جۇڭگونىڭ كامبودجادا تۇراتىن ەلشىلىگى جۇڭگو ازاماتتارىنا ”جوعارى ەڭبەكاقى“ شىرعاسىنان ساقتانۋدى ەسكەرتتى

شينحۋا اگەنتتىگىنىڭ ءتىلشىسى ۋ چاڭۋەي 1 – ايدىڭ 12 – كۇنى پنومپەننەن حابارلايدى. جۇڭگونىڭ كامبودجادا تۇراتىن باس كونسۋلحاناسى 1 – ايدىڭ 12 – كۇنى كونسۋلدىق ەسكەرتۋ جاريالاپ، جۇڭگو ازاماتتارىنا باسقالاردىڭ سوزىنە الدانباۋدى، ”جوعارى ەڭبەكاقى“ شىرعاسىنان ساقتانۋدى، كامبودجاعا شەكارادان ۇرلانىپ ءوتۋ ارقىلى بارماۋدى ەسكەرتكەن.

ءتىلشىنىڭ جۇڭگونىڭ كامبودجادا تۇراتىن ەلشىلىگىنەن ۇعىسۋىنشا، ەلشىلىك كامبودجادا تۇراتىن جۇڭگو ازاماتتارىنىڭ حاۋىپسىزدىگى مەن زاڭدى ۇقىق – مۇددەسىنە وسكەلەڭ ءمان بەرىپ، كامبودجا جاقتىڭ جۇڭگو ازاماتتارىنا باعىتتالعان ءتۇرلى قىلمىستىق ارەكەتتەرگە سوققى بەرۋىن ۇزدىكسىز ىلگەرىلەتەدى. جۋىردا كامبودجا ساقشى جاعى جەكە – جەكە پنومپەن قالاسى مەن تىبوڭكىمۋم ولكەسىندە ادام بارىمتالاۋعا، جۇڭگو ازاماتتارىن زاڭسىز قاماپ قويۋعا قاتىستى ەكى رەتكى دەلونى انىقتاپ، جۇڭگو ازاماتتارىنان زيانعا ۇشىراعان 10 ادامدى ءساتتى قۇتقارىپ، جۇڭگولىق قىلمىس كۇماندىلارىنان 8 ادامدى قولعا تۇسىرگەن.

جۇڭگونىڭ كامبودجادا تۇراتىن ەلشىلىگى مىنانى تاعى دا قاتاڭ ەسكەرتەدى: بىرىنشىدەن، جۇڭگو ازاماتتارىنىڭ حاۋىپسىزدىگىنە قاتىستى كامبودجادا تۋىلعان دەلولارداعى قىلمىس كۇماندىلارىنىڭ كوبى جۇڭگولىقتار. بارشا جۇڭگو ازاماتتارى حاۋىپسىزدىك پەن ساقتىق تانىمىن شىنايى كۇشەيتىپ، دوستاسقاندا اباي بولۋى، باسقالارعا سەنە سالماۋى، جەكەلىك ينفورماتسياسىن الباتى اشكەرەلەمەۋى كەرەك. ەكىنشىدەن، قاتىستى دەلولاردىڭ كوبى تەلەكوم مەن ينتەرنەتتەن پايدالانىپ الدامكوستىك ىستەۋ قاتارلى زاڭعا قايشى قىلمىستىق ارەكەتتەرمەن تىعىز قاتىستى. كوپشىلىكتىڭ ”جوعارى ەڭبەكاقىنى“ كوزدەپ قاتە جولعا تۇسۋدەن، باسقالاردىڭ زاڭسىز قاماۋعا الۋى، زورلىق – زومبىلىقپەن ازاپتاۋى قاتارلى حاۋىپ – قاتەرلەرگە ۇشىراپ قالۋدان، ءتىپتى ومىرىنە حاۋىپ توندىرۋدەن ساقتانۋىن ءۇمىت ەتەمىز. ۇشىنشىدەن، زيانعا ۇشىراعان كوپتەگەن ادامدار مەملەكەت شەكاراسىنان ۇرلانىپ ءوتۋ قاتارلى زاڭسىز تاسىلدەرمەن كامبودجاعا كەلگەن. مەملەكەت شەكاراسىنان ۇرلانىپ ءوتۋ — زاڭعا قايشى ارەكەت، بۇلاي ىستەگەن ادام ءبىر جاعىنان زاڭدىق جاۋاپكەرشىلىكتى ارقالاۋى كەرەك، ەندى ءبىر جاعىنان، كامبودجا جاق ۇرلانىپ وتۋشىلەردىڭ سالاۋاتى، ورنى قاتارلى ينفورماتسيانى بىلمەگەن جاعدايدا، دەر كەزىندە قۇتقارۋعا شاراسىز، وسىنىڭ سالدارىنان قاتىستى ادامدار اسا زور حاۋىپكە ۇشىرايدى.

جۇڭگونىڭ كامبودجادا تۇراتىن ەلشىلىگى جۇڭگو ازاماتتارىنىڭ باعىن سىناپ كورۋ ويىندا بولماۋىن، تاۋەكەلگە بەل بۋماۋىن ءۇمىت ەتەدى. ەگەر جۇڭگو ازاماتتارىنىڭ كامبودجادا جۇمىس ىستەۋ تۋرالى كۇماندى سۇراۋلارى بولسا، جۇڭگونىڭ كامبودجادا تۇراتىن ەلشىلىگىنە تەلەفون جالعاپ سۇراۋىنا بولادى. ەگەر ءوزىڭىزدىڭ نەمەسە قاسىڭىزداعى ادامداردىڭ تەلەكوم الدامكوستىگىنە ۇشىراۋ، باسقالاردىڭ زاڭسىز قاماپ قويۋى قاتارلى حاۋىپتى جاعدايلارعا جولىققانىن بايقاساڭىز، دەرەۋ جۇڭگو مەن كامبودجا ەكى ەل ساقشىلارىنا حابارلاسىڭىز نەمەسە جۇڭگونىڭ كامبودجادا تۇراتىن ەلشىلىگىنەن كومەك سۇراڭىز.

كەلۋ قاينارى: حالىق تورابى