بۇگىن كەشتەن باستاپ، شينجياڭنىڭ كوپ جەرىندە قار جاۋادى!

2 - ايدىڭ 2 - كۇنى تۇننەن 3 - كۇنى كۇندىزگە دەيىن التاي ايماعىنىڭ سولتۇستىگىندەگى تاۋلى وڭىرلەر، تارباعاتاي ايماعىنىڭ سولتۇستىگىندەگى تاۋلى وڭىرلەر قاتارلى جەرلەردىڭ ءىشىنارا وڭىرلەرىندە قىرباق قار جاۋدى. تارباعاتاي ايماعىنىڭ سولتۇستىك بولەگى، التاي ايماعىنىڭ باتىس بولەگى، ءۇرىمجى قالاسى، سانجى وبلىسى قاتارلى جەرلەردە قيىس شىعىستان 4 تە 5 بال جەل سوعادى؛ بۇراتالا وبلىسىنىڭ شىعىس بولەگى، تارباعاتاي ايماعىنىڭ وڭتۇستىك بولەگى، قارامايلى قالاسى، شىحىزى قالاسى، ءۇرىمجى قالاسى، سانجى وبلىسى، بايىنعولىن وبلىسىنىڭ سولتۇستىك بولەگى قاتارلى جەرلەردىڭ ءىشىنارا وڭىرلەرىندە ۇزدىك - سوزدىق تۇمان (قار) بولادى. بۇكىل شينجياڭنىڭ باسقا رايوندارىندا نەگىزىنەن كۇن اشىق نەمەسە بۇلتتى بولادى، جەل كۇشى زور بولمايدى.

2 – ايدىڭ 3 – كۇنى تۇننەن 4 – كۇنى كۇندىزگە دەيىن سولتۇستىك شينجياڭنىڭ باسىم كوپ بولەگى جانە قاشقار ايماعىنىڭ وڭتۇستىك تاۋلى ءوڭىرى، حوتان ايماعىنىڭ وڭتۇستىك تاۋلى ءوڭىرى، بايىنعولىن موڭعۇل اۆتونوميالى وبلىسىنىڭ تاۋلى ءوڭىرى، قۇمىل قالاسىنىڭ سولتۇستىك بولەگى قاتارلى جەرلەردىڭ ءىشىنارا وڭىرلەردە قىرباق قار جاۋادى، مۇنىڭ ىشىندە ىلە اڭعارىنىڭ سولتۇستىك، شىعىس بولەگى، تارباعاتاي ايماعىنىڭ سولتۇستىك بولەگى قاتارلى جەرلەردىڭ ءىشىنارا وڭىرلەرىندە جانە التاي ايماعىنىڭ شىعىسىنداعى تاۋلى رايونداردىڭ ءىشىنارا جەرلەرىندە ورتاشادان باستاپ قالىڭ قار جاۋادى؛ جوعارىدا ايتىلعان ءىشىنارا وڭىرلەردە باتىس سولتۇستىكتەن 5 بال اينالاسىندا جەل سوعادى، جەل وتتەرىندە جەل كۇشى 9 دا 10 بال بولادى. بۇكىل شينجياڭنىڭ باسقا رايوندارىندا نەگىزىنەن كۇن اشىق نەمەسە بۇلتتى بولادى، جەل كۇشى زور بولمايدى.

شينجياڭ اۋا رايى ستانسياسى 2 ـ ايدىڭ 1 ـ كۇنى ساعات 10 نان 28 مينۋت وتكەندە جاريالاعان تۇماننان ساقتانۋدىڭ سارى ءتۇستى ساقتىق سيگنالى، 1 ـ ايدىڭ 30 ـ كۇنى ساعات 16 دان 20 مينۋت وتكەندە جاريالاعان بوراننان ساقتانۋدىڭ كوك ءتۇستى ساقتىق سيگنالى جالعاستى كۇشكە يە بولادى.

كەلۋ قاينارى: حالىق تورابى