شي جينپيڭ رەسەيدىڭ زۇڭتۇڭى پۋتينمەن 10 - كەزەكتى جۇڭگو - رەسەي كورمەسىنە جەكە - جەكە قۇتتىقتاۋ حاتىن جولدادى

شينحۋا اگەنتتىگى، 5 - ايدىڭ 17 - كۇنى، بەيجيڭ. 5 - ايدىڭ 17 - كۇنى مەملەكەت ءتوراعاسى شي جينپيڭ رەسەيدىڭ زۇڭتۇڭى پۋتينمەن 10 - كەزەكتى جۇڭگو - رەسەي كورمەسىنە جەكە - جەكە قۇتتىقتاۋ حاتىن جولدادى.

شي جينپيڭ بىلاي دەپ اتاپ كورسەتتى: بيىل − جۇڭگو مەن رەسەيدىڭ ستراتەگيالىق سەلبەستىك سەرىكتەستىك قارىم - قاتىناس ورناتقاندىعىنىڭ 30 جىلدىعى جانە «جۇڭگو مەن رەسەيدىڭ تاتۋ كورشىلىك، دوستىق سەلبەستىك شارتىنا» قول قويىلعاندىعىنىڭ 25 جىلدىعى. ەكى جاقتىڭ بىرگە قۇلشىنۋىندا، جۇڭگو مەن رەسەيدىڭ ءار سالاداعى سەلبەستىگى ۇزدىكسىز تەرەڭدەپ، ناقتىلانىپ، سۇبەلى تابىستارعا قول جەتكىزدى.

شي جينپيڭ بىلاي دەپ باسا دارىپتەدى: ەكى ەلدەگى ءار سالانىڭ وسى كەزەكتى كورمەنى وراي ەتىپ، جۇڭگو مەن رەسەيدىڭ كورشىلەستىك جانە ءوزارا تولىقتاۋ ابزالدىعىن ساۋلەلەندىرىپ، جان - جاقتى ناقتى سەلبەستىكتى تەرەڭدەتىپ، ەكى ەلدىڭ ەكونوميكالىق، قوعامدىق دامۋىن اناعۇرلىم ويداعىداي جەبەپ، ەكى ەل حالىقتارىنىڭ ىرىس - قۇتىن ۇزدىكسىز ارتتىرىپ، جۇڭگو مەن رەسەيدىڭ جاڭا داۋىردەگى جان - جاقتى ستراتەگيالىق سەلبەستىك سەرىكتەستىك قارىم - قاتىناسىنىڭ ورنىقتى، باياندى بولۋىن ىلگەرىلەتۋگە تىڭ ۇلەس قوسۋىن ءۇمىت ەتەمىن.

پۋتين قۇتتىقتاۋ حاتىندا مىنالاردى ءبىلدىردى: رەسەي - جۇڭگو كورمەسى ەكى ەل اراسىنداعى كولەمى ەڭ ۇلكەن كورمە قيمىلىنا اينالىپ، ەكى جاقتىڭ تىكەلەي، ىشكەرىلەي پىكىرلەسۋىنە تۇعىر ازىرلەدى. وسى كەزەكتى كورمەنىڭ مازمۇنى باي، نازاردى ەكى جاقتى ءتۇيىندى سەلبەستىك سالاسىنا شوعىرلاندىرىپ، كەڭ تاقىرىپتى ارقاۋ ەتىپ، اۋىس - كۇيىس جاسايدى، بەلسەندى تابىستارعا قول جەتكىزىپ، ەكى ەلدىڭ ءوزارا ءتيىمدى سەلبەستىگىنىڭ جاڭا بولاشاعى ءۇشىن جوبا جاساپ، ەكى ەل حالقىنا باقىت جاراتاتىندىعىنا سەنەمىن.

10 - كەزەكتى جۇڭگو - رەسەي كورمەسىنىڭ تاقىرىبى ”سەنىم ارتۋ، سەلبەسۋ، تەڭ يگىلىككە كەنەلۋ“ بولدى، ونى ساۋدا مينيسترلىگى، حيلۇڭجياڭ ولكەلىك حالىق ۇكىمەتى، رەسەي ەكونوميكانى دامىتۋ مينيسترلىگى، رەسەي ونەركاسىپ جانە ساۋدا مينيسترلىگى بىرلەسىپ وتكىزەدى، سول كۇنى حيلۇڭجياڭ ولكەسىنىڭ حاربين قالاسىندا اشىلدى.