شي جينپيڭ كورەيا زۇڭتۇڭى لي زايميڭمەن كەڭەستى

جەرگىلىكتى ۋاقىت 11 - ايدىڭ 1 - كۇنى تۇستەن كەيىن كورەيا زۇڭتۇڭى لي زايميڭ جۇڭگونىڭ مەملەكەت ءتوراعاسى شي جينپيڭمەن چيڭجوۋ مۇراجايىندا كەڭەس وتكىزدى.

□ سۋرەتتى شينحۋا اگەنتتىگىنىڭ ءتىلشىسى شىن حۇڭ تۇسىرگەن

شينحۋا اگەنتتىگىنىڭ 11 ـ ايدىڭ 1 ـ كۇنى كورەيانىڭ چيڭجوۋىنان بەرگەن حابارى (تىلشىلەر دۋ باييۇي، دۇڭ شۋە). جەرگىلىكتى ۋاقىت 11 ـ ايدىڭ 1 ـ كۇنى تۇستەن كەيىن كورەيا زۇڭتۇڭى لي زايميڭ جۇڭگونىڭ مەملەكەت ءتوراعاسى شي جينپيڭمەن چيڭجوۋ مۇراجايىندا كەڭەس وتكىزدى.

11 ـ ايداعى چيڭجوۋدا كۇز رايى قويۋ. شي جينپيڭ اۆتوكولىكپەن جەتكەندە كورەيانىڭ قۇرمەت اترەتى سالتاناتپەن قارسى الدى.

لي زايميڭ شي جينپيڭدى ىستىق ىقىلاسپەن قارسى الدى. ەكى ەلدىڭ مەملەكەت باسشىلارى قول الىسىپ، ەستەلىك سۋرەتكە ءتۇستى.

شي جينپيڭ لي زايميڭمەن بىرگە كوزدەن كەشىرۋ مىنبەسىنە شىقتى. اسكەري وركەستر جۇڭگو مەن كورەيا ەكى ەلدىڭ مەملەكەت ءانىن ورىندادى. شي جينپيڭ لي زايميڭنىڭ سەرىك بولۋىندا قۇرمەت قاراۋىلىن كوزدەن كەشىردى. ەكى ەلدىڭ مەملەكەت باسشىلارى ەكى جاقتان سەرىك بولىپ كەلگەندەرمەن جەكە ـ جەكە قول الىسىپ قۇرمەت ءبىلدىردى.

قارسى الۋ سالتىنان كەيىن، ەكى ەلدىڭ مەملەكەت باسشىلارى كەڭەس وتكىزدى.

شي جينپيڭ بىلاي دەپ اتاپ كورسەتتى: جۇڭگو مەن كورەيا كوشىپ كەتپەيتىن ماڭىزدى جاقىن كورشىلەر، سونداي ـ اق بولىنبەيتىن سەلبەستىك سەرىكتەر. ديپلوماتيالىق قارىم ـ قاتىناس ورناتقان 33 جىلدان بەرى، ەكى ەل قوعامدىق ءتۇزىم جانە يدەولوگيا پارقىنان اتتاپ ءوتىپ، ءار سالاداعى اۋىس ـ كۇيىستى، سەلبەستىكتى بەلسەنە ىلگەرىلەتىپ، ءبىر ـ ءبىرىن تابىسقا جەتكىزۋدى، بىرگە گۇلدەنىپ ـ كوركەيۋدى جۇزەگە اسىردى. فاكت جۇڭگو - كورەيا قارىم ـ قاتىناسىنىڭ اقاۋسىز، ورنىقتى دامۋىن ىلگەرىلەتۋ باستان ـ اياق ەكى ەل حالقىنىڭ ءتۇبىرلى مۇددەسىنە ۇيلەسەتىن، ءداۋىر اعىمىنا ۇيلەسەتىن دۇرىس تالعام ەكەندىگىن دالەلدەدى. جۇڭگو جاق جۇڭگو - كورەيا قارىم ـ قاتىناسىنا باسا ءمان بەرەدى، كورەياعا قاراتىلعان ساياساتتا ۇلاسپالىلىقتى، ورنىقتىلىقتى ساقتايدى، كورەيا جاقپەن بايلانىستى كۇشەيتىپ، سەلبەستىكتى تەرەڭدەتىپ، ورتاق مۇددەنى كەڭەيتىپ، سىن ـ سايىستارعا قول ۇستاسا توتەپ بەرىپ، جۇڭگو - كورەيا ستراتەگيالىق سەلبەستىك سەرىكتەستىك قارىم ـ قاتىناسىنىڭ ورنىقتى قاداممەن الىسقا جەتۋىن ىلگەرىلەتىپ، ءوڭىردىڭ بەيبىتشىلىگى مەن دامۋىن اناعۇرلىم مول وڭ ەنەرگيامەن قامداۋدى قالايدى.

