شي جينپيڭ ا ق ش - نىڭ زۇڭتۇڭى ترامپپەن فۋشاندا ديدارلاستى

سول جەر ۋاقىتى 10 - ايدىڭ 30 - كۇنى مەملەكەت ءتوراعاسى شي جينپيڭ فۋشاندا ا ق ش - نىڭ زۇڭتۇڭى ترامپپەن ديدارلاستى.

سۋرەتتى شينحۋا اگەنتتىگىنىڭ ءتىلشىسى حۋاڭ جيڭۋىن تۇسىرگەن

«حالىق گازەتى»، 10 - ايدىڭ 30 - كۇنى، كورەيا فۋشان (تىلشىلەر دۋ شاڭزى، حۋ زىشي). سول جەر ۋاقىتى 10 - ايدىڭ 30 - كۇنى مەملەكەت ءتوراعاسى شي جينپيڭ فۋشاندا ا ق ش - نىڭ زۇڭتۇڭى ترامپپەن ديدارلاستى.

شي جينپيڭ بىلاي دەپ اتاپ كورسەتتى: جۇڭگو - ا ق ش قارىم - قاتىناسى ءبىزدىڭ بىرگە جەتەكشىلىك ەتۋىمىزدە جالپى تۇلعالىق ورنىقتىلىقتى ساقتادى. ەكى ەلدىڭ سەرىكتەس بولۋى، دوس بولۋى − تاريحتىڭ اڭداتپاسى ءارى رەالدىقتىڭ قاجەتى. ەكى ەلدىڭ مەملەكەت جاعدايى ۇقسامايدى، كەيبىر الاۋىزدىقتاردان ساقتانۋ قيىن، دۇنيە جۇزىندەگى الدىڭعى ەكى ءىرى ەكونوميكالىق تۇلعا رەتىندە، كەيدە قاقتىعىس تا بولادى، بۇل وتە قالىپتى. داۋىل مەن سىن - سايىس الدىندا، ەكى ەلدىڭ مەملەكەت باسشىلارى رولشى رەتىندە، بەتالىستى ويداعىداي يگەرىپ، جالپى جاعدايدى مەڭگەرىپ، جۇڭگو - ا ق ش قارىم - قاتىناسى سىندى الىپ كەمەنىڭ ورنىقتى العا باسۋىنا مۇمكىندىك جاساۋى كەرەك. مەن ترامپ زۇڭتۇڭمەن بىرگە جۇڭگو - ا ق ش قارىم - قاتىناسىنا بەرىك نەگىز قالاۋدى، سونداي - اق ەكى ەلدىڭ ءوز - ءوزىنىڭ دامۋىنا تاماشا ورتا ازىرلەۋدى قالايمىن.

شي جينپيڭ بىلاي دەپ باسا دارىپتەدى: جۇڭگو ەكونوميكاسىنىڭ دامۋ بەتالىسى جاقسى، بيىل الدىڭعى 3 توقسانداعى ارتۋ مولشەرى %5.2 كە جەتىپ، بۇكىل دۇنيە جۇزىندەگى زات ساۋداسى يمپورت - ەكسپورتى %4 ارتتى، بۇل ىشكى - سىرتقى قيىنشىلىقتاردى جەڭۋ ارقىلى جۇزەگە اسقان، وڭاي - وسپاق قولعا كەلمەگەن. جۇڭگو ەكونوميكاسى شالقار تەڭىز ىسپەتتى، كولەمى، كومەسكى كۇشى ءبىرشاما زور، ءبىزدىڭ ءتۇرلى حاۋىپ - قاتەر مەن سىن - سايىسقا توتەپ بەرۋگە سەنىمىمىز دە، قابىلەتىمىز دە بار. جۇڭگو كوممۋنيستىك پارتياسى 20 - كەزەكتى ورتالىق كوميتەتىنىڭ ءتورتىنشى جالپى ءماجىلىسى الداعى 5 جىلداعى حالىق شارۋاشىلىعى مەن قوعامدىق دامۋ پلانى جونىندەگى ۇسىنىستى قاراپ ماقۇلدادى. 70 نەشە جىلدان بەرى ءبىز جوبانى سوڭىنا دەيىن جاساۋعا تاباندى بولىپ، بىرىنەن سوڭ ءبىرىن ورىنداپ تىردىق، الدەكىمگە سايىس جاريالاپ، الدەكىمنىڭ ورنىن باسقىمىز كەلگەن جوق، قايتا زەيىن - زەردەنى شوعىرلاندىرا وتىرىپ ءوز ءىسىمىزدى ويداعىداي ىستەپ، ءوزىمىزدى ءتىپتى دە جاقسى سومداپ، دۇنيە جۇزىندەگى ءار ەلمەن دامۋ ورايىنان بىرگە يگىلىكتەندىك. بۇل − جۇڭگونىڭ تابىسقا جەتۋىندەگى ماڭىزدى قۇپيا سيفر. جۇڭگو رەفورمانى ونان ارى جاپپاي تەرەڭدەتىپ، سىرتقا ەسىك اشۋدى كەڭەيتىپ، ەكونوميكانىڭ ساپاسىنىڭ ءونىمدى جوعارىلاۋى مەن مولشەرىنىڭ ۇيلەسىمدى ارتۋىن كۇش سالا ىلگەرىلەتىپ، ادامنىڭ جان - جاقتى دامۋى مەن جالپى حالىقتىڭ بىرگە اۋقاتتانۋىن ىلگەرىلەتەدى، مۇنىڭ جۇڭگو مەن ا ق ش - تىڭ سەلبەستىگىنە اناعۇرلىم كەڭ ءورىس اشاتىندىعىنا سەنەمىن.

