جۇڭگوشا دەنساۋلىق ساقتاۋ جانە سالاماتتىقتى دامىتۋ جولىمەن بۇلجىماي ءجۇرىپ، ”15 - بەسجىلدىق“ كەزىندەگى سالاماتتى جۇڭگو قۇرىلىسىندا شەشۋشى ىلگەرىلەۋشىلىككە قول جەتكىزۋگە كەپىلدىك ەتۋ كەرەك

10 - ايدىڭ 12 - كۇنىنەن 13 - كۇنىنە دەيىن دەيىن مەملەكەتتىك دەنساۋلىق ساقتاۋ جانە سالاماتتىق ءماجىلىسى بەيجيڭدە اشىلدى. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ ماجىلىسكە قاتىناستى ءارى ماڭىزدى ءسوز سويلەدى.

سۋرەتتى شينحۋا اگەنتتىگىنىڭ ءتىلشىسى شيە حۋانچى تۇسىرگەن

«حالىق گازەتى»، 10 - ايدىڭ 13 - كۇنى، بەيجيڭ. مەملەكەتتىك دەنساۋلىق ساقتاۋ جانە سالاماتتىق ءماجىلىسى 10 - ايدىڭ 12 - كۇنىنەن 13 - كۇنىنە دەيىن بەيجيڭدە اشىلدى. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ ماجىلىسكە قاتىناستى ءارى ماڭىزدى ءسوز سويلەدى. ول بىلاي دەپ باسا دارىپتەدى: ”15 - بەسجىلدىق“ مەزگىلى _ 2035 - جىلعا بارعاندا سالاماتتى جۇڭگو قۇرۋ نىساناسىن جۇزەگە اسىرۋدىڭ شەشۋشى مەزگىلى، جۇڭگوشا دەنساۋلىق ساقتاۋ جانە سالاماتتىقتى دامىتۋ جولىمەن بۇلجىماي ءجۇرىپ، جاڭا داۋىردەگى دەنساۋلىق ساقتاۋ جانە سالاماتتىق قىزمەت باعىتىن دايەكتىلەندىرىپ، باسىمدىقتى ساۋلەلەندىرىپ، نەگىزدى بەكەمدەپ، ولقىلىقتاردى تولىقتاپ، ءالسىز بۋىنداردى كۇشەيتىپ، دەنساۋلىق ساقتاۋ جانە سالاماتتىق ىستەرىنىڭ جوعارى ساپالى دامۋىن ىلگەرىلەتىپ، حالىقتىڭ سالاماتتىق دەڭگەيىن ۇزدىكسىز جوعارىلاتىپ، سالاماتتى جۇڭگو قۇرىلىسىندا شەشۋشى ىلگەرىلەۋشىلىككە قول جەتكىزۋگە شىنايى كەپىلدىك ەتۋ كەرەك.

لي چياڭ قورىتىندى ءسوز سويلەدى. جاۋ لىجي، ۋاڭ حۋنيڭ، ساي چي، ديڭ شۋەشياڭ، لي شي ماجىلىسكە قاتىناستى.

شي جينپيڭ بىلاي دەپ اتاپ كورسەتتى: حالىقتىڭ سالاماتتىعى _ ۇلتتىڭ گۇلدەنىپ - كوركەيۋىنىڭ جانە مەملەكەتتىڭ قۇدىرەتتەنۋىنىڭ ماڭىزدى بەلگىسى. پارتيا 18 - قۇرىلتايىنان بەرى پارتيا ورتالىق كوميتەتى حالىقتىڭ سالاماتتىعىن قامتاماسىز ەتۋدى الدىمەن دامىتىلاتىن ستراتەگيالىق ورىنعا قويىپ، جاڭا داۋىردەگى دەنساۋلىق ساقتاۋ جانە سالاماتتىق قىزمەتى باعىتىن تۇراقتاندىرىپ، سالاماتتى جۇڭگو قۇرۋ جونىندە كەلەلى شەشىم - ورنالاستىرۋ جاساپ، دۇنيە جۇزىندەگى كولەمى ەڭ ۇلكەن ەمدەۋ قىزمەت وتەۋ جۇيەسىن، ءداستۇرلى ءدارى - دارمەك جۇيەسىن، اۋرۋدان ساقتانۋ جانە ونى تىزگىندەۋ جۇيەسىن، ەمدەۋدى قامتاماسىزداندىرۋ جۇيەسىن قۇرۋدى ىلگەرىلەتتى. دەنساۋلىق ساقتاۋ جانە سالاماتتىق ىستەرىندە تاريحي تابىستارعا قول جەتىپ، جان - جاقتى العا باسۋ جۇزەگە استى.

