«شي جينپيڭ ەل باسقارۋ جونىندەنىڭ» 5 - تومىنىڭ اعىلشىن تىلىندەگى باسىلىمىن تانىستىرۋ ءماجىلىسى يوحاننەسبۋرگتە وتكىزىلدى

«حالىق گازەتى»، 12 - ايدىڭ 3 - كۇنى، يوحاننەسبۋرگ (تىلشىلەر ياڭ وۋ، جىڭ شياڭ)، «شي جينپيڭ ەل باسقارۋ جونىندەنىڭ» 5 - تومىنىڭ اعىلشىنشا باسىلىمىن تانىستىرۋ ءماجىلىسى 12 - ايدىڭ 3 - كۇنى وڭتۇستىك افريكانىڭ يوحاننەسبۋرگىندە وتكىزىلدى.

ماجىلىسكە قاتىناسقان جۇڭگولىق، شەتەلدىك سيلى قوناقتار مىنالاردى ءبىلدىردى: «شي جينپيڭ ەل باسقارۋ جونىندەنىڭ» 5 - تومى شي جينپيڭ جاڭا ءداۋىر جۇڭگوشا سوتسياليزم يدەياسىنىڭ ەڭ جاڭا دامۋ جەتىستىكتەرىن شوعىرلى بەينەلەپ، جۇڭگو ۇلگىسىندەگى وسىزامانداندىرۋدىڭ ايقىن ەرەكشەلىگىن، امالياتتىق جولىن جانە شۇعىلالى تابىستارىن جۇيەلى تۇردە ايگىلەپ، دۇنيە جۇزىندەگى وڭتۇستىك ەلدەرىنىڭ وسىزاماندانۋعا بىرگە بەت الۋىنا ۇلگى الارلىق جۇڭگو اقىل - پاراساتى مەن جۇڭگو جوباسىن ازىرلەدى. جۇڭگو مەن وڭتۇستىك افريكا − بريكس ەلدەرىنىڭ ماڭىزدى مۇشەسى، دۇنيە ءجۇزىنىڭ وڭتۇستىگىندەگى ماڭىزدى كۇش، ەكى جاق جۇڭگو مەن افريكانىڭ وسىزاماندانۋدى قول ۇستاسا ىلگەرىلەتۋدەگى 10 ءىرى سەرىكتەستىك ارەكەتىن تياناقتاندىرىپ، 4 ءىرى دۇنيە جۇزىلىك باستامانى بىرگە امالياتتا ايگىلەپ، دۇنيە ءجۇزىنىڭ وڭتۇستىگىن دامىتۋعا، گۇلدەندىرۋگە، جۇڭگو مەن افريكانىڭ وسىزاماندانۋ ارمانىن بىرگە جۇزەگە اسىرۋىنا جەتەكشىلىك ەتۋگە ۇلەس قوسادى.

وڭتۇستىك افريكا افريكالىقتار كونگرەسى باس شۋجيىنىڭ 2 - ورىنباسارى، زۇڭتۇڭ سارايى جوبالاۋ، باقىلاۋ جانە باعالاۋ مينيسترى ماروپەني راموحاۋپا ارناۋ سوزىندە مىنالاردى ءبىلدىردى: «شي جينپيڭ ەل باسقارۋ جونىندەنىڭ» 5 - تومىندا ءتوراعا شي جينپيڭنىڭ جۇڭگو ۇلگىسىندەگى وسىزامانداندىرۋ، كەدەيلىكتەن ارىلتۋ، كەدەيلىكتى ازايتۋ، عىلىم - تەحنيكادا جاڭالىق اشۋ جانە دۇنيە جۇزىلىك دامۋ سەلبەستىگى سياقتى جاقتارداعى ماڭىزدى ۇستانىمدارى جۇيەلى بايىمدالىپ، دۇنيە جۇزىندەگى وڭتۇستىك ەلدەرىنە پايدالى ۇلگى ازىرلەدى. وڭتۇستىك افريكا مەن جۇڭگو كوپ جاقتىلىققا تاباندى بولۋ، بىرگە دامۋدى جەبەۋ سياقتى جاقتاردا بارىنشا قابىسادى، وڭتۇستىك افريكا «2030 - جىلعا دەيىنگى مەملەكەتتىڭ دامۋ جوباسىن» ”ءبىر بەلدەۋ، ءبىر جول“ باستاماسىمەن ۇشتاستىرۋدى ۇزدىكسىز ىلگەرىلەتىپ، دۇنيە ءجۇزىنىڭ وڭتۇستىگىنىڭ حالىقارالىق ىستەردەگى ۋاكىلدىك سيپاتى مەن ءسوز بيلىگىن بىرگە جوعارىلاتىپ، دۇنيە جۇزىلىك جونگە سالۋ جۇيەسىنىڭ اناعۇرلىم ءادىل، ۇيلەسىمدى باعىتقا قاراي دامۋىن ىلگەرىلەتەدى.

