- ورتالىق
- ەل ءىشى
- شينجياڭ
- حالىقارا
مادەنيەت
ارناۋلى تاقىرىپ
جۇمابەك تۇرسىن ۇلىنىڭ شينجياڭدا وتەتىن حالىقارالىق ەركىن بوكس جارىسىنىڭ اقپار جاريالاۋ جينالىسى وتكىزىلدى
قايىربەك قاسيران ۇلى («ىلە گازەتى» ءتىلشىسى)
2015.11.16 13:19
جۇڭگو قازاعىنان تۇڭعىش شىققان ەركىن بوكسشى، جۇڭگونىڭ ەركىن بوكس سالاسىنداعى توپ باستاعان سەركەلەردىڭ ءبىرى، بۇگىنگە دەيىن سان بەلەستى باعىندىرىپ، جۇڭگوعا قوناق بولىپ كەلگەن شەتەلدىك «جۋان جۇدىرىقتىلاردىڭ» تالايىنا «جۇدىرىعىنىڭ» ءدامىن تاتقىزىپ، جەڭىلىسىنە مويىنسال ەتكىزگەن گۇل كۇنەستىڭ ءتول تۋماسى جۇمابەك تۇرسىن ۇلىنىڭ «اتا مەكەنگە العىس ايتىپ، قوعامعا قايىرىمدىلىق جاساۋ» باس تاقىرىبىنداعى «ءداستۇرلى سايىسكەرلىك مادەنيەتىن ساۋلەلەندىرىپ جانە تاراتىپ، جالپى حالىقتىق دەنە شىنىقتىرۋ تانىمىن ءوسىرىپ، مەيىر باعىشتاپ، اتا مەكەنگە العىس ايتۋدى» ماقسات ەتىپ وتكىزىلەتىن جىن ۋ ـ حۇن «اتا مەكەنگە العىس ايتىپ، قوعامعا قايىرىمدىلىق جاساۋ» WBK حالىقارالىق ەركىن بوكىس ەرەجەسىز جەكپە – جەگى جانە وقۋعا كومەك بەرىپ، مەيىر باعىشتاۋ قيمىلى قاراشانىڭ 21 – كۇنى قۇلجا قالالىق دەنەتاربيە سارايىندا وتكىزىلمەكشى.
بۇل رەتكى جارىستا جۇمابەك باستاعان ەلىمىزدىڭ ەركىن بوكىس سالاسىنداعى ساڭلاقتارى امەريكا، قازاقستان، برازيليا، قىرعىزىستان، رەسەي، بۇلعاريا، جاپون، كامبودىجا سىندى ون نەشە مەملەكەتتىڭ ەركىن بوكس سالاسىنداعى ساڭلاقتارىمەن حالىقارالىق ەرەجەسىز جەكپە – جەككە تۇسەدى. جۇمابەك وسى رەتكى جارىستان تۇسەتىن بارلىق قاراجاتىن مەكتەپ قۇشاعىندا ءبىلىم الىپ جاتقان، وقۋدا ۇزدىك، وتباسىندا قيىنشىلىعى اۋىر باۋىر – قارىنداستارىنىڭ الاڭسىز وقۋى ءۇشىن كومەككە اتاماق. اتالعان جارىستى ىلە وبلىستىق AF ەركىن بوكىس كلوبى باس بولىپ ۇيىمداستىرىپ، نيڭبو جىن ۋ ـ حۇن حالىقارالىق مادەنيەت تاراتۋ شەكتى سەرىكتىگى مەن نيڭبو چۋانشىڭ دەنەتاربيە دەلدالدىق سەرىكتىگى ۇستىنە الىپ وتكىزەدى. مىنە، وسى اتالعان قيمىلدىڭ اقپار جاريالاۋ جينالىسى قاراشانىڭ 8 – كۇنى قۇلجا قالاسىنداعى حۋايۇي قوناق سارايىندا وتكىزىلدى.
اقپار جاريالاۋ جينالىسىندا ەڭ اۋەلى جىن ۋ ـ حۇن WBK حالىقارالىق ەرەجەسىز جەكپە – جەك جارىسىنىڭ نەگىزىن قالاۋشى، نيڭبو جىن ۋ ـ حۇن حالىقارالىق مادەنيەت تاراتۋ شەكتى سەرىكتىگىنىڭ باس القاسى ليۋ شۋەۋىن مىرزا شينجياڭ كولەمىندەگى جارىستاردىڭ جاۋاپتىسى بولعان قۇلجا قالاسىنداعى جەكە كاسىپكەر مۇرات يمانعازى ۇلىمەن توقتامعا قول قويدى.