شي جينپيڭ بىلاي دەپ باسا دارىپتەدى: ءبىز قۇرىپ شىعاتىن سالاماتتى جۇڭگو _ تەپە - تەڭ، جالپىعا ءتيىمدى، ساپالى، جوعارى ءونىمدى سالاماتتى جۇڭگو، سالاماتتىقتى باسقارۋ قابىلەتى، اۋرۋدان ساقتانۋ جانە ونى تىزگىندەۋ قابىلەتى، ەمدەۋدەن قىزمەت كورسەتۋ قابىلەتى، ەمدەۋ قامسىزداندىرۋىنىڭ تىرەكتىك قابىلەتى، ەمدەۋ، ءدارى - دارمەك، جاڭالىق اشۋ قابىلەتى، دارىندىلاردى تاربيەلەۋ قابىلەتى بولۋى، حالىق بۇقاراسىنىڭ كۇن سايىن ارتىپ وتىرعان سالاماتتىق قاجەتىن ءونىمدى قاناعاتتاندىرا الۋى، نەگىزگى سالاماتتىق كورسەتكىشتەرى ءۇرتىس ورنىقتى جوعارىلاۋى كەرەك.

شي جينپيڭ بىلاي دەپ اتاپ كورسەتتى: دەنساۋلىق ساقتاۋ جانە سالاماتتىق ىستەرى جالپى جاعدايلىق، نەگىزدىك رولعا يە، ءسوز جوق، سالاماتتىقتى الدىمەن دامىتۋ ستراتەگياسىن باتىل اتقارۋ كەرەك. حالىقتىڭ سالاماتتىعىن قامتاماسىز ەتۋدى ءتۇرلى ساياساتتارمەن توعىستىرىپ، ءار جاقتاعى قىزمەتتەردە ايگىلەۋ، جوبا جاساۋ، ساياسات جوبالاۋ، نىسانداردى دالەلدەۋ، ينجەنەريا قۇرىلىسى سياقتىلاردىڭ بارلىعىندا حالىقتىڭ سالاماتتىعىنا جاسايتىن ىقپالىن الدىمەن ويلاستىرۋ كەرەك.

شي جينپيڭ بىلاي دەپ باسا دارىپتەدى: ساقتانۋ _ ەڭ ۇنەمدى، ەڭ ءونىمدى سالاماتتىق تاكتيكاسى، دەنساۋلىق ساقتاۋ مەن سالاماتتىقتىڭ نەگىزدىك، قاينار سيپاتتى قىزمەتتەرىن ەگجەي - تەگجەيلى، ويداعىداي يگەرىپ، جالپى حالىقتىڭ سالاماتتىق نەگىزىن بەكەمدەۋ كەرەك. تۇتاس قوعامدى دۇرىس دەنساۋلىق كوزقاراسىن ورناتۋعا، ءونىمدى اقاۋسىز ءوزىن - ءوزى سومداۋعا جانە باسقارۋعا باستاۋ كەرەك. قالىڭ جاستار مەن ورەندەردى تاماشا ۇيرەنۋ، تۇرمىس ادەتىن قالىپتاستىرۋعا باستاپ، ءمورال، اقىل - وي، دەنە، ەستەتيكا، ەڭبەك جاقتارىنان جان - جاقتى دامىتۋدى جۇزەگە اسىرۋ كەرەك. تاماشا ەكولوگيالىق ورتا مەن ءوندىرىس، تۇرمىس ورتاسىن جاراتىپ، جالپى حالىقتىق دەنە شىنىقتىرۋعا، اقاۋسىز سەيىل - سەرۋەن قۇرۋعا دەم بەرۋ جانە قولداۋ كورسەتۋ كەرەك. ازىق - تۇلىك حاۋىپسىزدىگىن باقىلاۋ - باسقارۋدى كۇشەيتىپ، ازىق - تۇلىك حاۋىپسىزدىگىن ويداعىداي قورعاۋ كەرەك. اۋرۋدان ساقتانۋ جانە ونى تىزگىندەۋ جۇيەسىن اقاۋسىزداندىرىپ، كولەمدى جۇقپالى اۋرۋدىڭ تۋىلماۋىنىڭ تومەنگى شەگىن بەكەمدەۋ كەرەك.

