ليۋ ياندۇڭ جولداستىڭ سۇيەگى بەيجيڭدە ورتەلدى

11 - ايدىڭ 3 - كۇنى ليۋ ياندۇڭ جولداستىڭ سۇيەگى بەيجيڭدەگى باباۋشان توڭكەرىستىك قۇرباندار قابىرستاندىعىندا ورتەلدى. شي جينپيڭ، جاۋ لىجي، ۋاڭ حۋنيڭ، ساي چي، ديڭ شۋەشياڭ، لي شي، حان جىڭ قاتارلىلار باباۋشانعا بارىپ سۇيەكپەن قوشتاستى. سۋرەتتە: شي جينپيڭ ليۋ ياندۇڭنىڭ تۋىستارىمەن قول الىسىپ، شىنايى كوڭىل ايتۋدا.

سۋرەتتى شينحۋا اگەنتتىگىنىڭ ءتىلشىسى شيە حۋانچى تۇسىرگەن

شينحۋا اگەنتتىگى، 11 - ايدىڭ 3 - كۇنى، بەيجيڭ. جۇڭگو كوممۋنيستىك پارتياسىنىڭ تاڭداۋلى مۇشەسى، كوممۋنيزمنىڭ ۇزاق سىنىنان وتكەن ادال جاۋىنگەرى، پارتيامىزدىڭ بىرلىكساپ قىزمەتى جانە ەلىمىزدىڭ وقۋ - اعارتۋ، عىلىم - تەحنيكا، ەمدەۋ، دەنساۋلىق ساقتاۋ، ايەلدەر مەن بالالار قىزمەتىنىڭ كورنەكتى باسشىسى، جۇڭگو كوممۋنيستىك پارتياسى 17 -، 18 - كەزەكتى ورتالىق كوميتەتى ساياسي بيۋروسىنىڭ مۇشەسى، جۇڭگو حالىق ساياسي ءماسليحات كەڭەسى 10 - كەزەكتى مەملەكەتتىك كوميتەتىنىڭ ورىنباسار ءتوراعاسى، مەملەكەتتىك كەڭەستىڭ بۇرىنعى مۇشەسى، مەملەكەتتىك كەڭەستىڭ بۇرىنعى ورىنباسار زۇڭليى ليۋ ياندۇڭ جولداستىڭ سۇيەگى 11 - ايدىڭ 3 - كۇنى بيجيڭدەگى باباۋشان توڭكەرىستىك قۇرباندار قابىرستاندىعىندا ورتەلدى.

ليۋ ياندۇڭ جولداس ناۋقاس سەبەبىنەن 2026 - جىلى 10 - ايدىڭ 28 - كۇنى ساعات 14 تەن 53 مينۋت وتكەندە بەيجيڭدە 81 جاسىندا قايتىس بولدى.

ليۋ ياندۇڭ جولداستىڭ ناۋقاسى اۋىرلاعان كەزدە جانە قايتىس بولعاننان كەيىن، شي جينپيڭ، لي چياڭ، جاۋ لىجي، ۋاڭ حۋنيڭ، ساي چي، ديڭ شۋەشياڭ، لي شي، حان جىڭ، حۋ جينتاۋ قاتارلى جولداستار شيپاحاناعا بارىپ كوڭىلىن سۇرادى نەمەسە ءتۇرلى فورمالارمەن ليۋ ياندۇڭ جولداستىڭ قايتىس بولعاندىعىنا قايعىلى ازا ءبىلدىردى ءارى ونىڭ تۋىس - تۋعاندارىنان شىنايى حال سۇرادى.

11 - ايدىڭ 3 - كۇنى تۇستەن بۇرىن باباۋشان توڭكەرىستىك قۇرباندار قابىرستاندىعىنىڭ زالى قايعىلى جىم - جىرت كۇيگە ەندى، ازالى مۋزيكا باياۋ قويىلىپ تۇردى. زالدىڭ ءتورىنىڭ جوعارعى جاعىنا ”ليۋ ياندۇڭ جولداسقا قايعىلى ازا بىلدىرەمىز“ دەگەن اق ءتۇستى جازۋ جازىلعان قارا كەرمە تۋ ىلىنگەن، كەرمە تۋدىڭ استىنا ليۋ ياندۇڭ جولداستىڭ سۋرەتى قويىلعان. ليۋ ياندۇڭ جولداستىڭ سۇيەگى گۇل شوقتارىمەن قورشالىپ، ۇستىنە جۇڭگو كوممۋنيستىك پارتياسىنىڭ نارت قىزىل تۋى جابىلعان.

تۇستەن بۇرىن ساعات 9 دان 30 مينۋت وتكەندە، شي جينپيڭ، جاۋ لىجي، ۋاڭ حۋنيڭ، ساي چي، ديڭ شۋەشياڭ، لي شي، حان جىڭ قاتارلىلار ازالى مۋزيكا ءۇنى ىشىندە ليۋ ياندۇڭ جولداستىڭ سۇيەگىنىڭ الدىنا باياۋ كەلىپ، ءۇنسىز ازا ءبىلدىرىپ، ليۋ ياندۇڭ جولداستىڭ سۇيەگىنە 3 مارتە ءيىلىپ قۇرمەت ءبىلدىردى ءارى ليۋ ياندوڭ جولداستىڭ تۋىس - تۋعاندارىمەن ءبىر - بىرلەپ قول الىسىپ، كوڭىل ايتتى.

پارتيا مەن مەملەكەتتىڭ قاتىستى باسشى جولداستارى سۇيەكپەن قوشتاستى نەمەسە ءتۇرلى فورمالارمەن ازا ءبىلدىردى. ورتالىق پەن مەملەكەت ورگاندارىنىڭ قاتىستى تاراۋلارىنداعى جاۋاپتى جولداستار، ليۋ ياندۇڭ جولداستىڭ كوزى تىرىسىندەگى دوس - جاراندارى مەن اۋىلداستارىنىڭ ۋاكىلدەرى دە سۇيەكپەن قوشتاستى.