دارمەك دۇكەندەرى ەمدەۋ قامسىزداندىرۋىنا قاتىناسقان ناۋقاستار مەن ەمدەۋ قامسىزداندىرۋىنا قاتىناسپاعان ناۋقاستارعا ەكى ءتۇرلى باعا قولدانعان 

حالىق گازەتىنىڭ ءتىلشىسى سۇن شيۋيان 10 – ايدىڭ 13 – كۇنى بەيجيڭنەن حابارلايدى. مەملەكەتتىك ەمدەۋدى قامتاماسىزداندىرۋ مەڭگەرمەسى جۋىردا ۇقتىرۋ باسىپ تاراتىپ، بەلگىلەنگەن ءدارى – دارمەكتى بولشەك ساتۋ دۇكەندەرىنىڭ ”ەكى ءتۇرلى باعا قويۋىنا“ باقىلاۋ جۇرگىزۋ جانە ونى ءبىر جاقتى ەتۋدى اناعۇرلىم كۇشەيتۋدى تالاپ ەتكەن.

ۇقتىرۋعا قاراعاندا، جۋىردا كەي جەرلەردە بەلگىلەنگەن ءدارى – دارمەكتى بولشەك ساتۋ دۇكەندەرى ەمدەۋ قامسىزداندىرۋىنا قاتىناسقان ناۋقاستار مەن قاتىناسپاعان ناۋقاستارعا ”ەكى ءتۇرلى باعا“ (الالاۋ سيپاتىنداعى باعا) قولدانعان، اتاپ ايتقاندا، بۇكىلدەي ۇقساس ءدارىنى ەمدەۋ قامسىزداندىرۋىنا قاتىناسقان ناۋقاستارعا ەمدەۋ قامسىزداندىرۋىنا قاتىناسپاعان ناۋقاستارعا قاراعاندا قىمبات ساتقان. «جۇڭحۋا حالىق رەسپۋبليكاسىنىڭ باعا زاڭى»، «جۇڭحۋا حالىق رەسپۋبليكاسىنىڭ ءدارى – دارمەكتى باقىلاۋ – باسقارۋ زاڭى» قاتارلى زاڭدارداعى تالاپتارعا ساي، بەلگىلەنگەن ءدارى - دارمەك دۇكەندەرىنىڭ ەمدەۋ قامسىزداندىرۋىنا قاتىناسقاندارعا ءدارى – دارمەكتى قىمبات باعادا ساتۋ ارقىلى پايداعا كەنەلۋ ارەكەتى باعاعا قاتىستى الدامكوستىك ىستەۋ سىندى كۇدىك تۋدىرعان، سونىمەن بىرگە، بەلگىلەنگەن ءدارى – دارمەك دۇكەندەرىنىڭ ەمدەۋ قامسىزداندىرۋى كولەمىندە قىزمەت وتەۋ شارتىنداعى ”ەمدەۋ قامسىزداندىرۋىنا قاتىناسقاندارعا ادىلەتسىز، الالاۋ سيپاتىنداعى باعا قولدانۋعا بولمايدى“ دەگەن باسقارۋ تالابىنا قايشى كەلەدى، قاتاڭ تەكسەرىپ ءبىر جاقتى ەتۋ كەرەك.

ۇقتىرۋدا مىنالار تالاپ ەتىلگەن: بەلگىلەنگەن ءدارى – دارمەك دۇكەندەرىندەگى ”ەكى ءتۇرلى باعا“ ماسەلەسى جونىندەگى دەرەكتەرگە ايرىقشا نازار اۋدارىپ، ”ەكى ءتۇرلى باعا قويۋ“ ماسەلەسىن قاتاڭ تەكسەرىپ ءبىر جاقتى ەتۋ، ۇدايىلانعان باقىلاۋ جانە جونگە سالۋ قىزمەتىن ويداعىداي ىستەۋ كەرەك. جەر – جەردەگى ەمدەۋدى قامتاماسىزداندىرۋ تاراۋلارى نەگىزگى تۇلعالىق جاۋاپكەرشىلىگىن شىنايى تياناقتاندىرۋى، بازاردى باقىلاۋ – باسقارۋ تاراۋلارى قاتارلى تاراۋلارمەن سايكەسە ارەكەتتەنىپ، جۇمىس باسىنا بارىپ تەكسەرۋ مەن اشكەرەلەۋ مازمۇنىن اداقتاۋدى كۇشەيتۋى كەرەك. بەلگىلەنگەن ءدارى – دارمەك دۇكەندەرى ەمدەۋ قامسىزداندىرۋ كولەمىندە قىزمەت وتەۋ شارتىنا قايشى كەلىپ، ”ەكى ءتۇرلى باعا قوياتىن“ بولسا، جاعدايدىڭ اۋىر – جەڭىلدىك دارەجەسىنە جانە رەتتەۋ – تۇزەتۋ احۋالىنا قاراي وتىرىپ، باستى جاۋاپتىلارىن شاقىرىپ سويلەسۋ، ەمدەۋ قامسىزداندىرۋىنان ەسەپ جاساۋىن ۋاقىتشا توقتاتۋ، اقى تولەمەۋ نەمەسە ەمدەۋ قامسىزداندىرۋى قورىنان تولەنگەن قاراجاتتى قايتارىپ الۋ، ەمدەۋ قامسىزداندىرۋى كولەمىندە قىزمەت وتەۋ شارتىن ۋاقىتشا توقتاتۋ نەمەسە كۇشىنەن قالدىرۋ، قاتىستى تاراۋلاردىڭ ءبىر جاقتى ەتۋىنە جوتكەپ بەرۋ قاتارلى شارالاردى قولدانىپ، قاتاڭ ءبىر جاقتى ەتۋ، ەمدەۋ قامسىزداندىرۋ قورىنىڭ حاۋىپسىزدىگىن شىنايى قورعاپ، جۇرتشىلىقتىڭ ءدارى – دارمەك ساتىپ الۋ جاعىنداعى ۇقىق – مۇددەسىن قامتاماسىزداندىرۋ كەرەك.

كەلۋ قاينارى: حالىق تورابى