بەيجيڭنەن ورتا ازياعا قاتىنايتىن تۇراقتى كەزەكشى پويەز تۇڭعىش رەت قاتىنادى 

حالىق گازەتىنىڭ تىلشىلەرى لي شينپيڭ، ۋاڭ جوۋ 4 – ايدىڭ 20 – كۇنى بەيجيڭنەن حابارلايدى. ءتىلشىنىڭ مەملەكەتتىك تەمىر جول بەيجيڭ مەكەمەسىنەن ۇعىسۋىنشا: 4 – ايدىڭ 20 - كۇنى، اۆتوموبيلدىڭ بولشەكتەرى، مەحانيكالىق جابدىقتار قاتارلى زاتتار تيەلگەن ورتا ازيا كەزەكشى پويەزى بەيجيڭ لياڭشياڭ بەكەتىنەن جولعا شىققان، الدا الاتاۋ ساعاسى شەكارا وتكەلى ارقىلى شەكارادان شىعىپ، قازاقستاننىڭ الماتى قالاسىنا بارادى. بۇل بەيجيڭ قالاسىنان ورتا ازياعا قاتىنايتىن تۇراقتى كەزەكشى پويەزدىڭ تۇڭعىش رەت قاتىناۋى، بەيجيڭ مەن ورتا ازيا ءوڭىرى اراسىنداعى ەكونوميكا – ساۋدا سالاسىنداعى قارىم - قاتىناسىنا ورنىقتى، جوعارى ءونىمدى زات اينالىمى ارناسىن سيلايدى.

بۇل كەزەكشى پويەزدى مەملەكەتتىك تەمىر جول بەيجيڭ مەكەمەسى مەن بەيجيڭ فاڭشان حالىقارالىق قۇرلىقتىق پورت تيجارات شەكتى سەرىكتەستىگى بىرگە ىسكە قوسقان، بۇدان كەيىن پويەز ءار اپتادا ءبىر رەت قاتىناۋ جيىلىگى بويىنشا تۇراقتى قاتىنايتىن بولادى. تانىستىرۋعا قاراعاندا، تۇراقتى كەزەكشى پويەز تۇراقتى ۋاقىت، تۇراقتى جەلى، تۇراقتى كەزەك بويىنشا قاتىنايدى، تاسىمال ونىمدىلىگى اناعۇرلىم جوعارى بولۋ، زات جونەلتۋى اناعۇرلىم ورنىقتى بولۋ سىندى كورنەكتى ارتىقشىلىققا يە، كاسىپورىندار ءوندىرىس جوسپارىن بايسالدىلىقپەن ورنالاستىرىپ، شەتەلدەن كەلگەن تاپسىرىستاردى ورىنداي الادى، زات اينالىمىنىڭ وزىندىك قۇنىن تومەندەتىپ، بازارداعى باسەكەلىك قۋاتىن جوعارىلاتۋعا ءتيىمدى. بەيجيڭ حالىقارالىق قۇرلىقتىق پورتىنىڭ قاتىستى جاۋاپتىسى مىنانى ءبىلدىردى: الاتاۋ ساعاسى شەكارا وتكەلىنىڭ ارتىقشىلىعىنا سۇيەنىپ، ورتا ازياعا قاتىنايتىن تۇراقتى كەزەكشى پويەز استاناداعى سىرتقى ساۋدا كاسىپورىندارىنا ورنىقتى، جوعارى ءونىمدى شەكارا اتتاعان زات اينالىمى جولىن سالادى. بەيجيڭ حالىقارالىق قۇرلىقتىق پورتى دا قىزمەت وتەۋ ساپاسىن ۇزدىكسىز جوعارىلاتىپ، كاسىپورىنداردىڭ قاجەتىنە نازاردى شوعىرلاندىرىپ، زات اينالىمى جوسپارىن جاساپ، اناعۇرلىم كوپ تاۋارلاردىڭ شەكارا اتتاپ، دۇنيە جۇزىنە جەتكىزىلۋىنە دەم بەرەدى.

كەلۋ قاينارى: حالىق تورابى