شي جينپيڭ ازيا - تىنىق مۇحيت ەكونوميكالىق سەلبەستىك ۇيىمىنىڭ 32 ـ رەتكى باسشىلار بەيرەسمي ماجىلىسىنە قاتىناستى ءارى ماڭىزدى ءسوز سويلەدى

جەرگىلىكتى ۋاقىت 10 ـ ايدىڭ 31 ـ كۇنى تۇستەن بۇرىن ازيا - تىنىق مۇحيت ەكونوميكالىق سەلبەستىك ۇيىمىنىڭ 32 ـ رەتكى باسشىلار بەيرەسمي ءماجىلىسىنىڭ 1 ـ كەزەڭدىك ءماجىلىسى كورەيانىڭ چيڭجوۋىنداعى حىباي ءماجىلىس ورتالىعىندا وتكىزىلدى. مەملەكەت ءتوراعاسى شي جينپيڭ ماجىلىسكە قاتىناستى ءارى «جالپىعا ءتيىمدى، سيىسىمدى اشىق ازيا - تىنىق مۇحيت ەكونوميكاسىن بىرگە قۇرايىق» دەگەن تاقىرىپتا ماڭىزدى ءسوز سويلەدى.

□سۋرەتتى شينحۋا اگەنتتىگىنىڭ ءتىلشىسى حۋاڭ جيڭۋىن تۇسىرگەن

شينحۋا اگەنتتىگىنىڭ 10 ـ ايدىڭ 31 ـ كۇنى كورەيانىڭ چيڭجوۋىنان بەرگەن حابارى (تىلشىلەر حان مو، لۋ رۇي). جەرگىلىكتى ۋاقىت 10 ـ ايدىڭ 31 ـ كۇنى تۇستەن بۇرىن ازيا - تىنىق مۇحيت ەكونوميكالىق سەلبەستىك ۇيىمىنىڭ 32 ـ رەتكى باسشىلار بەيرەسمي ءماجىلىسىنىڭ 1 ـ كەزەڭدىك ءماجىلىسى كورەيانىڭ چيڭجوۋىنداعى حىباي ءماجىلىس ورتالىعىندا وتكىزىلدى. مەملەكەت ءتوراعاسى شي جينپيڭ ماجىلىسكە قاتىناستى ءارى «جالپىعا ءتيىمدى، سيىسىمدى اشىق ازيا - تىنىق مۇحيت ەكونوميكاسىن بىرگە قۇرايىق» دەگەن تاقىرىپتا ماڭىزدى ءسوز سويلەدى.

شي جينپيڭ ءماجىلىس الاڭىنا كەلگەندە كورەيانىڭ زۇڭتۇڭى لي زايميڭ ىستىق ىقىلاسپەن قارسى الدى.

شي جينپيڭ سوزىندە بىلاي دەپ اتاپ كورسەتتى: ازيا - تىنىق مۇحيت ەكونوميكالىق سەلبەستىك ۇيىمى قۇرىلعان 30 نەشە جىلدان بەرى، ازيا - تىنىق مۇحيت ءوڭىرىن الەمدىك اشىق دامۋدىڭ الدىڭعى لەگىندە جۇرۋگە جەتەكتەپ، ازيا - تىنىق مۇحيت ءوڭىرىنىڭ بۇكىل جەر شارى ەكونوميكاسىنداعى ەڭ ومىرشەڭ كۇشكە يە وڭىرگە اينالۋىنا دەم بەردى. قازىر دۇنيە ءجۇزىنىڭ 100 جىلدىق وزگەرىسى جەدەل قۇبىلىپ، ازيا - تىنىق مۇحيت ءوڭىرىنىڭ دامۋى ءدوپ كەلگەن ورنىقسىز، ايقىنسىز فاكتورلار كوبەيدى. سۇراپىل داۋىلدار مەن اساۋ تولقىن بولعان سايىن قيىندىقتى سولعۇرلىم بىلەك بىرىكتىرە جەڭۋ كەرەك. تاراپتار ازيا - تىنىق مۇحيت ەكونوميكالىق سەلبەستىك ۇيىمىنىڭ ەكونوميكانىڭ ارتۋىن جەبەۋ، حالىقتىڭ قۇت ـ ىرىسىن ارتتىرۋ اۋەلگى ماقساتىنان جازباي، اشىق دامۋ بارىسىندا ورايدان بىرگە يگىلىكتەنۋگە، تەڭ يگىلىككە كەنەلۋدى جۇزەگە اسىرۋعا تاباندى بولىپ، جالپىعا ءتيىمدى، سيىسىمدى ەكونوميكانىڭ جاھاندانۋىن ىلگەرىلەتىپ، ازيا - تىنىق مۇحيت ورتاق تۇلعاسىن قۇرۋ كەرەك.

شي جينپيڭ 5 ۇسىنىستى ورتاعا قويدى.

ءبىرىنشى، كوپ جاقتى ساۋدا ءتۇزىلىسىن بىرگە قورعاۋ كەرەك. ناعىز كوپ جاقتىلىقتى امالياتتا ايگىلەپ، دۇنيە جۇزىلىك ساۋدا ۇيىمىن وزەك ەتكەن كوپ جاقتى ساۋدا ءتۇزىلىسىنىڭ بەدەلى مەن ونىمدىلىگىن جوعارىلاتىپ، حالىقارالىق ەكونوميكا ـ ساۋدا ەرەجەسىنىڭ داۋىرمەن بىرگە العا باسۋىن ىلگەرىلەتىپ، وركەندەپ كەلە جاتقان ەلدەردىڭ ورىندى ۇقىق ـ مۇددەسىن اناعۇرلىم ويداعىداي قامتاماسىزداندىرۋ كەرەك.

