شي جينپيڭ قازاقستاننىڭ زۇڭتۇڭى توقايەۆپەن كەزدەستى

7 - ايدىڭ 16 - كۇنى تۇستەن كەيىن مەملەكەت ءتوراعاسى شي جينپيڭ شاڭحاي شيجياۋ قوناق ۇيىندە 2026 - جىلعى دۇنيە جۇزىلىك جاساندى زەردە جينالىسىنا جانە جاساندى زەردەنى دۇنيە جۇزىلىك باسقارۋ جوعارى دارەجەلىلەر ماجىلىسىنە قاتىناسۋ ءۇشىن جۇڭگوعا كەلگەن قازاقستاننىڭ زۇڭتۇڭى توقايەۆپەن كەزدەستى.

سۋرەتتى شينحۋا اگەنتتىگىنىڭ ءتىلشىسى جاي جيانلان تۇسىرگەن

«حالىق گازەتى»، 7 - ايدىڭ 16 - كۇنى، شاڭحاي (تىلشىلەر ياڭ چيچۋ، حۋان شياڭ). مەملەكەت ءتوراعاسى شي جينپيڭ 7 - ايدىڭ 16 - كۇنى تۇستەن كەيىن شاڭحاي شيجياۋ قوناق ۇيىندە 2026 - جىلعى دۇنيە جۇزىلىك جاساندى زەردە جينالىسىنا جانە جاساندى زەردەنى دۇنيە جۇزىلىك باسقارۋ جوعارى دارەجەلىلەر ماجىلىسىنە قاتىناسۋ ءۇشىن جۇڭگوعا كەلگەن قازاقستاننىڭ زۇڭتۇڭى توقايەۆپەن كەزدەستى.

شي جينپيڭ بىلاي دەپ اتاپ كورسەتتى: دۇنيە جۇزىندە عاسىرلىق وزگەرىس تەرەڭ، كۇردەلى، قۇبىلمالى بولۋدا، جۇڭگو مەن قازاقستاننىڭ قاتىناسى سىن - سىناقتار بارىسىندا ۇزاق ۋاقىت بەكەمدەلە ءتۇستى، ەكى ەلدىڭ ماڭگىلىك جالپى بەتتىك ستراتەگيالىق سەرىكتەستىك قاتىناسى جوعارى دەڭگەيدەگى اينالىمدى ساقتاپ، وراسان زور سەلبەستىك كومەسكى كۇشىن جانە كەڭ دامۋ ءورىسىن ايگىلەدى. جۇڭگو جاق تاياۋدا عانا جۇڭگو كوممۋنيستىك پارتياسى قۇرىلعاندىعىنىڭ 105 جىلدىعىن قۇتتىقتادى. جۇڭگو كوممۋنيستىك پارتياسىنىڭ كۇرەس بارىسىندا ۇزدىكسىز شۇعىلالى ناتيجە جاراتا الۋى، تاريح پەن حالىقتىڭ جۇڭگو كوممۋنيستىك پارتياسىن تاڭداۋى، تۇپتەپ كەلگەندە، جۇڭگو كوممۋنيستىك پارتياسىنىڭ اقيقاتقا تالپىنۋ، حالىققا تەرەڭ تامىر تارتۋ، تاريحي بورىشتى باتىلدىقپەن ارقالاۋ، دامۋ اعىمىنا سايكەسۋ، كۇرەس جۇرگىزۋگە باتىل بولۋ، ءوزىن الۋەتتەندىرۋگە ءمان بەرۋ سياقتى تاڭداۋلى ەرەكشەلىككە يە بولعاندىعىنان. بۇل − جۇڭگو كوممۋنيستىك پارتياسىنىڭ نە ءۇشىن ىسكەر بولۋىنىڭ شەشۋشى قۇپيا سيفرى. قازاقستان جالپى بەتتىك رەفورمالاۋدى بار كۇشپەن ىلگەرىلەتۋدە، بۇل − مەملەكەتتىڭ بولاشاعىن كوزدەي وتىرىپ جاسالعان ستراتەگيالىق جوبا. جۇڭگو مەن قازاقستان دامۋ ستراتەگياسى مەن ساياساتتارىن ۇشتاستىرۋدى كۇشەيتىپ، ناقتى سەلبەستىك دەڭگەيىن ۇزدىكسىز جوعارىلاتىپ، بىرگە دامۋعا دەم بەرىپ، جۇڭگو مەن قازاقستاننىڭ ستراتەگيالىق سەلبەستىگىنىڭ ۇزدىكسىز تىڭ ساتىعا كوتەرىلۋىن، تىڭ تابىستارعا قول جەتكىزۋىن ىلگەرىلەتۋى كەرەك.

