شي جينپيڭ موڭعۇليانىڭ زۇڭتۇڭى حورەلسۋحپەن كەزدەستى

سول جەر ۋاقىتى 8 - ايدىڭ 31 - كۇنى تۇستەن كەيىن مەملەكەت ءتوراعاسى شي جينپيڭ بىشكەكتە 2026 - جىلعى شاڭحاي سەلبەستىك ۇيىمىنىڭ باسشىلار ماجىلىسىنە قاتىناسۋ كەزىندە موڭعۇليانىڭ زۇڭتۇڭى حورەلسۋحپەن كەزدەستى.

سۋرەتتى شينحۋا اگەنتتىگىنىڭ ءتىلشىسى يان يان تۇسىرگەن

«حالىق گازەتى»، 8 - ايدىڭ 31 - كۇنى، بەيجيڭ (تىلشىلەر جۋ شياۋجياۋ، ۋاڭ زى). سول جەر ۋاقىتى 8 - ايدىڭ 31 - كۇنى تۇستەن كەيىن مەملەكەت ءتوراعاسى شي جينپيڭ بىشكەكتە 2026 - جىلعى شاڭحاي سەلبەستىك ۇيىمىنىڭ باسشىلار ماجىلىسىنە قاتىناسۋ كەزىندە موڭعۇليا زۇڭتۇڭى حورەلسۋحپەن كەزدەستى.

شي جينپيڭ بىلاي دەپ اتاپ كورسەتتى: جۇڭگو مەن موڭعۇليا تاۋ - وزەندەرى تۇتاسقان، كورشىلەس قونىستانعان، بەيبىت قاتار تۇرادى، ءبىر - بىرىنە قارايلاسۋ، سەلبەسىپ تەڭ يگىلىككە كەنەلۋ باستان - اياق ەكى ەل قاتىناسىنىڭ نەگىزگى اعىمى جانە نەگىزى. جۇڭگو جاق جۇڭگو - موڭعۇليا قاتىناسىن ۇزدىكسىز توڭىرەكتىك ديپلوماتياداعى ماڭىزدى ورىنعا قويادى، موڭعۇليا جاقپەن بىرگە ستراتەگيالىق ءوزارا سەنىمدىلىكتى بەكەمدەپ، ءوزارا ءتيىمدى سەلبەستىكتى تەرەڭدەتىپ، حالىق تىلەگىنىڭ توعىسۋىن جەبەپ، ەكى ەلدىڭ جان - جاقتى ستراتەگيالىق سەرىكتەستىك قاتىناسىنا اناعۇرلىم كوپ ومىرشەڭدىك كۇش ۇستەپ، جۇڭگو - موڭعۇليا تاعدىرلاس ورتاق تۇلعاسىن قۇرۋدى ىلگەرىلەتەدى.

شي جينپيڭ بىلاي دەپ باسا دارىپتەدى: ەكى جاق جۇڭگو - موڭعۇليا قاتىناسى دامۋىنىڭ ساياسي نەگىزىن بەكەمدەپ، ءبىر - ءبىرىنىڭ تاۋەلسىزدىگىنە، يەلىك ۇقىعىنا جانە تەرريتوريا تۇتاستىعىنا، ءبىر - ءبىرىنىڭ وزەكتى مۇددەسىنە جانە ءجىتى قاداعالاپ وتىرعان كەلەلى ىستەرىنە قۇرمەت ەتۋى كەرەك. جۇڭگو جاق موڭعۇليا جاقپەن دامۋ ستراتەگياسىن ۇشتاستىرۋدى كۇشەيتىپ، ساۋدا، ۇلاستىرۋ - تۇتاستىرۋ، ەنەرگيا، كەن ونىمدەرى سياقتى ءداستۇرلى سەلبەستىكتى ىلگەرىلەتىپ، جاسىل كەن ونىمدەرى، جاساندى زەردە، سيفرلى ەكونوميكا سياقتى جاڭادان گۇلدەنگەن سالالارداعى سەلبەستىكتىڭ كومەسكى كۇشىن اشىپ، ءوزارا ءتيىمدى سەلبەستىكتىڭ اناعۇرلىم كوپ ارتۋ تۇيىندەرىن قالىپتاستىرىپ، وسىزاماندانۋ جولىندا قول ۇستاسا العا باسۋدى قالايدى. موڭعۇليا جاقتىڭ جۇڭگو قارجىلاندىرعان كاسىپورىنداردىڭ زاڭدى ۇقىق - مۇددەسىن شىنايى قورعاۋىن ءۇمىت ەتەدى. ەكى جاق تاعى كوپ جاقتى سايكەسۋ مەن سەلبەسۋدى كۇشەيتىپ، دۇنيە جۇزىلىك سايىستارعا بىرگە توتەپ بەرۋى كەرەك.

حورەلسۋح مىنالاردى ءبىلدىردى: موڭعۇليا مەن جۇڭگو دوس كورشى، حالىقارالىق جاعداي قالاي وزگەرسە دە، ەكى ەل باستان - اياق ءوزارا قۇرمەت ەتىپ، ءوزارا سەنىم ارتىپ، تاتۋ كورشى بولىپ كەلەدى. جۇڭگونىڭ دامۋى توڭىرەكتەگى ەلدەرگە ماڭىزدى وراي جاراتىپ، ازيا مەن دۇنيە ءجۇزىنىڭ دامۋىنا جەتەكشىلىك ەتۋدە. جۇڭگومەن دوستىق سەلبەستىكتى تەرەڭدەتۋ _ موڭعۇليانىڭ ديپلوماتيالىق ساياساتىنىڭ باستى باعىتى، موڭعۇليا جاق جۇڭگو جاقپەن ساياسي سەنىمدىلىكتى ۇزدىكسىز بەكەمدەپ، ساۋدا، قارجى قوسۋ، ونەركاسىپ، اۋىل شارۋاشىلىعى، كەن كاسىبى، جاسىل ەكونوميكا سياقتى سەلبەستىكتەردى جيىلەتىپ، ەكى ەل قاتىناسىنىڭ ۇزدىكسىز تىڭ ساتىعا كوتەرىلۋىن ىلگەرىلەتۋدى قالايدى. موڭعۇليا جاق ءبىر جۇڭگو پرينسيبىن باتىل اتقارادى، تايۋان _ جۇڭگو تەرريتورياسىنىڭ ايرىلماس ءبىر بولىگى، شينجياڭعا، شيزاڭعا، شياڭگاڭعا ساياتىن ماسەلەلەردىڭ بارلىعى _ جۇڭگونىڭ ىشكى ءىسى. ءتوراعا شي جينپيڭ العا قويعان 4 ءىرى دۇنيە جۇزىلىك باستاما مەن ادامزاتتىڭ تاعدىرلاس ورتاق تۇلعاسىن قۇرۋ ۇستانىمى دۇنيە ءجۇزىنىڭ بەيبىتشىلىگى مەن حاۋىپسىزدىگىن قورعاۋدا، باياندى دامۋدى جەبەۋدە، دۇنيە جۇزىلىك سىن - سايىسقا توتەپ بەرۋدە ماڭىزدى مانگە يە، موڭعۇليا جاق جۇڭگو جاقپەن بىرگە امالياتتا ايگىلەۋدى قالايدى.

ساي چي، ۋاڭ ي قاتارلىلار كەزدەسۋدە بىرگە بولدى.

كەلۋ قاينارى: حالىق تورابى