باعىپ - قاعۋ مىندەتىن اناعۇرلىم ناقتىلاندىردى، جاڭادان وزگەرىس ەنگىزىلگەن «بالالار يگىلىك قۇرىلىمدارىن باسقارۋ ءادىسى» جاريالاندى

شينحۋا اگەنتتىگىنىڭ 2 – ايدىڭ 26 – كۇنى بەيجيڭنەن بەرگەن حابارى. ءتىلشىنىڭ 2 – ايدىڭ 26 – كۇنى حالىق ىستەرى مينيسترلىگىنەن ۇعىسۋىنشا، جاڭادان وزگەرىس ەنگىزىلگەن «بالالار يگىلىك قۇرىلىمدارىن باسقارۋ ءادىسى» تاياۋدا جاريالانعان. ءادىس جالپى 7 تاراۋ 64 تارماق بولىپ، بۇرىنعىدان 12 تارماق قوسىلىپ، 43 تارماققا وزگەرىس ەنگىزىلدى، بۇل باعىپ - قاعۋ مىندەتىن ونان ارى ناقتىلاندىرۋ، قوعامدىق قىزمەت وتەۋ فۋنكسياسىن كەڭەيتۋ، قۇرىلىمداردىڭ ىشكى باسقارۋىن كۇشەيتۋ قاتارلى مازمۇندارعا سايادى، 2026 – جىلى 4 - ايدىڭ 1 - كۇنىنەن باستاپ اتقارىلادى.

ادىستە مىنالار ايقىن بەلگىلەندى: بالالار يگىلىك قۇرىلىمدارى حالىق ىستەرى تاراۋلارى ۇزاق ۋاقىت قامقورلىققا العان جانە ءبىر ءبولىم ۋاقىتتىق قامقورلىققا العان بالالاردى قابىلداپ، باعالاپ، باعىپ – قاعۋدان، ورنالاستىرۋدان شيپاحانادان شىققانعا دەيىنگى تۇتاس تىزبەكتى قىزمەت وتەۋ بارىسىن اناعۇرلىم ارناعا ءتۇسىرىپ، ”بالالاردى الدىمەن دامىتۋ جانە بالالارعا ەڭ ءتيىمدى بولۋ“ پرينسيبىن مەڭگەرۋگە، تەكسەرۋگە بولاتىن تۇزىمدىك شاراعا اينالدىرۋ كەرەك.

ادىستە قىزمەت وتەۋدى كەڭەيتۋ ارناۋلى تاراۋى قوسىلىپ، شارت - جاعدايى بار بالالار يگىلىك قۇرىلىمدارىنىڭ الىپ قالۋ، باعىپ - قاعۋ مىندەتىن ويداعىداي وتەۋ نەگىزىندە، قوعامدىق قىزمەت وتەۋ فۋنكسياسىن كەڭەيتىپ، ”اشىق شيپاحانا“ قۇرىپ، قوعامداعى ساۋىقتىرۋ جاتتىعۋىنا قاجەتتى اۋرۋ، مۇگەدەك بالالارعا، جالعىزسىراۋ اۋرۋىنا شالدىققان بالالارعا مۇمكىندىگىنشە قىزمەت وتەۋىنە بولادى دەپ بەلگىلەندى، سونىمەن بىرگە قاتىستى بالالاردىڭ اكە - شەشەسىنە نەمەسە باسقا دا قامقورشىسىنا كۇتىمدەۋ ونەرىن جەتىلدىرۋ، پسيحيكالىق جاقتان جەتەكشىلىك ەتۋ قاتارلى قىزمەت وتەيدى.

ىشكى باسقارۋدى كۇشەيتۋ ءۇشىن، ادىستە بالالار يگىلىك قۇرىلىمدارىنىڭ حاۋىپسىزدىك باسقارۋ سۋبيەكتتىك جاۋاپكەرشىلىگى ايقىندالدى ءارى ءورت ءسوندىرۋ جانە ورتتەن ساقتانۋ حاۋىپسىزدىگى، شۇعىل جاعدايعا توتەپ بەرۋدى باسقارۋ، قازىنا باسقارۋ، ارحيۆ باسقارۋ، قىزمەتكەرلەردى باسقارۋ، جىلۋ جيناۋ – اتاۋدى باسقارۋ قاتارلى جاقتارداعى ناقتى شارالار مەن باقىلاۋ ـ باسقارۋ تالاپتارى كەمەلدەندىرىلدى.

كەلۋ قاينارى: حالىق تورابى