مەملەكەتتىك ساياسي كەڭەس 14 - كەزەكتى كوميتەتىنىڭ 4 - ءماجىلىسى بەيجيڭدە اشىلدى

3 - ايدىڭ 4 - كۇنى تۇستەن كەيىن جۇڭگو حالىق ساياسي ءماسليحات كەڭەسى 14 - كەزەكتى مەملەكەتتىك كوميتەتىنىڭ 4 - ءماجىلىسى بەيجيڭدەگى حالىق سارايىندا اشىلدى. سۋرەتتە: شي جينپيڭ، لي چياڭ، جاۋ لىجي، ساي چي، ديڭ شۋەشياڭ، لي شي، حان جىڭ ءتوراعالار مىنبەسىنەن ورىن الدى.

سۋرەتتى شينحۋا اگەنتتىگىنىڭ ءتىلشىسى يان يان تۇسىرگەن

مەملەكەتتىك ساياسي كەڭەستىڭ ءتوراعاسى ۋاڭ حۋنيڭ ساياسي كەڭەس 14 - كەزەكتى مەملەكەتتىك كوميتەتى تۇراقتى كوميتەتى اتىنان ماجىلىسكە قىزمەتتەن بايانداما جاسادى.

سۋرەتتى شينحۋا اگەنتتىگىنىڭ ءتىلشىسى ياۋ داۋەي تۇسىرگەن

شينحۋا اگەنتتىگى، 3 - ايدىڭ 4 - كۇنى، بەيجيڭ. ءبىر نيەت، ءبىر تىلەكپەن ايبىندى جوبا جاساپ، ناقتى ىستەپ، كۇرەس جۇرگىزىپ، داۋىرلىك ۇلى ءىستى بىرگە جاراتتى.

جۇڭگو حالىق ساياسي ءماسليحات كەڭەسى 14 - كەزەكتى مەملەكەتتىك كوميتەتىنىڭ 4 - ءماجىلىسى 3 - ايدىڭ 4 - كۇنى تۇستەن كەيىن حالىق سارايىندا اشىلدى.

مەملەكەتتىك ساياسي كەڭەستىڭ 2000 نان استام مۇشەسى جۇڭگو كوممۋنيستىك پارتياسى ورتالىق كوميتەتىنىڭ شەشىمدەرى مەن ورنالاستىرۋلارىن ارقاۋ ەتىپ، ”15-بەسجىلدىق“ جوبا باعدارلاماسىن جاساۋعا جانە اتقارۋعا نازار اۋدارىپ، ۇكىمەت ءىسىن ىشكەرىلەي كەڭەسىپ، بەلسەنە اقىل - كەڭەس بەرىپ، ”15 - بەسجىلدىقتا“ جاقسى باستاما اشۋ، جاقسى قادام باسۋ ءۇشىن كەڭ كولەمدە كۇش توپتاپ، جۇڭگو ۇلگىسىندەگى وسىزامانداندىرۋ ارقىلى مەملەكەتتى قۇدىرەتتەندىرۋ قۇرىلىسىن، ۇلتتىڭ گۇلدەنۋى ۇلى ءىسىن جاپپاي ىلگەرىلەتۋ ءۇشىن اقىل - پاراساتى مەن كۇش - قۋاتىن ارنايدى.

3 - ايداعى بەيجيڭدە كوكتەم لەبى ەسەدى. حالىق سارايىنىڭ ۇلكەن زالىندا شامدار سامالاداي جارقىراپ، دۋماندى بەينەگە شومدى. جۇڭگو حالىق ساياسي ءماسليحات كەڭەسىنىڭ گەربى ءتوراعالار مىنبەسىنىڭ ءدال ورتاسىنا ءىلىنىپ، ەكى جاعىنا بەستەن نارت قىزىل تۋ قويىلعان.

مەملەكەتتىك ساياسي كەڭەس 14 - كەزەكتى كوميتەتىنىڭ 4 - ماجىلىسىنە قاتىناسۋعا ءتيىستى مۇشە 2125 ادام، ناقتى قاتىناسقانى 2078 ادام، بۇل بەلگىلەمەدەگى ادام سانىنا ۇيلەسەدى.