شي جينپيڭ بىلاي دەپ اتاپ كورسەتتى: ەمدەلۋگە قىزمەت وتەۋ دەڭگەيىن جاپپاي جوعارىلاتۋ _ سالاماتتى جۇڭگو قۇرۋداعى ءتۇيىندى مىندەت. ەمدەۋ، دەنساۋلىق ساقتاۋ نەگىزىن بەكەمدەۋ ينجەنەرياسىن ىشكەرىلەي اتقارىپ، ەمدەۋ، دەنساۋلىق ساقتاۋ قۇرىلىمدارىنىڭ فۋنكتسيالىق ورنى مەن قۇرىلىمدىق ورنالاسۋىن ساپالىلاندىرىپ، دارەجەگە ءبولىپ ەمدەۋدى جەبەپ، بۇقارانىڭ جاقىن ماڭدا اۋرۋ كورسەتۋىنە، جاقسى ەمدەلۋىنە مۇمكىندىك جاساۋ كەرەك. سوزىلمالى اۋرۋلاردان جان - جاقتى ساقتانۋدى جانە ونى تىزگىندەۋدى كۇشەيتىپ، الدىن الۋ مەن ەمدەۋدىڭ تۇتاس تىزبەكتى قىزمەت وتەۋىن كەمەلدەندىرۋ كەرەك. جۇڭي شيپاگەرلىگى مەن ءدارى - دارمەكتى جالعاستىرۋ، جاڭالىق اشا دامىتۋ مەحانيزمىن اقاۋسىزداندىرىپ، جۇڭي شيپاگەرلىگى مەن باتىسشا شيپاگەرلىكتىڭ سايكەسۋىن، توعىسۋىن كۇشەيتۋ كەرەك. دەنساۋلىق ساقتاۋ جانە سالاماتتىق سالاسىنداعى نەگىزدىك زەرتتەۋ مەن العاشقى جاڭالىق اشۋدى كۇشەيتىپ، عىلىم - تەحنيكا جەتىستىكتەرىن كادەگە جاراتۋدى جەبەپ، سالاماتتىق كاسىپ سالاسىن زورايتۋ، كۇشەيتۋ كەرەك. ەمدەلۋدى ساپالىلاندىرىپ، بۇقارانىڭ ەمدەلۋ قولايلىلىعى مەن رازىلىعىن ۇزدىكسىز جوعارىلاتۋ كەرەك.

شي جينپيڭ بىلاي دەپ باسا دارىپتەدى: رەفورما _ دەنساۋلىق ساقتاۋ جانە سالاماتتىق ىستەرىن دامىتۋدىڭ قۇدىرەتتى قوزعاۋشى كۇشى، ەمدەۋ، ەمدەۋ قامسىزداندىرۋى، شيپاگەرلىك، ءدارى - دارمەك ىستەرىن سايكەستى دامىتۋدى جانە جونگە سالۋدى ىلگەرىلەتۋدى ەمدەۋ، ءدارى - دارمەك، دەنساۋلىق ساقتاۋ ءتۇزىلىسى رەفورماسىنىڭ نەگىزگى قامال الۋ باعىتى ەتۋگە تاباندى بولۋ كەرەك. ەمدەۋ، دەنساۋلىق ساقتاۋ ءىسورىندارىنىڭ رەفورما جوباسىن جاپپاي تياناقتاندىرىپ، الەۋمەتتىك يگىلىكتى جەتەكشى ەتىپ، ۇكىمەت باسقارۋىنداعى شيپاحانالار رەفورماسىن تەرەڭدەتىپ، اۋدان، رايون، نەگىزگى ساتى ەمدەۋ قۇرىلىمدارىنىڭ اينالىمىن قامتاماسىز ەتۋدى كۇشەيتۋ كەرەك. كوپ ساتىلى ەمدەۋ قامتاماسىزداندىرۋ جۇيەسىن ورناتىپ، ءدارى - دارمەك ماتەريالدارىن جيناۋدى، ەمدەۋ قامسىزداندىرۋىنان تولەۋدى جانە قارجىدان پايدالانۋ ساياساتىن ساپالىلاندىرىپ، قوردىڭ حاۋىپسىز اينالىمىن، شيپاحانالاردىڭ ءتيىمدى اينالىمىن، بۇقارا اۋىرتپالىعىنىڭ ۇيلەسىمدى بولۋىن جۇزەگە اسىرۋ كەرەك. ءدارى - دارمەكپەن قامداۋدى قامتاماسىزداندىرۋ جانە پايدالانۋدى باسقارۋ مەحانيزمىن اقاۋسىزداندىرىپ، مەملەكەتتىڭ نەگىزگى ءدارى - دارمەك ءتۇزىمىن كەمەلدەندىرىپ، ءدارى - دارمەكتىڭ ساپا حاۋىپسىزدىگىن باقىلاۋ - باسقارۋدى كۇشەيتۋ كەرەك.