شي جينپيڭ جۇڭگو - كورەيا قارىم ـ قاتىناسىنىڭ جاڭا جاعدايىن اشۋ جونىندە مىناداي 4 ۇسىنىس قويدى:

ءبىرىنشى، ستراتەگيالىق بايلانىستى كۇشەيتىپ، ءوزارا سەنىمدىلىك نەگىزىن بەكەمدەۋ كەرەك. جۇڭگو - كورەيا قارىم ـ قاتىناسىنا ۇزاق بولاشاقتىق تۇرعىدان قاراپ، ءوزارا قۇرمەت ەتۋ بارىسىندا بىرگە دامىپ، ورتاقتىققا ۇمتىلىپ، پارىقتاردى ساقتاۋ بارىسىندا سەلبەسىپ تەڭ يگىلىككە كەنەلۋ كەرەك. ءارقايسىسىنىڭ قوعامدىق تۇزىمىنە جانە دامۋ جولىنا قۇرمەت ەتىپ، ءبىر ـ ءبىرىنىڭ وزەكتى مۇددەسىمەن جانە ءجىتى قاداعالاپ وتىرعان كەلەلى ىستەرىمەن ساناسىپ، دوستىق كەڭەس ارقىلى قايشىلىقتار مەن الاۋىزدىقتاردى ويداعىداي ءبىر جاقتى ەتۋ كەرەك. ەكى ەل اراسىنداعى تىلدەسۋ ارناسى مەن اۋىس ـ كۇيىس مەحانيزمىنەن ويداعىداي پايدالانىپ، ەكى ەل قارىم ـ قاتىناسىن دامىتۋعا كۇش توپتاۋ كەرەك.

ەكىنشى، ءوزارا پايدا جەتكىزۋ سەلبەستىگىن تەرەڭدەتىپ، مۇددە دانەكەرىن بەكەمدەۋ كەرەك. كورشىنى تابىسقا جەتكىزۋ وزىمىزگە كومەكتەسكەندىك سانالادى. جۇڭگو جاق كورەيا جاقپەن بىرگە ءوزارا پايدا جەتكىزىپ تەڭ يگىلىككە كەنەلۋ پرينسيبىنەن جازباي، جۇڭگو - كورەيا ەركىن ساۋدا كەلىسىمىنىڭ 2 ـ كەزەڭدىك كەلىسسوزىن جەدەل ىلگەرىلەتىپ، جاساندى زەردە، بيولوگيالىق ءدارى ـ دارمەك جاساۋ، جاسىل كاسىپ سالاسى، قارتتار ەكونوميكاسى سياقتى جاڭادان گۇلدەنگەن سالالارداعى سەلبەستىك كومەسكى كۇشىن تەرەڭ اشىپ، ەكونوميكا ـ ساۋدا سەلبەستىگىنىڭ ساپاسىن جوعارىلاتىپ دارەجەسىن ءوسىرۋدى ىلگەرىلەتۋدى قالايدى. جۇڭگو - كورەيا ەكى ەل بىردەي ينتەرنەتتە قۇمار ويناۋعا جانە تەلەگراف الدامكوستىگىنە سوققى بەرۋگە باسا ءمان بەرەدى، ەكى جاقتى جانە وڭىرلىك اۋماقتا سەلبەستىك جاساسىپ، ەكى ەل حالىق بۇقاراسىنىڭ ءومىرى مەن مال ـ مۇلىك حاۋىپسىزدىگىن اناعۇرلىم ويداعىداي قورعاۋىنا بولادى.