مەملەكەتتىك ساياسي كەڭەستىڭ ءتوراعاسى ۋاڭ حۋنيڭ، مەملەكەتتىك ساياسي كەڭەس ءتوراعاسىنىڭ ورىنباسارلارى شى تايفىڭ، حۋ چۇنحۋا، شىن يۋەيۋە، ۋاڭ يۇڭ، جوۋ چياڭ، پابالا گىلەلاڭجيە، حى حوۋحۋا، لياڭ جىنيىڭ، باتىر، سۋ حۇي، شاۋ حۇڭ، گاۋ يۇنلۇڭ، مۋ حۇڭ، شيان حۇي، ۋاڭ دۇڭفىڭ، جياڭ شينجى، جياڭ زوجۇن، حى باۋشياڭ، ۋاڭ گۋاڭچيان، چين بويۇڭ، جۋ يۇڭشين، ياڭ جىن ءتوراعالار مىنبەسىنىڭ الدىڭعى قاتارىنان ورىن الدى.

پارتيا مەن مەملەكەت باسشىلارىنان شي جينپيڭ، لي چياڭ، جاۋ لىجي، ساي چي، ديڭ شۋەشياڭ، لي شي، حان جىڭ قاتارلىلار ءتوراعالار مىنبەسىنەن ورىن الىپ، ءماجىلىستىڭ اشىلعاندىعىن قۇتتىقتادى.

تۇستەن كەيىن ساعات 3 تە شى تايفىڭ ءماجىلىستىڭ اشىلعاندىعىن جاريالادى، زالداعىلار تۇگەل ورىندارىنان تۇرىپ، جۇڭحۋا حالىق رەسپۋبليكاسىنىڭ مەملەكەت ءانىن اسقاقتاتا شىرقادى.

ءماجىلىس الدىمەن مەملەكەتتىك ساياسي كەڭەس 14 - كەزەكتى كوميتەتى 4 - ءماجىلىسىنىڭ كەڭەستىك ءتارتىبىن قاراپ ماقۇلدادى.

ۋاڭ حۋنيڭ مەملەكەتتىك ساياسي كەڭەس 14 - كەزەكتى كوميتەتى تۇراقتى كوميتەتى اتىنان ماجىلىسكە قىزمەتتەن بايانداما جاسادى.

ۋاڭ حۋنيڭ مىنالاردى ءبىلدىردى: 2025 - جىل _ جۇڭگو ۇلگىسىندەگى وسىزامانداندىرۋ ۇردىسىندە ماڭىزدى مانگە يە ءبىر جىل. كۇردەلى دە الماعايىپ حالىقارالىق جاعداي جانە ەل ىشىندەگى جاپالى دا اۋىر رەفورما، دامۋ، ورنىقتىلىق مىندەتتەرى الدىندا، شي جينپيڭ جولداستى ۇيتقى ەتكەن جۇڭگو كوممۋنيستىك پارتياسى ورتالىق كوميتەتى بۇكىل پارتيانى، بۇكىل ەلدەگى ءار ۇلت حالقىن ىنتىماقتاستىرىپ جانە باستاپ، قيىندىققا قارسى اتتانىپ، قايراتتانا شايقاسىپ، ەل ءىشى جانە حالىقارا سىندى ەكى كەلەلى جاعدايدى ءبىر تۇتاس جوسپارلاپ، تۇتاس جىلداعى ەكونوميكالىق، قوعامدىق دامۋدىڭ باستى نىسانالارىن ءساتتى ورىنداپ، ”14 - بەسجىلدىق“ جوبانى تابىسپەن اياقتاتىپ، ەلىمىزدىڭ ەكونوميكالىق قۋاتى، عىلىم - تەحنيكالىق قۋاتى، مەملەكەت قورعانىسى قۋاتى، مەملەكەتتىڭ جالپىلىق قۋاتى تىڭ ساتىعا كوتەرىلىپ، جۇڭگو ۇلگىسىندەگى وسىزامانداندىرۋدا تىڭ دا نىق قادام تاستالدى.