شي جينپيڭ بىلاي دەپ اتاپ كورسەتتى: حالىقتىڭ سالاماتتىعىن قامتاماسىز ەتۋ دەنساۋلىق ساقتاۋ جانە سالاماتتىق جۇيەسىندەگى كادرلار مەن دارىندىلار قوسىنىن كۇشەيتۋدى قاجەت ەتەدى. ءار دارەجەلى باسقارۋشى تاراۋلار مەن ەمدەۋ، دەنساۋلىق ساقتاۋ قۇرىلىمدارىنىڭ باسشىلىق القاسىن، اسىرەسە، ءبىرىنشى باسشىسىن ويداعىداي تاڭداپ، كۇشەيتىپ، سانى جەتكىلىكتى، قۇرىلىمى ۇيلەسىمدى، ساپاسى تاماشا ەمدەۋ قىزمەتكەرلەرى قوسىنىن قۇلشىنا قۇرۋ كەرەك. شيپاگەرلىك ءمورال، شيپاگەرلىك ستيل قۇرىلىسىن كۇشەيتىپ، تاماشا كاسىپتىك سالت قالىپتاستىرۋ كەرەك. شيپاگەرلەردى قۇرمەتتەپ، دەنساۋلىق ساقتاۋعا ءمان بەرەتىن قوعامدىق اۋقىم قالىپتاستىرۋدى ىلگەرىلەتۋ كەرەك.

شي جينپيڭ بىلاي دەپ باسا دارىپتەدى: بارلىق ادامنىڭ سالاماتتىقتان يگىلىكتەنۋى _ بۇكىل ادامزاتتىڭ ورتاق ارمانى، ادامزاتتىڭ دەنساۋلىق ساقتاۋ، سالاماتتىق ورتاق تۇلعاسىن قۇرۋدى بەلسەنە ىلگەرىلەتىپ، دەنساۋلىق ساقتاۋ جانە سالاماتتىق سالاسىنداعى كەلەلى سىن - سايىسقا قول ۇستاسا توتەپ بەرىپ، ءار ەل حالقىنىڭ سالاماتتىعىن، ىرىس - قۇتىن ۇزدىكسىز ارتتىرۋ كەرەك. ”ءبىر بەلدەۋ، ءبىر جولدىڭ“ دەنساۋلىق ساقتاۋ جانە سالاماتتىق سالاسىنداعى سەلبەستىكتى تەرەڭدەتىپ، دەنساۋلىق ساقتاۋدا شەتەلگە كومەكتەسۋ قىزمەتىن كۇشەيتۋ جانە ودان جاڭالىق اشۋ كەرەك. سالاماتتى جۇڭگو حيكاياسىن ويداعىداي بايانداپ، حالىقارالىق ورتاق تانىمدى ونان ارى ۇيىستىرۋ كەرەك.

