حوحشىلدا جورعا بوكەنىنىڭ جىلدىق اۋۋى باستالدى 

جۇڭگو اقپارات اگەنتتىگىنىڭ ءتىلشىسى پان يۇيجيە 5 – ايدىڭ 9 – كۇنى شينيڭنەن حابارلايدى. چيڭحاي ولكەسى يۇيشۋ زاڭزۋ اۆتونوميالى وبلىسى قوعام حاۋىپسىزدىگى مەكەمەسى حوحشىل جاراتىلىستىق قورىعى قوعام حاۋىپسىزدىگى مەكەمەسىنىڭ 5 - ايدىڭ 9 – كۇنى حابارلاۋىنشا، 5 – ايدىڭ 7 – كۇنى ساعات 17 دە، بيىلعى تۇڭعىش توپتاعى 158 جورعا بوكەن قارلى بورانعا قاراماي، سانجياڭيۋان مەملەكەتتىك باقشاسى حوحشىل باسقارماسى ۋداۋلياڭ قورعاۋ پۋنكتىنە قاراستى اۋماقتان حوحشىلدىڭ قويناۋىنا قاراي اۋعان، بىلتىرعىمەن سالىستىرعاندا، تۇڭعىش توپتاعى اۋعان جورعا بوكەن سانى جۇزگە جۋىق ارتقان.

ءار جىلى 5 – ايدا، چيڭحايدىڭ سانجياڭيۋانى، شيزاڭنىڭ چياڭتاڭى، شينجياڭنىڭ التىنتاۋى قاتارلى جەرلەردەگى ۇرعاشى جورعا بوكەندەر ءبىر جەرگە شوعىرلانىپ، چيڭحاي ولكەسى يۇيشۋ زاڭزۋ اۆتونوميالى وبلىسىنداعى حوحشىلداعى ”جورعا بوكەندەردىڭ ۇلكەن تۋىت ءۇيى“ دەپ اتالعان جوناي كولى اۋماعىنا قاراي اۋادى، 7 – ايدىڭ ورتا جانە اياق شەنىندە تولدەپ بولعاننان كەيىن تولدەرىن ەرتىپ اۋەلگى مەكەنىنە ورالادى. قازىر حوحشىل اۋماعىندا مەكەندەيتىن جورعا بوكەن توبىنىڭ سانى 70 مىڭنان اسادى، ولاردىڭ مەكەن جاڭالاۋ ساپارى ”دۇنيە جۇزىندەگى تۇياقتى حايۋاناتتاردىڭ ەڭ عاجايىپ كولەمدى كوشىنىڭ ءبىرى“ دەپ اتالادى.

حوحشىل جاراتىلىستىق قورىعى قوعام حاۋىپسىزدىگى مەكەمەسى سۋنانداجيە ەكولوگيالىق ساقشى ىستەرى بولىمشەسىنىڭ جاۋاپتىسى دانجىڭ سايدان بىلاي دەدى: جورعا بوكەن كوشەتىن مەزگىل باستالعاننان كەيىن، ساقشى جاق جورعا بوكەن ءۇيىرى وتەتىن چيڭحاي – شيزاڭ تاس جولى 109 – مەملەكەتتىك تاس جولى بويىندا شارلاۋ جيىلىگىن ارتتىرىپ، 24 ساعات بويى ۇزدىكسىز كۇزەتۋ، ارى – بەرى وتكەن كولىكتەردى رەتكە سالۋ، دەر كەزىندە قاتىناستى تەجەۋ شاراسىن اتقارىپ، جورعا بوكەندى قورعاۋ جونىندەگى بىلىمدەردى ۇگىتتەۋدى كۇشەيتىپ، ادامزات قيمىلىنىڭ جورعا بوكەننىڭ كوشۋىنە كەدەرگىلىك جاساۋىن ازايتقان.

كەلۋ قاينارى: حالىق تورابى