شي جينپيڭ ەگيپەتتىڭ زۇڭتۇڭى سيسيمەن كەڭەس وتكىزدى

سول جەر ۋاقىتى 9 - ايدىڭ 2 - كۇنى تۇستەن بۇرىن ەگيپەتتىڭ زۇڭتۇڭى سيسي جۇڭگونىڭ مەملەكەت ءتوراعاسى شي جينپيڭمەن كايرو كۇن سارايىندا كەڭەس وتكىزدى. سۋرەتتە: كەڭەستەن بۇرىن سيسي شي جينپيڭگە ارناپ قارسى الۋ سالتىن وتكىزۋدە.

سۋرەتتى شينحۋا اگەنتتىگىنىڭ ءتىلشىسى شىن حۇڭ تۇسىرگەن.

سول جەر ۋاقىتى 9 - ايدىڭ 2 - كۇنى تۇستەن بۇرىن ەگيپەتتىڭ زۇڭتۇڭى سيسي جۇڭگونىڭ مەملەكەت ءتوراعاسى شي جينپيڭمەن كايرو كۇن سارايىندا كەڭەس وتكىزدى. سۋرەتتە: شي جينپيڭ مەن حانىمى پىڭ لييۋان جانە سيسي مەن حانىمى يتيسار ەكى ەلدىڭ مەملەكەت تۋى الدىندا ەستەلىك سۋرەتكە تۇسۋدە.

سۋرەتتى شينحۋا اگەنتتىگىنىڭ ءتىلشىسى يان بوگۋ تۇسىرگەن

سول جەر ۋاقىتى 9 - ايدىڭ 2 - كۇنى تۇستەن بۇرىن ەگيپەتتىڭ زۇڭتۇڭى سيسي جۇڭگونىڭ مەملەكەت ءتوراعاسى شي جينپيڭمەن كايرو كۇن سارايىندا كەڭەس وتكىزدى. كەڭەستەن كەيىن ەكى ەلدىڭ مەملەكەت باسشىلارى ”ءبىر بەلدەۋ، ءبىر جولدى“ بىرگە قۇرۋ، جاساندى زەردە، ەكونوميكا - ساۋدا، ءوندىرۋ، قامداۋ تىزبەگى سەلبەستىگى سياقتى سالالارداعى كوپ ءتۇرلى سەلبەستىك قۇجاتتارىنا قول قويۋعا بىرگە كۋا بولدى.

سۋرەتتى شينحۋا اگەنتتىگىنىڭ ءتىلشىسى شيە حۋانچى تۇسىرگەن.

«حالىق گازەتى»، 9 - ايدىڭ 2 - كۇنى، كايرو (تىلشىلەر حۋاڭ پەيجاۋ، گۇڭ حان). سول جەر ۋاقىتى 9 - ايدىڭ 2 - كۇنى تۇستەن بۇرىن ەگيپەتتىڭ زۇڭتۇڭى سيسي جۇڭگونىڭ مەملەكەت ءتوراعاسى شي جينپيڭمەن كايرو كۇن سارايىندا كەڭەس وتكىزدى.

كايرودا اسپان شايداي اشىق. شي جينپيڭ مەن حانىمى پىڭ لييۋان اۆتوكولىكپەن كۇن سارايىنا جەتكەندە، اتتى قوسىن مەن قۇرمەت قاراۋىلى ساپ تۇزەپ قۇرمەت ءبىلدىردى، اسكەري وركەستر قوناقتاردى قارسى الۋ مۋزىكاسىن ورىندادى، 21 رەت قۇرمەت ساليۋتى اتىلدى. سيسي مەن حانىمى يتيسار ىستىق ىقىلاسپەن قارسى الدى.

