سىچۋاننىڭ يبين قالاسى گاۋشيان اۋدانىندا تۋىلعان 5.5 بال جەر سىلكىنىسىندە 13 ادام جەڭىل جارالانعان 

6 – ايدىڭ 29 – كۇنى ساعات 4 مولشەرىندە، ءتىلشىنىڭ سىچۋان ولكەسى يبين قالاسى جەر سىلكىنىسىنەن قۇتقارۋ جانە اپاتتان ساقتانۋ قولباسشىلىق شتابىنان ۇعىسۋىنشا، گاۋشيان اۋدانىندا تۋىلعان 5.5 بال جەر سىلكىنىسىندە ادام قازا بولماعان، جەڭىل جارالانعان 13 ادام ۋاعىندا شيپاحاناعا جەتكىزىلىپ ەمدەلگەن، حاۋىپسىز ورىنعا شۇعىل كوشىرىلگەن جانە ورنالاستىرىلعان ادام سانى 196 ادام.

جۇڭگو جەر سىلكىنىسى ستانسياسى تورىنىڭ رەسمي ولشەۋىنە قاراعاندا، 6 – ايدىڭ 29 – كۇنى ساعات 0 دەن 12 مينۋت وتكەندە سىچۋاننىڭ يبين قالاسى گاۋشيان اۋدانىندا 5.5 بال جەر سىلكىنگەن، سىلكىنىس قاينارى 6 كيلومەتر تەرەڭدىكتە، سىلكىنىس ورتالىعى سولتۇستىك ەندىك 28.50 گرادۋس، شىعىس بويلىق 104.69 گرادۋس ورىندا. سىچۋان ولكەلىك جەر سىلكىنىسى مەكەمەسىنىڭ تانىستىرۋىنشا، سىلكىنىس ورتالىعى يبين قالاسى گاۋشيان اۋدانى شاحى قالاشىعىندا.

ساعات 4 تەن 50 مينۋت وتكەندە، ءتىلشىنىڭ شاحى قالاشىعى شاڭلۇڭ قىستاعى پارتيانىڭ بۇقاراعا قىزمەت وتەۋ ورتالىعىنا جەتىپ ناق مايداننان ۇعىسۋىنشا، سىلكىنىس ورتالىعىندا قاتىناس، ەلەكتر قۋاتى، حابارلاسۋ لەنياسى ۇزىلمەگەن. شاحى قالاشىقتىق پارتكومنىڭ ورىنباسار شۋجيى، قالاشىق باستىعى يان چياڭنىڭ تانىستىرۋىنشا، 21 وتباسىنىڭ ۇيىنە سىزات تۇسكەن، مۇنىڭ ىشىندە 3 وتباسىنىڭ ءۇيىنىڭ ءبۇلىنۋ جاعدايى سالىستىرمالى تۇردە اۋىر بولعان، بۇل ۇيلەرگە قاتىستى 10 ادام جاقىن ماڭداعى تۋىس – تۋعان، دوس – جاراندارىنىڭ ۇيىنە ورنالاستىرىلعان. تەكسەرۋ ارقىلى شامامەن 12 جەردەن جولعا تۇسكەن تاس بايقالىپ، العاشقى قادامدا تازالانعان.

جەر سىلكىنگەننەن كەيىن، جۇڭگو جەر سىلكىنىسى مەڭگەرمەسى دەرەۋ 3 – دارەجەلى شۇعىل جاعدايعا توتەپ بەرۋ شاراسىن ىسكە قوسقان، سىچۋان ولكەلىك جەر سىلكىنىسى مەكەمەسى دەرەۋ جەر سىلكىنىسىندە شۇعىل جاعدايعا توتەپ بەرۋ جوسپارىن ىسكە قوسىپ، 3 – دارەجەلى شۇعىل جاعدايعا توتەپ بەرۋ شاراسىن اتقارعان، يبين قالالىق جەر سىلكىنىسىنەن قۇتقارۋ جانە اپاتتان ساقتانۋ قولباسشىلىق شتابى جەر سىلكىنىسىنە قاتىستى 3 – دارەجەلى شۇعىل جاعدايعا توتەپ بەرۋ شاراسىن ىسكە قوسقان. قازىرگە دەيىن، جەر سىلكىنىسىنەن قۇتقارۋ جانە اپاتتان ساقتانۋعا قاتىستى ءتۇرلى قىزمەتتەر قاربالاس ءارى ءتارتىپتى ورىستەتىلۋدە.

كەلۋ قاينارى: حالىق تورابى