لي چياڭ قورىتىندى سوزىندە بىلاي دەپ اتاپ كورسەتتى: باس شۋجي شي جينپيڭنىڭ ماڭىزدى ءسوزى دەنساۋلىق ساقتاۋ جانە سالاماتتىق قىزمەتىندەگى ءبىر قىدىرۋ ءتۇبىرلى، باعىتتىق، جالپى جاعدايلىق ماسەلەگە تەرەڭ جاۋاپ بەردى، وتە كۇشتى يدەيالىق، ستراتەگيالىق، جەتەكشىلىك سيپاتقا يە، جاڭا ءداۋىردىڭ جاڭا جورىعىنداعى دەنساۋلىق ساقتاۋ جانە سالاماتتىق قىزمەتىن ويداعىداي ىستەۋگە ايقىن باعدار كورسەتىپ، ماڭىزدى تياناق ازىرلەدى، مۇقيات ۇيرەنىپ، ءتۇسىنىپ، قاز - قالپىندا ناقتاپ تياناقتاندىرۋ كەرەك. يدەيالىق سانالىلىق مەن ارەكەت سانالىلىعىن كۇشەيتىپ، جۇڭگوشا دەنساۋلىق ساقتاۋ جانە سالاماتتىقتى دامىتۋ جولىمەن بۇلجىماي ءجۇرۋ؛ سالاماتتىقتى الدىمەن ەسكەرۋ بەتالىسىن بەرىك ورناتۋ، حالىقتىڭ سالاماتتىعى مەن ەكونوميكانىڭ، قوعامنىڭ سايكەستى دامۋىن ىلگەرىلەتۋ؛ نەگىزگى ەمدەۋ، دەنساۋلىق ساقتاۋ ىستەرىنىڭ الەۋمەتتىك يگىلىك سيپاتىنا تاباندى بولىپ، جالپى حالىقتىڭ سالاماتتىق نەگىزىن بەكەمدەۋ؛ نەگىزدى ساقتاۋ مەن ساپانى جوعارىلاتۋعا تەڭ ءمان بەرۋگە تاباندى بولىپ، حالىق بۇقاراسىنىڭ الۋان ءتۇرلى سالاماتتىق قاجەتىن اناعۇرلىم ويداعىداي قاناعاتتاندىرۋ؛ رەفورما جاساۋدى، جاڭالىق اشۋدى جانە ەسىك اشۋدى، سەلبەسۋدى تەرەڭدەتىپ، دەنساۋلىق ساقتاۋ جانە سالاماتتىق ىستەرىن دامىتۋدىڭ قوزعاۋشى كۇشىن، ومىرشەڭدىك كۇشىن ۇزدىكسىز كۇشەيتۋ كەرەك. نازاردى دەنساۋلىق ساقتاۋ جانە سالاماتتىق ىستەرىندەگى تولعاقتى تۇيىندەر مەن بوگەتتەرگە شوعىرلاندىرىپ، حالىق بۇقاراسىنىڭ شۇعىل، قيىن، ۋايىمداعان، ءزارۋ ماسەلەلەرىن شەشۋدى كورنەكتى تۇردە ويداعىداي يگەرىپ، سالماقتى اۋرۋلاردان ساقتانۋ - تىزگىندەۋدى كۇش سالا ويداعىداي ىستەپ، دارەجەگە ءبولىپ ەمدەۋ جۇيەسى قۇرىلىسىن ىلگەرىلەتىپ، بۇقارانىڭ ەمدەلۋ بارىسىن ساپالىلاندىرىپ، كوپ ساتىلى ەمدەۋدى قامتاماسىزداندىرۋ جۇيەسىن ورناتىپ، جۇڭي شيپاگەرلىگى مەن ءدارى - دارمەكتىڭ وزگەشە باسىمدىعىن بەكەمدەپ، قارتتار مەن بالالاردىڭ سالاماتتىعىنا قىزمەت وتەۋدى ويداعىداي يگەرىپ، عىلىم - تەحنيكا ارقىلى ەمدەۋ، ءدارى - دارمەك، دەنساۋلىق ساقتاۋ ىستەرىنىڭ دامۋىن ىلگەرىلەتۋ، سالاماتتى جۇڭگو قۇرىلىسىنىڭ نەگىزىن بەكەمدەۋ كەرەك.

جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ مۇشەلەرى، ورتالىق كوميتەت شۋجيچۋىنىڭ شۋجيلەرى، ورتالىق اسكەري ىستەر كوميتەتى ءتوراعاسىنىڭ ورىنباسارلارى، مەملەكەتتىك حالىق قۇرىلتايى تۇراقتى كوميتەتىندەگى قاتىستى باسشى جولداستار، مەملەكەتتىك كەڭەستىڭ مۇشەلەرى، ەڭ جوعارى حالىق پروكۋراتۋراسىنىڭ باس پروكۋرورى، مەملەكەتتىك ساياسي كەڭەستەگى قاتىستى باسشى جولداستار ماجىلىسكە قاتىناستى.

ءارقايسى ولكە، اۆتونوميالى رايون، قالالاردىڭ جانە جوسپارى بولەك جاسالاتىن قالالاردىڭ، شينجياڭ ءوندىرىس - قۇرىلىس بيڭتۋانىنىڭ، ورتالىق پەن مەملەكەت ورگاندارىنىڭ قاتىستى تاراۋلارىنىڭ، قاتىستى حالىقتىق ۇيىمداردىڭ، ءىشىنارا ورتالىق كاسىپورىندارىنىڭ، ورتالىق اسكەري ىستەر كوميتەتى ورگانىنىڭ قاتىستى تاراۋلارىنىڭ نەگىزگى جاۋاپتى جولداستارى جانە مامان - وقىمىستىلاردىڭ ۋاكىلدەرى قاتارلىلار ماجىلىسكە قاتىناستى.

كەلۋ قاينارى: حالىق تورابى