جۇڭگو كوممۋنيستىك پارتياسى 20 - كەزەكتى ورتالىق كوميتەتىنىڭ ءتورتىنشى جالپى ءماجىلىسى جەڭىسپەن اشىلىپ، ”15 - بەسجىلدىق“ دامۋ جوباسى جاسالدى.

ۋاڭ حۋنيڭ حالىق ساياسي كەڭەسىنىڭ وتكەن ءبىر جىلدان بەرگى قىزمەتىن قورىتىندىلادى. ول بىلاي دەدى: مەملەكەتتىك ساياسي كەڭەس كوميتەتى جانە ونىڭ تۇراقتى كوميتەتى شي جينپيڭ جاڭا ءداۋىر جۇڭگوشا سوتسياليزم يدەياسىن جەتەكشى ەتۋگە تاباندى بولىپ، ”ەكىنى تۇراقتاندىرۋدىڭ“ شەشۋشى ءمانىن تەرەڭ ءتۇسىنىپ، ”ءتورت تانىمدى“ كۇشەيتىپ، ”ءتورت سەنىمدى“ بەكەمدەپ، ”ەكىنى قورعاۋدى“ ورىنداپ، جۇڭگو كوممۋنيستىك پارتياسىنىڭ 20 - قۇرىلتايى مەن پارتيا 20 - كەزەكتى ورتالىق كوميتەتى ءار رەتكى جالپى ءماجىلىسىنىڭ رۋحىن مۇقيات دايەكتىلەندىرىپ، تياناقتاندىرىپ، باس شۋجي شي جينپيڭنىڭ حالىق ساياسي كەڭەسى قىزمەتىن كۇشەيتۋ جانە جاقسارتۋ جونىندەگى ماڭىزدى يدەياسى مەن جۇڭگو حالىق ساياسي ءماسليحات كەڭەسى قۇرىلعاندىعىنىڭ 75 جىلدىعىن قۇتتىقتاۋ جينالىسىندا سويلەگەن ماڭىزدى ءسوزىنىڭ رۋحىن دايەكتىلەندىرىپ، تياناقتاندىرىپ، پارتيانىڭ باسشىلىعىن، بىرلىكساپتى، كەڭەس دەموكراتياسىن ورگانيكالى ۇشتاستىرۋعا، حالىق ساياسي كەڭەسىنىڭ سيپاتى مەن ورنىنا، وزەكتى ارقاۋ ەتۋگە، جالپى جاعدايعا قىزمەت وتەۋگە تاباندى بولىپ، ارناۋلى كەڭەس قۇرىلىمىندىق رولىن تولىق ساۋلەلەندىردى. جۇڭگو كوممۋنيستىك پارتياسىنىڭ جاپپاي باسشىلىعىنا جانە پارتيا ورتالىق كوميتەتىنىڭ ورتالىقتانعان ءبىر تۇتاس باسشىلىعىنا تاباندى بولىپ، ”ەكىنى قورعاۋدى“ سانالى تۇردە امالياتتا ايگىلەدى؛ جۇڭگو كوممۋنيستىك پارتياسى 20 - كەزەكتى ورتالىق كوميتەتى ءتورتىنشى جالپى ءماجىلىسىنىڭ رۋحىن ۇيرەنىپ، ۇگىتتەپ، دايەكتىلەندىرىپ، ”15 - بەسجىلدىق“ جوبانى جاساۋعا اقىل - كەڭەس بەرۋگە نازار اۋداردى؛ ورتالىقتىڭ سەگىز ءتۇرلى بەلگىلەمەسىنىڭ رۋحىن ۇيرەنۋ تاربيەسىن ىشكەرىلەي ورىستەتىپ، ستيلى پاك، سالتى دۇرىس، ءىس تىندىرىپ، ناتيجە شىعاراتىن تاماشا راي قالىپتاستىرىپ، ءتۇرلى قىزمەتتە تىڭ ناتيجەگە قول جەتكىزدى.

