شي جينپيڭ سەيشەلدىڭ زۇڭتۇڭى حەرمينيەمەن جۇڭگو مەن سەيشەلدىڭ ديپلوماتيالىق قاتىناس ورناتقاندىعىنىڭ 50 جىلدىعى بايلانىسىمەن ءوزارا قۇتتىقتاۋ تەلەگرامماسىن جولدادى

شينحۋا اگەنتتىگى، 6 - ايدىڭ 30 - كۇنى، بەيجيڭ. 6 - ايدىڭ 30 - كۇنى مەملەكەت ءتوراعاسى شي جينپيڭ سەيشەلدىڭ زۇڭتۇڭى حەرمينيەمەن ءوزارا قۇتتىقتاۋ تەلەگرامماسىن جولداپ، ەكى ەلدىڭ ديپلوماتيالىق قاتىناس ورناتقاندىعىنىڭ 50 جىلدىعىن قۇتتىقتادى.

شي جينپيڭ بىلاي دەپ اتاپ كورسەتتى: ديپلوماتيالىق قاتىناس ورناتقان 50 جىلدان بەرى، حالىقارالىق جاعداي قالاي وزگەرسە دە، جۇڭگو مەن سەيشەل باستان - اياق ءبىر - بىرىنە سەنىپ، تاباندىلىقپەن ءبىر - بىرىنە قارايلاسىپ، ءوزارا كومەكتەستى، ەكى ەلدىڭ دوستىعى قۇرىشتاي بەكەمدەلدى. مەن ەكى جاق ديپلوماتيالىق قاتىناس ورناتۋ اۋەلگى ماقساتىنان جازباي، تىزە قوسا العا باسسا بولعانى، جۇڭگو - سەيشەل قاتىناسى دامۋىنىڭ داڭعىل جولى، ءسوز جوق، بارعان سايىن كەڭەيەتىندىگىنە، ەكى جاقتى سەلبەستىكتىڭ بولاشاعى، ءسوز جوق، اناعۇرلىم نۇرلى بولاتىندىعىنا كامىل سەنەمىن. مەن جۇڭگو - سەيشەل قاتىناسىنىڭ دامۋىنا ايرىقشا ءمان بەرەمىن، حەرمينيە زۇڭتۇڭمەن بىرگە قۇلشىنىپ، ديپلوماتيالىق قاتىناس ورناتۋدىڭ 50 جىلدىعىن جاڭا باستاما ەتىپ، ءداستۇرلى دوستىقتى جالعاستىرىپ، ”ءبىر بەلدەۋ، ءبىر جولدى“ جوعارى ساپامەن بىرگە قۇرۋ جانە جۇڭگو - افريكا سەلبەستىك تالقى مىنبەرى سياقتى جۇلگەدە ءوزارا ءتيىمدى سەلبەستىكتى تەرەڭدەتىپ، بىرگە دامۋدى جەبەپ، جۇڭگو - سەيشەل ستراتەگيالىق سەرىكتەستىك قاتىناسىنىڭ ۇزدىكسىز تىڭ ساتىعا كوتەرىلۋىنە جەتەكشىلىك ەتىپ، ەكى ەل حالقىنا اناعۇرلىم ويداعىداي باقىت جاراتۋدى قالايمىن.

حەرمينيە مىنانى ءبىلدىردى: ديپلوماتيالىق قاتىناس ورناتقان 50 جىلدان بەرى سەيشەل - جۇڭگو قاتىناسى ءوزارا قۇرمەتتەۋ، ءوزارا سەنىم ارتۋ جانە بىرگە دامۋ نەگىزىندە ورنىقتى دامىدى. جۇڭگو قاشاندا سەيشەلدىڭ قاستەرلى سەرىگى، سەيشەل جاقتىڭ حالىق تۇرمىسىن جاقسارتۋىنا، مەملەكەتتىڭ دامۋ نىساناسىن جۇزەگە اسىرۋىنا كوپتەگەن قولداۋ كورسەتتى. سەيشەل جاق ءبىر جۇڭگو پرينسيبىن باتىل اتقارادى، ”ءبىر بەلدەۋ، ءبىر جولدى“ بىرگە قۇرۋ جانە جۇڭگو - افريكا سەلبەستىك تالقى مىنبەرى اياسىندا سەلبەستىكتى ۇزدىكسىز كۇشەيتىپ، ەكى ەل قاتىناسىن ۇزدىكسىز تەرەڭدەتۋدى قالايدى.