مەكتەپتەردىڭ اسحانالارىنا ازىق – تۇلىكتى مول مولشەردە ساتىپ الۋدى جۇيەگە تۇسىرەدى 

حالىق گازەتىنىڭ ءتىلشىسى يان يچياۋ 10 – ايدىڭ 13 – كۇنى بەيجيڭنەن حابارلايدى. وقۋ – اعارتۋ مينيسترلىگى مەن بازاردى باقىلاۋ – باسقارۋ باس مەڭگەرمەسى «مەكتەپتەردىڭ اسحانالارىنا ازىق – تۇلىكتى مول مولشەردە ساتىپ الۋدى، تەكسەرىپ وتكىزىپ الۋدى باسقارۋ قىزمەتى باعدارناماسىن» بىرگە باسىپ تاراتقان، مۇنداعى ماقسات — بۇكىل ەلىمىزدەگى ءار دارەجەلى ءتۇرلى مەكتەپتەردىڭ اسحانالارىنىڭ ازىق – تۇلىكتى مول مولشەردە ساتىپ الۋىن، تەكسەرىپ وتكىزىپ الۋىن باسقارۋ قىزمەتىن اناعۇرلىم جۇيەگە ءتۇسىرۋ، مەكتەپ اۋلاسىنداعى ازىق – تۇلىك حاۋىپسىزدىگى تۇزىمدىك جۇيەسىن اناعۇرلىم كەمەلدەندىرۋ، مەكتەپ اۋلاسىنداعى ازىق – تۇلىك حاۋىپسىزدىگىن قامتاماسىزداندىرۋ ورەسىن شىنايى جوعارىلاتۋ.

قىزمەت باعدارناماسىندا مىنالار باسا دارىپتەلگەن: مەكتەپتەر مەكتەپتەگى ازىق – تۇلىك كوميسسياسىنىڭ، ورتا – باستاۋىش مەكتەپتەردەگى ازىق – تۇلىكتى باقىلايتىن اتا – انالار كوميسسياسىنىڭ نەمەسە اتا – انالار كوميسسياسىنىڭ، وقىتۋشىلار مەن جۇمىسشى – قىزمەتكەرلەر ۋاكىلدەر جيىنىنىڭ پىكىرىن تىڭداۋ نەگىزىندە، ”ءۇش ماڭىزدى ءىس، ءبىر قوماقتى قاراجات“ (ماڭىزدى شەشىم، ماڭىزدى كادرلىق رەتتەۋ، ماڭىزدى نىسانداردى ورنالاستىرۋ جانە قوماقتى سوماداعى قاراجاتتى پايدالانۋ) تۇزىمىندەگى تالاپتارعا ساي، سايكەستى تولىمدىلىققا يە قامداۋشى جاق وندىرگەن جانە تيجارات ەتكەن مول مولشەردەگى ازىق – تۇلىكتەردى ساتىپ الۋ كەرەك. مەكتەپ اسحانالارىن مول مولشەردە ازىق – تۇلىكپەن قامدايتىن ساۋداگەرلەر زاڭدى تيجارات تولىمدىلىعىنا يە بولۋى، ءونىمنىڭ ساپاسى مەملەكەتتىڭ قاتىستى ولشەمدەرىنە ساي كەلۋى، سايكەستى قامداۋ قۋاتىنا يە بولۋى، جۋىرداعى 3 جىلدان بەرى ازىق – تۇلىك حاۋىپسىزدىگىنە قاتىستى شىرعالاڭ تۋىلماعان بولۋى نەمەسە ازىق – تۇلىك حاۋىپسىزدىگىنە قاتىستى جۇرت اڭىسىندىق وقيعالار جاعىندا شىنىمەن دە قاتەلىك وتكىزبەگەن بولۋى، زاڭعا اۋىر دارەجەدە قايشىلىق جاساپ، سەنىمدىلىكتەن ايرىلعانداردىڭ تىزىمدىگىنە ەنگىزىلمەگەن بولۋى كەرەك. مەكتەپتەر مەكتەپ اۋلاسىنداعى ازىق – تۇلىك حاۋىپسىزدىگىنە مەكتەپ باستىعى جاۋاپتى بولۋ ءتۇزىمىن تياناقتاندىرىپ، ازىق – تۇلىك حاۋىپسىزدىگى قىزمەتىن مەكتەپتىڭ ماڭىزدى تالقى مازمۇنىنا ەنگىزۋى، ءار وقۋ ماۋسىمىندا كەمىندە مەكتەپ اسحاناسىندا ءبىر رەت جۇمىس باسىنداعى قىزمەت ءماجىلىسىن اشۋى، ورتا – باستاۋىش مەكتەپتەردىڭ جاۋاپتىلارى مەن بالالار باقشالارىنىڭ جاۋاپتىلارى بىرگە تاماقتانۋ ءتۇزىمىن قاتاڭ اتقارۋى، مەكتەپ اسحاناسى الەۋمەتتىك يگىلىك سيپاتىندىق پرينسيپكە جانە پايدانى كوزدەمەۋ پرينسيبىندە تاباندى بولۋى، مول مولشەردەگى ازىق – تۇلىكتەردىڭ ينفورماتسياسىن اشىق جاريالاۋ ءتۇزىمىن كەمەلدەندىرۋى كەرەك.

قىزمەت باعدارناماسىندا مىنالار تالاپ ەتىلگەن: مەكتەپتەر مول مولشەردەگى ازىق – تۇلىكتەردى ساتىپ العاندا، العان زاتتاردى تەكسەرىپ وتكىزىپ الۋ ءتۇزىمىن قاتاڭ اتقارۋى، ازىق – تۇلىكتەردىڭ كەلۋ قاينارىن تەكتەۋ مۇمكىندىگىنە، ساپاسىنىڭ حاۋىپسىزدىگىنە كەپىلدىك ەتۋى كەرەك. ”ەكى ادام نەمەسە كوپ ادام بىرلەسىپ تەكسەرۋ“ ارقىلى وتكىزىپ الۋ ءتۇزىمىن ورناتىپ، توپتىق تۇردە تەكسەرىپ وتكىزىپ الۋ، وتكىزىپ الۋدى اشىق، جاريا ورىستەتۋ كەرەك. قامباعا كىرگىزۋ الدىندا تەكسەرىپ وتكىزىپ العان، تولىمدى بولعان مول مولشەردەگى ازىق – تۇلىكتەردى دەر كەزىندە قامباعا كىرگىزۋ، قاتىستى ينفورماتسيالاردى دەر كەزىندە تىزىمگە الۋ، ساقتاۋ مەن باسقارۋ «ازىق – تۇلىك سالاسىندا قىزمەت وتەۋ جاعىنداعى ازىق – تۇلىك حاۋىپسىزدىگىنە ساياتىن ىستەر ولشەمىنە» ۇيلەسەتىن بولۋى، اۋا الماساتىن، دىم تارتپايتىن ورىندا ساقتاۋ، ىندەت دانەكەرىندىك ورگانيزمدەردەن ءونىمدى ساقتانۋ قۇرىلعىلارى ورنالاستىرىلۋى، ۋلى، زالالدى ت.ب لاستاۋ قاينارىنان بەلگىلەنگەن ولشەمدەگى ارالىقتى ساقتاۋى كەرەك.

كەلۋ قاينارى: حالىق تورابى