تاۋ - وزەندى بايتاق دالانى تۇرلەندىرىپ، جۇڭگو ۇلگىسىندەگى وسىزامانداندىرۋدىڭ نەگىزىن ونان ارى نۇرلاندىرۋ كەرەك

3 - ايدىڭ 30 - كۇنى پارتيا مەن مەملەكەت باسشىلارىنان شي جينپيڭ، لي چياڭ، جاۋ لىجي، ۋاڭ حۋنيڭ، ساي چي، ديڭ شۋەشياڭ، لي شي قاتارلىلار بەيجيڭ قالاسى چاڭپيڭ رايونى بايشان قالاشىعىنا كەلىپ، استانانىڭ مىندەتتى اعاش ەگۋ قيمىلىنا قاتىناستى. سۋرەتتە: شي جينپيڭ كوپشىلىكپەن بىرگە اعاش ەگۋدە.

سۋرەتتى شينحۋا اگەنتتىگىنىڭ ءتىلشىسى يان يان تۇسىرگەن

شينحۋا اگەنتتىگى، 3 - ايدىڭ 30 - كۇنى، بەيجيڭ. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ 3 - ايدىڭ 30 - كۇنى تۇستەن بۇرىن استانادا مىندەتتى اعاش ەگۋ قيمىلىنا قاتىناسقاندا بىلاي دەپ باسا دارىپتەدى: تاماشا ەكولوگيادان بارلىق ادام تەڭ يگىلىكتەنەدى، بۇل سونداي - اق كۇش بىرىكتىرىپ بىرگە قۇرۋدى قاجەت ەتەدى. بۇكىل قوعامدى اعاش ەگىپ، ورمان وسىرۋگە كەڭىنەن قاتىناسۋعا جۇمىلدىرىپ، ۇيىمداستىرىپ، تاۋ - وزەندى بايتاق دالانى تۇرلەندىرىپ، جۇڭگو ۇلگىسىندەگى وسىزامانداندىرۋدىڭ نەگىزىن ونان ارى نۇرلاندىرۋ كەرەك.

استانا بەيجيڭدە كوكتەم سامالى ەسىپ، كۇللى تىرشىلىك جانداندى. تۇستەن بۇرىن ساعات وننان 40 مينۋت وتكەندە، پارتيا مەن مەملەكەت باسشىلارىنان شي جينپيڭ، لي چياڭ، جاۋ لىجي، ۋاڭ حۋنيڭ، ساي چي، ديڭ شۋەشياڭ، لي شي قاتارلىلار اۆتوكولىككە توپتىق وتىرىپ، چاڭپيڭ رايونى بايشان قالاشىعىنا كەلىپ، كادر - بۇقارامەن بىرگە مىندەتتى اعاش ەگۋگە قاتىناستى.

اعاش ەگۋ ءتۇيىنى باقشاعا پايدالانۋعا ىڭعايلانعان جەر ەدى، باقشا سالىنىپ بولعاننان كەيىن بۇقارانى ەكولوگيالىق سەيىل - سەرۋەن كەڭىستىگىمەن قامدايدى.

باس شۋجيدىڭ كەلگەنىن كورىپ، اعاش ەگىپ جاتقان كادر - بۇقارا باس شۋجيگە ىستىق ىقىلاسپەن امانداستى. شي جينپيڭ كوپشىلىككە قول بۇلعاپ قۇرمەت ءبىلدىرىپ، كۇرەكتى الىپ اعاش ەگۋ ورنىنا بارىپ، سول مايدانداعى بەيجيڭ قالاسىنىڭ، مەملەكەتتىك ورمان - جايىلىم مەكەمەسىنىڭ جاۋاپتى جولداستارىمەن جانە كادر - بۇقارامەن، پيونەرلەرمەن بىرگە قىزۋ ەڭبەككە كىرىستى.

ەڭبەك مايدانىنداعىلار توپىراق كۇرەپ، قىر شىعارىپ، توسپا جاسادى، سۋ شىعارىپ، ەگىلگەن اعاشتاردى سۋاردى... شي جينپيڭ ماي قاراعاي، بەيجيڭ مۋدان اعاشى، شەتەن جاپىراقتى ورىك، ەۆكومميا، يۋانباۋفىڭ سياقتى كوپتەگەن قالامشالاردى ىركەس - تىركەس ەكتى. ول ءبىر جاعىنان اعاش ەگىپ، ەندى ءبىر جاعىنان بالالاردىڭ ۇيرەنۋ، تۇرمىس، ەڭبەككە شىنىعۋ جانە اعاش ەگۋگە قاتىناسۋ جاعدايىن ۇعىستى. شي جينپيڭ بىلاي دەپ باسا دارىپتەدى: جاستار مەن ورەندەر بەينە قالامشا سياقتى ومىرشەڭدىك كۇشكە جانە ۇمىتكە تولى، كىشكەنتايىنان ۇلى مۇرات ورناتىپ، ءبىلىمدى، ەڭبەكتى، تابيعاتتى ءسۇيىپ، احىلاق، اقىل - وي، دەنە، ەستەتيكا، ەڭبەك جاقتارىنان جان - جاقتى دامىپ، تىرەكتى دارىندى بولۋعا قۇلشىنۋى كەرەك. ناق مايدان قىزۋ مەرەيگە شومىپ، قاربالاس جاعداي جارىققا شىقتى.

