2026.10.14 15:46 كەلۋ قاينارى : حالىق تورابى

10 - ايدىڭ 13 - كۇنى تۇستەن كەيىن مەملەكەت ءتوراعاسى شي جينپيڭ بەيجيڭدەگى حالىق سارايىندا جۇڭگوعا مەملەكەتتىك ساپارمەن كەلگەن بوتسۆانانىڭ زۇڭتۇڭى بوكومەن كەڭەس وتكىزدى. سۋرەتتە: كەڭەستەن بۇرىن شي جينپيڭ مەن حانىمى پىڭ لييۋان حالىق سارايىنىڭ سولتۇستىك زالىندا بوكو مەن حانىمى كاونيدى قارسى الۋ سالتىن وتكىزۋدە.
سۋرەتتى شينحۋا اگەنتتىگىنىڭ ءتىلشىسى شيە حۋانچى تۇسىرگەن

10 - ايدىڭ 13 - كۇنى تۇستەن كەيىن مەملەكەت ءتوراعاسى شي جينپيڭ بەيجيڭدەگى حالىق سارايىندا جۇڭگوعا مەملەكەتتىك ساپارمەن كەلگەن بوتسۆانانىڭ زۇڭتۇڭى بوكومەن كەڭەس وتكىزدى. سۋرەتتە: كەڭەستەن بۇرىن شي جينپيڭ مەن حانىمى پىڭ لييۋان حالىق سارايىنىڭ سولتۇستىك زالىندا بوكو مەن حانىمى كاونيدى قارسى الۋ سالتىن وتكىزۋدە.
سۋرەتتى شينحۋا اگەنتتىگىنىڭ يۋە يۋەۋەي تۇسىرگەن
«حالىق گازەتى»، 10 - ايدىڭ 13 - كۇنى، بەيجيڭ (ءتىلشى ياڭ چياۋچۋ). 10 - ايدىڭ 13 - كۇنى تۇستەن كەيىن مەملەكەت ءتوراعاسى شي جينپيڭ بەيجيڭدەگى حالىق سارايىندا جۇڭگوعا مەملەكەتتىك ساپارمەن كەلگەن بوتسۆانانىڭ زۇڭتۇڭى بوكومەن كەڭەس وتكىزدى. ەكى ەل مەملەكەت باسشىلارى ەكى جاقتى قاتىناستى جالپى بەتتىك ستراتەگيالىق سەلبەستىك سەرىكتەستىك قاتىناس دەڭگەيىنە كوتەرەتىندىكتەرىن جاريالادى.
شي جينپيڭ بىلاي دەپ اتاپ كورسەتتى: وتكەن عاسىردىڭ 70 - جىلدارىندا بوتسۆانا جاق ەكى ەل ديپلوماتيالىق قاتىناس ورناتۋدان بۇرىن - اق جاڭا جۇڭگونىڭ بىرلەسكەن مەملەكەتتەر ۇيىمىنداعى زاڭدى ورنىن قالپىنا كەلتىرۋىن قولداپ داۋىس بەردى. قازىر ەكى جاق وسىزاماندانۋ ارمانى جولىندا قول ۇستاسا العا باسىپ، جۇڭگو - بوتسۆانا دوستىعىنىڭ تىڭ داستانىن جالعاستى جازۋدا. جۇڭگو - بوتسۆانا دوستىعى جاقۇتتاي ماڭگى جارقىراۋى كەرەك. ەكى جاق ءبىرىن - ءبىرى سۇيەنىش ەتەتىن ”كەلۋ جولىن“ ەستە بەرىك ساقتاپ، جاڭا داۋىردەگى جۇڭگو - بوتسۆانا قاتىناسى دامۋىنىڭ ”داڭعىل جولىن“ ويداعىداي باسىپ، دۇنيە ءجۇزىنىڭ دامۋى مەن العا باسۋىنا ۇلەس قوسۋى كەرەك.
شي جينپيڭ بىلاي دەپ باسا دارىپتەدى: ”مۇراتتاستىق“ قانا ”جولدان تايدىرمايدى“. بيىل _ جۇڭگو كوممۋنيستىك پارتياسى قۇرىلعاندىعىنىڭ 105 جىلدىعى، سونداي - اق بوتسۆانانىڭ تاۋەلسىزدىك العاندىعىنىڭ 60 جىلدىعى. ەكى ەلدىڭ بيلىك باسىنداعى پارتيالارى سەلبەستىكتى كۇشەيتىپ، ەل باسقارۋ تاجىريبەلەرىن اۋىستىرۋدى تەرەڭدەتىپ، ۇستانىمداردىڭ توعىسۋىن كۇشەيتۋى كەرەك. جۇڭگو جاق بوتسۆانا جاقتىڭ ءوز مەملەكەت جاعدايىنا ۇيلەسەتىن دامۋ جولىمەن ءجۇرۋىن قولدايدى. ەكى جاق ەكونوميكا - ساۋدا سەلبەستىگى جۇلگەسىن ونان ارى كەمەلدەندىرىپ، جۇڭگونىڭ افريكاداعى ديپلوماتيالىق قاتىناس ورناتقان ەلدەرگە كەدەن باجىسىن جاپپاي اتقارۋى الا كەلگەن جاڭا ورايدان ويداعىداي پايدالانۋى كەرەك. جۇڭگو جاق بوتسۆانا جاقپەن سيفرلى ەكونوميكا، اۋىل شارۋاشىلىعى، مال شارۋاشىلىعى سياقتى سالالارداعى سەلبەستىكتى كۇشەيتىپ، ”زەردەلى وقۋ - اعارتۋ“ نىسانىن اتقارىپ، بوتسۆانا جاقتىڭ ەكونوميكالىق، قوعامدىق دامۋىنا دەم بەرۋدى قالايدى.