شي جينپيڭ بىلاي دەپ باسا دارىپتەدى: جۇڭگو مەن قازاقستاننىڭ جالپى بەتتىك سەلبەستىگىن تاباندىلىقپەن ىلگەرىلەتۋ ەكى ەلدىڭ جانە ەكى ەل حالقىنىڭ ءتۇبىرلى مۇددەسىنە ۇيلەسەدى. ەكى جاق ساۋدانىڭ جاڭالىق اشا دامۋىن ىلگەرىلەتىپ، ساۋدا قۇرىلىمىن ساپالىلاندىرىپ، شەكارا اتتاعان ەلەكتروندىق ساۋدا، قىزمەت وتەۋ ساۋداسىنىڭ جاڭا كاسىپ كۇيىن جەتىلدىرۋى؛ ەنەرگيا، كەن ونىمدەرى سەلبەستىگىن كەڭەيتىپ، ءتۇيىندى نىسانداردىڭ تياناقتانىپ اتقارىلۋىن جەدەل ىلگەرىلەتۋى؛ ۇلاستىرۋ - تۇتاستىرۋ قۇرىلىسىن ىلگەرىلەتىپ، اناعۇرلىم كوپ توتە ۇشاتىن كەزەكشى ۇشاقتاردى كوبەيتىپ، حالىقارالىق جول تاسىمالىنىڭ قولايلىلانۋ دەڭگەيىن جوعارىلاتۋى كەرەك؛ جاڭاشا وندىرگىش كۇشتەردى جەتىلدىرۋدە جۇڭگو جاق سيفرلى ەكونوميكا، جاساندى زەردە سياقتى تەحنيكالاردان تەڭ يگىلىكتەنىپ، قازاقستاننىڭ سيفرلانۋعا قاراي بۇرىلىس جاساۋىنا دەم بەرۋدى قالايدى؛ ”جۇڭگو - قازاقستان مادەنيەت اۋىس - كۇيىس جىلىن“ ويداعىداي وتكىزىپ، وقۋ - اعارتۋ، عىلىم - تەحنيكا، ەمدەۋ، دەنساۋلىق ساقتاۋ، دەنە تاربيە، اقپارات قۇرالدارى سياقتىلاردىڭ سەلبەستىگىن كۇشەيتىپ، ۇرپاقتان - ۇرپاققا جالعاسقان دوستىقتىڭ نەگىزىن بەكەمدەۋى كەرەك. جۇڭگو جاق قازاقستان جاقپەن بىرگە ءتورت ءىرى دۇنيە جۇزىلىك باستامانى امالياتتا ايگىلەپ، بىرلەسكەن مەملەكەتتەر ۇيىمى، شاڭحاي سەلبەستىك ۇيىمى، جۇڭگو - ورتا ازيا مەحانيزمى سياقتى كوپ جاقتى مەحانيزمدە سايكەسۋ مەن سەلبەسۋدى كۇشەيتىپ، حالىقارالىق ادىلدىك پەن ادىلەتتىلىكتى بىرگە قورعاۋدى قالايدى.