ۋاڭ حۋنيڭ مىنالاردى ءبىلدىردى: 2026 - جىل − ”15 - بەسجىلدىق“ جوبانىڭ باستاما جىلى، حالىق ساياسي كەڭەسى شي جينپيڭ جاڭا ءداۋىر جۇڭگوشا سوتسياليزم يدەياسىن جەتەكشى ەتۋگە تاباندى بولىپ، جۇڭگو كوممۋنيستىك پارتياسىنىڭ 20 - قۇرىلتايى مەن پارتيا 20 - كەزەكتى ورتالىق كوميتەتى جالپى ماجىلىستەرىنىڭ رۋحىن ىشكەرىلەي دايەكتىلەندىرىپ، جۇڭگو كوممۋنيستىك پارتياسى 20 - كەزەكتى ورتالىق كوميتەتى ءتورتىنشى جالپى ءماجىلىسىنىڭ ورنالاستىرۋلارىن مۇقيات تياناقتاندىرىپ، باس شۋجي شي جينپيڭنىڭ حالىق ساياسي كەڭەسى قىزمەتىن كۇشەيتۋ جانە جاقسارتۋ جونىندەگى ماڭىزدى يدەياسىن دايەكتىلەندىرىپ، جۇڭگو كوممۋنيستىك پارتياسىنىڭ باسشىلىعىنداعى كوپ پارتيا سەلبەستىگى مەن ساياسي كەڭەس تۇزىمىنە تاباندى بولىپ جانە ونى كەمەلدەندىرىپ، حالىق ساياسي كەڭەسىنىڭ سيپاتى مەن ورنىنان جازباي، ىنتىماق جانە دەموكراتيا سىندى ەكى ۇلكەن نەگىزگى تاقىرىپقا تاباندى بولىپ، نازاردى پارتيا مەن مەملەكەتتىڭ وزەكتى مىندەتىنە شوعىرلاندىرۋعا تاباندى بولىپ، حالىق ساياسي كەڭەسىنە قاتىناسقان ءارقايسى پارتيا - توپتاردى، ۇيىمداردى جانە ءار ۇلت، ءار سالا قايراتكەرلەرىن ۇيىمداستىرىپ، ”15 - بەسجىلدىق“ جوبانىڭ تاماشا باستاماسىن جۇزەگە اسىرۋ ءۇشىن جۇرت تىلەگىن، ورتاق تانىمدى، اقىل - پاراساتتى، كۇش - قۋاتتى كەڭىنەن ۇيىستىرۋى كەرەك.

ۋاڭ حۋنيڭ مىنالاردى ءبىلدىردى: جۇڭگو كوممۋنيستىك پارتياسىنىڭ باسشىلىعىنا بۇلجىماي تاباندى بولىپ، دۇرىس ساياسي بەتالىستى مىقتى يگەرۋ؛ پارتيانىڭ جاسامپاز نازاريالارىمەن قارۋلانۋدى كۇندەلىكتى قىزمەتپەن توعىستىرىپ، ۇدايى يگەرۋگە تاباندى بولىپ، يدەيالىق - ساياسي جاقتان جەتەكشىلىك ەتۋ، ورتاق تانىمدى كەڭىنەن ۇيىستىرۋ قىزمەتىنىڭ ناقتى ونىمدىلىگىن جوعارىلاتۋ؛ ”15 - بەسجىلدىق“ جوبانى اتقارۋدى ارقاۋ ەتىپ، ۇكىمەت ءىسىن كەڭەسىپ، ۇسىنىس - پىكىر بەرىپ، مىندەتتى جوعارى ساپالى اتقارۋ ناتيجەسىمەن پارتيا مەن مەملەكەتتىڭ وزەكتى مىندەتىنە قىزمەت ەتۋ؛ مۇشەلەردىڭ نەگىزگى تۇلعالىق رولىن تولىق ساۋلەلەندىرىپ، مىندەت وتەۋ قابىلەتى مەن ورەسىن جوعارىلاتىپ، ءبىر جاعادان باس، ءبىر جەڭنەن قول شىعارىپ، ەرلىكپەن العا باسىپ، جاڭا ءداۋىردىڭ جاڭا جورىعىنداعى حالىق ساياسي كەڭەسى ىستەرىنىڭ جوعارى ساپالى دامۋىن ىلگەرىلەتىپ، جۇڭگوشا سوتسياليزم جولىندا سوتسياليستىك وسىزاماندانعان مەملەكەت قۇرۋعا اقىل - پاراسات پەن كۇش - قۋاتتى ارناۋ كەرەك.