وسىدان سوڭ حالىقارالىق دارەجەدەگى سپورتشى جۇمابەك تۇرسىن ۇلى جىن ۋ ـ حۇن كلوبىنىڭ اتىنان ءبىر جىل جارىسقا قاتىناسىپ بەرۋگە توقتامعا قول قويىسىپ، كەلىسىم شارت جاساستى. توقتامعا قول قويىپ بولعان سوڭ جۇمابەك ءوز كوڭىل كۇيىن بىلاي جەتكىزدى:
- ەركىن بوكس ونەرىنىڭ حالىقارالىق ەرەجەسىز جەكپە – جەگىن تۋعان مەكەنىم ىلەدە وتكىزۋ كوپتەن اڭساعان ارماندارىمنىڭ ءبىرى ەدى. مەن ەندى وسى رەتكى جارىسىمنان تۇسەتىن قارجىنى تۇگەلىمەن تۋعان مەكەنىمنىڭ مەكتەپ قۇشاعىنداعى وتباسىنداعى قيىنشىلىعى بار تۇلەكتەرىنە كومەككە اتاماقپىن.
«ەل ءۇمىتىن ەر اقتار، ەر اتاعىن ەل ساقتار» دەگەندەي، نە ءبىر بيىك بەلەستەردى باعىندىرىپ، حالىقارالىق دەڭگەيدەگى جارىس تورىنەن وزىندىك ورىن الىپ ۇلگىرگەن ازاماتىمىزدىڭ تۋعان جەرىنىڭ تۋىن كوتەرىپ، وسىنداعى وسپىرىمدەردىڭ الاڭسىز وقۋىنا جاقىننان جاردەم بەرۋ ءۇشىن ۇيىستىرعان سايىسى جانكۇيەرلەرىنىڭ جۇرەك قىلىن تەربەتتى.
اقپار جاريالاۋ ءماجىلىسى بارىسىندا جىن ۋ ـ حۇن WBK حالىقارالىق ەرەجەسىز جەكپە – جەك جارىسىنىڭ نەگىزىن قالاۋشى، نيڭبو جىن ۋ ـ حۇن حالىقارالىق مادەنيەت تاراتۋ شەكتى سەرىكتىگىنىڭ باس القاسى ليۋ شۋەۋىن مىرزا ىلەدەگى ءارقايسى اقپارات، باسپا ءسوز سالاسىنان كەلگەن تىلشىلەردىڭ سۇراۋىنا جاۋاپ بەرىپ، جارىس جاعدايىنان الدىن الا حاباردار ەتتى. ليۋ شۋەۋىن بىلاي دەدى:
- نيڭبو جىن ۋ ـ حۇن حالىقارالىق مادەنيەت تاراتۋ شەكتى سەرىكتىگى الەۋمەتتىك يگىلىك ىستەرىن دامىتۋ، جۇڭگو مادەنيەتىن تاراتۋ، مادەنيەت ىستەرىنىڭ دامۋىنا قولداۋ كورسەتۋ جۇمىستارىمەن اينالىساتىن كاسىپتىك ورگان. قازىرگە دەيىن كوپتەگەن ايگىلى كاسپورىندارمەن ىستەستىك توقتامىن جاساسىپ، ولارمەن تىعىز سەلبەسە وتىرىپ، جۇڭگو مەن حالىقاراداعى ءارقايسى ەلدەردىڭ مادەنيەت، سايىسكەرلىك ونەرى جاعىنان مادەنيەت اۋىس – كۇيىسىن جاساۋىنا تاماشا تەكشە ازىرلەدى. 2014 -، 2015 – جىلعى جىن ۋ ـ حۇن WBK حالىقارالىق ەرەجەسىز جەكپە – جەك جارىستارىنىڭ ءساتتى وتكىزىلۋى ءار ۇلتتىڭ سايىسكەرلىك جانە ەركىن بوكس ونەرىن تىڭ ءبىر ساتىعا كوتەردى. «جىن ۋ ـ حۇننىڭ» وسى رەت شينجياڭعا، اسىرەسە، ىلەگە ات باسىن بۇرۋى شينجياڭداعى ءار ۇلت حالقىنىڭ مادەني تۇرمىسىن بايىتىپ، ىلەنىڭ مادەنيەت، دەنەتاربيە ىستەرىنىڭ گۇلدەنىپ – كوركەيۋى ءۇشىن، مادەنيەت، دەنەتاربيە ىستەرىنىڭ تابىستارى ارقىلى ىلەدەگى ءار ۇلت حالقىنىڭ جاڭا ءبىر رۋحاني