كوكتەم مەرەكەسى تاسىمالى كەزىندە شينجياڭدا سۋىق اۋا رايى وزگەرىسى ءالسىز بولادى

شينجياڭ ۇيعۇر اۆتونوميالى رايوندىق كليمات ورتالىعى 2 - ايدىڭ 2 - كۇنى 2026 - جىلعى كوكتەم مەرەكەسى تاسىمال كەزىندەگى العاشقى مەرزىمدىك اۋا رايىنا قىزمەت وتەۋ ارناۋلى مالىمەتىن جاريالادى، كوكتەم مەرەكەسى تاسىمالى مەزگىلىندە (2 – ايدىڭ 2 – كۇنىنەن 3 – ايدىڭ 13 – كۇنىنە دەيىن) بۇكىل شينجياڭنىڭ باسىم كوپ جەرىندە تەمپەراتۋرا بۇرىنعى جىلدارداعىدان جوعارى بولادى، سۋىق اۋا رايىنىڭ وزگەرىسى جالپى جاقتان ءبىرشاما ءالسىز بولادى، 6 رەتكى ورتاشا جانە السىزدەۋ اۋا رايى بارىسى شينجياڭعا اسەر ەتەدى، سولتۇستىك شينجياڭنىڭ سولتۇستىك بولەگىندە، وڭتۇستىك شينجياڭنىڭ باتىس بولىگىندەگى تاۋلى وڭىرلەردە جاۋىن – شاشىن ءبىرماشا مول بولادى، قار جاۋۋدىڭ، تەمپەراتۋرانىڭ تومەندەۋىنىڭ جانە تۇماندى اۋا رايىنىڭ كوكتەم مەرەكەسى كەزىندەگى تاسىمالعا ىقپال جاساۋىنان ساقتاۋ كەرەك.

الدىن الا مالىمەتتە كورسەتىلۋىنشە، كوكتەم مەرەكەسى تاسىمالى كەزىندە بۇكىل شينجياڭنىڭ باسىم كوپ بولەگىنىڭ ورتاشا تەمپەراتۋراسى جىلداعىدان 1.5 تە 1.9 سەلتسي گرادۋس اينالاسىندا جوعارى بولادى، تارباعاتاي ايماعىنىڭ سولتۇستىگىندە، التاي ايماعىندا 0.6 دا 0.8 سەلتسي گرادۋس جوعارى بولادى. جاۋىن - شاشىننىڭ كەڭىستىك ورنالاسۋى بىركەلكى بولمايدى، تارباعاتاي ايماعىنىڭ سولتۇستىگىندە، التاي ايماعىندا، ءۇرىمجى قالاسىندا، سانجى حۇيزۋ اۆتونوميالى وبلىسىنىڭ باسىم كوپ بولەگىندە، قۇمىل قالاسىنىڭ سولتۇستىگىندەگى تاۋلى رايونداردا جانە قىزىلسۋ قىرعىز اۆتونوميالى وبلىسىنىڭ، قاشقار ايماعىنىڭ ءىشىنارا تاۋلى وڭىرلەرىندە جاۋىن - شاشىن مولشەرى 20 دا 30 پايىز كوپ بولادى؛ تارباعاتاي ايماعىنىڭ وڭتۇستىگىنەن قارامايلى قالاسىنا دەيىنگى وڭىرلەردە، سونداي - اق وڭتۇستىك شينجياڭنىڭ، شىعىس شينجياڭنىڭ باسىم كوپ وڭىرلەرىندە جاۋىن - شاشىن مولشەرى 30 دا 70 پايىز از بولادى نەمەسە نەگىزىنەن جاۋىن - شاشىن بولمايدى.

كوكتەم مەرەكەسى تاسىمالى كەزىندە مەجەمەن 6 رەتكى اۋا رايى بارىسى شينجياڭعا ىقپال جاسايدى، باستىسى، 2 – ايدىڭ 3 – كۇنىنەن 5 – كۇنىنە دەيىن، 7 – كۇنىنەن 9 – كۇنىنە دەيىن، 17 – كۇنىنەن 19 – كۇنىنە دەيىن، 26 – كۇنىنەن 28 – كۇنىنە دەيىن قىرباق قار جاۋىپ، تەمپەراتۋرا ءسال تومەندەيدى، بۇدان سىرت، 2 – ايدىڭ 22 – كۇنىنەن 24 – كۇنىنە دەيىن، 3 – ايدىڭ 6 – كۇنىنەن 8 – كۇنىنە دەيىن ەكى رەت ورتاشا دارەجەدە قار جاۋىپ، تەمپەراتۋرا تومەندەيدى، ىقپال كولەمى ءبىرشاما كەڭ بولادى، تەمپەراتۋرا 6 دا 8 سەلتسي گرادۋس تومەندەيدى.

كەلۋ قاينارى: حالىق تورابى