وڭتۇستىك افريكا حالىقتىق پارلامەنت ىستەرىنىڭ ءتوراعاسى سەدريك فروليك مىنالاردى ءبىلدىردى: «شي جينپيڭ ەل باسقارۋ جونىندەنىڭ» 5 - تومىنداعى جۇڭگونىڭ بولاشاق دامۋىنىڭ ۇلى جوباسى وڭتۇستىك افريكانىڭ جۇڭگونىڭ ەڭ جاڭا دامۋ ۇستانىمى مەن ديپلوماتيالىق ساياساتىن تۇسىنۋىنە تەرەزە اشتى. كىتاپتاعى حالىقتى بارىنەن جوعارى قويۋ، جاسىل دامۋ، بىرگە اۋقاتتانۋ جانە ادامزاتتىڭ تاعدىرلاس ورتاق تۇلعاسىن قۇرۋ سياقتى ءبىرقىدىرۋ ماڭىزدى ۇستانىم ءار ەلدىڭ وسىزامانداندىرۋ قۇرىلىسىن ىلگەرىلەتۋىنە جانە جونگە سالۋ قابىلەتىن جوعارىلاتۋىنا ماڭىزدى وي سالادى.

قيمىل بارىسىندا جۇڭگو جاق شەتەلدىك سيلى قوناقتارعا «شي جينپيڭ ەل باسقارۋ جونىندەنىڭ» 5 - تومىنىڭ اعىلشىنشا باسىلىمىن ۇسىندى. ماجىلىسكە قاتىناسقان ماماندار وسىزامانداندىرا دامۋدان بىرگە يگىلىكتەنۋ تاجىريبەلەرى، دۇنيە ءجۇزىنىڭ وڭتۇستىگى جانە دۇنيە ءجۇزىن جونگە سالۋ، بريكس ەلدەرىنىڭ سەلبەستىگى، ”ءبىر بەلدەۋ، ءبىر جولدى“ جوعارى ساپامەن بىرگە قۇرۋ، سونداي - اق جاڭا داۋىردەگى جۇڭگو - افريكا سەلبەستىگىنىڭ مازمۇنىن بايىتۋ سياقتى كەڭەستىك تاقىرىپتار توڭىرەگىندە پىكىر اۋىستىرىپ، تالقى ورىستەتتى.

بۇل رەتكى قيمىلدى جۇڭگو مەملەكەتتىك كەڭەسىنىڭ اقپارات كەڭسەسى، جۇڭگو شەتەل تىلدەرى مەكەمەسى، جۇڭگونىڭ وڭتۇستىك افريكادا تۇراتىن باس ەلشىحاناسى بىرگە وتكىزدى، جۇڭگو مەن شەتەلدىڭ ءار سالا قايراتكەرلەرىنەن 200 دەن استام ادام قيمىلعا قاتىناستى.

كەلۋ قاينارى: حالىق تورابى