ءۇشىنشى، حالىقتار سۇيىسپەنشىلىگىن كۇشەيتىپ، حالىقتار جۇرەگىنىڭ توعىسۋىن جەبەۋ كەرەك. قوعامدىق پىكىر مەن حالىق تىلەگىنە جەتەكشىلىك ەتۋدى كۇشەيتىپ، ۇنامدى ينفورماتسيالاردى كوبىرەك تاراتىپ، كەرەناۋ بەتالىستى تەجەۋ كەرەك. اقاۋسىز، پايدالى گۋمانيتارلىق اۋىس ـ كۇيىس ورىستەتىپ، ءوزارا تۇسىنىستىكتى كۇشەيتىپ، حالىق تىلەگى نەگىزىن بەكەمدەۋ كەرەك. ادامداردىڭ بارىس ـ كەلىسىنە قولايلىلىق جاساپ، جاستار مەن ورەندەر، مەديالار، اقىلماندار قويماسى، جەرگىلىكتى ورىن سياقتىلاردىڭ بارىس ـ كەلىسىن جانداندىرىپ، ەكى ەل حالقىنىڭ تىلەك توعىستىرۋىن جەبەپ، جۇڭگو - كورەيا قارىم ـ قاتىناسىنىڭ اقاۋسىز، ورنىقتى دامۋىنا تاماشا راي قالىپتاستىرۋ كەرەك.

ءتورتىنشى، كوپ جاقتى ىستەستىكتى جيىلەتىپ، بەيبىت دامۋدى بىرگە جەبەۋ كەرەك. جۇڭگو جاق كورەيا جاقتىڭ ازيا - تىنىق مۇحيت ەكونوميكالىق سەلبەستىك ۇيىمىنىڭ باسشىلار بەيرەسمي ءماجىلىسىن تابىستى وتكىزگەندىگىن قۇتتىقتايدى، ازيا - تىنىق مۇحيت ەكونوميكالىق سەلبەستىك ۇيىمىنىڭ وتاعاسى ەلى بولۋدى مىندەتىنە العان تاماشا ورايدا ءارقايسى جاقپەن بىرگە ازيا - تىنىق مۇحيت ەركىن ساۋدا رايونى اياق الىسىن جانە وڭىرلىك ەكونوميكانىڭ ءبىر تۇلعالانۋىن ىلگەرىلەتىپ، ازيا - تىنىق مۇحيت ورتاق تۇلعاسىن بىرگە قۇرۋدى قالايدى. جۇڭگو - كورەيا ەكى جاق ناعىز كوپ جاقتىلىقتى بىرگە امالياتتا ايگىلەپ، كوپ جاقتى ساۋدا ءتۇزىلىسىن قورعاۋى، حالىقارالىق باسقارۋدىڭ اناعۇرلىم ءادىل، ۇيلەسىمدى بەتالىسقا قاراي دامۋىن ىلگەرىلەتۋى كەرەك.

شي جينپيڭ بىلاي دەپ باسا دارىپتەدى: جۇڭگو كوممۋنيستىك پارتياسى 20 ـ كەزەكتى ورتالىق كوميتەتىنىڭ ءتورتىنشى جالپى ءماجىلىسى ”15 ـ بەسجىلدىق“ جوبا ۇسىنىسىن قاراپ ماقۇلدادى. جۇڭگو ەكونوميكاسىنىڭ نەگىزى مىعىم، باسىمدىعى كوپ، سەرپىمدىلىگى كۇشتى، كومەسكى قۋاتى زور، ۇزاق ۋاقىت جاقسارۋدىڭ تىرەكتىك شارت ـ جاعدايى جانە نەگىزگى اۋقىمى وزگەرگەن جوق، الداعى جەردە جوعارى دەڭگەيدە سىرتقا ەسىك اشۋدى بۇلجىماي كەڭەيتىپ، دۇنيە جۇزىندەگى ءار ەلمەن دامۋ ورايىنان بىرگە يگىلىكتەنەدى.

