سيرەك كەزدەسەدى! شولدە جۇرگەن ءىلبىس بايقالدى، جەرگىلىكتى ورىن وسى جونىندە جاۋاپ قايتاردى

3 – ايدىڭ 21 – كۇنى تۇستە، شينجياڭ تۇرپان ايماعى قۇمتاع شولىنەن مەملەكەتتىك 1 – دارەجەلى قورعالاتىن حايۋانات — ءىلبىس بايقالعان، ساياحاتشىلار ونى بايقاعان سوڭ دەرەۋ ساقشىعا مالىمدەگەن. جەرگىلىكتى ورىنداعى ورمان شارۋاشىلىعى جانە جايىلىم تاراۋلارى مەن قوعام حاۋىپسىزدىگى تاراۋلارى دەرەۋ بىرلەسكەن ارەكەت ورىستەتىپ، بەس ساعات دەگەندە ءىلبىستى ءساتتى ۇستاعان ءارى قۇتقارۋ شارالارىن قولدانعان.

العاشقى قادامداعى تەكسەرۋگە قاراعاندا، مەملەكەتتىك 1 – دارەجەلى قورعالاتىن بۇل حايۋانات 5 – 7 جاس ارالىعىنداعى جەتىلگەن انالىق ءىلبىس ەكەن، تەك ءبىرشاما السىرەۋ، شولىركەۋ جاعدايى بايقالعان، دەنەسىنىڭ سىرتىنان كورنەكتى جاراقات بايقالماعان. جەرگىلىكتى ورىنداعى قۇتقارۋ شارت – جاعدايى شەكتى بولعاندىقتان، ءىلبىستى تۇندەلەتىپ اۆتونوميالى رايوندىق جابايى حايۋاناتتاردى قۇتقارۋ – قورعاۋ ورتالىعىنا جوتكەپ، كاسىپتىك ەمدەۋ ورىستەتىلگەن.

تۇرپان قالاسى ءپىشان اۋداندىق ورمان شارۋاشىلىعى جانە جايىلىم مەكەمەسىنىڭ جايىلىم پۋنكتىنىڭ باستىعى لي حۇڭبياۋدىڭ تانىستىرۋىنشا، ءىلبىس ۇستىرتتە تىرشىلىك ەتەتىن سيرەك كەزدەسەتىن حايۋانات، جىل بويى تەڭىز دەڭگەيىنەن 2500 – 5000 مەتر بيىكتىكتەگى اسقار تاۋلاردىڭ تاستاقتى وڭىرلەرىندە تىرشىلىك ەتەدى، وسى رەت قۇمتاع شولىنەن بايقالۋى وتە سيرەك كەزدەسەتىن جاعداي. ”توڭىرەكتەگى جاعراپيالىق ورتاعا تالداۋ جاساۋعا نەگىزدەلگەندە، بۇل ءىلبىس تيانشان تاۋ سىلەمىندە اڭ قۋالاپ ءجۇرىپ اداسىپ وسىندا كەلگەن بولۋى مۇمكىن“.

ۇعىسۋعا قاراعاندا، ءىلبىستىڭ دەنساۋلىعى قالپىنا كەلىپ، تۇزدە تىرشىلىك ەتۋ شارتىنا ساي كەلگەن سوڭ، قاتىستى تاراۋلار ۇيلەسىمدى مەزگىلدە ونى تابيعاتقا قويا بەرىپ، وزىنە ءتان مەكەنىنە قايتارادى.

كەلۋ قاينارى: حالىق تورابى