سيسي شي جينپيڭگە ارناپ قارسى الۋ سالتىن وتكىزدى. ەكى ەلدىڭ مەملەكەت باسشىلارى قۇرمەت قاراۋىلى مىنبەسىنە بىرگە شىقتى، اسكەري وركەستر جۇڭگو مەن ەگيپەتتىڭ مەملەكەت اندەرىن ورىندادى. ەكى ەلدىڭ مەملەكەت باسشىلارى جەكە - جەكە قارسى جاقتان سەرىك بولىپ كەلگەندەرمەن قول الىسىپ قۇرمەت ءبىلدىردى. ەكى ەلدىڭ مەملەكەت باسشىلارى مەن حانىمدارى كۇن سارايى زالىنا كىرىپ، ەكى ەلدىڭ مەملەكەت تۋى الدىندا سۋرەتكە ءتۇستى.

قارسى الۋ سالتىنان كەيىن ەكى ەلدىڭ مەملەكەت باسشىلارى كەڭەس وتكىزدى.

شي جينپيڭ بىلاي دەپ اتاپ كورسەتتى: 1956 - جىلى ەگيپەت اراب ەلدەرى مەن افريكا ەلدەرى اراسىندا الدىمەن جاڭا جۇڭگومەن ديپلوماتيالىق قاتىناس ورناتتى. ەكى ەلدىڭ اعا بۋىن باسشىلارى ەكى ەل حالقىن ۇلتتىڭ تاۋەلسىزدىگىنە تالپىنۋعا باستاپ، يمپەرياليزم مەن وتارشىلدىققا قارسى تۇرۋ جولىندا تىزە قوسا كۇرەس جۇرگىزىپ، مىزعىماس تەرەڭ دوستىقتى سومدادى. 70 جىلدىق بوران - شاشىندى باستان كەشىرۋ جۇڭگو، ەگيپەت ەكى ەل قاتىناسىنىڭ ”تەڭ تۇرعىدا ءوزارا سەنۋ، دوستىق، ءوزارا ۇلگى الۋ، ءبىر جاعادان باس، ءبىر جەڭنەن قول شىعارۋ، سەلبەسىپ تەڭ يگىلىككە كەنەلۋ“ سىندى ايقىن ەرەكشەلىگىن جەتىلدىردى جانە وعان كۋا بولدى. تاياۋ جىلداردان بەرى ءبىزدىڭ بىرگە جەتەكشىلىك ەتۋىمىزدە، جۇڭگو مەن ەگيپەتتىڭ جالپى بەتتىك ستراتەگيالىق سەرىكتەستىك قاتىناسى قارىشتاپ دامىدى. ەكى جاق دامۋدى، گۇلدەنۋدى جۇزەگە اسىرۋ، حالىقتى باقىتقا كەنەلتۋ، حالىقارالىق ادىلدىك پەن ادىلەتتىلىكتى قورعاۋ ىستەرىندە ۇستانىمى توعىسىپ، ستراتەگياسى قابىستى. قىم - قۋىت حالىقارالىق جانە وڭىرلىك جاعداي الدىندا، ەكى ەل ءوزارا قولداۋ كورسەتىپ، سەلبەستىكتى تەرەڭدەتىپ، جۇڭگو - ەگيپەت تاعدىرلاس ورتاق تۇلعاسى قۇرىلىسىن ۇزدىكسىز ىلگەرىلەتتى.

