قوعام حاۋىپسىزدىگى مينيسترلىگىنىڭ قاتىناس باسقارۋ مەكەمەسى جازدىق دەمالىسقا قاتىستى ەسكەرتۋ جاريالادى: بالالاردى ”زاڭسىز تيجارات جۇرگىزەتىن اۆتوموبيلگە“ وتىرعىزباڭىزدار

قوعام حاۋىپسىزدىگى مينيسترلىگىنىڭ قاتىناس باسقارۋ مەكەمەسى 7 - ايدىڭ 20 - كۇنى ەسكەرتۋ جاريالادى، جازدىق دەمالىس مەزگىلىندە ءبىر ءبولىم ”زاڭسىز تيجارات جۇرگىزەتىن“ شوفەرلەر ورايدان پايدالانىپ جولاۋشى تاسىمالدايدى، بۇل بالالاردىڭ ساپارعا شىعۋ حاۋىپسىزدىگىنە كومەسكى قاتەر تۋدىراتىندىقتان، ونان ساقتانۋ قاجەت.

جۋىردا جياڭشي ولكەسىندەگى جوعارى قارقىندى تاس جولداعى قاتىناس ساقشىلارى زاڭسىز تاسىمالمەن شۇعىلدانعان، وتىرعىزعان ادام سانى ولشەمنەن اسقان ءبىر شاعىن اۆتوبۋستى تەكسەرىپ ءبىر جاقتى ەتكەن. اتالعان اۆتوموبيلگە تەك ۋاقىتتىق ءنومىر تاقتاسى ىلىنگەن، 7 ادام وتىرۋعا بولاتىن اۆتوموبيلگە، ءىس جۇزىندە، 8 ادام وتىرعىزعان، جولاۋشىلاردىڭ كوبى اتا - اناسى جۇمىس ىستەيتىن جەرگە بارىپ ولارمەن كەزدەسۋگە اتتانعان بالالار ەكەن. تەكسەرۋ ارقىلى اۆتوموبيل جۇرگىزۋشى گو Xتىڭ جىجياڭنان جولاۋشىلاردى وتىرعىزىپ جياڭشيگە قاراي جولعا شىققانى، ءار ادامنان 200 يۋان اقى العانى، الايدا گو X پەن ونىڭ اۆتوموبيلىنىڭ تاس جولدا تاسىمالمەن شۇعىلدانۋ رۇقسات كۋالىگى جوق ەكەندىگى، زاڭسىز تاسىمالمەن شۇعىلدانۋ كۇمانىنا شاتىلعانى انىقتالعان.

قاتىناس ساقشىلارى مىنانى ەسكەرتتى: اتا - انالار جازدىق دەمالىستا بالالاردىڭ ساپارعا شىعۋىن لايىقتى ورنالاستىرۋى، شەكتەۋلى ادام سانىنان ارتىق ادام وتىرعىزعان اۆتوموبيلگە وتىرعىزۋدان، كولىكتى زاڭسىز تۇردە بىرگە جالداۋدان باس تارتۋى قاجەت. ەگەر باسقالارعا بالانى اۆتوموبيلمەن الا كەلۋدى تاپسىرساڭىز، تاپسىرعان ادام مەن ول جۇرگىزگەن اۆتوموبيلدىڭ تولىمدىلىعىن، حاۋىپسىزدىك جاعدايىن ۇعىسۋىڭىز كەرەك. بارشا شوفەرلەر اۆتوموبيلدىڭ جىلدامدىعىن شەكتەن اسىرۋ، شارشاعان كۇيدە اۆتوموبيل جۇرگىزۋ سىندى زاڭعا قايشى ارەكەتتەردەن اۋلاق بولۋى قاجەت. (ءتىلشى سۇن پىڭچىڭ)

كەلۋ قاينارى: حالىق تورابى