شي جينپيڭ فرانسيا زۇڭتۇڭى ماكرونمەن چىڭدۋدا دوستىق اۋىس ـ كۇيىس جاسادى

12 ـ ايدىڭ 5 ـ كۇنى مەملەكەت ٴتوراعاسى شي جينپيڭ سىچۋان ولكەسى چىڭدۋ قالاسى دۋجياڭياندا فرانسيا زۇڭتۇڭى ماكرونمەن دوستىق اۋىس ـ كۇيىس جاسادى. سۋرەتتە: شي جينپيڭ مەن حانىمى پىڭ لييۋان ماكرونمەن جانە ونىڭ حانىمىمەن بىرگە سۋرەتكە ٴتۇستى.□ سۋرەتتى شينحۋا اگەنتتىگىنىڭ ٴتىلشىسى ديڭ حايتاۋ تۇسىرگەن

شينحۋا اگەنتتىگىنىڭ 12 ـ ايدىڭ 5 ـ كۇنى چىڭدۋدان بەرگەن حابارى (تىلشىلەر سۇن ي، ۋ گۋاڭيۇي). 12 ـ ايدىڭ 5 ـ كۇنى مەملەكەت ٴتوراعاسى شي جينپيڭ سىچۋان ولكەسى چىڭدۋ قالاسىنداعى دۋجياڭياندا فرانسيا زۇڭتۇڭى ماكرونمەن دوستىق اۋىس ـ كۇيىس جاسادى.

قىس باسىنداعى دۋجياڭياندا تاۋلار جاسىل جەلەك جامىلعان. ماكرون مەن حانىمى جەتكەن كەزدە شي جينپيڭ مەن پىڭ لييۋان ىستىق ىقىلاسپەن قارسى الدى. شي جينپيڭ ماكروننىڭ ”ىرىستى مەكەنگە“ ساپارلاي كەلگەنىن قارسى الىپ، بىلاي دەدى: بىلتىر ٴسىز مەنى اتا مەكەنىڭىز جوعارى پيرەنەس ولكەسىنە بارۋعا ۇسىنىس ەتتىڭىز، ٴسىزدىڭ وسى جولعى ساپارىڭىزدىڭ جۇڭگو جونىندەگى تانىمىڭىزدى ونان ارى بايىتا تۇسەتىندىگىنە سەنەمىن.

ەكى ەلدىڭ مەملەكەت باسشىلارى مەن حانىمدارى يانگۇڭ جولىن بويلاي اڭگىمەلەستى.

شي جينپيڭ دۋجياڭياننىڭ تاريحى مەن ماڭىزىن تانىستىرىپ، بىلاي دەپ اتاپ كورسەتتى: دۋجياڭيان سۋ يگىلىگى ينجەنەرياسى _ دۇنيە جۇزىندە قازىرگە دەيىن پايدالانىلىپ كەلە جاتقان بىردەن ـ ٴبىر ەرتە زامانعى سۋ يگىلىگى ينجەنەرياسى، سونداي ـ اق ادامزات پەن تابيعاتتىڭ جاراسىمدى قاتار ٴومىر ٴسۇرۋىنىڭ ەڭ العاشقى تابىستى امالياتتارىنىڭ ٴبىرى، ونى سالۋ بارىسى جۇڭحۋا ۇلتىنىڭ ٴوزىن تالىقپاي الۋەتتەندىرۋ، جاپا ـ ماشاقاتتان قورىقپاۋ، باتىلدىقپەن ٴورىس اشۋ رۋحىن تولىق بەينەلەدى. ٴار رەت دۋجياڭيانعا كەلگەن سايىن اتا ـ بابالارىمىزدىڭ جەرگىلىكتى جاعدايعا، ىڭعايىنا قاراي ىستەۋ، تابيعات پەن ادامنىڭ بىرلىگى، سۋدى تىزگىندەپ حالىققا پايدا جەتكىزۋ جاعىنداعى ۇلىلىعىن سەزىنىپ، ودان ەل باسقارۋ اقىل ـ پاراساتىن قابىلدايمىن. فرانسۋز ۇلتى دا قايتپاس قايسار رۋحقا يە. جۇڭگو _ فرانسيا ەكى ەل باسقا ەلدەرگە قاراعاندا ٴتىپتى دە ٴوزارا ٴتۇسىنىسۋى، ٴوزارا قۇرمەت ەتۋى كەرەك.

ماكرون مىنالاردى ٴبىلدىردى: دۋجياڭياننىڭ تاۋى جاسىل، سۋى تۇنىق، كورىنىسى كوز تارتادى. 2000 جىلدان استام ۋاقىتتىڭ الدىندا سالىنعان سۋ يگىلىگى ينجەنەرياسى كۇنى بۇگىنگە دەيىن رولىن ساۋلەلەندىرىپ كەلەدى، جۇڭگو حالقىنىڭ ەڭبەكشىلدىگى، پاراساتتىلىعى ادامدى تاڭ قالدىرادى. فرانسيا _ جۇڭگو ەكى ەلدىڭ دە ۇزاق تاريحي مادەنيەتى بار، ەكى ەل حالقىنىڭ تاماشا تۇرمىسقا تالپىنىسى ۇشتاسقان، فرانسيا مەن جۇڭگو سەلبەستىگىندە دامۋ مەن گۇلدەنۋدى بىرگە جوسپارلاۋعا، ەكى ەل حالقىن باقىتقا كەنەلتۋگە بولادى.

