2026.10.14 15:47 كەلۋ قاينارى : حالىق تورابى

10 - ايدىڭ 13 - كۇنى تۇستەن كەيىن مەملەكەت ءتوراعاسى شي جينپيڭ حالىق سارايىندا جۇڭگوعا رەسمي ساپارمەن كەلگەن توگو مينيسترلەر كەڭەسىنىڭ ءتوراعاسى فورەمەن كەزدەستى.
سۋرەتتى شينحۋا اگەنتتىگىنىڭ ءتىلشىسى لي شياڭ تۇسىرگەن
«حالىق گازەتى»، 10 - ايدىڭ 13 - كۇنى، بەيجيڭ (ءتىلشى ياڭ چياۋچۋ). مەملەكەت ءتوراعاسى شي جينپيڭ 10 - ايدىڭ 13 - كۇنى تۇستەن كەيىن بەيجيڭدەگى حالىق سارايىندا جۇڭگوعا رەسمي ساپارمەن كەلگەن توگو مينيسترلەر كەڭەسىنىڭ ءتوراعاسى فورەمەن كەزدەستى. ەكى ەل باسشىلارى ەكى جاقتى قاتىناستىڭ ورنىن جاڭا داۋىردەگى كوپ جاقتى تاعدىرلاس ورتاق تۇلعاعا كوتەرەتىندىگىن جاريالادى.
شي جينپيڭ بىلاي دەپ اتاپ كورسەتتى: جۇڭگو مەن توگونىڭ ءداستۇرلى دوستىعىن ەكى ەلدىڭ اعا بۋىن باسشىلارى تىكەلەي ورناتقان، نەگىزى تەرەڭ، ۋاقىت وتكەن سايىن بەكەمدەلۋدە. كوپ جىلدان بەرى ەكى جاق ءبىر جاعادان باس، ءبىر جەڭنەن قول شىعارىپ، سەلبەستىك دانەكەرىن ۇزدىكسىز بەكەمدەپ، حالىقتىڭ ءوزارا ءتۇسىنىسۋىن كۇشەيتىپ، جاڭا داۋىردەگى جۇڭگو - افريكا تاعدىرلاس ورتاق تۇلعاسىن قۇرۋدىڭ جاندى داستانىن جازدى. جۇڭگو مەن توگونىڭ دوستىق سەلبەستىك ۇستانىمى ساي كەلەدى، بولاشاعى نۇرلى. ەكى جاق ەكى پارتيانىڭ، ەكى ەلدىڭ ءار جىكتەگى بارىس - كەلىسىن ونان ارى جيىلەتىپ، ەل باسقارۋ تاجىريبەلەرى جونىندە اۋىس - كۇيىس جاساۋدى تەرەڭدەتىپ، ءبىر - ءبىرىنىڭ وزەكتى مۇددەسىنە جانە ءجىتى قاداعالاپ وتىرعان كەلەلى ىستەرىنە ساياتىن ماسەلەلەردە ءبىرىن - ءبىرى تاباندىلىقپەن قولداۋى كەرەك. نولدىك كەدەن باجىسى شاراسى _ جۇڭگونىڭ افريكانىڭ دەربەس دامۋىن قولداۋ، تۇزىمدىك ەسىك اشۋ ارقىلى جۇڭگو - افريكا سەلبەستىگىنە دەم بەرۋ سىندى ەرەكشە ورنالاستىرۋىن كوزدە ۇستاعان، توگونىڭ نولدىك كەدەن باجىسى مەن جۇڭگوعا يمپورت ەتىلەتىن ونىمدەردىڭ ”جاسىل ارناسى“ سياقتى شارالاردان ويداعىداي پايدالانىپ، وڭىرلىك ساۋدا، زات اينالىمى سياقتى توراپتىق رولىن اناعۇرلىم ساۋلەلەندىرىپ، ءوز ەلى مەن رايونىنىڭ اناعۇرلىم كوپ ەرەكشە ونىمدەرىنىڭ جۇڭگو بازارىنا كىرۋىنە جەتەكشىلىك ەتۋىن قارسى الامىز. جۇڭگو جاق توگونىڭ حالىق اقشاسىنىڭ شەكارا اتتاپ پايدالانىلۋىن كەڭەيتۋدى ىلگەرىلەتكەندىگىن القايدى، توگو جاقپەن جاڭا ەنەرگيا، سيفر، زەردە سياقتى سالالارداعى سەلبەستىكتى كۇشەيتىپ، توگونىڭ ونەركاسىپتەنۋ اياق الىسىنا دەم بەرۋدى قالايدى. جۇڭگو مەن توگونىڭ حالىقارالىق جانە وڭىرلىك ىستەردەگى تۇرعىسى قارايلاس، كوپ جاقتى سەلبەستىكتى كۇشەيتىپ، دۇنيە جۇزىلىك جونگە سالۋدى رەفورمالاۋدى، كەمەلدەندىرۋدى قول ۇستاسا ىلگەرىلەتىپ، ءوڭىردىڭ بەيبىتشىلىگى مەن حاۋىپسىزدىگىن جەبەۋ كەرەك.
