كەدەن باس باسقارماسى «دەنگە قىزباسى ىندەتىنىڭ ەلىمىزگە تارالۋىنان ساقتانۋ تۋرالى ۇقتىرۋدى» شىعاردى 

ورتالىق تەلەۆيزيا تورابىنىڭ حابارى: ”كەدەن اقپاراتتارى“ ۋيشين تەكشەسىنىڭ حابارلاۋىنشا، دۇنيە جۇزىلىك دەنساۋلىق ساقتاۋ ۇيىمى جاريالاعان ساندى مالىمەتكە نەگىزدەلگەندە، 2026 – جىلعى 1 – ايدان 2 – ايعا دەيىن دۇنيە ءجۇزى بويىنشا دەنگە قىزباسى ىندەتىنە شالدىققانداردىڭ سانى جيىنى 423 مىڭ ادام بولعان، مۇنىڭ ىشىندە امەريكا وڭىرىندە ىندەتكە شالدىققانداردىڭ سانى 352 مىڭ ادام بولعان. دەنگە قىزباسى ىندەتىنىڭ ەلىمىزگە تارالۋىنان ساقتانۋ، شەكارادان كىرىپ – شىعۋشىلاردىڭ سالاماتتىق حاۋىپسىزدىگىن قورعاۋ ءۇشىن، «جۇڭحۋا حالىق رەسپۋبليكاسىنىڭ مەملەكەت شەكاراسىنا قاتىستى دەنساۋلىق ساقتاۋ – كارانتيندەۋ زاڭى» جانە ونىڭ اتقارىلاتىن ەگجەي – تەگجەيلى ەرەجەسى قاتارلى زاڭ – تۇزىمدەردەگى بەلگىلەمەلەرگە ساي، مىناداي ۇقتىرۋ شىعارىلدى:

ءبىرىنشى، دەنگە قىزباسى ىندەتى تاراعان مەملەكەتتەردەن (رايونداردان) كەلگەن ادامداردان ەگەر قىزۋى ورلەۋ، باسى اۋرۋ، بۇلشىق ەتتىڭ سىزداپ اۋرۋى جانە بۋىننىڭ سىرقىراۋى، بورتكەن شىعۋ جانە بەتى، موينى، كەۋدە ءبولىمى كۇرەڭىتۋ قاتارلى اۋرۋ بەلگىلەرى بايقالسا، شەكارادان كىرگەن كەزدە كەدەن مەكەمەسىنە ىرىقتىلىقپەن مالىمدەۋى كەرەك، كەدەن مەكەمەسى بەلگىلەمەدەگى ءتارتىپ بويىنشا مەديتسينالىق شارالاردى قولدانادى.

ەكىنشى، دەنگە قىزباسى ىندەتى تاراعان مەملەكەتتەردەن (رايونداردان) كەلگەن قاتىناس - تاسىمال قۇرالدارى، جۇك قورابى قاتارلى تاسىمال جابدىقتارى، زاتتار، جۇكتەر، پوچتالىق جولدامالار قاتارلى بۇيىمدار مەن سىرتقى قوراپتارى زاڭ بويىنشا كەدەن مەكەمەسىنىڭ كارانتيندەۋ – تەكسەرۋىنەن وتكىزىلۋى كەرەك، كارانتيندەۋ – تەكسەرۋ بارىسىندا ماسا بايقالسا، بەلگىلەمە بويىنشا دەنساۋلىق ساقتاۋ شارالارى اتقارىلۋى كەرەك.

ءۇشىنشى، وتكەلدەرگە جاۋاپتى قىزمەت وتەۋشى ورىندار ءونىمدى شارالاردى قولدانىپ، ماسانىڭ كوبەيۋىنە ءتيىمدى جەرلەردى الاستاۋى، وتكەلدەگى ماسانىڭ مولشەرىن باقىلاۋى جانە تىزگىندەۋى، كەدەن مەكەمەسىنىڭ وتكەلدەگى دەنساۋلىق ساقتاۋعا قاتىستى اتقارعان شارالارىن قابىلداۋى كەرەك.

ءتورتىنشى، دەنگە قىزباسى ىندەتى تاراعان مەملەكەتتەرگە (رايوندارعا) باراتىن ادامداردىڭ شەكارادان شىعار الدىندا كەدەن مەكەمەسىنەن جانە ونىڭ حالىقارالىق ساياحات سالاسىنداعى دەنساۋلىق ساقتاۋ ورتالىعىنان كەڭەس سۇراۋىنا بولادى نەمەسە كەدەن باس باسقارماسىنىڭ تورابىنان قاتىستى ىندەت مالىمەتتەرى مەن حالىقارالىق ساياحات سالاسىنداعى دەنساۋلىق ساقتاۋعا قاتىستى ەسكەرتۋلەردى كورۋىنە بولادى.

بۇل ۇقتىرۋدىڭ مازمۇنى 2026 – جىلعى 4 – ايدىڭ 10 – كۇنىنەن باستاپ كۇشكە يە بولىپ، كۇشكە يە مەرزىمى ءبىر جىل. وسى مەرزىم ىشىندە دۇنيە جۇزىلىك دەنساۋلىق ساقتاۋ ۇيىمى جاريالاعان دەنگە قىزباسى ىندەتى تاراعان مەملەكەتتەر (رايوندار) تىزىمدىگىنە جاڭادان قوسىلعان مەملەكەتتەرگە (رايوندارعا) وسى ۇقتىرۋداعى شارالار اتقارىلادى.

كەلۋ قاينارى: حالىق تورابى