شي جينپيڭ جۇڭگو - بوتسۆانا، جۇڭگو - افريكا كەن كاسىبى سەلبەستىگىن ىلگەرىلەتۋ جونىندە 4 ءتۇرلى قۋاتتامانى العا قويدى: ءبىرىنشى، افريكانىڭ بايلىعى افريكاعا ءتان دەيتىن سەلبەستىك العى شارتىنا تاباندى بولۋ كەرەك. جۇڭگو ءوز تاجىريبەلەرىمەن ءبولىسىپ، افريكا ەلدەرىنىڭ مەملەكەت جاعدايىنا ۇيلەسەتىن كەن كاسىبىن دامىتۋ جوباسىن جاساۋىنا كومەكتەسۋدى قالايدى. ەكىنشى، ادىلەت پەن مۇددەنى قاتار جۇرگىزۋ، ءوزارا پايدا جەتكىزۋ، ءوزارا تيىمدىلىك جاساۋ سىندى سەلبەستىك ۇستانىمىنا تاباندى بولۋ كەرەك. جۇڭگو جاق جۇڭگو كاسىپورىندارىن اينالىم قابىلەتىن جوعارىلاتۋعا، افريكانىڭ ءىس جۇزىندىك جاعدايىنا ۇيلەسەتىن جاسىل تەحنيكانى جوتكەۋگە، كەن كاسىبىنىڭ دامۋى مەن وڭتۇستىك افريكا ەلدەرىنىڭ سەلبەستىگىن ىلگەرىلەتۋگە ۇزدىكسىز شابىتتاندىرادى. ءۇشىنشى، جوعارى ساپالى دامۋدىڭ سەلبەستىك بەتالىسىنا تاباندى بولۋ كەرەك. جۇڭگو جاق جۇڭگو - افريكا كەن كاسىبى سەلبەستىگىنىڭ كاسىپ سالاسىنداعى قۇندى ارتتىرۋعا بۇرىلىس جاساۋىن ۇزدىكسىز ىلگەرىلەتىپ، شاما كەلەتىن، باياندى قارجى قۇراۋ ۇلگىسىندە جاڭالىق اشۋعا ىزدەنىس جاساپ، جوعارى دەڭگەيلى سەلبەستىك ارقىلى افريكانىڭ وسىزاماندانۋ اياق الىسىنا دەم بەرەدى. ءتورتىنشى، ءادىل، اشىق سەلبەستىك ورتاسىنا تاباندى بولۋ كەرەك. افريكانىڭ بايلىعى وڭىرلىك ساياسي كۇرەس قۇرالىنا اينالماۋى كەرەك، جۇڭگو جاق ءار جاقتىڭ افريكانىڭ دامۋىنا شىن نيەتىمەن دەم بەرگەنىن قۋانا كورىپ وتىر، افريكا جاقپەن بىرگە كاسىپورىنداردىڭ قارجى قوسىپ شارۋاشىلىق جۇرگىزۋىنە اناعۇرلىم ۇيلەسىمدى شارت - جاعداي جاراتۋدى قالايدى.
