شي جينپيڭ كانادا زۇڭليى كارنەيمەن كەزدەستى

1 ـ ايدىڭ 16 ـ كۇنى تۇستەن بۇرىن مەملەكەت ءتوراعاسى شي جينپيڭ بەيجيڭ حالىق سارايىندا جۇڭگوعا رەسمي ساپارمەن كەلگەن كانادا زۇڭليى كارنەيمەن كەزدەستى.

□ سۋرەتتى شينحۋا اگەنتتىگىنىڭ ءتىلشىسى شيە حۋانچى تۇسىرگەن

شينحۋا اگەنتتىگىنىڭ 1 ـ ايدىڭ 16 ـ كۇنى بەيجيڭنەن بەرگەن حابارى (ءتىلشى دۇڭ شۋە). 1 ـ ايدىڭ 16 ـ كۇنى تۇستەن بۇرىن مەملەكەت ءتوراعاسى شي جينپيڭ بەيجيڭ حالىق سارايىندا جۇڭگوعا رەسمي ساپارمەن كەلگەن كانادا زۇڭليى كارنەيمەن كەزدەستى.

شي جينپيڭ بىلاي دەپ اتاپ كورسەتتى: بىلتىر 10 ـ ايدا ءبىز كورەيانىڭ چيڭجوۋىندا كەزدەسىپ، جۇڭگو مەن كانادا قارىم ـ قاتىناسىنىڭ قالپىنا كەلۋ، جاقسارۋ جاڭا جاعدايىن اشتىق. ەكى جاق ءار سالاداعى سەلبەستىكتى قالپىنا كەلتىرۋ جانە قايتا باستاۋ جونىندە ىشكەرىلەي تالقى جۇرگىزىپ، بەلسەندى جەتىستىكتەرگە قول جەتكىزدى. جۇڭگو — كانادا قارىم ـ قاتىناسىنىڭ اقاۋسىز، ورنىقتى دامۋى ەكى ەلدىڭ ورتاق مۇددەسىنە ۇيلەسەدى ءارى دۇنيە ءجۇزىنىڭ بەيبىتشىلىگىنە، ورنىقتىلىعىنا جانە دامۋىنا، گۇلدەنۋىنە دە پايدالى. ەكى جاق تاريحقا، حالىققا، دۇنيە جۇزىنە جاۋاپتى بولۋ پوزيتسياسىمەن جۇڭگو — كانادا جاڭاشا ستراتەگيالىق سەرىكتەستىك قارىم ـ قاتىناسىن ورناتۋدى ىلگەرىلەتىپ، جۇڭگو — كانادا قارىم ـ قاتىناسىنىڭ اقاۋسىز، ورنىقتى، باياندى دامۋ ارناسىنا قادام تاستاۋىن ىلگەرىلەتىپ، ەكى ەل حالقىن اناعۇرلىم ويداعىداي باقىتقا كەنەلتۋى كەرەك.

شي جينپيڭ جۇڭگو — كانادا قارىم ـ قاتىناسى جونىندە مىناداي 4 پىكىردى العا قويدى: ءبىرىنشى، ءوزارا قۇرمەت ەتەتىن سەرىكتەر بولۋى كەرەك. جۇڭگو مەن كانادا ديپلوماتيالىق قارىم ـ قاتىناس ورناتقان 55 جىلدان بەرى، ەكى ەل قارىم ـ قاتىناسى بوران ـ شاشىندى جانە اۋمالى ـ توكپەلى كەزەڭدەردى باستان وتكىزىپ، قۇندى تاريحي تاجىريبەلەر جانە امالياتتىق شابىت قالدىردى. جۇڭگو مەن كانادا ەكى ەلدىڭ مەملەكەت جاعدايى ۇقساماعانىمەن، الايدا ءبىر ـ ءبىرىنىڭ يەلىك ۇقىعىنا جانە تەرريتوريا تۇتاستىعىنا قۇرمەت ەتۋى، ءبىر ـ ءبىرىنىڭ تاڭداعان ساياسي تۇزىمىنە جانە دامۋ جولىنا قۇرمەت ەتۋى، مەملەكەت پەن مەملەكەتتىڭ دۇرىس وتاسۋ جولىنا تاباندى بولۋى كەرەك. ەكىنشى، بىرگە داميتىن سەرىكتەر بولۋى كەرەك. جۇڭگو مەن كانادانىڭ ەكونوميكا ـ ساۋدا قارىم ـ قاتىناسىنىڭ ءمانى — ءوزارا پايدا جەتكىزىپ تەڭ يگىلىككە كەنەلۋ. ەكى جاق بىردەي سەلبەسۋ بارىسىندا پايداعا كەنەلەدى. جۇڭگونىڭ جوعارى ساپالى دامۋى، جوعارى دەڭگەيلى ەسىك اشۋى جۇڭگو مەن كانادا سەلبەستىگىنە ۇزدىكسىز جاڭا وراي ازىرلەيدى، جاڭا ءورىس كەڭەيتەدى. ەكى جاق سەلبەستىكتى جەبەۋ جاعىندا قوسۋ امالىن كوبىرەك قولدانىپ، ۇنامسىز ءتىزىم جاعىندا ازايتۋ امالىن كوبىرەك قولدانىپ، اناعۇرلىم تەرەڭ، اناعۇرلىم كەڭ سەلبەستىك ارقىلى ورتاق مۇددە دانەكەرىن ۇزدىكسىز بەكەمدەۋى كەرەك. ءۇشىنشى، ءبىر ـ بىرىنە سەنەتىن سەرىكتەر بولۋى كەرەك. حالىق تىلەگىنىڭ توعىسۋى — ەڭ نەگىزگى، ەڭ بەرىك، ەڭ باياندى ۇلاسۋ ـ تۇتاسۋ، ەكى جاق ەكى ەلدى وقۋ ـ اعارتۋ، مادەنيەت، ساياحات، دەنە تاربيە، جەرگىلىكتى ورىن سياقتى ءار سالاسىن اۋىس ـ كۇيىستى، سەلبەستىكتى كۇشەيتۋگە شابىتتاندىرىپ، ادامداردىڭ بارىس ـ كەلىسىنە قولايلىلىق تۋدىرىپ، حالىق تىلەگى نەگىزىن بەكەمدەۋى كەرەك. ءتورتىنشى، ءوزارا ىستەستىك جاسايتىن سەرىكتەر بولۋى كەرەك. بولشەكتەنگەن دۇنيە ءجۇزى ادامزات ءدوپ كەلگەن ورتاق سىن ـ سايىستارعا توتەپ بەرە المايدى، شىعار جول — ناعىز كوپ جاقتىلىقتى قورعاپ جانە امالياتتا ايگىلەپ، ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋ. جۇڭگو جاق كانادا جاقپەن بىرلەسكەن مەملەكەتتەر ۇيىمى، 20 ەل توبى، ازيا — تىنىق مۇحيت ەكونوميكالىق سەلبەستىك ۇيىمى سياقتى جۇلگەلەر اياسىندا بايلانىس جاساپ جانە سايكەسىپ، الەمدىك سىن ـ سايىستارعا بىرگە توتەپ بەرۋدى قالايدى.