ەكى ەلدىڭ مەملەكەت باسشىلارى مەن حانىمدارى سۋ جاعاسىنداعى حۋايگۋ سامالدىعىندا وتىرىپ شاي ٴىشىپ، الەم جايلى اقتارىلا اڭگىمەلەستى.

شي جينپيڭ بىلاي دەپ باسا دارىپتەدى: مەملەكەتتىڭ قۇدىرەتتەنۋى، ۇلتتىڭ گۇلدەنۋى زاتتىق وركەنيەتتىڭ قوردالانۋىن قاجەت ەتەدى، رۋحاني وركەنيەتتىڭ ارلەنۋىن دە قاجەت ەتەدى. مادەنيەت سەنىمى بار ۇلت عانا تابان تىرەپ تۇرا الادى، ورنىقتى تۇرا الادى، ۇزاققا جەتە الادى. جۇڭحۋا وركەنيەتى _ دۇنيە جۇزىندەگى بىردەن ـ ٴبىر ٴۇزىلىس جاساماعان، سونداي ـ اق مەملەكەت فورماتسياسىمەن دامىپ قازىرگە جەتكەن ۇلى وركەنيەت، كورنەكتى ۇلاسپالىلىق، جاسامپازدىق، ٴبىر تۇتاستىق، سيىسىمدىلىق، بەيبىتشىلىك سيپاتى بار. جۇڭگو _ فرانسيا ەكى ەل جەكە ـ جەكە شىعىس پەن باتىس وركەنيەتىنىڭ كورنەكتى ۋاكىلدەرى. ەكى ەلگە ورتاق دەربەس، وزىنە ـ ٴوزى قوجايىن بولۋ رۋحى وزدەرىنىڭ تەرەڭ مادەنيەت تامىرىنان باستاۋ العان. جۇڭگو مەن فرانسيانىڭ ديپلوماتيالىق قارىم ـ قاتىناس ورناتۋى دەربەس، وزىنە ـ ٴوزى قوجايىن بولعان ەكى ەلدىڭ ”قول الىسۋى“ بولىپ قانا قويماي، ەكى ۇلكەن شۇعىلالى وركەنيەتتىڭ توعىسۋى. وزگەرىس پەن بىلىقپالىق قاباتتاسقان حالىقارالىق جاعداي الدىندا جۇڭگو مەن فرانسيا سىندى تاريحي مادەنيەتتى ەكى ٴىرى ەلدىڭ تىلدەسۋ، سەلبەسۋ ارقىلى دۇنيە ٴجۇزىنىڭ بەيبىتشىلىگىنە، ورنىقتىلىعىنا جانە ادامزاتتىڭ دامۋىنا، العا باسۋىنا اناعۇرلىم زور ۇلەس قوساتىندىعىنا سەنەمىن.

ماكرون بىلاي دەدى: قازىر حالىقارالىق جاعداي جەدەل وزگەرۋدە، ايقىنسىزدىققا تولى. فرانسيا جاق جۇڭگو جاقپەن بايلانىستى، سايكەسۋدى كۇشەيتىپ، قاقتىعىستاردى تىلدەسۋ، كەڭەسۋ ارقىلى شەشۋگە تاباندى بولىپ، دۇنيە ٴجۇزىنىڭ بەيبىتشىلىگى مەن ورنىقتىلىعىن قول ۇستاسا قورعاۋدى قالايدى.

شي جينپيڭ مەن حانىمى ماكرون مەن حانىمىن تۇسكى استا بىرگە بولۋعا ۇسىنىس ەتىپ، ۇزدىكسىز ىشكەرىلەي پىكىرلەستى.

ەكى ەلدىڭ مەملەكەت باسشىلارى قويۋ بايلانىستى ساقتاپ، جۇڭگو مەن فرانسيانىڭ جالپى بەتتىك ستراتەگيالىق سەرىكتەستىك قارىم ـ قاتىناسىنىڭ ۇزدىكسىز العا دامۋىن بىرگە ىلگەرىلەتۋگە ٴبىر اۋىزدان قوسىلدى.

ساپار كەزىندە ەكى جاق الەمدىك باسقارۋدى كۇشەيتۋ، الەمدىك كليمات پەن قورشاعان ورتانىڭ سىن ـ سايىسىنا سەلبەسە توتەپ بەرۋ، يادرو ەنەرگياسىنان بەيبىت پايدالانۋ سالاسىنداعى سەلبەستىكتى ۇزدىكسىز ىلگەرىلەتۋ، اۋىل شارۋاشىلىعى مەن ازىق ـ تۇلىك اۋىس ـ كۇيىسى جانە سەلبەستىگى، ۋكراينا جاعدايى مەن پالەستينا جاعدايى جونىندە بىرلەسكەن مالىمدەمە جاريالادى.

ۋاڭ ي جوعارىداعى قيمىلدارعا قاتىناستى.