ەكى تاراۋ قيىنشىلىعى بار جۇرتشىلىققا كومەكتەسۋ قوسىمشا قاراجاتىنان 141 ميلليارد يۋان قاراجات ءبولدى

شارۋالار گازەتىنىڭ جالپىلىق مەديا ءتىلشىسى ليۋ يۋن حابارلايدى. ءتىلشىنىڭ حالىق ىستەرى مينيسترلىگى جۋىردا اشقان كەزەكتى اقپار جاريالاۋ ماجىلىسىنەن ۇعىسۋىنشا، جەرگىلىكتى ورىنداردىڭ قيىنشىلىعى بار جۇرتشىلىقتىڭ كۇندەلىكتى تۇرمىسىن قامتاماسىزداندىرۋىنا قاراجاتتىق قولداۋ كورسەتۋ ءۇشىن، حالىق ىستەرى مينيسترلىگى مەن قازىنا مينيسترلىگى ورتالىقتىڭ 2026 – جىلعى قيىنشىلىعى بار جۇرتشىلىققا كومەكتەسۋ قوسىمشا قاراجاتىنان الدىن الا 141 ميلليارد يۋان قاراجات بولگەن.

حالىق ىستەرى مينيسترلىگىنىڭ قوعامدىق كومەك مەڭگەرمەسىنىڭ قاتىستى جاۋاپتىسى ماجىلىستە بىلاي دەپ تانىستىردى: ”قوس مەرەكە“ مەزگىلىندە قيىنشىلىعى بار جۇرتشىلىقتىڭ نەگىزدىك تۇرمىسىن قامتاماسىزداندىرۋ قىزمەتىن ويداعىداي ىستەۋ ءۇشىن، حالىق ىستەرى مينيسترلىگى جەر – جەردىڭ ەڭ تومەنگى تۇرمىس دەڭگەيىن قامتاماسىزداندىرۋ قاراجاتى مەن ەرەكشە قيىنشىلىعى بارلارعا كومەكتەسۋگە پايدالانىلاتىن قامداۋ قاراجاتىن دەر كەزىندە تولىق سومادا تاراتۋىنا جەتەكشىلىك ەتىپ، شارت – جاعدايى بار جەرلەردى جاڭا جىل مەن كوكتەم مەرەكەسى مەزگىلىندە بەرىلەتىن كومەك قاراجاتتى مەرەكەدەن بۇرىن تاراتۋعا جانە ءبىر رەتتىك تۇرمىستىق قوسىمشا قاراجاتتى ارتتىرۋعا شابىتتاندىرادى. جەر – جەر كوكتەم مەرەكەسى مەزگىلىندە ەڭ تومەنگى تۇرمىس دەڭگەيىن قامتاماسىزداندىرۋ قاراجاتىن، ەرەكشە قيىنشىلىعى بارلارعا كومەكتەسۋگە پايدالانىلاتىن قامداۋ قاراجاتىن الۋعا جاڭادان ءوتىنشى بەرگەندەرگە ءوتىنىش قابىلداۋ ءتارتىبىن اناعۇرلىم جاقسارتىپ، تەكسەرىپ تۇراقتاندىرۋ مەن قاراجاتتى تاراتۋ قارقىنىن جەدەلدەتەدى. بەيجيڭ، تيانجين، شاڭحاي، جياڭسۋ، نيڭشيا قاتارلى ولكەلەر (اۆتونوميالى رايون، توتە قاراستى قالا) ناق اقشا، تۇتىنۋ بەلەتى، ناقتى زات قاتارلى فورمالارمەن قيىنشىلىعى بار جۇرتشىلىققا ءبىر رەتتىق تۇرمىستىق قوسىمشا قاراجات تاراتۋ سوماسىن ارتتىرادى.

مۇنان سىرت، حالىق ىستەرى مينيسترلىگى سولتۇستىك وڭىرلەردەگى حالىق ىستەرى تاراۋلارىنىڭ جەرگىلىكتى جاعدايعا قاراي وتىرىپ، جىلۋمەن قامداۋ قوسىمشا قاراجاتىن تاراتۋ، سۋىقتان ساقتانۋ جانە جىلىنۋ بۇيىمدارىمەن قامداۋ، سايكەستىرۋ ارقىلى جىلۋمەن قامداۋ قاراجاتىن ازايتۋ نەمەسە الماۋ قاتارلى ءتۇرلى تاسىلدەردەن پايدالانىپ، قيىنشىلىعى بار جۇرتشىلىقتىڭ قىستا جىلىنۋ قيىنشىلىعىن شىنايى باسەڭدەتۋىنە جەتەكشىلىك ەتەدى. باستاپقى ساناققا قاراعاندا، 17 ولكە مەن شينجياڭ ءوندىرىس – قۇرىلىس بيڭتۋانى جىلۋمەن قامداۋ جاعىندا كومەكتەسۋ كولەمىن كەڭەيتىپ، جىلۋمەن قامداۋ جاعىندا كومەكتەسۋدى ەڭ تومەنگى تۇرمىس دەڭگەيىن قامتاماسىزداندىرۋ دەڭگەيىنە جاقىنداعان وتباسىلارعا، تۇراقتى شىعىمدى تولەۋدە قيىنشىلىققا جولىققان وتباسىلارعا قاراي كەڭەيتەدى. قىس مەزگىلى كەلگەننەن بەرى، سولتۇستىكتەگى وڭىرلەر مەن اپاتقا ۇشىراعان وڭىرلەردەگى قاتىستى ولكەلەر جيىنى 3 ميلليارد 100 ميلليون يۋان قاراجات ورنالاستىرىپ، قيىنشىلىعى بار جۇرتشىلىققا جىلۋمەن قامداۋ قوسىمشا قاراجاتى مەن جىلۋمەن قامداۋ بۇيىمدارىن تاراتۋعا پايدالانادى.

كەلۋ قاينارى: حالىق تورابى