شي جينپيڭ وزبەكستاننىڭ زۇڭتۇڭى مىرزيويەۆپەن كەزدەستى

سول جەر ۋاقىتى 8 - ايدىڭ 31 - كۇنى تۇستەن كەيىن مەملەكەت ءتوراعاسى شي جينپيڭ بىشكەكتە 2026 - جىلعى شاڭحاي سەلبەستىك ۇيىمىنىڭ باسشىلار ماجىلىسىنە قاتىناسۋ كەزىندە وزبەكستاننىڭ زۇڭتۇڭى مىرزيويەۆپەن كەزدەستى.

سۋرەتتى شينحۋا اگەنتتىگىنىڭ ءتىلشىسى لي شياڭ تۇسىرگەن

«حالىق گازەتى»، 8 - ايدىڭ 31 - كۇنى، بىشكەك (تىلشىلەر باي ياڭ، شيڭ شۋە). سول جەر ۋاقىتى 8 - ايدىڭ 31 - كۇنى تۇستەن كەيىن مەملەكەت ءتوراعاسى شي جينپيڭ بىشكەكتە 2026 - جىلعى شاڭحاي سەلبەستىك ۇيىمى باسشىلار ماجىلىسىنە قاتىناسۋ كەزىندە وزبەكستاننىڭ زۇڭتۇڭى مىرزيويەۆپەن كەزدەستى.

شي جينپيڭ بىلاي دەپ اتاپ كورسەتتى: بيىل _ جۇڭگو مەن وزبەكستاننىڭ جالپى بەتتىك ستراتەگيالىق سەرىكتەستىك قاتىناس ورناتقاندىعىنىڭ 10 جىلدىعى. ءبىزدىڭ بىرگە جەتەكشىلىك ەتۋىمىزدە ەكى ەل قاتىناسى ۇزدىكسىز ساپاسىن كۇشەيتىپ، دارەجەسىن جوعارىلاتىپ، ءار سالاداعى سەلبەستىكتە سۇبەلى تابىستارعا قول جەتكىزىلدى، جۇڭگو مەن وزبەكستاننىڭ تاعدىرلاس ورتاق تۇلعاسى قۇرىلىسىندا كورنەكتى تابىستارعا قول جەتتى. جۇڭگو جاق وزبەكستان جاقپەن بىرگە ستراتەگيالىق ءوزارا سەنىمدىلىكتى بەكەمدەپ، ءوزارا ءتيىمدى سەلبەستىكتى تەرەڭدەتىپ، جۇڭگو - وزبەكستان قاتىناسىنىڭ جاڭا ”التىن 10 جىلدىعىن“ بىرگە جاراتۋدى قالايدى.

شي جينپيڭ بىلاي دەپ باسا دارىپتەدى: حالىقارالىق جاعداي قالاي وزگەرسە دە، جۇڭگو جاقتىڭ جۇڭگو - وزبەكستان دوستىعىن تەرەڭدەتۋگە كۇش سالۋ تۇرعىسى وزگەرمەيدى، وزبەكستاننىڭ ءوز مەملەكەت جاعدايىنا ۇيلەسەتىن دامۋ جولىمەن ءجۇرۋىن بۇرىنعىداي قولدايدى. ەكى جاق قول ۇستاسا قۇلشىنىپ، ەكى ەل سەلبەستىگىنىڭ ۇلى ءىسىن ويداعىداي ىستەۋى كەرەك. جۇڭگو - قىرعىزستان - وزبەكستان تەمىر جول قۇرىلىسىن جوعارى ساپامەن ىلگەرىلەتىپ، جاساندى زەردە، شولەيتتەنۋدى جونگە سالۋ سياقتى سەلبەستىكتەردى كەڭەيتىپ، ءوزارا پايدا جەتكىزىپ، تەڭ يگىلىككە كەنەلۋگە تاباندى بولۋ كەرەك. ەكى ەلدىڭ جەرگىلىكتى ورىندارى اۋىس - كۇيىسىنىڭ قىزۋ جاعدايىن جالعاستىرىپ، ءوزارا مادەنيەت ورتالىعىن قۇرۋدى جەدەلدەتىپ، وقۋ - اعارتۋ، كەدەيلىكتى ازايتۋ سياقتى سالالارداعى سەلبەستىكتى كەڭەيتىپ، حالىق تىلەگىنىڭ توعىسۋىن جەبەۋ كەرەك. ەكى جاقتىڭ زاڭ اتقارۋ، حاۋىپسىزدىك سەلبەستىگى مەحانيزمىنەن ويداعىداي پايدالانىپ، ”ءۇش ءتۇرلى كۇشكە“ تىزە قوسا سوققى بەرىپ، حاۋىپسىزدىك قورعانىس شەبىن بەكەمدەۋ كەرەك. شاڭحاي سەلبەستىك ۇيىمىن قۇرۋشى مۇشە ەل رەتىندە، جۇڭگو مەن وزبەكستان تيانجين باسشىلار ءماجىلىسىنىڭ جەتىستىكتەرىن ويداعىداي تياناقتاندىرۋدى بىرگە ىلگەرىلەتىپ، ءوڭىردىڭ دامۋىن، گۇلدەنۋىن جەبەۋى قاجەت.

