ەڭ جوعارى حالىق سوتى مەن ەڭ جوعارى حالىق پروكۋراتۋراسى ايقىن تۇراقتاندىردى: وتباسىلىق زورلىق – زومبىلىق سەبەپتى زياندالۋشى قاتارلىلاردىڭ ازاماتتىق ىستەر بويىنشا ارىز بەرۋىنە قولداۋ كورسەتۋدى ءوتىنىش ەتۋىنە بولادى 

جۇڭگو جاستارى گازەتى 3 – ايدىڭ 24 – كۇنى بەيجيڭنەن حابارلايدى (جۇڭگو جاستار گازەتى – جۇڭگو جاستار تورابىنىڭ ءتىلشىسى حۋ نيڭ) ەڭ جوعارى حالىق سوتى، ەڭ جوعارى حالىق پروكۋراتۋراسى جۋىردا «ازاماتتىق ىستەر بويىنشا ارىز بەرۋ جاعىندا قولداۋ كورسەتىلەتىن دەلولاردى بىتىرۋگە قاتىستى ءبىرقانشا ماسەلە جونىندەگى جەتەكشى پىكىردى» بىرگە جاريالادى. پىكىردە مىنالار ايقىن بەلگىلەنگەن: ازاماتتىق ىستەر ۇقىق – مۇددەسى زياندالۋشى جاق ارىز بەرۋ ارقىلى ۇقىق – مۇددەسىن قورعاۋدى قالاسا، الايدا ارىز بەرۋ قابىلەتى تومەن بولسا، ارىز بەرۋگە باتىلدىق ەتە الماسا نەمەسە ازاماتتىق ىستەر بويىنشا دەربەس ارىز بەرە المايتىن بولسا، حالىق پروكۋراتۋراسى ازاماتتىق ىستەر ارىز - شاعىم زاڭىنىڭ 15 – تارماعىنداعى بەلگىلەمەلەرگە ساي ونىڭ حالىق سوتى مەكەمەسىنە ازاماتتىق ىستەر بويىنشا ارىز بەرۋىنە قولداۋ كورسەتسە بولادى.

پىكىردە پروكۋراتۋرا مەكەمەسى ارىز بەرۋ جاعىندا قولداۋ كورسەتسە بولاتىن جاعدايلار ايقىن بەلگىلەنگەن: وتباسىلىق زورلىق – زومبىلىق سەبەپتى زياندالۋشىلار اجىراسۋدى، زيان تولەۋدى تالاپ ەتكەن نەمەسە حالىق سوتى مەكەمەسىنەن باس اماندىعىن قورعاۋ بۇيرىعىن شىعارۋدى ءوتىنىش ەتكەن جاعداي؛ ازامات جاسىنا تولماعانداردىڭ ادامدىق ۇقىعى، مال – مۇلىك ۇقىعى نەمەسە باسقا دا زاڭدى ۇقىق – مۇددەسى زيانعا ۇشىراعان جاعداي؛ مۇگەدەكتەردىڭ ادامدىق ۇقىعى، مال – مۇلىك ۇقىعى نەمەسە باسقا دا زاڭدى ۇقىق – مۇددەسى زيانعا ۇشىراعان جاعداي؛ شارۋا جۇمىسكەرلەر ەڭبەكاقىسىن بەرۋدى تالاپ ەتكەن جاعداي؛ قارتايۋ، ناۋقاسقا شالدىعۋ، ەڭبەك قۋاتى كەمشىل بولۋ قاتارلى سەبەپتەرمەن ءوزى دەربەس تىرشىلىك ەتە الماعاندىقتان نەمەسە تۇرمىسىندا قيىنشىلىق بولعاندىقتان باعىپ - قاعۋ قاراجاتىن، كۇتىمدەۋ قاراجاتىن بەرۋدى تالاپ ەتكەن جاعداي؛ اسكەرلەردىڭ، اسكەرلەردىڭ وتباسى مۇشەلەرىنىڭ جانە قاھارمانداردىڭ، ۇكىمەت قىزمەتى بارىسىندا قۇربان بولعان اسكەرلەردىڭ، اۋرۋدان قازا بولعان اسكەرلەردىڭ بالا – شاعاسىنىڭ ادامدىق ۇقىعى، مال – مۇلىك ۇقىعى نەمەسە باسقا دا زاڭدى ۇقىق – مۇددەسى زيانعا ۇشىراعان جاعداي ت.ب.

پىكىردە مىنالار اتاپ كورسەتىلگەن: حالىق پروكۋراتۋراسى ازاماتتىق ىستەر بويىنشا ارىز بەرۋگە قولداۋ كورسەتىلەتىن دەلولاردى ءبىرجاقتى ەتۋ بارىسىندا، داۋگەردىڭ ارىز – شاعىم بەرۋ ماقساتىن ايقىنداۋعا كومەكتەسىپ، داۋگەرگە زاڭدىق كەڭەس بەرۋ، زاڭدىق كومەك بەرۋگە سايكەسۋ، ارىز بەرۋگە قولداۋ كورسەتۋ ماقساتىندا پىكىر بەرۋ، زاڭ بويىنشا قاتىستى ماتەريالداردى سايكەسىپ الىپ بەرۋ قاتارلى جاقتاردا كومەكتەسۋىنە بولادى. حالىق پروكۋراتۋراسى ازاماتتىق ىستەر بويىنشا ارىز بەرۋگە قولداۋ كورسەتىلەتىن دەلولاردى ءبىرجاقتى ەتۋ بارىسىندا، داۋگەردىڭ قارسى جاقپەن تاتۋلاسۋىنا جەتەكشىلىك ەتىپ قولداۋ كورسەتۋىنە بولادى. تەكسەرۋ ارقىلى وسى پىكىردەگى بەلگىلەنگەن ازاماتتىق ىستەر بويىنشا ارىز بەرۋگە قولداۋ كورسەتىلەتىن دەلولار كولەمىنە قامتىلاتىنى ءارى زاڭدا بەلگىلەنگەن ارىز بەرۋ شارتىنا تولاتىنى تۇراقتاندىرىلسا، حالىق پروكۋراتۋراسىنىڭ داۋگەردىڭ حالىق سوتى مەكەمەسىنە ارىز بەرۋىنە قولداۋ كورسەتۋىنە بولادى.

جۇڭگو جاستار گازەتى – جۇڭگو جاستار تورابىنىڭ ءتىلشىسى حۋ نيڭ

كەلۋ قاينارى: حالىق تورابى