شي جينپيڭ بىلاي دەپ باسا دارىپتەدى: جۇڭگو مەن ەگيپەت بىرىنشىدەن، ءبىرىن - ءبىرى تاباندىلىقپەن قولداپ، جوعارى جىكتەگىلەردىڭ بارىس - كەلىس جاعدايىن ساقتاپ، ءار سالاداعى، ءار جىكتەگى اۋىس - كۇيىستى، سەلبەستىكتى جيىلەتىپ، ەل باسقارۋ تاجىريبەلەرىن اۋىستىرۋدى، ءوزارا ۇلگى الۋدى كۇشەيتۋى كەرەك. ەكىنشىدەن، ءوزارا ءتيىمدى سەلبەستىكتى ىلگەرىلەتىپ، دامۋ ستراتەگياسىن ۇشتاستىرۋدى كۇشەيتىپ، نەگىزدىك قۇرىلعى قۇرىلىسى، ەلەكتر قۋاتى، اۋىل شارۋاشىلىعى، حابارلاسۋ تەحنيكاسى سياقتى ءداستۇرلى سالالارداعى سەلبەستىكتىڭ كومەسكى كۇشىن اشىپ، جاسىل ەنەرگيا، ەلەكترلى اۆتوكولىك، اۆياتسيا، عارىش، سيفرلى ەكونوميكا، وسى زامانعى اۋىل شارۋاشىلىق تەحنيكاسى سياقتى سەلبەستىكتىڭ جاڭا كورىنەۋ تۇيىندەرىن قالىپتاستىرۋى كەرەك. ۇشىنشىدەن، گۋمانيتارلىق اۋىس - كۇيىستى جەبەپ، مادەنيەت، وقۋ - اعارتۋ، عىلىم - تەحنيكا، دەنساۋلىق ساقتاۋ، دەنە تاربيە سياقتى جاقتارداعى اۋىس - كۇيىستى، سەلبەستىكتى جان - جاقتى كەڭەيتىپ، ادامداردىڭ بارىس - كەلىسىن كەڭەيتىپ، حالىق تىلەگىنىڭ توعىسۋىن كۇشەيتۋى كەرەك. تورتىنشىدەن، حاۋىپسىزدىك سەلبەستىگىن كۇشەيتىپ، ەل ارالىق قىلمىستارعا بىرگە سوققى بەرىپ، شىرىكتەسۋگە قارسى تۇرۋداعى حالىقارالىق سەلبەستىكتى تەرەڭدەتىپ، ءبىر - ءبىرىنىڭ لاڭكەستىككە قارسى تۇرۋ قۇلشىنىسىن باتىل قولداپ، ەكى ەلدىڭ ورتاق حاۋىپسىزدىگىن قورعاۋى كەرەك. بەسىنشىدەن، حالىقارالىق كوپ جاقتى سەلبەستىكتى كۇشەيتىپ، بىرلەسكەن مەملەكەتتەر ۇيىمى، بريكس ەلدەرى سياقتى كوپ جاقتى تۇعىرلارداعى سايكەسۋ مەن سەلبەسۋدى اناعۇرلىم جيىلەتىپ، جۇڭگو - اراب ەلدەرى، جۇڭگو - افريكا سەلبەستىك تالقى مىنبەرى قۇرىلىسىن قول ۇستاسا ىلگەرىلەتىپ، سىڭار جاقتىلىق پەن زورەكەرلىك ارەكەتتەرىنە بىرگە قارسى تۇرىپ، اناعۇرلىم ءادىل، ۇيلەسىمدى دۇنيە جۇزىلىك جونگە سالۋ جۇيەسىن ورناتۋدى ىلگەرىلەتۋى كەرەك.

سيسي مىنالاردى ءبىلدىردى: ءتوراعا شي جينپيڭنىڭ ەكى ەلدىڭ ديپلوماتيالىق قاتىناس ورناتقاندىعىنىڭ 70 جىلدىعى قارساڭىندا ەگيپەتتە تاريحي مەملەكەتتىك ساپاردا بولعاندىعىن قىزۋ قارسى الامىز. ەگيپەت پەن جۇڭگو ديپلوماتيالىق قاتىناس ورناتقاننان بەرى ەكى ەل قاتىناسى اقاۋسىز، ورنىقتى دامىپ، ءار سالاداعى سەلبەستىكتە سۇبەلى تابىستارعا قول جەتكىزدى. ەگيپەت ءبىر جۇڭگو پرينسيبىن باتىل ۇستانىپ، ەكى ەلدىڭ جان - جاقتى ستراتەگيالىق سەرىكتەستىك قاتىناسىنىڭ اناعۇرلىم زور دامۋعا قول جەتكىزۋىن ىلگەرىلەتۋگە كۇش سالادى. ەگيپەت جاق جۇڭگومەن بىرگە ساۋدا، قارجى قوسۋ، جاساۋ كاسىبى، نەگىزدىك قۇرىلعى قۇرىلىسى، فينانس، عىلىم - تەحنيكا، جاڭا ەنەرگيا سياقتى سالالارداعى سەلبەستىكتى جيىلەتىپ، اسكەري حاۋىپسىزدىك اۋىس - كۇيىسىن كۇشەيتىپ، ادامداردىڭ بارىس - كەلىسىن جيىلەتىپ، ەكى ەل حالقىنا باقىت جاراتىپ، ءوڭىردىڭ دامۋىنا، گۇلدەنۋىنە دەم بەرۋدى قالايدى. بىرلەسكەن مەملەكەتتەر ۇيىمى حاۋىپسىزدىك القالار كەڭەسىنىڭ تۇراقتى القا ەلى رەتىندە جۇڭگو حالىقارالىق ىستەردە ماڭىزدى، سىندارلى رول اتقارۋدا، ەگيپەت جاق جۇڭگو جاقپەن كوپ جاقتى تۇعىردا سايكەسۋدى، سەلبەسۋدى كۇشەيتىپ، دۇنيە جۇزىلىك سايىستارعا بىرگە توتەپ بەرىپ، حالىقارالىق ادىلدىك پەن ادىلەتتىلىكتى قول ۇستاسا قورعاۋدى قالايدى.

