جۇڭگو اۋرۋدان ساقتانۋ جانە ونى تىزگىندەۋ ورتالىعى: شۇعىل سيپاتتى تىنىس جولى جۇقپالى اۋرۋ ىندەتى جالپى جاقتان باسەڭدەۋگە بەتالدى 

حالىق تورابىنىڭ ءتىلشىسى ديڭ يشين 2 - ايدىڭ 10 – كۇنى بەيجيڭنەن حابارلايدى. 2 – ايدىڭ 10 – كۇنى مەملەكەتتىك دەنساۋلىق ساقتاۋ - سالاماتتىق كوميتەتى اقپار جاريالاۋ ءماجىلىسىن اشىپ، مەزگىل مەن امالعا (كوكتەم باسى، جاڭبىر سۋى) جانە سالاماتتىققا قاتىستى جاعدايدى تانىستىرىپ، تىلشىلەردىڭ سۇراۋىنا جاۋاپ بەردى.

ماجىلىستە جۇڭگو اۋرۋدان ساقتانۋ جانە ونى تىزگىندەۋ ورتالىعىنىڭ زەرتتەرمەنى ۋاڭ دايان مىنانى ءبىلدىردى: باقىلاۋ - تەكسەرۋ ناتيجەسىنە قاراعاندا، قازىر شۇعىل سيپاتتى جۇقپالى اۋرۋ ىندەتى جالپى جاقتان تومەندەۋ بەتالىسىن بايقاتتى. كۇزەت ءتۇيىنى بولعان ەمحانالاردىڭ امبۋلاتوريا جانە شۇعىل ەمدەۋ بولىمىندەگى جۇقپالى تۇماۋ تەكتەس تىنىس جولى اۋرۋلارىنان ۇلگى الىپ تەكسەرۋ جۇرگىزۋ ناتيجەسىنىڭ بولىمدىلىق مولشەرىنە قاراعاندا، الدىڭعى ءۇش ورىندا تۇراتىن اۋرۋ قوزدىرعىشتار جەكە - جەكە جۇقپالى تۇماۋ ۆيرۋسى، تىنىس جولى بىرىككەن كلەتكالى ۆيرۋسى، مۇرىن ۆيرۋسى بولعان. تەكسەرىپ انىقتالعان ۆيرۋستاردىڭ بارلىعى بۇرىننان بەلگىلى ۇنەمى كەزدەسەتىن اۋرۋ قوزدىرعىشتار بولعان، بەلگىسىز اۋرۋ قوزدىرعىشتار جانە سولاردىڭ سەبەبىنەن تۋىنداعان جاڭا جۇقپالى اۋرۋلار بايقالماعان.

قازىر بۇكىل ەلىمىز بويىنشا جۇقپالى تۇماۋ ىندەتى جالپى جاقتان تومەن دەڭگەيدە، جۋىرداعى ەكى اي بويى ۇزدىكسىز تومەندەگەن، كۇزەت ءتۇيىنى بولعان ەمحانالاردىڭ جۇقپالى تۇماۋ ۆيرۋسىن تەكسەرۋ ناتيجەسىنىڭ بولىمدىلىق مولشەرى، بۇكىل ەلىمىز بويىنشا حابارلانعان ناۋقاستار سانى، شوعىرلى ىندەت جاعدايى جونىندەگى مالىمەت سانى ۇزدىكسىز تومەندەگەن. كەڭ تارالعان ۆيرۋس تۇبىرشىگى A تيپتى H3N2 تيپ تارماعى باستى تارالعان تۇبىرشىك بولىپ، B تيپتى ۆيكتوريا تارماعىنىڭ سالىستىرماسى بىرتىندەپ جوعارىلاي باستاعان.

تىنىس جولى بىرىككەن كلەتكالى ۆيرۋسىن تەكسەرۋ ناتيجەسىنىڭ بولىمدىلىق مولشەرى تومەندەۋ بەتالىسىن بايقاتقان، سولتۇستىكتەگى وڭىرلەردە وڭتۇستىكتەگى وڭىرلەردەن جوعارى بولعان. مۇرىن ۆيرۋسىن تەكسەرۋ ناتيجەسىنىڭ بولىمدىلىق مولشەرى بەلگىلى دەڭگەيدە تولقىعان كۇيدە بولعان. جاڭا تيپتى ايدارشا ۆيرۋسپەن جۇعىمدالۋ قاتارلى قاتىستى باقىلانعان تىنىس جولى اۋرۋ قوزدىرعىشتارىن تەكسەرۋ ناتيجەسىنىڭ بولىمدىلىق مولشەرى جالپى جاقتان تومەن دەڭگەيدە بولعان.

كەلۋ قاينارى: حالىق تورابى