شي جينپيڭ سول جەردەگى كادر - بۇقارامەن ىقىلاسپەن اڭگىمەلەستى. ول بىلاي دەدى: پارتيا 18 - قۇرىلتايىنان بەرى ەلىمىزدىڭ ورمان كولەمى جانە زاپاس مولشەرى ۇدايى ”ەكى رەت ارتىپ“، شولەيتتەنگەن جانە قۇمايتتانعان جەر كولەمى ۇدايى ”ەكى رەت ازايىپ“، دۇنيە ءجۇزى بويىنشا جاسىلدانۋ اۋماعى ەڭ كوپ، ەڭ تەز ارتقان مەملەكەتكە اينالدى، اسپانى اشىق، جەرى جاسىل، سۋى تۇنىق بولۋ قالىپتى جاعدايعا اينالدى. تاياۋدا ەلىمىز ەكولوگيالىق ورتا زاڭناماسىن جاريالاپ، كورىكتى جۇڭگو قۇرىلىسىنىڭ زاڭمەن جونگە سالۋ ىرگە تاسىن ونان ارى بەكەمدەدى. اعاش ەگىپ، ورمان ءوسىرۋ _ كورىكتى جۇڭگو قۇرىلىسىنداعى ماڭىزدى مىندەت، العان بەتتەن قايتپاي، قازىرگى جاعدايدى تياناق ەتىپ، ۇزاق بولاشاقتى كوزدە ۇستاپ، كۇش جالعاپ العا باسىپ، مەملەكەتكە، حالىققا پايدالى وسى ءىرى ءىستى تىڭعىلىقتى ىستەۋىمىز كەرەك.

شي جينپيڭ بىلاي دەپ باسا دارىپتەدى: بيىل _ ”15 - بەسجىلدىق“ جوبانىڭ باستالعان جىلى، سونداي - اق جالپى حالىقتىق مىندەتتى اعاش ەگۋ ناۋقانى ورىستەتىلگەندىگىنىڭ 45 جىلدىعى. جاڭا جاعدايدا مەملەكەت جەرىن جاسىلداندىرۋدى ىلگەرىلەتۋدە ساپانى جوعارىلاتۋعا، كاسىپتى گۇلدەندىرۋگە، حالىققا پايدا جەتكىزۋگە اناعۇرلىم ءمان بەرىپ، ەگۋ مەن باسقارۋدى بىرگە يگەرۋدى، ەكولوگيا مەن كاسىپ سالاسىن بىرگە جەبەۋدى، ادام مەن تابيعاتتىڭ بىرگە ءومىر ءسۇرۋىن جۇزەگە اسىرۋ كەرەك. جاسىلداندىرۋ كەڭىستىگىنەن ءبىر تۇتاس پايدالانىپ، جەرگە قاراي جاسىلداندىرۋ، سۋعا قاراي جاسىلداندىرۋ، جەرگىلىكتى جاعدايعا قاراي جاسىلداندىرۋ جۇمىسىن ويداعىداي ىستەپ، اعاش ەگۋگە ۇيلەسسە اعاش، ءشوپ ەگۋگە ۇيلەسسە ءشوپ ەگۋ كەرەك. باسقارۋ مەن قورعاۋدى اناعۇرلىم زور تەبىنمەن كۇشەيتىپ، ورماننىڭ باياندى تيجاراتىن وڭىرگە، تۇرگە ءبولىپ ورىستەتىپ، جايىلىمدى قورعاۋدى، قالپىنا كەلتىرۋدى پارمەندى، ءونىمدى ىلگەرىلەتىپ، ورمان، جايىلىم ساپاسى مەن يقۋاتىن جاپپاي جوعارىلاتىپ، ورتتەن ساقتانۋ، دەرت - دەربەزدەن ساقتانۋ قىزمەتتەرىن جاقسى ىستەپ، جاسىلداندىرۋ جەتىستىكتەرىن ويداعىداي قورعاۋ كەرەك. ەكولوگيالىق ونىمدەردىڭ قۇنىن كادەگە جاراتۋ ارناسىن ىركىلىسسىزدەندىرىپ، ورمان، جايىلىم كاسىبىن زورايتىپ، ەكونوميكالىق قۇن مەن ەكولوگيالىق ونىمدىلىكتى قاتار جوعارىلاتۋ كەرەك. قالا مەن اۋىلدى جاسىلداندىرۋدى، كورىكتەندىرۋدى سايكەستى ىلگەرىلەتىپ، بۇقارانىڭ ماڭايىنداعى جاسىل جەرلەردى ارتتىرىپ، قالا - اۋىل تۇرعىندارىن ءتىپتى دە كوپ جاسىل تابىس سەزىمىنە كەنەلتۋ كەرەك.

بەيجيڭدەگى جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ مۇشەلەرى، ورتالىق كوميتەت شۋجيچۋىنىڭ شۋجيلەرى، مەملەكەتتىك كەڭەستىڭ مۇشەلەرى قاتارلىلار اعاش ەگۋ قيمىلىنا قاتىناستى.

كەلۋ قاينارى: حالىق تورابى