بەينەسىن ايگىلەپ، مەيىر باعىشتاۋ قيمىلدارىنىڭ ءۇزىلىسسىز جالعاسۋىنا دانەكەر بولۋ ءۇشىن ماڭىزدى رول اتقارادى دەپ ويلايمىز. بۇل رەتكى جارىسىمىز تايلاند جۇدىرىقشىلىعى، ەركىن بوكس جانە MMA تۇرلەرى بويىنشا وتكىزىلەدى. جارىسىمىزعا چيڭحاي تەلەۆيزياسى، جىجياڭ تەلەۆيزياسى، نيڭشيا تەلەۆيزياسى، جۇڭگو توراپ تەلەۆيزياسى، شينلاڭ تورابى، تۋدوۋ تورابى، لىشى تورابى سىندى قۇزىرلى اقپارات ورىندارى دانەكەر بولسا، ال ۇكىمەت تاراۋلارى دا ەرەكشە قولداۋ كورسەتىپ، مادەنيەت، دەنەتاربيە ىستەرىن دامىتۋعا باسا ءمان بەرىپ وتىر. الداعى جارىسىمىزدىڭ ويداعىداي وتەرىنە سەنىمىمىز دە كامىل. بۇل رەتكى جارىسىمىزدىڭ باس گەرويى، جارىق جۇلدىز بولعان جۇمابەكتىڭ وسىدان ەكى جىل بۇرىن امەريكاداعى UFC دە ەرەجەسىز جەكپە – جەك ءتۇرى بويىنشا ەكى جىل توقتامعا وتىرىپ تاياۋدا توقتام ۋاقىتى اياقتاپ، ەلگە قايتا ورالعان سوڭ مەملەكەت ىشىندەگى، ياعني جۇڭگوعا كەلگەننەن كەيىنگى 1- رەتكى جارىسى بولماق.
بۇل ءبىر كولەمى ەڭ ۇلكەن جارىس. وسى جولعى جارىستا سايىسكەرلىك سالاسىنىڭ ساڭلاقتارى ءتورت التىن بەلبەۋگە تالاسپاق. جۇمابەك بۇل جولعى دودا دا برازيليالىق «كوزىلدىرىكتى جىلان» - سانتوسپەن سايىسقا تۇسەدى. سانتوس ەرەجەسىز جەكپە – جەكتە 15 مايدان جارىسقا ءتۇسىپ 13 مايدانىندا جەڭگەن.
جۇمابەك تۇرسىن ۇلى 1986 - جىلى ءساۋىردىڭ 17 – كۇنى گۇل كۇنەستىڭ بەستوبە اۋىلىندا ءومىر ەسىگىن اشقان. 2005 – جىلى قۇلجا قالاسىنداعى دەنەتاربيە مەكتەبىندە وقىپ، وسى جىلدىڭ قاراشا ايىندا شي - ان قالالىق دەنەتاربيە ينستيتۋتىنا قابىلدانعان. ىلە وبلىستىق AF ەركىن بوكىس كلوبىنىڭ جاۋاپتىسى، كوپ رەتكى حالىقارالىق ەركىن بوكستىڭ، MMA جارىسىنىڭ اعا جۇلدەگەرى. ول بيىلعى جىلدىڭ باسىندا ىلە قارۋلى ساقشى باس اترەتى، ىلە وبلىستىق قوعام حاۋىپسىزدىگى مەكەمەسى ەرەكشە ساقشى اترەتى سىندى قۇزىرلى ورىنداردىڭ ەرەكشە ۇسىنىسىمەن بوكس ونەرىنەن تەحنيكالىق باۋلۋ كۋرستارىنا جەتەكشىلىك ەتكەن.
جەكە كاسىپكەر، بوكس جانكۇيەرى، جىن ۋ ـ حۇننىڭ شينجياڭ كولەمىندەگى جارىستارىنىڭ جاۋاپتىسى مۇرات يمانعازى ۇلى بىلاي دەيدى: وسى جولعى جارىس جۇمابەكتىڭ ءوز اتىندا وتەدى، بۇل رەتكى جارىسقا نيڭبوداعى جىن ۋ ـ حۇن كلوبى قولداۋ كورسەتىپ وتىر. وسى رەتكى جارىستان تۇسكەن قارجىدان جۇمابەك وتباسىندا قيىنشىلىعى بار وقۋشىلارعا ءوز اتىنان 50 مىڭ يۋان قارجىلاي كومەك بەرمەك، -دەيدى.