بوكو مىنالاردى ءبىلدىردى: ءتوراعا شي جينپيڭنىڭ پارمەندى باسشىلىعىندا، جۇڭگو كۇللى دۇنيە ءجۇزىن جالت قاراتقان دامۋ جەتىستىكتەرىنە قول جەتكىزدى. جۇڭگو كەدەيلەردى تۇگەلدەي كەدەيلىكتەن ارىلتىپ، جۇڭگوشا ەرەكشەلىككە يە ءساتتى دامۋ جولىمەن ءجۇردى، بۇل بوتسۆانا جاقتىڭ ىشكەرىلەي ۇيرەنۋىنە، ۇلگى الۋىنا تاتيدى. بوتسۆانا جاق جۇڭگومەن قاتىناسىنا ايرىقشا ءمان بەرەدى، ءبىر جۇڭگو پرينسيبىن باتىل اتقارادى، ”تايۋان دەربەستىگى“ بولشەكتەۋ قاسكۇنەمدىگىنە قارسى تۇرادى، ءارقانداي كۇشتىڭ جۇڭگونىڭ ىشكى ىسىنە كيلىگۋىنە قارسى تۇرادى. بوتسۆانا جاق جۇڭگو جاقتىڭ ۇزاق ۋاقىتتان بەرى بوتسۆانا ەلىنىڭ دامۋىنا كورسەتكەن قولداۋى مەن كومەگىنە العىس ايتادى، جۇڭگو جاقپەن دامۋ ستراتەگياسىن ۇشتاستىرۋدى كۇشەيتۋدى قالايدى، اناعۇرلىم كوپ جۇڭگو كاسىپورىندارىنىڭ بوتسۆاناعا بارىپ قارجى قوسىپ، شارۋاشىلىقتى گۇلدەندىرۋىن قارسى الادى، ”ءبىر بەلدەۋ، ءبىر جول“، ونەركاسىپ، اۋىل شارۋاشىلىعى، كەن شارۋاشىلىعى، جاڭالىق اشۋ، سيفرلاندىرىپ تيپكە بۇرىلىس جاساۋ سياقتى سالالارداعى سەلبەستىكتى كۇشەيتىپ، ەكى ەل قاتىناسىنىڭ اناعۇرلىم كوپ ناقتى جەتىستىكتەرگە قول جەتكىزۋىن ىلگەرىلەتەدى. ءتوراعا شي جينپيڭ دۇنيە ءجۇزى اۋىر سىن - سايىسقا ءدوپ كەلگەن كەزدە 4 ۇلكەن دۇنيە جۇزىلىك باستامانى العا قويىپ، ءىرى ەلدىڭ جاۋاپكەرشىلىك ارقالاۋىن ايگىلەدى، بۇل بىرلەسكەن مەملەكەتتەر ۇيىمىن ۇيتقى ەتكەن حالىقارالىق ءتارتىپتى قورعاۋعا ءتيىمدى. بوتسۆانا جاق جۇڭگو جاقپەن تىعىز سايكەسىپ، سەلبەسىپ، كوپ جاقتىلىققا تاباندى بولىپ، وركەندەپ كەلە جاتقان ەلدەردىڭ ىنتىماعىن كۇشەيتىپ، افريكا مەن جۇڭگونىڭ ىنتىماعىن، سەلبەستىگىن جەبەپ، دۇنيە جۇزىلىك جونگە سالۋ جۇيەسىنىڭ اناعۇرلىم سيىسىمدى، اناعۇرلىم ۋاكىلدىك سيپاتقا يە بولۋىنا مۇمكىندىك جاساۋدى قالايدى.
كەڭەستەن كەيىن ەكى ەلدىڭ مەملەكەت باسشىلارى دۇنيە جۇزىلىك حاۋىپسىزدىك باستاماسى، ”ءبىر بەلدەۋ، ءبىر جولدى“ بىرگە قۇرۋ، جاسىل كەن، دەنساۋلىق ساقتاۋ، سالاماتتىق، ادام كۇشى بايلىعى سياقتى سالالارداعى كوپ ءتۇرلى سەلبەستىك قۇجاتتارىنا قول قويۋعا بىرگە كۋا بولدى.
ساپار كەزىندە ەكى جاق «جۇڭحۋا حالىق رەسپۋبليكاسى مەن بوتسۆانا رەسپۋبليكاسىنىڭ جالپى بەتتىك ستراتەگيالىق سەلبەستىك سەرىكتەستىك قاتىناس ورناتۋ جونىندەگى بىرلەسكەن مالىمدەمەسىن» جاريالادى.
كەڭەستەن ىلگەرى شي جينپيڭ مەن حانىمى پىڭ لييۋان حالىق سارايىنىڭ سولتۇستىك زالىندا بوكو مەن حانىمى كاونيدى قارسى الۋ سالتىن وتكىزدى.
بوكو جەتكەن كەزدە قۇرمەت قاراۋىلى ساپ تۇزەپ قۇرمەت ءبىلدىردى. ەكى ەلدىڭ مەملەكەت باسشىلارى پارات مىنبەسىنە شىقتى، اسكەري وركەستر جۇڭگو مەن بوتسۆانانىڭ مەملەكەت اندەرىن ورىندادى، تيان - انمىن الاڭىندا 21 رەت قۇرمەت ساليۋتى اتىلدى. بوكو شي جينپيڭنىڭ سەرىك بولۋىندا جۇڭگو حالىق ازاتتىق ارمياسىنىڭ قۇرمەت قاراۋىلىن كوزدەن كەشىردى ءارى سالتانات قاتارىن كوردى.
سول كۇنى كەشتە شي جينپيڭ مەن پىڭ لييۋان حالىق سارايىنىڭ التىن ءتۇستى زالىندا بوكو مەن حانىمىنا قارسى الۋ قوناعاسىن بەردى.
ۋاڭ ي جوعارىداعى قيمىلدارعا قاتىناستى.
كەلۋ قاينارى: حالىق تورابى