شي جينپيڭ بىلاي دەپ اتاپ كورسەتتى: ەكى ەلدىڭ ەكونوميكا - ساۋدا ۇيىرمەلەرى ماڭىزدى ەكونوميكا - ساۋدا ماسەلەلەرى جونىندە ىشكەرىلەي پىكىر اۋىستىرىپ، ماسەلەنى شەشۋدىڭ ورتاق تانىمىن قالىپتاستىردى. ەكى جاق ۇيىرمەلەرى سوڭعى قىزمەتتەردى تەز ارادا اشالاپ جانە بەلگىلەپ، ورتاق تانىمدى ويداعىداي قورعاپ، ويداعىداي تياناقتاندىرىپ، ناقتى تابىستار ارقىلى جۇڭگو مەن ا ق ش - نىڭ جانە دۇنيە ءجۇزى ەكونوميكاسىنىڭ ”كوڭىلىن ورنىقتىرۋى“ كەرەك. جۇڭگو مەن ا ق ش - نىڭ ەكونوميكا - ساۋدا قارىم - قاتىناسى تاياۋدا بۇراڭدىقتاردى باستان كەشىرىپ، ەكى جاققا دا وي سالدى. ەكونوميكا - ساۋدا ۇزدىكسىز جۇڭگو - ا ق ش قارىم - قاتىناسىنىڭ ورنىقتىرعىشىنا جانە ىلگەرىلەتكىشىنە اينالۋى، كەدەرگى جانە قاقتىعىس ءتۇيىنى بولماۋى كەرەك. ەكى جاق ۇلكەن ەسەپ جاساپ، سەلبەستىك الا كەلگەن ۇزاق بولاشاقتىق مۇددەگە كوبىرەك نازار اۋدارۋى، ءوزارا ءوش الاتىن قاتەرلى اينالىسقا تۇسپەۋى كەرەك. ەكى جاق ۇيىرمەلەرىنىڭ تەڭدىك، قۇرمەت ەتۋ، ءوزارا تيىمدىلىك جاساۋ پرينسيبى بويىنشا ۇزدىكسىز اڭگىمەلەسىپ، ماسەلە تىزىمدىگىن ۇزدىكسىز ىقشامداپ، سەلبەستىك تىزىمدىگىن ۇزارتۋىنا بولادى.