ەكى ەل مەملەكەت باسشىلارى ورتا شىعىس جاعدايى جونىندە ىشكەرىلەي پىكىرلەستى. شي جينپيڭ بىلاي دەپ اتاپ كورسەتتى: جۇڭگو وڭىردەگى ەلدەردىڭ تاتۋ كورشىلىك، دوستىق قاتىناسىن دامىتۋدى، ورتاق، جالپىلىق، سەلبەستىك، باياندى حاۋىپسىزدىك كوزقاراسىن ۇستانۋدى، ورتا شىعىس حاۋىپسىزدىگىنىڭ جاڭا جۇلگەسىن ورناتۋدى قولدايدى. شي جينپيڭ وسى جونىندە مىناداي 4 باستامانى العا قويدى: ءبىرىنشى، ءوڭىردىڭ ورتاق حاۋىپسىزدىگىنىڭ ىشكى قوزعاۋشى كۇشىن قاۋلاتۋ كەرەك. ورتا شىعىس وڭىرىندەگى حالىقتىڭ ءوز ىسىنە ءوزى قوجا بولۋىنا تاباندى بولىپ، سىرتقى كۇشتەردىڭ كيلىگۋىنە قارسى تۇرىپ، وڭىردەگى ەلدەردىڭ بەيبىتشىلىك پەن حاۋىپسىزدىك جونىندەگى تىلدەسۋدى كۇشەيتىپ، وڭىرلىك حاۋىپسىزدىك قۇرىلىمىن قايتا سومداۋ جونىندە ىزدەنىس جاساپ، بولاشاق تاعدىرىن دەربەس يگەرۋىن قولداۋ كەرەك. ەكىنشى، وڭىرلىك ورتاق حاۋىپسىزدىكتى جان - جاقتى جونگە سالۋدى ىلگەرىلەتۋ كەرەك. ورتا شىعىستاعى قولامتالى ماسەلەلەر كوپ، ىشكى بايلانىسى كۇشتى، جالپىلىق شەشۋ جوباسىن قاراستىرۋ كەرەك. پالەستينا ماسەلەسى ءالى دە ورتا شىعىس ماسەلەسىنىڭ وزەگى، ءارقانداي كەزدە نەمقۇرايدى قاراۋعا جانە شەتكە ىسىرۋعا بولمايدى. ءۇشىنشى، وڭىرلىك ورتاق حاۋىپسىزدىكتىڭ دامۋ نەگىزىن بەكەمدەۋ كەرەك. ورتا شىعىس ءوڭىرىنىڭ باياندى تىنىشتىعىن جۇزەگە اسىرۋدا، تۇپتەپ كەلگەندە، دامۋعا سۇيەنەمىز. جۇڭگو وڭىردەگى ءار ەلمەن بىرگە حالىقارالىق سۋ جولىنىڭ حاۋىپسىزدىگىن قورعاپ، دامۋ سەلبەستىگىن ىلگەرىلەتىپ، وڭىردەگى ەلدەردىڭ مۇددەسىنىڭ توعىسۋىن جەبەپ، ءوزارا سەنىمدىلىكتى بىرتىندەپ ارتتىرىپ، قاقتىعىستىڭ ءوربيتىن ورتاسىن جويۋدى قالايدى. ءتورتىنشى، وڭىرلىك ورتاق حاۋىپسىزدىكتىڭ حالىقارالىق سايكەستىگىن كۇشەيتۋ كەرەك. بىرلەسكەن مەملەكەتتەر ۇيىمى ەرەجەسى مەن حالىقارالىق زاڭ − ورتا شىعىس ىستەرىن ءبىر جاقتى ەتۋدىڭ نەگىزگى ولشەمى. حالىقارالىق قوعام، اسىرەسە، شەكارا سىرتىنداعى ءىرى ەلدەر قوس ولشەمدى تاستاپ، وڭىردەگى ەلدەردىڭ يەلىك ۇقىعى مەن تەرريتوريا تۇتاستىعىنا قۇرمەت ەتىپ، ءوڭىردىڭ حاۋىپسىزدىگى مەن ورنىقتىلىعىن قورعاۋى كەرەك. بىرلەسكەن مەملەكەتتەر ۇيىمىنىڭ وڭىرلىك ىستەردە رولىن شىنايى ساۋلەلەندىرۋىن قولداۋ كەرەك.