مىرزيويەۆ مىنالاردى ءبىلدىردى: جۇڭگونىڭ ءتوراعا شي جينپيڭنىڭ باسشىلىعىندا كەلەلى دامۋ جەتىستىكتەرىنە ۇزدىكسىز قول جەتكىزىپ، دۇنيە جۇزىلىك سىن - سايىستارعا بەرىك سەنىممەن توتەپ بەرگەندىگىن قىزۋ قۇتتىقتايمىن، وزبەكستان جاق جۇڭگو ۇلگىسىندەگى وسىزامانداندىرۋدىڭ نۇرلى بولاشاعىنا تولىق سەنىم ارتادى. وزبەكستان مەن جۇڭگونىڭ تەرەڭ دوستىعى بار، باستان - اياق ءبىرىن - ءبىرى ءتۇسىنىپ، ءبىرىن - ءبىرى قولداپ كەلەدى. ءتوراعا شي جينپيڭنىڭ كورەگەندىگى وزبەكستان - جۇڭگو قاتىناسىنا كەڭ ءورىس اشىپ، ەكى جاقتىڭ ءار سالاداعى سەلبەستىگىنىڭ جاپپاي دامۋىنا جەتەكشىلىك ەتتى. وزبەكستان جاق جۇڭگومەن قاتىناستى دامىتۋعا تاباندى بولادى، حالىقارالىق جاعدايدىڭ وزگەرىسىنە بولا ەشقانداي وزگەرىس تۋدىرمايدى، جۇڭگومەن بىرگە ساياسي سەنىمدىلىكتى تەرەڭدەتىپ، ساۋداعا قارجى قوسۋدى كەڭەيتىپ، اۋىل شارۋاشىلىعى، قاتىناس، ەنەرگيا، كەن ونىمدەرى، عىلىم - تەحنيكا سياقتى سالالارداعى سەلبەستىكتى تەرەڭدەتىپ، گۋمانيتارلىق اۋىس - كۇيىستى جەبەپ، ”ءۇش ءتۇرلى كۇشكە“ بىرگە سوققى بەرىپ، ەكى جاقتى قاتىناستىڭ اناعۇرلىم زور دامۋىن ىلگەرىلەتۋدى قالايدى. وزبەكستان جاق ءبىر جۇڭگو پرينسيبىنە تاباندى بولىپ، ءتوراعا شي جينپيڭ العا قويعان 4 ءىرى دۇنيە جۇزىلىك باستامانى ايرىقشا قۇپتايدى، جۇڭگومەن قول ۇستاسا وتىرىپ شاڭحاي سەلبەستىك ۇيىمىنىڭ دامۋىن ىلگەرىلەتىپ، حالىقارالىق ادىلدىك پەن ادىلەتتىلىكتى بىرگە قورعاۋدى قالايدى.

ساي چي، ۋاڭ ي قاتارلىلار كەزدەسۋدە بىرگە بولدى.

كەلۋ قاينارى: حالىق تورابى