ەكىنشى، اشىق وڭىرلىك ەكونوميكالىق ورتانى بىرگە قالىپتاستىرۋ كەرەك. ساۋدا مەن قارجى قوسۋدىڭ ەركىن، قولايلى بولۋىن ۇزدىكسىز ىلگەرىلەتىپ، قازىنا ـ فينانس سالاسىنداعى سەلبەستىكتى تەرەڭدەتىپ، وڭىرلىك ەكونوميكانىڭ ءبىر تۇلعالانۋ اياق الىسىن ورنىقتى ىلگەرىلەتىپ، ءوزارا ۇشتاسۋدى، توعىسۋدى، بىرگە العا باسۋدى ىلگەرىلەتىپ، ازيا - تىنىق مۇحيت ەركىن ساۋدا رايونى قۇرىلىسى ءۇشىن كۇش ـ قۋات توپتاۋ كەرەك.

ءۇشىنشى، كاسىپ سالاسى تىزبەگى مەن قامداۋ تىزبەگىنىڭ ورنىقتى، ىركىلىسسىز بولۋىن بىرگە قورعاۋ كەرەك. ”قول اجىراتۋ“ ەمەس، قايتا ”قول ۇستاسۋعا“، ”تىزبەكتى ءۇزۋ“ ەمەس، قايتا ”تىزبەكتى ۇزارتۋعا“ تاباندى بولىپ، اناعۇرلىم كوپ مۇددە توعىسۋ تۇيىندەرىن بەلسەنە قاراستىرىپ، قامداۋ تىزبەگىنىڭ اشىق دامۋىن قولداۋ كەرەك. قاتتى قۇرىلعىلاردى تۇتاستىرۋدى، جۇمساق قۋاتتى ۇلاستىرۋدى، تىلەكتەردى توعىستىرۋدى ۇزدىكسىز ناقتى، ەگجەي ـ تەگجەيلى ىستەپ، ازيا - تىنىق مۇحيت ءوڭىرىنىڭ ەسىك اشۋ، دامۋ نەگىزىن ونان ارى بەكەمدەۋ كەرەك.

ءتورتىنشى، ساۋدانىڭ سيفرلانۋىن، جاسىلدانۋىن بىرگە ىلگەرىلەتۋ كەرەك. سيفرلى تەحنولوگيانىڭ شەكارا اتتاعان ساۋدانى جەبەۋ رولىن تولىق ساۋلەلەندىرىپ، ءتۇرلى جاسىل قامالداردى الاستاپ، جاسىل كاسىپ، تازا ەنەرگيا جانە جاسىل كەن سەلبەستىگىن كەڭەيتۋ كەرەك.

بەسىنشى، جالپىعا ءتيىمدى، سيىسىمدى دامۋدى بىرگە جەبەۋ كەرەك. حالىقتى وزەك ەتكەن دامۋ ۇستانىمىنا تاباندى بولىپ، دامۋدىڭ بىركەلكىسىزدىگى ماسەلەسىن كۇش سالا شەشىپ، ەكونوميكانىڭ جاھاندانۋىنىڭ اناعۇرلىم سيىسىمدى، اناعۇرلىم باياندى بولۋىن ىلگەرىلەتىپ، وڭىردەگى جالپى حالىقتى اناعۇرلىم ويداعىداي يگىلىككە كەنەلتۋ كەرەك. جۇڭگو جاق ءار جاقپەن سەلبەسىپ، ”ءبىر بەلدەۋ، ءبىر جولدى“ جوعارى ساپامەن بىرگە قۇرۋدى ىلگەرىلەتىپ، ءار ەلمەن بىرگە دامۋعا، گۇلدەنىپ ـ كوركەيۋدەن بىرگە يگىلىكتەنۋگە كۇش سالادى.

شي جينپيڭ بىلاي دەپ باسا دارىپتەدى: جۇڭگو سىرتقا ەسىك اشۋ سىندى نەگىزگى مەملەكەت ساياساتىنا باستان ـ اياق تاباندى بولىپ، ءىس جۇزىندىك ارەكەتى ارقىلى اشىق دۇنيە ءجۇزى ەكونوميكاسىن قۇرۋدى ىلگەرىلەتەدى. جۇڭگو كوممۋنيستىك پارتياسى 20 ـ كەزەكتى ورتالىق كوميتەتىنىڭ ءتورتىنشى جالپى ءماجىلىسى ”15 ـ بەسجىلدىق“ جوبانى جاساۋ جونىندەگى ۇسىنىستى ماقۇلدادى. جۇڭگو وسىنى وراي ەتىپ، رەفورمانى ونان ارى جاپپاي تەرەڭدەتىپ، جوعارى دەڭگەيدەگى سىرتقا ەسىك اشۋدى تاباندىلىقپەن كەڭەيتىپ، جۇڭگو ۇلگىسىندەگى وسىزامانداندىرۋدىڭ جاڭا جەتىستىكتەرى ارقىلى ازيا - تىنىق مۇحيت ءوڭىرى مەن دۇنيە جۇزىنە ۇزدىكسىز جاڭا وراي جاراتادى.

ءماجىلىستى كورەيا زۇڭتۇڭى لي زايميڭ باسقاردى، نەگىزگى تاقىرىبى — ”باياندى بولاشاق قۇرايىق“.

ۋاڭ ي جوعارىداعى قيمىلعا قاتىناستى.