سيسي مىنالاردى ءبىلدىردى: ەگيپەت جاق جۇڭگو جاقتىڭ ورتا شىعىس ماسەلەسىندە باستان - اياق وبيەكتيۆ، ءادىل مايداندا تۇرعاندىعىن ايرىقشا القايدى. ەگيپەت جاق وڭىرلىك جاعدايدىڭ باسەڭدەۋىن ىلگەرىلەتۋگە كۇش سالىپ، قايشىلىقتار مەن قاقتىعىستاردى ساياسي جولمەن شەشىپ، ءوڭىردىڭ حاۋىپسىزدىگى مەن دامۋىن جۇزەگە اسىرۋعا قۇلشىنادى. ەگيپەت جۇڭگو جاقپەن سايكەسۋدى ۇزدىكسىز كۇشەيتىپ، ورتا شىعىس جاعدايىن باسەڭدەتىپ، ورتا شىعىستىڭ ورنىقتىلىعىن قورعاپ، وڭىرلىك حاۋىپسىزدىك جۇلگەسىن قاراستىرۋدى قالايدى.

كەڭەستەن كەيىن ەكى ەلدىڭ مەملەكەت باسشىلارى ”ءبىر بەلدەۋ، ءبىر جولدى“ بىرگە قۇرۋ، جاساندى زەردە، ەكونوميكا - ساۋدا، ءوندىرۋ، قامداۋ تىزبەگى سەلبەستىگى سياقتى سالالارداعى كوپ ءتۇرلى سەلبەستىك قۇجاتتارىنا قول قويۋعا بىرگە كۋا بولدى. ەكى جاق «جۇڭحۋا حالىق رەسپۋبليكاسى مەن اراب ەگيپەت رەسپۋبليكاسىنىڭ جالپى بەتتىك ستراتەگيالىق سەرىكتەستىك قاتىناسىن ونان ارى تەرەڭدەتۋ جونىندەگى بىرلەسكەن مالىمدەمەسىن» جاريالادى. ساپار كەزىندە ەكى جاق سيفرلى ەكونوميكا، عىلىم - تەحنيكا، وقۋ - اعارتۋ، قاتىناس سياقتى سالالارداعى 20 نەشە سەلبەستىك قۇجاتىنا قول قويدى.

سول كۇنى تۇستە سيسسي مەن يتيسار كۇن سارايىندا شي جينپيڭ مەن پىڭ لييۋاندى قارسى الۋ قوناعاسىن وتكىزدى.

ساي چي، ۋاڭ ي قاتارلىلار جوعارىداعى قيمىلدارعا قاتىناستى.