شي جينپيڭ ءار جاقتىڭ افريكاداعى قولامتالى ماسەلەلەردى شەشۋگە سىندارلى ات سالىسۋى جونىندە 4 پرينسيپتى العا قويدى: ءبىرىنشى، افريكانىڭ جەتەكشىلىگىنە تاباندى بولۋ، افريكا حالقى _ افريكانىڭ ناعىز قوجاسى، وڭىرلىك ىستەردە ۇيتقىلىق رولىن ساۋلەلەندىرۋى كەرەك. ەكىنشى، ادىلدىكتى، تۋراشىلدىقتى قورعاۋ، قاتىناسۋشى جاقتار بىرلەسكەن مەملەكەتتەر ۇيىمى ۋستاۆىنىڭ نەگىزگى ماقساتى مەن پرينسيبىنە بويسۇنۋى، قاتىستى ەلدەردىڭ يەلىك ۇقىعى مەن تەرريتوريا تۇتاستىعىنا قۇرمەت ەتۋى كەرەك.
ءۇشىنشى، سوعىستى توقتاتىپ، بەيبىتشىلىككە ۇمتىلۋ، سوعىس پەن سىڭار جاقتى جازالاۋ مەملەكەت پەن مەملەكەت اراسىنداعى قايشىلىقتى شىن مانىندە شەشە المايدى، ءوزارا قۇرمەت ەتۋگە، كەڭ كولەمدە كەڭەسۋگە تاباندى بولىپ، پارىقتاردى ساقتاپ، ءبىرىن - ءبىرى تۇسىنۋگە، بىرىنە - ءبىرى جول بەرۋگە ۇمتىلۋ كەرەك. ءتورتىنشى، ۇستىنەن وڭاۋ مەن تۇبىرىنەن وڭاۋدى قاتار جۇرگىزۋ، قازىرگى حاۋىپسىزدىككە نازار اۋدارۋمەن بىرگە، ۇزاق بولاشاقتىق دامۋدى دا جوسپارلاۋ كەرەك.
فورە مىنالاردى ءبىلدىردى: وسى رەتكى جۇڭگودا ساپاردا ءتوراعا شي جينپيڭنىڭ دانىشپان باسشىلىعىندا جۇڭگو ۇلگىسىندەگى وسىزامانداندىرۋ قۇرىلىسىندا كورنەكتى دامۋ جەتىستىكتەرىنە قول جەتكىزىلگەنىنە، جۇڭحۋانىڭ تاڭداۋلى ءداستۇرلى مادەنيەتىنىڭ ساۋلەلەندىرىلىپ جاتقانىنا ءوز كوزىممەن كۋا بولىپ، جۇڭگونىڭ بيلىك جۇرگىزۋ ۇستانىمى مەن تابىسقا جەتۋ قۇپيا سيفرىن اناعۇرلىم جاقسى ءتۇسىندىم. توگونىڭ جۇڭگومەن ءداستۇرلى دوستىعى ۋاقىت وتكەن سايىن بەكەمدەلۋدە. كەلەر جىلى ەكى ەل ديپلوماتيالىق قاتىناس ورناتۋدىڭ 55 جىلدىعىن قارسى الادى. توگو جاق جۇڭگو جاقپەن ءوزارا سەنىمدىلىكتى نىعايتىپ، تىلدەسۋدى، قاتىناستى كۇشەيتىپ، ۇزاق ۋاقىتتىق ءوزارا پايدا جەتكىزۋ سەلبەستىگىن جيىلەتىپ، جاڭا داۋىردەگى توگو - جۇڭگو تاعدىرلاس ورتاق تۇلعاسىن بىرگە قۇرىپ، ەكى ەل حالقىن اناعۇرلىم ويداعىداي باقىتقا كەنەلتۋدى قالايدى. توگو جاق جۇڭگو جاقتىڭ ەل باسقارۋ تاجىريبەلەرىن ىشكەرىلەي ۇيرەنىپ، ۇلگى الۋدى قالايدى، جۇڭگو كاسىپورىندارىنىڭ توگوعا بارىپ قارجى قوسىپ، كاسىپتى گۇلدەندىرۋىن قارسى الادى، جۇڭگو جاقپەن ساۋدا، نەگىزدىك قۇرىلعى قۇرىلىسى، عىلىم - تەحنيكا سياقتى سالالاردا سەلبەستىك ورىستەتۋدى قالايدى. توگو جاق ءتوراعا شي جينپيڭنىڭ ءار جاقتىڭ افريكانىڭ قولامتالى ماسەلەلەرىن شەشۋگە سىندارلى ات سالىسۋى جونىندە العا قويعان ماڭىزدى پرينسيبىن بۇكىلدەي قۇپتايدى، جۇڭگونىڭ دۇنيە ءجۇزىنىڭ بەيبىتشىلىگىن، ورنىقتىلىعىن قورعاۋدا، دۇنيە جۇزىلىك سىن - سايىسقا بىرگە توتەپ بەرۋدە اتقارعان ماڭىزدى رولىن بارىنشا القايدى، جۇڭگو جاقپەن كوپ جاقتى سەلبەستىكتى كۇشەيتىپ، كوپ جاقتىلىقتى بىرگە قورعاۋدى، وركەندەپ كەلە جاتقان ەلدەردىڭ مۇددەسىن قورعاۋدى قالايدى.
ۋاڭ ي كەزدەسۋدە بىرگە بولدى.
كەلۋ قاينارى: حالىق تورابى