جارىستىڭ ۇيىمداستىرۋشىسى نايىلجان ءنابيجان ۇلى بىلاي دەيدى: مۇنداي حالىقارالىق جەكپە – جەكتىڭ ىلەدە، ءتىپتى، شينجياڭدا تۇڭعىش رەت وتكىزىلۋى. مىنە، وسى رەت شينجياڭ حالقىنا التى بۇرىشتى تەمىر تور ىشىندەگى، حالىقارالىق دەڭگەيدەگى ەركىن كۇرەس جارىسىن ناق مايداننان كورۋ ورايى تۋىلماق. اسىرەسە، جۇمابەكتەي ازاماتىمىزدىڭ ەركىن بوكس ونەرىنەن شەتەل بوكسشىلارىمەن حالىقارالىق دەڭگەيدەگى ەركىن كۇرەس جارىسىن ناق مايداننان تاماشالاۋ ورايى وڭاي كەلە بەرمەيدى. اتالعان دودانىڭ وزگەشەلىگى – بۇل جارىس قازىرگى دەيىنگى ەلىمىز كولەمىندەگى ەڭ ۇلكەن ەركىن بوكس جارىسى بولىپ، قازاقستاننىڭ ەركىن بوكس سالاسىنداعى الەمگە ايگىلى ساڭلاعى قۋات، نۇربەرگەن، سونداي - اق باسقا دا ون نەشە مەملەكەتتىڭ ايتۋلى ساڭلاقتارى دوداعا تۇسەدى. وسى رەتكى دودادا التىن بەلبەۋگە تالاساتىن تۋعان جەرىمىزدىڭ تۇلەكتەرىنەن تاعى تايىر، ايدىن جۇماي ۇلى، حاميت تۇرسىنبەك ۇلى، ايجارىق اكىمبەك ۇلى قاتارلى جۇمابەكتىڭ ءىزىن باسار ونەرلى ۇلاندارىمىز قاتىسادى، ەندەشە، ازاماتتارىمىزدىڭ الداعى جارىسىنا اقجول بولسىن دەگىمىز كەلەدى.
كەلۋ قاينارى: «ىلە گازەتى» - ىلە اقپارات تورابى
جاۋاپتى رەداكتورى : نۇرعيسا قۇرمانجان ۇلى
وقىرمان نازارىنا
نازار سالا كەتەرسىز
- 1.
جۇڭحۋا حالىق رەسپۋبليكاسىنىڭ قاتىستى زاڭ-ەرەجەلەرىنە بويسىنىپ، توراپتا ءمورالدى بولىڭىز، ءسىزدىڭ ارەكەتىڭىز سەبەبىنەن تىكەلەي نەمەسە جانامالاي تۋىنداعان زاڭدىق جاۋاپكەرشىلىكتى ءوزىڭىز ارقالايسىز.
2.
قالام اتىڭىز بەن جازعان لەبىزىڭىزدى باسقارۋدىڭ بارلىق ۇقىعى حالىق تورابىنا ءتان.
3. حالىق تورابىنىڭ ءسىزدىڭ حالىق تورابىنىڭ لەبىز جازۋ بەتىنە جازعان لەبىزىڭىزدى توراپ ىشىندە كوشىرۋ نەمەسە لەبىزىڭىزدەن سيتات كەلتىرۋ ۇقىعى بار.
4.
ەگەر باسقارۋ جاعىنا پىكىرىڭىز بولسا، لەبىز جازۋ بەتىنىڭ باسقارۋشىسىنا نەمەسە حالىق گازەتى مەكەمەسىنىڭ توراپ ورتالىعىنا اڭىس ەتىڭىز.
تەلەفون: 67 /65368365-010 حات ساندىعى: kazakh@peopledaily.com.cn
بۇل بەتتىڭ مەنشىك ۇقىعى حالىق تورابىنا ءتان، كەلىسىمنەن وتپەگەندە كوشىرىپ پايدالانۋعا بولمايدى
Copyright © 1997-2012 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى 
بۇل حابارعا باعاڭىز
لەبىز جازۋ
