بايلىق تابىلدى! قۇمىلدان ساپ كۆارتس كەنى تابىلدى

انار بۇلت \ شينجياڭ گازەتىنىڭ ءتىلشىسى ۋي يۇڭگۇي حابارلايدى. جۋىردا قۇمىل قالالىق جاراتىلىستىق بايلىق مەكەمەسى قۇمىل قالاسىنىڭ قاراماعىنداعى وڭىردەن تۇڭعىش رەت 4N5 دارەجەدەگى ساپ كۆارتس شيكىزات كەنى (ءبىر ءبولىمى 4N8 دارەجەسىنە جەتەدى) بايقالعانىن جاريالاعان.

2025 – جىلى 4 – ايدا، جاراتىلىستىق بايلىق مينيسترلىگى «جاڭادان بايقالعان كەن تۇرلەرى جونىندەگى ۇقتىرۋدى» جاريالاعان، مۇنىڭ ىشىندە جاڭا كەن ءتۇرى — ساپ كۆارتس كەنى تۇراقتاندىرىلعان. قاتىستى تانىستىرۋعا قاراعاندا، ساپ كۆارتس كەنى دەگەنىمىز كەندى تاڭداۋ، قورىتۋ ارقىلى قول جەتكىزگەن كرەمني قوس توتىعىنىڭ ساپتىق دارەجەسى %99.995 تەن تومەن بولماعان، جارتىلاي وتكىزگىش، فوتو ەلەكتر قاتارلى جوعارى – جاڭا تەحنولوگيالىق سالالاردا قولدانۋ تالابىن قاناعاتتاندىراتىن تاۋ جىنىسىن كورسەتەدى. ساپ كۆارتس كەنىنىڭ ماتەريالى وپتيكالىق تالشىق، كۆارتس تيگەل، كۆارتس اينەك، مونوكريستال كرەمني، كوپ كريستالدى كرەمني قاتارلى جوعارى – جاڭا تەحنولوگيالىق ونىمدەردى وندىرۋدە ماڭىزدى رولعا يە، ستراتەگيالىق جاڭا گۇلدەنگەن كاسىپ سالاسىنداعى نەگىزدىك ماتەريالعا جاتادى. دۇنيە ءجۇزى كولەمىندە ساپ كۆارتس ماتەريالى كەمشىل، باعاسى اسا قىمبات، ونىڭ ۇستىنە، بايلىق قاينارى بىرتىندەپ سارقىلۋدا.

حابارعا قاراعاندا، جۋىرداعى جىلداردان بەرى، ەلىمىز جاڭا كەزەكتى كەن ىزدەۋدە جەتىسىككە جەتۋ ستراتەگيالىق ارەكەتى ارقىلى حىنانداعى شىعىس چينليڭ، شينجياڭداعى التاي قاتارلى وڭىرلەردە كوپ جەردەن ساپ كۆارتس كەنىن بايقاعان، ەلىمىز بويىنشا كوپتەگەن كاسىپورىندار مەن عىلىمي زەرتتەۋ ورىندارى جەكە – جەكە تەحنولوگيالىق جاقتان قامال الۋدى ورىستەتىپ، 4N5 دارەجەسىنەن جوعارى سىناقتىق ونىمدەرگە ءساتتى قول جەتكىزگەن، ءبىر ءبولىم ۇلگى زاتتار 4N8 دارەجەسىنە جەتىپ، ساپ كۆارتس كەنىن تەكسەرىپ باعالاۋ، بايلىق قاينارىن بارلاۋ، ىشكەرىلەي قورىتۋ، باعىتتامالى تۇردە قاجەتسىز قۇرامنان ارىلتۋ قاتارلى جاقتاردا ماڭىزدى جەتىستىككە قول جەتكىزىپ، جەرگىلىكتى بايلىق قاينارىنان پايدالانىپ، ساپ كۆارتس قۇمىن ءوندىرۋدى سالالاندىرۋدا ماڭىزدى قادام باسقان.

كەلۋ قاينارى: حالىق تورابى