توقايەۆ مىنالاردى ءبىلدىردى: شاڭحاي سىندى جاڭالىق اشۋ ومىرشەڭدىك كۇشىنە تولى قالاعا كەلىپ، دۇنيە جۇزىلىك جاساندى زەردە جينالىسىنا قاتىناسقانىما وتە قۋانىشتىمىن. جۇڭگو كوممۋنيستىك پارتياسى قۇرىلعاندىعىنىڭ 105 جىلدىعىن قىزۋ قۇتتىقتايمىن، جۇڭگونىڭ ءتوراعا شي جينپيڭنىڭ دانىشپان باسشىلىعىندا كۇللى دۇنيە ءجۇزىن جالت قاراتقان دامۋ جەتىستىكتەرىنە قول جەتكىزگەندىگىن قۇتتىقتايمىن. قازاقستان جۇڭگومەن قاتىناستى قازاقستاننىڭ سىرتقى ديپلوماتياسىنىڭ ماڭداي الدى باعىتى ەتىپ جۇڭگومەن ماڭگىلىك جالپى بەتتىك ستراتەگيالىق سەرىكتەستىك قاتىناستى ۇزدىكسىز كۇشەيتۋگە كۇش سالادى. قازاقستان جاق ءتوراعا شي جينپيڭنىڭ ەكى جاقتى قاتىناستى دامىتۋ جونىندەگى ماڭىزدى پىكىرىن بۇكىلدەي قۇپتايدى ءارى جۇڭگو جاقپەن بىرگە بەلسەنە تياناقتاندىرادى، جۇڭگو جاقپەن جوعارى جىكتەگىلەردىڭ بارىس - كەلىسىن جيىلەتىپ، ساۋدا، قارجى قوسۋ، قاتىناس، ەنەرگيا، اۋىل شارۋاشىلىعى، سيفرلى ەكونوميكا سياقتى جاقتارداعى ناقتى سەلبەستىكتى كۇشەيتىپ، گۋمانيتارلىق اۋىس - كۇيىستى جەبەپ، ەكى ەل قاتىناسىنىڭ دامۋىندا اناعۇرلىم كوپ، ناقتى جەتىستىكتەرگە قول جەتكىزۋدى ءۇمىت ەتەدى. قازاقستان جاق ءتوراعا شي جينپيڭ العا قويعان 4 ۇلكەن دۇنيە جۇزىلىك باستامانى جانە ادامزاتتىڭ تاعدىرلاس ورتاق تۇلعاسىن قۇرۋ ۇستانىمىن ايرىقشا القايدى جانە قولدايدى، جۇڭگو جاقپەن بىرلەسكەن مەملەكەتتەر ۇيىمى، شاڭحاي سەلبەستىك ۇيىمى، جۇڭگو - ورتا ازيا مەحانيزمى، ازيا ءوزارا ىقپالداستىق جانە سەنىم شارالارى ءماجىلىسى سياقتى كوپ جاقتى تۇعىرلاردا جوعارى دەڭگەيلى سەلبەستىكتى ۇزدىكسىز ساقتاپ، جاساندى زەردەنى دۇنيە جۇزىلىك جونگە سالۋ سەلبەستىگىن بەلسەنە ورىستەتىپ، دۇنيە ءجۇزىنىڭ باياندى دامۋى مەن بەيبىتشىلىگىن، ورنىقتىلىعىن بىرگە جەبەۋدى قالايدى.

كەزدەسۋدەن كەيىن ەكى ەل مەملەكەت باسشىلارى ەكونوميكا - ساۋدا، قاتىناس، قازىنا، اقپارات قۇرالدارى سياقتى سالالارداعى كوپ ءتۇرلى سەلبەستىك قۇجاتتارىنا قول قويۋعا جانە ونى جاريالاۋعا بىرگە كۋا بولدى.

ساي چي، ديڭ شۋەشياڭ، ۋاڭ ي، چىن جينيڭ قاتارلىلار جوعارىداعى قيمىلدارعا قاتىناستى.