لي زايميڭ مىنالاردى ءبىلدىردى: ءتوراعا شي جينپيڭنىڭ اراعا 11 جىل سالىپ كورەيادا تاعى دا مەملەكەتتىك ساپاردا بولعاندىعىن قىزۋ قارسى الامىن، وسى رەتكى ساپار كورەيا - جۇڭگو قارىم ـ قاتىناسى جونىنەن كەلەلى ءمان الادى. كورەيا مەن جۇڭگو ديپلوماتيالىق قارىم ـ قاتىناس ورناتقاننان بەرى ءار سالاداعى ءوزارا پايدا جەتكىزۋ سەلبەستىگى ۇزدىكسىز تەرەڭدەپ، ءارقايسىسىنىڭ ەكونوميكالىق دامۋىن پارمەندى ىلگەرىلەتتى. كورەيا مەن جۇڭگو كورشى، سونداي ـ اق بولىنبەيتىن سەرىكتەر. كورەيا جاق جۇڭگومەن قارىم ـ قاتىناسىنا باسا ءمان بەرەدى، جۇڭگو جاقپەن بىرگە قۇلشىنىپ، ەكى جاقتى دوستىق سەلبەستىك قارىم ـ قاتىناسىنىڭ ءتىپتى دە زور دامۋشىلىقتارعا يە بولۋىن ىلگەرىلەتۋدى قالايدى. ەكى جاق جوعارى جىكتەگىلەردىڭ بارىس ـ كەلىسىن جيىلەتىپ، ساياسي پارتيالار، جەرگىلىكتى ورىندار اۋىس ـ كۇيىسىن كۇشەيتىپ، الاۋىزدىقتى ۇيلەسىمدى ءبىر جاقتى ەتۋى كەرەك. جۇڭگونىڭ ”15 ـ بەسجىلدىق“ جوباسى الداعى بەس جىلداعى ەكونوميكالىق دامۋ بەتالىسى مەن ماڭىزدى ءتۇيىنىن ايقىندادى، كورەيا جاق جۇڭگوعا قاراتىلعان ءوزارا پايدا جەتكىزۋ سەلبەستىگىن كۇشەيتىپ، كاسىپ سالاسى مەن قامداۋ تىزبەگىنىڭ ورنىقتىلىعىن قورعاپ، ەكى ەل حالقىنا اناعۇرلىم مول قۇت ـ ىرىس اكەلۋدى قالايدى. كورەيا جاق جۇڭگو جاقپەن بىرگە گۋمانيتارلىق اۋىس ـ كۇيىستى جيىلەتىپ، حالىقتار سۇيىسپەنشىلىگىن جاقسارتۋدى قالايدى. كورەيا جاق جۇڭگو جاقتىڭ 2026 ـ جىلعى ازيا - تىنىق مۇحيت ەكونوميكالىق سەلبەستىك ۇيىمىنىڭ باسشىلار بەيرەسمي ءماجىلىسىن باسقارىپ وتكىزۋىن قولدايدى، جۇڭگو جاقپەن حالىقارالىق جانە وڭىرلىك ىستەردە بايلانىس جاساۋدى جانە سايكەسۋدى كۇشەيتىپ، ءوڭىردىڭ جانە بۇكىل جەر شارىنىڭ بەيبىت دامۋىن بىرگە جەبەۋدى قالايدى.

كەڭەستەن كەيىن ەكى ەلدىڭ مەملەكەت باسشىلارى ەكى جاقتىڭ ەكونوميكا ـ ساۋدا، فينانس، اۋىل شارۋاشىلىعى، زاڭ اتقارۋ، عىلىم ـ تەحنولوگيا سياقتى سالالارداعى سەلبەستىك حۇجاتتارىن اۋىستىرۋ سالتىنا بىرگە كۋا بولدى.

سول كۇنى كەشتە لي زايميڭ شي جينپيڭمەن شاعىن كولەمدى دوستىق اۋىس ـ كۇيىس جاسادى ءارى شي جينپيڭگە ارناپ قارسى الۋ قوناعاسىن وتكىزدى.

ساي چي، ۋاڭ ي قاتارلىلار جوعارىداعى قيمىلعا قاتىناستى.