بەتتى ساقتاۋ | باس بەت ەتۋ
| حات ساندىعى
| حابارلاسىڭىز | ءبىز تۋرالى
جۇڭگو كوممۋنيستىك پارتياسى اقپارات تورابى
جۇڭگو كوممۋنيستىك پارتياسى اقپارات تورابى
جۇڭگو كوممۋنيستىك پارتياسى اقپارات تورابى
2026.01.30 14:39 كەلۋ قاينارى : حالىق تورابى
1 – ايدىڭ 30 – كۇنى تاڭ سارىدە، شينجياڭ كوكتوعاي اۋداندىق ورمان شارۋاشىلىعى جانە جايىلىم مەكەمەسى جۋىرداعى جاعداي تۋرالى حابارلاندىرۋ شىعاردى، جۋىردا شينجياڭ كوكتوعاي اۋدانى كوكتوعاي قالاشىعى تاراتى قىستاعىنىڭ ماڭىندا شاڭعى تەبۋگە بارعان ساياحاتشىنى ءىلبىس جارالاعان وقيعا تۋىلعان سوڭ، 1 – ايدىڭ 28 – كۇنى سول وڭىردە تاعى دا ءىلبىس بايقالعان ءارى مالشىلاردىڭ قوراسىنا ءتۇسىپ، 35 تۇياق قويدى ءولتىرىپ، 5 تۇياق قويدى جارالاپ كەتكەن.
ءىلبىستىڭ تاعى دا ادامدى، مالدى جارالاۋىنان ساقتانۋ ءۇشىن، «شينجياڭ ۇيعۇر اۆتونوميالى رايونىنىڭ ‹جۇڭحۋا حالىق رەسپۋبليكاسىنىڭ جابايى حايۋاناتتاردى قورعاۋ زاڭىن› اتقارۋ ادىسىندەگى» بەلگىلەمەلەرگە ساي، كوكتوعاي اۋداندىق ورمان شارۋاشىلىعى جانە جايىلىم مەكەمەسى كاسىپتىك قىزمەتكەرلەردى ۇيىمداستىرىپ، قىزمەت جوباسىن بەلگىلەپ، ءىلبىستىڭ ەرەكشەلىگىنە ساي مالشىلاردىڭ قوراسىنا شىرعا قۇرىپ، 1 – ايدىڭ 29 – كۇنى ساعات 9 اينالاسىندا ازىق ءۇشىن قوراعا قايتا اينالىپ سوققان ءىلبىستى ۇستاعان ءارى كوكتوعاي اۋدانددىق جابايى حايۋاناتتاردى قۇتقارۋ ورتالىعىنا حاۋىپسىز جەتكىزگەن.
كاسىپتىك قىزمەتكەرلەردىڭ العاشقى قادامدا تەكسەرىپ تۇراقتاندىرۋىنشا، بۇل ءىلبىس جۋىردا ساياحاتشىنى جارالاعان ءىلبىس ەكەن، ول 2 جاس اينالاسىنداعى تولىق جەتىلىپ بولماعان ءىلبىس ەكەن. مامانداردىڭ ساراپتاۋىنشا، وسى جاستاعى ءىلبىستىڭ قىس مەزگىلىندە تۇزدە دەربەس تىرشىلىك ەتۋ قۋاتى ءبىرشاما ءالسىز بولادى، تاۋلى وڭىردە قاسات قار ءبىرشاما قالىڭ بولعاندىقتان، ازىق اۋلاۋى قيىنعا سوعىپ، ازىق اۋلاۋ ءۇشىن ەلدى مەكەندەرگە قاراي ويىسقان. قازىر بۇل ءىلبىستىڭ دەنساۋلىق جاعدايى جاقسى، جارالانۋ جاعدايى بايقالماعان. كوكتوعاي اۋداندىق جابايى حايۋاناتتاردى قۇتقارۋ ورتالىعى كۇن جىلىنعان سوڭ عىلىمي ساراپتاۋ جۇرگىزۋ ارقىلى ۇيلەسىمدى ۋاقىتتا تۇزگە قويا بەرۋدى جوسپارلاعان.
كوكتوعاي اۋداندىق ورمان شارۋاشىلىعى جانە جايىلىم مەكەمەسى بارشا جۇرتقا جانە ساياحاتشىلارعا مىنانى ەسكەرتەدى: قىس مەزگىلى جابايى حايۋاناتتاردىڭ ازىق اۋلاۋى قيىنعا تۇسەتىن مەزگىل بولعاندىقتان، بىرنەشە رەت ەلدى مەكەندەردە ءىلبىس بايقالدى، حاۋىپسىزدىككە قاتىستى ەسكەرتۋلەرگە، ءسوزسىز، بويسۇنىپ، جابايى حايۋاناتتار جولىققاندا ارالىق ساقتاۋعا جانە دەر كەزىندە ساقشىعا مالىمدەۋگە نازار اۋدارىپ، باس اماندىعىڭىزعا كەپىلدىك ەتىڭىز!
كەلۋ قاينارى: حالىق تورابى
