ءتىلشى مەملەكەتتىك 216 – تاس جولداعى ەلەكتر قۇرىلعىلارىن شۇعىل جوندەپ جاتقان جەردەن حابار بەردى 

8 - ايدىڭ 26 – كۇنى تۇستەن بۇرىن، نەپال جاقتا لاي كوشكىنى اپاتى تۋىلعاندىقتان، شيزاڭ رىكازى قالاسى جيلۇڭ اۋدانى جيلۇڭ وتكەلىندە ادامداردىڭ ءولىمى جانە جارالانۋى، دەرەكسىز كەتۋى سىندى اۋىر اپات جاعدايى تۋىلدى. بەتكەيدەن دومالاپ تۇسكەن تاستار مەن اعىنى قاتتى سۋ قوسانجارلاعان كۇردەلى جۇمىس ورتاسىنا ءدوپ كەلگەندە، ەلەكتر قۋاتى سالاسىنداعى شۇعىل قۇتقارۋ قىزمەتكەرلەرى ۋاقىتتى مىقتى يگەرىپ، مەملەكەتتىك 216 – تاس جولدىڭ تۇتاستىرىلعان بولەگىندە باعانا ورناتۋ، ەلەكتر جەلىسىن تارتۋ جۇمىستارىن جەدەل ورىستەتتى.

ورتالىق تەلەۆيزياسى ءتىلشىسى گۋ جۇنليڭ: بۇل جەر جيلۇڭ وتكەلىندەگى نەگىزگى قۇتقارۋ رايونىنا بارىپ – كەلەتىن مەملەكەتتىك 216 – تاس جولداعى شۇعىل جوندەپ جاتقان ورىن، ءبىر جاعىندا اعىنى قاتتى وركەشتەپ اعىپ جاتقان سۋ، ەندى ءبىر جاعىندا لاي كوشكىنى اعىپ وتكەن جۇمساق تاۋ جىنىس قاباتى بار، كەز كەلگەن ۋاقىتتا تاس دومالاپ ءتۇسۋى مۇمكىن. وسىنداي جاعدايدا ەلەكتر قۇرىلعىلارىن شۇعىل جوندەۋدىڭ قانشالىقتى قيىن ەكەنىن ەلەستەتۋگە بولادى.

ءتىلشىنىڭ ۇعىسۋىنشا، بۇل ەلەكتر باعاناسى قازىر جيلۇڭ وتكەلىنە ەڭ جاقىن باعانا بولىپ، نەگىزگى قۇتقارۋ رايونىنان تەك 2.6 كيلومەتر عانا قاشىقتىقتا ەكەن. استىڭعى جاعىنا قۇم – شاعىل ۇيىلگەن، بۇل ەلەكتر باعانالارى جەر استىنا 2 مەتر تەرەڭدىككە دەيىن كومىلگەن. جالپى 5 دانا باعانا ورناتىلعان.

ەلەكتر قۋاتى سالاسىنداعى قىزمەتكەرلەر ەلەكتر باعاناسىنا ەلەكتر سىمىن تارتىپ، ەلەكتر سىمىن ايىرعىش زاتتاردى ورناتتى. وسىنداي ءبىر باعانانى ورناتۋعا ەڭ تەز بولعاندا جارىم ساعات ۋاقىت كەتەدى ەكەن.

قازىرگە دەيىن، جەرگىلىكتى ەلەكتر سەرىكتەستىگى نەگىزگى قۇتقارۋ رايونىنا بارىپ – كەلەتىن مەملەكەتتىك 216 – تاس جولدىڭ تۇتاستىرىلعان بولەگىندە جالپى 8 دانا ەلەكتر جەتكىزۋ باعاناسىن ورناتقان.

مەملەكەتتىك ەلەكتر تورى سەرىكتەستىگى جيلۇڭ اۋداندىق ەلەكتر قۋاتىن جەتكىزۋ سەرىكتەستىگىنىڭ جاۋاپتىسى پۋ چيۇڭ: جوسپار بويىنشا، ەلەكتر جەتكىزۋ باعاناسىنان جيىنى 40 داناسى مەن قوسالقى جابدىقتاردى ورناتىپ، بۇدان بىلايعى قۇتقارۋ جۇمىستارىنىڭ حاۋىپسىز جۇرگىزىلۋىن ورنىقتى ەلەكتر قۋاتىمەن قامدايمىز، – دەدى.

(ورتالىق تەلەۆيزياسى ءتىلشىسى ۋاڭ شى - يۇي، گۋ جۇنليڭ، حاۋ يجيە)

كەلۋ قاينارى: حالىق تورابى