شي جينپيڭ بىلاي دەپ باسا دارىپتەدى: تىلدەسۋ قارسىلاسۋدان جاقسى. جۇڭگو مەن ا ق ش اراسىنداعى ءار ارنا، ءار جىك قارىم - قاتىناستى ساقتاپ، ءتۇسىنىسۋدى كۇشەيتۋى كەرەك. ەكى ەلدىڭ زاڭسىز قونىس اۋدارۋ مەن تەلەگراف الدامكوستىگىنە سوققى بەرۋ، اقشا جۋۋعا قارسى تۇرۋ، جاساندى زەردە، جۇقپالى اۋرۋلارعا توتەپ بەرۋ سياقتى سالالارداعى سەلبەستىگىنىڭ بولاشاعى جاقسى، باعىتتامالى تاراۋلار پىكىرلەسۋدى، اۋىس - كۇيىستى كۇشەيتىپ، ءوزارا ءتيىمدى سەلبەستىك ورىستەتۋى كەرەك. جۇڭگو مەن ا ق ش وڭىرلىك جانە حالىقارالىق ساحنادا دا ءتيىمدى ىقپالداستىق جاساۋى كەرەك. بۇگىنگى دۇنيە جۇزىندە ءالى دە كوپتەگەن قيىن ماسەلە بار، جۇڭگو مەن ا ق ش ءىرى ەلدەردىڭ جاۋاپكەرشىلىگىن بىرگە ايگىلەپ، ەكى ەلگە جانە دۇنيە جۇزىنە ءتيىمدى ءىرى ىستەردى، ناقتى ىستەردى، جاقسى ىستەردى قول ۇستاسا كوبىرەك ىستەي الادى. كەلەر جىلى جۇڭگو ازيا - تىنىق مۇحيت ەكونوميكالىق سەلبەستىك ۇيىمىنىڭ وتاعاسى ەلى بولادى، ا ق ش 20 ەل توبى باسشىلار ءماجىلىسىن وتكىزەدى. ەكى جاق ءبىرىن - ءبىرى قولداپ، ەكى رەتكى باسشىلار ءماجىلىسىنىڭ بەلسەندى تابىستارىنا قول جەتكىزىپ، دۇنيە ءجۇزى ەكونوميكاسىنىڭ ارتۋىن جەبەۋگە، دۇنيە ءجۇزى ەكونوميكاسىن جونگە سالۋدى كەمەلدەندىرۋگە ۇلەس قوسۋىنا بولادى.

ترامپ مىنالاردى ءبىلدىردى: ءتوراعا شي جينپيڭمەن كەزدەسكەنىمدى ماقتانىش سەزىنەمىن. جۇڭگو − ۇلى مەملەكەت، ءتوراعا شي جينپيڭ − جۇرت قۇرمەتىنە بولەنگەن ۇلى باسشى، سونداي - اق مەنىڭ كوپ جىلدىق جاقسى دوسىم، ءبىز وتە كوڭىلدى بولدىق. ا ق ش - جۇڭگو قارىم - قاتىناسى ەجەلدەن جاقسى، بولاشاقتا ءتىپتى دە جاقسى بولادى، جۇڭگو مەن ا ق ش - تىڭ بولاشاعىنىڭ ءتىپتى دە كوركەم بولۋىن ءۇمىت ەتەمىن. جۇڭگو − ا ق ش - تىڭ ەڭ ۇلكەن سەرىگى، ەكى ەل قول ۇستاسا وتىرىپ دۇنيە جۇزىندە كوپتەگەن ءىرى ىستەردى ىستەي الادى، بولاشاقتا ا ق ش - جۇڭگو سەلبەستىگىندە اناعۇرلىم زور تابىستارعا قول جەتكىزەدى. جۇڭگو 2026 - جىلعى ازيا - تىنىق مۇحيت ەكونوميكالىق سەلبەستىك ۇيىمى باسشىلارىنىڭ بەيرەسمي ءماجىلىسىن وتكىزەدى، ا ق ش 20 ەل توبى باسشىلار ءماجىلىسىن وتكىزەدى، ەكى جاقتىڭ تابىسقا جەتكەندىگىن قۋانا كورىپ وتىرمىز.

ەكى ەلدىڭ مەملەكەت باسشىلارى ەكى جاقتىڭ ەكونوميكا - ساۋدا، ەنەرگيا سياقتى سالالارداعى سەلبەستىگىن كۇشەيتىپ، گۋمانيتارلىق اۋىس -كۇيىستى جەبەۋگە قوسىلدى.

ەكى ەلدىڭ مەملەكەت باسشىلارى ۇنەمىلىك بارىس - كەلىستى ساقتاۋعا قوسىلدى. ترامپ كەلەر جىلى جۇڭگوعا ەرتەرەك ساپارلاي كەلۋدى كۇتۋدە، ءتوراعا شي جينپيڭدى ا ق ش - عا ساپارلاي بارۋعا ۇسىنىس ەتتى.

ساي چي، ۋاڭ ي، حى ليفىڭ قاتارلىلار كەزدەسۋدە بىرگە بولدى.

كەلۋ قاينارى: حالىق تورابى