مەملەكەتتىك ساياسي كەڭەس ءتوراعاسىنىڭ ورىنباسارى حى باۋشياڭ مەملەكەتتىك ساياسي كەڭەس 14 - كەزەكتى كوميتەتى تۇراقتى كوميتەتى اتىنان ماجىلىسكە مەملەكەتتىك ساياسي كەڭەس 14 - كەزەكتى كوميتەتىنىڭ 3 - ماجىلىسىنەن بەرگى ۇسىنىس جوبا قىزمەتىنىڭ جاعدايىنان بايانداما جاسادى. مەملەكەتتىك ساياسي كەڭەس 14 - كەزەكتى كوميتەتىنىڭ 3 - ماجىلىسىنەن بەرى، جيىنى 5992 ۇسىنىس جوبا ورتاعا قويىلدى، تەكسەرۋ ارقىلى 5061 ۇسىنىس جوبا ەستەلىككە الىندى، ۇسىنىس جوبالاردىڭ %99.9 ى ءبىتىرىلدى جانە وعان جاۋاپ قايتارىلدى. ۇسىنىس جوبادا جاپپاي سوتسياليستىك وسىزاماندانعان قۇدىرەتتى ەل قۇرۋ، ەكىنشى 100 جىلدىق كۇرەس نىساناسىن جۇزەگە اسىرۋ ايبىندى جوباسى ارقاۋ ەتىلىپ، ”بەستى ءبىر تۇلعالاندىرۋ“ جالپىلىق ورنالاستىرۋى مەن ”ءتورتتى جاپپاي ورىنداۋ“ ستراتەگيالىق ورنالاستىرۋى تىعىز ارقاۋ ەتىلىپ، پاراساتتى كەڭەس بەرىلىپ، ناقتى شارالار ۇسىنىلدى، ۇسىنىس جوبادا ورتاعا قويىلعان پىكىرلەر ”14 - بەسجىلدىق“ جوبانىڭ نىسانا - مىندەتتەرىن جاپپاي ورىنداۋ، ”15 - بەسجىلدىق“ جوبانى زەرتتەپ جاساۋ، ەكونوميكانىڭ، قوعامنىڭ جوعارى ساپالى دامۋىن جەبەۋدە بەلسەندى رول اتقاردى.

ۋاڭ ي، يىن لي، ليۋ گوجۇڭ، لي گانجيە، لي شۋلەي، لي حۇڭجۇڭ، حى ليفىڭ، جاڭ گوچيڭ، چىن ۋىنچيڭ، چىن جينيڭ، چىن مين - ىر، يۋان جياجۇن، حۋاڭ كۇنميڭ، ليۋ جينگو، ۋاڭ شياۋحۇڭ، جاڭ شىڭمين، ۋاڭ دۇڭميڭ، شياۋ جيە، جىڭ جيانباڭ، ديڭ جۇڭلي، ساي دافىڭ، حى ۋەي، ۋ ۋەيحۋا، تيە نيڭ، پىڭ چيڭحۋا، جاڭ چيڭۋەي، لوساڭجياڭسۇن، شوكىرات زاكىر، ۋ جىڭلۇڭ، چىن ي - چين، جاڭ جۇن، يىڭ يۇڭ قاتارلى باسشى جولداستار دا ءتوراعالار مىنبەسىنەن ورىن الدى.

جۇڭگو كوممۋنيستىك پارتياسى ورتالىق كوميتەتىنىڭ، مەملەكەتتىك حالىق قۇرىلتايى تۇراقتى كوميتەتىنىڭ، مەملەكەتتىك كەڭەستىڭ قاتىستى تاراۋلارىنداعى جاۋاپتى جولداستار ۇسىنىس بويىنشا اشىلۋ ماجىلىسىنە سىرتتاي قاتىناستى. شەتەلدەردىڭ جۇڭگودا تۇراتىن ەلشىلەرى، شەتەلدەگى چياۋباۋلار قاتارلىلار ۇسىنىس بويىنشا اشىلۋ ماجىلىسىنە قاتىناستى.

كەلۋ قاينارى: حالىق تورابى