كارنەي مىنالاردى ءبىلدىردى: كانادانىڭ جۇڭگومەن دوستىق بارىس ـ كەلىسىنىڭ تاريحى ۇزاق، ەكى ەل ەكونوميكاسى ءبىرىن ـ ءبىرى جوعارى دەڭگەيدە تولىقتايدى، كەڭ كولەمدى ورتاق مۇددەسى بار، ورايعا تولى. كانادا جاق جۇڭگو جاقپەن سەرپىندى، باياندى جاڭاشا ستراتەگيالىق سەرىكتەستىك قارىم ـ قاتىناس ورناتىپ، ەكى جاق حالقىنا اناعۇرلىم كوپ قۇت ـ ىرىس اكەلۋدى قالايدى. ءتوراعا شي جينپيڭنىڭ باسشىلىعىندا جۇڭگو ەكونوميكاسى جەدەل دامىپ، عىلىم ـ تەحنولوگيادا جاڭالىق اشۋ تابىستارى كورنەكتى بولىپ، دۇنيە ءجۇزى ەكونوميكاسىنىڭ ارتۋىنا قوزعاۋشى كۇش ازىرلەدى. كانادا جاق ءبىر جۇڭگو ساياساتىن اتقارۋدى قايتالاي دارىپتەيدى، جۇڭگو جاقپەن ءبىر بەتالىستا ىلگەرىلەۋگە كۇش سالىپ، ءوزارا قۇرمەت ەتىپ، قول ۇستاسا قۇلشىنىپ، ەكونوميكا ـ ساۋدا، ەنەرگيا، اۋىل شارۋاشىلىعى، فينانس، وقۋ ـ اعارتۋ، كليمات وزگەرىسى سياقتى سالالارداعى سەلبەستىكتى كەڭەيتەدى جانە كۇشەيتەدى. كوپ جاقتىلىق — دۇنيە ءجۇزى حاۋىپسىزدىگىنىڭ، ورنىقتىلىعىنىڭ ىرگە تاسى، ءتوراعا شي جينپيڭنىڭ الەمدىك باسقارۋ باستاماسىن العا قويۋىنىڭ كەلەلى ماڭىزى بار. وزگەرىس پەن بىلىقپالىق قاباتتاسقان حالىقارالىق جاعداي الدىندا كانادا جاق جۇڭگو جاقپەن كوپ جاقتى سايكەسۋدى جيىلەتىپ، كوپ جاقتىلىقتى جانە بىرلەسكەن مەملەكەتتەر ۇيىمىنىڭ بەدەلىن قورعاۋدى، دۇنيە ءجۇزىنىڭ بەيبىتشىلىگىن، ورنىقتىلىعىن بىرگە قورعاۋدى قالايدى.

كەزدەسۋدەن كەيىن، ەكى جاق «جۇڭگو مەن كانادا باسشىلارى ديدارلاسۋىنىڭ بىرلەسكەن مالىمدەمەسىن» جاريالادى.

ۋاڭ ي كەزدەسۋگە قاتىناستى.